54-р хичээл: Сургаал ба Гэрээ 37–40

Суралцахуйгаа үнэлэх 3

Сургаал ба Гэрээ 20–40

Есүс хажуудаа сууж буй хүүхдийг харж байгаа нь

Сүнслэг суралцахуйгаа эргэн харж, үнэлэх нь бидэнд Аврагчид ойртоход тусална. Энэ хичээл нь Сургаал ба Гэрээнээс одоог хүртэл судалсан туршлага нь сүнслэгээр өсөж хөгжихөд суралцагчдад хэрхэн тусалсныг эргэн санаж, тэдгээрийг үнэлж дүгнэхэд тусална.

Боломжит суралцах үйл ажиллагаа

Биеийн болон сүнсний өсөлт хөгжил

Өсөлт хөгжлийг зэрэгцүүлэн харьцуулсан зургийг харуулаарай.

Өсөлт хөгжил, өөрчлөлт, ахиц дэвшлээ хэмжихийн тулд хүмүүс ихэвчлэн зэрэгцүүлж харьцуулсан зургийг ашигладаг.

• Бидний өөрсдийн зураг өөрчлөгдсөн эсвэл өссөн байдлыг харахад бидэнд хэрхэн туслах вэ?

• Ахиц дэвшлээ таньж мэдэх өөр ямар ямар арга замууд байна вэ?

Суралцагчдад сүнслэг өсөлтийн талаар тунгаан бодож, ярилцахад нь туслахын тулд энэ хичээлийн эхэнд ашигласан, Есүсийн хүүхэдтэй хамт байгаа зургийг үзүүлж болно.

Та хүүхдэд Есүс Христтэй илүү адилхан болж, өсөж хөгжих чадамжийнх нь тухай юу хэлэх байснаа бодоорой.

• Хүн өөрийгөө Аврагчтай илүү адил болж байгааг таньж мэдэх ямар ямар арга зам байдаг вэ? (Лук 2:52; мөн Алма 5:14-ийг үзнэ үү.)

Суралцагчдыг ахиц дэвшлээ тунгаан бодохдоо Ариун Сүнснээс тусламж эрэлхийлэхэд урь. Есүс Христтэй илүү адил болж байгаагаа мэдрэх зарим арга замын талаар судлах тэмдэглэлдээ бичихийг тэднээс хүс. Та Сургаал ба Гэрээг судлахдаа олж мэдсэн Аврагчийн зан чанарын талаар бодоход суралцагчдыг урамшуулан дэмжиж болно. Сүүлийн хэдэн долоо хоногт тэмдэглэл, судрууд дээрээ Аврагчийн талаар тодруулсан хэсгээ харахад суралцагчдыг урамшуулан дэмж. Есүс Христийн аль зан чанарыг өөрсдөөсөө илүү их харж байгаагаа тунгаан бодохыг суралцагчдаас хүс (өчүүхэн байсан ч болно).

Зарим суралцагч ахиц дэвшлээ мэдэхгүй байж магад. Ахиц нь ихэнхдээ анзаарахад хэцүү байдаг ба ялангуяа өөрөөсөө олж харахад хэцүү ч энэ нь ахихгүй байна гэсэн үг биш гэдгийг суралцагчдад сануулаарай. Энэ хичээлээр суралцагчид ариун ёслолын зорилгыг тайлбарлах, бошиглогчийг дагах хүслээ эргэцүүлэн бодох, сайн мэдээг хуваалцах төлөвлөгөөгөө эргэн харах боломжтой байх болно. Ангидаа Сургаал ба Гэрээ 20–40-ийг судлах нь дараах үйл ажиллагаанууд дээр байгаагаас өөр бусад үнэнийг тодотгож өгсөн байж болно. Хэрэв тийм бол тэдгээр үнэнийг оруулан уг үйл ажиллагааг тохируулан өөрчилж болно.

Ариун ёслолын зорилгыг тайлбарлах

Ариун ёслолын зорилгыг тайлбарлах боломжийг суралцагчдад олго. Бэлтгэлтэй байхын тулд Сургаал ба Гэрээнээс ариун ёслолын талаар сурсан зүйлээ эргэн харахад урь (Сургаал ба Гэрээ 20:75–79; 27:1–2-ыг үзнэ үү). Тэд мөн судлах тэмдэглэлдээ бичсэн зүйлээ эргэн харж болно.

Та дараахтай адил жишээг танилцуулж, суралцагчдаас хариулахдаа дүр бүтээж үзүүлэх, инфографик буюу мэдээллийн график, танилцуулга бэлдэх эсвэл тэмдэглэл бичих зэрэг аргуудын аль нэгийг ашиглан ариун ёслолын зорилгыг тайлбарлахыг хүсэж болно.

Айзак нэг найзаа ням гарагт өөртэй нь хамт сүм рүү явахыг урив. Найз нь өмнө нь ариун ёслолын цуглаанд оролцож байгаагүй тул өмнөх өдөр нь Айзак хэдэн чухал зүйлийг тайлбарлаж өгөхийг хүсжээ.

• Айзакийг ариун ёслолын талаар дэлгэрэнгүй юуг хуваалцах хэрэгтэй гэж та бодож байна вэ?

Санаа бодлоо бэлдэж, гэрчлэлээ хуваалцахад нь туслахын тулд суралцагчдад дараах заавруудыг харуулж болно.

Ариун ёслолын тухайд төвлөрч болох хоёр юм уу гурван зүйлийг сонго. Үүнийг тайлбарлаж, гэрчлэхэд туслах нэг эсвэл хэд хэдэн судрыг ашигла.

• Талх, усыг адисалдаг залбирлууд

• Бид Тэнгэрлэг Эцэгт юу амладаг тухай

• Тэнгэрлэг Эцэг бидэнд юу амладаг тухай

• Ариун ёслолоос хүртэхэд харуулдаг хандлагууд

• Есүс Христэд бүрэн төвлөрөх

• Таны хувийн туршлагууд

Суралцагчдыг уг жишээнд хариулахдаа, Есүс Христтэй илүү адил болж байгаагаа харахад нь тэдэнд ариун ёслол хэрхэн тусалж болохыг тунгаан бодож, хуваалцахад урьж болно.

Амьд бошиглогчийг дагах хүсэл нэмэгдэж байгааг мэдрэх

Сүүлийн хичээлүүдээр суралцагчид өнөө үед бошиглогчийг дагахын ач холбогдлын талаар судлах боломжтой байсан байж магад. Энэ судлах үйл ажиллагаа нь Сургаал ба Гэрээг судлах явцад амьд бошиглогчийг дагах хүсэл нь хэрхэн өөрчлөгдөж байгааг эргэцүүлэн бодох боломжийг суралцагчдад олгоно.

Та өмнөх хичээл дээр байсан, дараах өөрийгөө үнэлэх үйл ажиллагааг суралцагчдад сануул (Сургаал ба Гэрээ 21 дээрх хичээлийг үзнэ үү).

Өмнөх хичээл дээр таны хувьд дагахад хэцүү бошиглогч, төлөөлөгчдийн зөвлөмжийн талаар бодоход таныг урьсан. Тэр нь юу байсныг санахыг хичээ. Та тэмдэглэж авсан зүйлээ судлах тэмдэглэл дээрээсээ харж болно.

Судлах тэмдэглэл дээрээ бичсэн зүйлээ харах хэдэн хормыг суралцагчдад гаргаж өг.

• Бошиглогчийг дагахын ач холбогдлыг онцолсон, бидний саяхан судалсан ямар ямар судрууд байна вэ?

  Суралцагчид Иосеф Смит—Түүх 1:21–35; Сургаал ба Гэрээ 1:38–39; 21:4–6 зэрэг зарим судрыг гаргаж ирж болох юм. Олж мэдсэн зүйлээ хуваалцах боломжийг суралцагчдад олго. Үүнийг жижиг бүлгүүдэд хуваагдан гүйцэтгэвэл илүү олон суралцагч тэдэнд чухал зүйлээ хуваалцах боломжтой болно.

  Суралцагчдыг дараах асуултуудын нэг эсвэл хэд хэдэд хариулан бичихэд урь. Эдгээр мэдрэмжээ тэмдэглэх өөрийн арга барилыг сонгох боломжийг суралцагчдад олго. Хангалттай хугацаа өгсний дараа, цөөн суралцагчийг бодлоо сайн дураараа хуваалцахад урь. Суралцагчид бошиглогчийг дагах талаар сөрөг мэдрэмжтэй байж болох ч та тэднийг өчүүхэн ч гэсэн хүслээ үйлдэл болгож, Их Эзэний бошиглогчдыг дагаснаар ирэх Түүний адислалыг эрэлхийлэхэд урамшуулж болно.

• Их Эзэний сонгосон бошиглогчийг дагах талаар та одоо ямар мэдрэмжтэй байна вэ? Их Эзэний бошиглогчдыг дагах талаар таны мэдрэмжид юу хамгийн их нөлөөлсөн гэж та бодож байна вэ?

• Бошиглогчийг дагах нь Есүс Христтэй илүү адил болоход хэрхэн тусална гэж та бодож байна вэ?

Есүс Христийн сайн мэдээг бусадтай хуваалцах

Есүс Христийн сайн мэдээг хуваалцах талаар Сургаал ба Гэрээнээс юу сурч байгаа талаар бодоход нь суралцагчдад тусал. Судлах явцдаа тэдний төвлөрсөн тодорхой хэсгүүд эсвэл шүлгүүдийг харахад урьж болно. Үүнд Сургаал ба Гэрээ 18; 30–36-р хэсгүүд багтаж болно.

Суралцагчид “Сургаал ба Гэрээ 30–36, 2-р бүлгийг” судлахдаа хэн нэгэнд сайн мэдээг хуваалцах төлөвлөгөө гаргах боломжтой байсан. Дараахтай адил асуултуудыг тавьж, энэхүү төлөвлөгөөг нь шалга (суралцагчид жижиг бүлгээрээ эдгээр асуултыг мөн ярилцаж болно).

• Та хэн нэгэнтэй сайн мэдээг хуваалцахын тулд ойрын үед юу хийсэн бэ? Энэ нь хэр амжилттай болсон бэ?

• Энгийн бөгөөд ердийн байдлаар сайн мэдээг хуваалцахаар хичээх үед танд ямар ямар саад бэрхшээл тулгардаг вэ?

• Та Есүс Христийн сайн мэдээг хуваалцах талаар юу сурч байна вэ?

Аврагчийн сайн мэдээг хуваалцах хичээл зүтгэлийнхээ талаар ангиараа ярилц. Суралцагчид амжилттай болсон эсвэл хүндрэлтэй байсан зүйлсийг ярилцаж болно. Энэ ярилцлага нь Есүс Христийн сайн мэдээнээс хуваалцахад бие биедээ туслах боломжийг суралцагчдад олгоно. Түүнчлэн та Аврагч, Түүний сайн мэдээний талаар бусадтай ярилцахыг оролдох үедээ хэрхэн сайжирснаа бодоход нь суралцагчдад тусалж болно.