52-р хичээл: Сургаал ба Гэрээ 37–40

Сургаал ба Гэрээ 38:15–27, 34–42

Нэг байгтун

Аврагчийн тохинуулал

Их Эзэн гэгээнтнүүддээ Огайод цугларахын тулд агуу золиос гаргахаар бэлтгэж байх үед нь зааварчилгаа өгөв. Аврагч гэгээнтнүүдэд өгсөн илчлэлтээрээ Өөрийн зан чанарыг илчилж, Өөрийнхөө хүмүүсийг Өөр шигээ амьдрахад урьсан. Энэ хичээл нь бусдыг үнэлж, эв нэгдэлтэй байхыг эрэлхийлснээр Аврагчтай адилхан болоход суралцагчдад тусална.

Боломжит суралцах үйл ажиллагаа

Их Эзэн биднээс Өөртэй нь адил болохыг хүсдэг.

Та суралцагч бүрийг таван сонирхлоо бичихэд урьснаар хичээлээ эхлүүлж болно. Дараа нь ангийнхныг жижиг бүлгүүдэд хуваарил. Тэднийг сонирхдог зүйлсээ хуваалцаж, нийтлэг зүйлсээ жагсааж бичихэд урь. Үүний дараа, өөр өөр сонирхолтой хүмүүст нэгдмэл байх нь зарим үед яагаад хэцүү байдаг мөн Христийн шавийн хувьд нэгдмэл байх нь яагаад чухал байдгийг ярилцахыг тэднээс хүс.

Суралцагчдыг илүү сайн хандаж болох хэн нэгэн эсвэл илүү сайн харилцаатай болж болох хэн нэгний талаар бодоход урь. Тэр хүндээ илүү сайн хандаж эсвэл харилцаагаа илүү сайжруулахад нь тэдэнд туслахын тулд Ариун Сүнснээс урам зориг эрэлхийлэхэд суралцагчдыг урамшуул. Ийнхүү харилцах нь эв нэгдэлтэй болоход хэрхэн тусалж болох тухай бодоход тэднийг урь.

1830 оны 12-р сард Иосеф Смит Библийг сүнслэгээр өдөөгдөн хянаж байсан ба Агуу Үнэт Сувд дээр буй одоогийн Мосе 6–7-р хэсгийг хүлээн авсан юм. Эдгээр бүлэг нь Енох нэртэй бошиглогч болон түүний хүмүүсийн түүхийг агуулдаг. Тэд зөв шударга, эв нэгдэлтэй байсан учраас Их Эзэн тэр хүмүүсийг Сион хэмээн нэрлэжээ.

Сургаал ба Гэрээ 38-д Аврагч гэгээнтнүүдийг Огайод цугларахыг зааварласан. Тэр тэдэнд Өөрийн зан чанарын тухай заагаад, Сионыг байгуулах зарчмыг онцлон хэлсэн. Эдгээр зарчимд дуулгавартай байх нь Аврагчийн хуулийг хүлээн авч, Түүний хүчээр хишиг хүртэхэд бэлтгэхэд нь гэгээнтнүүдэд туслах юм (Сургаал ба Гэрээ 38:32-ыг үзнэ үү).

Сургаал ба Гэрээ 38:24–27-г уншаад, Есүс Христийн хөгжүүлээсэй хэмээн биднээс хүсдэг зан чанаруудыг олж мэд.

Суралцагчдыг Сургаал ба Гэрээ 38:24–27-г уншиж байхад та 24–25-р шүлэг дэх давтагдсан үг хэллэгийг онцолж болно. Түүнчлэн та цөөн суралцагчийг 26–27-р шүлэг дэх сургаалт зүйрлэлийг жүжигчлэн тоглоход урьж болно.

• Ах дүүгээ өөр шигээ хүндлэх гэдэг нь юу гэсэн утгатай гэж та бодож байна вэ? (Матай 22:36–39; Иохан 13:34–35; Иаков 2:17–19-ийг үзнэ үү.)

• Бид 26–27-р шүлэг дэх сургаалт зүйрлэлээс Аврагчийн тухай юу мэдэж авч болох вэ?

• 24–27-р шүлэг бидэнд Есүс Христ шиг болох талаар юу зааж байна вэ?

  Бид Есүс Христийн шавь нарын хувьд бусдыг үнэлж, эв нэгдлийг эрэлхийлснээр Түүнтэй адил болж чадна гэсэнтэй ижил зарчмыг олж тогтооход нь суралцагчдад тусал.

  Энэ зарчмыг ойлгоход нь суралцагчдад туслахын тулд дараах асуултуудын заримыг эсвэл өөрийн бодож буй асуултыг ашигла. Суралцагчдыг ярилцаж байхдаа илүү сайн харилцаатай байхыг хүсэж буй хүмүүсийн тухай бодоход урьж болох юм.

• Есүс Христ бусдыг үнэлэх талаарх жишээг хэрхэн үлгэрлэн үзүүлсэн бэ? Мөн эв нэгдлийн жишээг хэрхэн харуулсан бэ?

• Сүмийн бусад гишүүнтэй эв нэгдэлтэй байх нь яагаад заримдаа хэцүү байдаг вэ?

• Бусдыг илүү их хайрлаж, Сүмийн гишүүдтэй илүү нэгдмэл байх нь таны амьдралд ямар өөрчлөлтийг авчирч болох вэ?

Аврагч бидэнд нэгдмэл байхад хэрхэн тусалдгийг ойлгоход нь суралцагчдад туслахын тулд ChurchofJesusChrist.org дээрээс “One in Christ” (4:48) видеог үзүүлж болно.

Сургаал ба Гэрээ 38:34–36, 39–42-ыг уншаад, Огайод цугларахаар бэлдэж буй гэгээнтнүүдийг хэрхэн нэгдмэл байхад урьсныг олж мэд.

• Огайо руу нүүж буй хүмүүст бие биеэ үнэлж, эв нэгдэлтэй байхад тус болох юуг та олж мэдсэн бэ?

Бусдыг үнэлж, эв нэгдлийг эрэлхийлэх бидний хичээл зүтгэл

Сургаал, зарчмуудыг онцлохын тулд бошиглогчдын үгсийг ашигла. Үүнийг хэрэгжүүлэхийн тулд Багшийн хөгжүүлбэл зохих ур чадвар гарын авлагын “Судруудаас болон хожмын үеийн бошиглогчдын үгсээс заа” гэсэн гарчигтай сургалтыг үзнэ үү. Ахлагч Рэнландын дараах мэдэгдэлд дурдсаны дагуу “судруудад байгаа үнэнийг амьд бошиглогчдын хэлж буй зүйлтэй холбоход суралцагчдад туслах урилга бэлтгэх” ур чадвараар дадлага хийхийг бод.

Арван хоёр төлөөлөгчийн чуулгын ахлагч Дэйл Г.Рэнланд Христийн шавь нарын хувьд нэгдмэл байж чадах арга замуудыг заасан. ChurchofJesusChrist.org дээрх “Христийн амар тайван дайсагналыг хөнөөдөг” (цагийн код 12:39; 4:49-өөс 6:32 хүртэл үзнэ үү) видеог үзэх юм уу уг мэдэгдлийг уншина уу.

Ахлагч Дэйл Г.Рэнланд

Нэгдмэл байхын тулд хүчин чармайлт гаргах шаардлагатай. Энэ нь биднийг Бурханы хайрыг зүрх сэтгэлдээ соёолуулж, мөнхийн хувь заяандаа анхаарлаа төвлөрүүлэх үед өсөн хөгждөг. Бид Бурханы хүүхдүүд гэх нийтлэг үндсэн шинж чанараараа мөн сэргээгдсэн сайн мэдээний үнэнд тууштай байх гэсэн үүрэг амлалтаараа нэгддэг. Бурханыг гэх бидний хайр мөн Есүс Христийн шавь байх нь бусдад чин сэтгэлээсээ санаа тавих хүслийг бадраадаг. Бид өнгө өнгийн цэцэгс адил бусдын өөр өөр зан чанар, харах өнцөг, авьяас чадварыг үнэлдэг. Хэрэв бид Есүс Христийн шавь байх замаа хувийн ашиг сонирхол, үзэл бодлоос дээгүүр тавьж чадахгүй бол нэн тэргүүнд тавьдаг зүйлсээ дахин нэг эргэн харж, өөрчлөгдөх ёстой.

Бид магадгүй “Чи надтай санал нийлэх юм бол бид мэдээж нэгдэж чадна!” гэж хэлэхийг хүсэж байж болно. Гэхдээ “Нэгдмэл байдлыг хөхиүлэн дэмжихийн тулд би юу хийж болох вэ? Би энэ хүнд Христэд илүү ойртоход нь хэрхэн тусалж чадах вэ? Зөрчилдөөнийг багасгаж, Сүмийн гишүүдийг бусдын зовлонг ойлгодог, бусдад санаа тавьдаг болгохын тулд би юу хийж болох вэ?” гэж асуух нь хавьгүй дээр хандлага юм.

Христийн хайр бидний амьдралыг дүүргэх үед бид зөрчилдөөнд номхон даруу байдал, тэсвэр тэвчээр, сайхан сэтгэлээр ханддаг. Бид эмзэглэхийн оронд хөршийнхөө нөхцөл байдалд илүү санаа тавьдаг. Бид “нэгдмэл саналд хүрэхийг эрэлхийлдэг” [Даллин Х.Өүкс, “Тэнгэрлэгээр нөлөөлөгдсөн Үндсэн хуулиа хамгаалах нь,” 2021 оны 4-р сарын Ерөнхий чуулган, 110]. “Үзэл бодлынх нь талаар бүү заргалд,” санал нийлэхгүй байгаа хүнээ бүү шүү, тэднийг бүдрэхэд бүү хүргэ [Ром 14:1–3, 13, 21-ийг үзнэ үү]. Үүний оронд, тантай санал нийлэхгүй байгаа хүмүүсийг амьдралынхаа туршлага дээр үндэслэн чадах чинээгээрээ хичээж байна гэж бод. (Дэйл Г.Рэнланд, “Христийн амар тайван дайсагналыг хөнөөдөг,” Лиахона, 2021 оны 11-р сар, 84)

Христийн шавийн хувьд бусдыг үнэлж, тэдэнтэй нэгдмэл байхыг хичээснээр хэрхэн адислагдаж байснаа хуваалцахыг суралцагчдаас хүс.

Суралцагчдыг бусдыг үнэлж, харилцаагаа бэхжүүлэхээр хэр сайн ажиллаж байгаагаа залбирч байгаад үнэлж дүгнэхэд урь.

Суралцагчид судлах тэмдэглэл дээрээ дараах асуултад хариулж болно.

Харилцаагаа бэхжүүлэхийг хүсэж буй хувь хүн эсвэл бүлэг хүнийг залбирч сонго. Дараах асуултуудын нэгд эсвэл түүнээс олонд хариул.

• Та тухайн хүнийг эсвэл хүмүүсийг үнэлж, тэдэнд хайраа харуулахын тулд юу хийж болох вэ?

• Та тулгарч буй саад бэрхшээлийг даван туулахын тулд Аврагчид хэрхэн хандаж болох вэ?

• Энэ нь танд Аврагчтай илүү адилхан болоход хэрхэн туслах вэ?

Нэмэлт эх сурвалж

Бид хэрхэн илүү эв нэгдэлтэй байж чадах вэ?

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Ахлагч Д.Тодд Кристоффэрсон

Бидний хүн нэг бүр Аврагчийг амьдралынхаа төвд байлгаж, биднийг удирдуулахаар Түүний итгэмжилсэн хүмүүсийг дагах юм бол бид нэг зүрх сэтгэл, нэг оюун ухаантай болно. (Д.Тодд Кристоффэрсон, “Сионд ирэгтүн,” 2008 оны 10-р сарын Ерөнхий чуулган, 46)

Ахлагч Д.Тодд Кристоффэрсон

Бид хожмын үеийн Христийн Cүмд арьс өнгөөр ялгаварлах, овог аймгаар гадуурхах үзэл, өөр аливаа хуваагдлыг хүлээн зөвшөөрч болохгүй. Их Эзэн бидэнд “Нэг байгтун; мөн хэрэв та нар нэг байхгүй аваас та нар минийх биш болой” [Сургаал ба Гэрээ 38:27] хэмээн зарлигласан. Бид гадуурхах, ялгаварлах үзлийг Сүмээс, гэр орноосоо, хамгийн чухал нь зүрх сэтгэлээсээ хичээнгүйлэн үндсээр нь сугалан хаяхын төлөө хичээх ёстой. Манай Сүм олон үндэстэн ястнаас бүрдэж өсөхийн хэрээр бид тэднийг улам халуун дулаанаар хүлээн авч байх ёстой. Бид нэг нэгэндээ хэрэгтэй. (Д.Тодд Кристоффэрсон, “Нэгэн хэсэг нь байх сургаал,” Лиахона, 2022 оны 11-р сар, 53)

Арван хоёр төлөөлөгчийн чуулгын ахлагч Квинтин Л.Күк ийн заасан.

Ахлагч Квинтин Л.Күк

Хэдийгээр гайхалтай урам зориг өгдөг соёл уламжлал болон хэлнүүдийн ялгаатай байдал байдаг ч бид хайр болон нэгдмэл байдалд сэтгэл зүрхээрээ холбоотой байх ёстой. Их Эзэн: “хүн бүр ах дүүсээ өөр шигээ хүндлэг. … Нэг байгтун; мөн хэрэв та нар нэг байхгүй аваас та нар минийх биш болой” [Сургаал ба Гэрээ 38:25, 27] хэмээн хэлсэн. Бид зохих соёлын ялгаануудыг хүндэтгэдэг ба бидний зорилго бол бүхий л арга замаар Есүс Христийн сайн мэдээний уламжлал, заншил, соёлд нэгдмэл байх явдал юм. (Квинтин Л.Күк, “Эзэн бол миний Гэрэл,” 2015 оны 4-р сарын Ерөнхий чуулган, 53)

Бид бусдыг хэрхэн хүндэлж, үнэлж болох вэ?

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсон

Тив бүрд мөн далайн арлуудаар итгэлтэй хүмүүс Есүс Христийн Хожмын Үеийн Гэгээнтнүүдийн Сүмд нэгдэн цугларч байна. Итгэлтэй хүмүүсийг гэрээний зам дээр гарч, бидний хайрт Гэтэлгэгч дээр ирэхэд соёл, хэл яриа, хүйс, яс үндэс зэргийн ялгаа чухал байхаа больдог.

Эцсийн дүнд бид жинхэнэ Бурхан Эцэг байх гэдэг нь юу болохыг зөвхөн ойлгосноор ахан дүүгийн холбоо, эгч дүүсийн харилцаа гэж юу болохыг бүрэн утгаар нь ойлгох юм. Гагцхүү энэ ойлголт тусгаарлах ханын оронд татан оролцуулах гүүр барихад биднийг урамшуулдаг. (Russell M. Nelson, “Remarks at Worldwide Priesthood Celebration” [address given at the “Be One” celebration, June 1, 2018], newsroom.ChurchofJesusChrist.org)

Арван хоёр төлөөлөгчийн чуулгын ахлагч Жэффри Р.Холланд ийн заасан.

Ахлагч Жэффри Р.Холланд

Бид эргэн тойрныхоо хүмүүсийн нөхцөл байдал, зовлон бэрхшээлд ихэнхдээ санаандгүй байдлаар хайхрамжгүй ханддаг. Бид бүгдэд асуудал тулгардаг ба эцсийн эцэст хувь хүн бүр өөрийн аз жаргалын төлөө хариуцлага хүлээх ёстой. Бидний хэн нь ч цаг хугацаа, мөнгө төгрөгөө зориулаад ч өөрсдийгөө зовлон бэрхшээлээс салгаж чадахгүй буюу “хэцүү бэрх цагт” хэн нэгэнд халамж, анхаарал тавихаас өөр юу ч хийж чадахгүй (“Эзэн, таныг дагая,” Дуулал, д. 121). Хэдий тийм ч бид Аврагчийн амьдралыг жишээ болгосноор илүүг хийх арга замыг олох боломжтой. …

… Би өсвөр насандаа эргэн очиж, тухайн үед миний хүрээлэлд төдийлөн багтаагүй хүмүүстэй холбогдох боломж олдоосой гэж хүсэж байна. Өсвөр үеийнхэн бусдад хамаатай, харьяалагдсан гэдгээ мөн чухал нэгэн гэдгээ мэдрэхийг хүсдэг. … Энэ олон жилийн дараа ч сэтгэлийг минь надад байгаагүй харилцаа холбоо, холбогдож чадаагүй найзууд өвтгөдөг. (Jeffrey R. Holland, “Come unto Me,” Ensign, Apr. 1998, 21)

Нэмэлт суралцах үйл ажиллагаа

Сургаал ба Гэрээ 38:15–22. Аврагчийн зан чанар ба хүмүүсийнхээ төлөөх хүсэл

Самбар дээр “Аврагчийн нэр, зан чанар” болон “Өөрийн хүмүүсийн төлөөх Аврагчийн хүсэл” гэсэн хоёр гарчиг бич. Та ангиа хоёр хуваан, гарчгийг хуваарилан өгч болно. Суралцагчдыг оногдсон гарчгаас юу олж мэдсэнээ уншиж, бичихэд урь.

Огайод цугларахаар бэлтгэж байсан эхэн үеийн гэгээнтнүүдэд энэ мэдлэг нь хэрхэн тус болж байсан талаар суралцагчдын юу олж мэдсэнийг ярилцана уу. Та мөн Аврагчийг биднээс хэцүү зүйл хийхийг хүсэх үед бид хэрхэн хариу үйлдэл үзүүлэхээ ярилцаж болно.

Сургаал ба Гэрээ 38:35. Ядуу, тусламж хэрэгтэй хүмүүсийг халамжлах

Ядуу, тусламж хэрэгтэй хүмүүсийг халамжлах тал дээр Сүмийн байр суурийг мэдэж, ойлгоход нь суралцагчдад туслахын тулд Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь гарын авлагыг ашиглана уу (ChurchofJesusChrist.org). Суралцагчид 1.2 ,1.2.2 болон 22.0–22.3 гэсэн хэсгүүдийг судлаад, тусламж хэрэгтэй хүмүүсийг халамжилдаг арга замуудыг олж мэднэ.

Суралцагчид 2022 оны 11-р сарын Лиахона сэтгүүлийн 6–8-р хуудсан дээрх ерөнхийлөгч Даллин Х.Өүксийн “Ядуус болон гачигдагсдад туслах” захиаснаас жишээнүүдийг олж болно.

Суралцагчид хэрэв боломжтой бол бусдад үйлчлэх боломжуудын талаар JustServe.org-аас олох боломжтой.

Мөн ChurchofJesusChrist.org дээрээс “Сайн самари хүний сургаалт зүйрлэл” (5:44) видеог үзээд, суралцагчид тусламж хэрэгтэй хүмүүст тусалснаар юу сурч, мэдэрсэн талаар ярилцаж болно.

Сургаал ба Гэрээ 38:24–25. “Мөн хүн бүр ах дүүсээ өөр шигээ хүндлэг”

Дараах өөрийгөө үнэлэх үнэлгээ нь суралцагчдад бусдыг хэрхэн өөрсөд шигээ хүндэлж болохыг ойлгоход тусална. Суралцагчдыг хариултуудаа залбирч байгаад тунгаан бодоход урь. Дараа нь тэд бусдад хандах хандлагаа сайжруулахад нь туслах анхаарлаа төвлөрүүлэх нэг зүйлийг сонгож болно.

Бусдад хандах миний хандлага

Хариултын хувилбар: 1 = хэзээ ч үгүй; 2 = заримдаа; 3 = ихэвчлэн; 4 = бараг үргэлж; 5 = үргэлж

____ Би бусдыг мөнхөд сайн сайхан, аз жаргалтай байгаасай хэмээн чин сэтгэлээсээ хүсдэг. (Мозая 28:3)

___ Би бусдын сэтгэлийг ойлгож, аливаа зүйлийг тэдний өнцгөөс харахыг хичээдэг. (Иуда 1:22)

___ Намайг гомдоож, надад буруу зүйл хийсэн хүмүүсийг би уучилдаг. (Eфес 4:32).

____ Хүмүүст асуудал тулгарч, тэднийг сэтгэлээр унасан үед би тэдэнд туслахыг хичээдэг. (Мозая 18:9)

___ Тохиромжтой үед нь би бусдад тэднийг хайрлаж, тэдэнд санаа тавьдгаа хэлдэг. (Иохан 13:34–35)

____ Би бусдад үйлчлэх боломж бололцоог эрэлхийлдэг. (Мозая 2:17)

____ Би бусдын талаар эерэг зүйлс ярьдаг. (Сургаал ба Гэрээ 42:27)

___ Хэдийгээр хүмүүстэй таарч тохироход хэцүү байсан ч би тэдэнтэй найрсаг бас тэвчээртэй ханддаг. (Моронай 7:45)

___ Би бусдын амжилтад баярладаг. (Алма 17:2–4)