48-р хичээл: Сургаал ба Гэрээ 30–36

Сургаал ба Гэрээ 30–36, 2-р хэсэг

“Амаа нээгтүн мөн тэдгээр нь дүүргэгдэх болно”

Их Эзэн Сүмээ зохион байгуулсныхаа дараахан Өөрийн сайн мэдээг тунхаглуулахаар номлогчдыг дуудахдаа, номлолын ажилд нь тэднийг хүчирхэгжүүлж, чиглүүлэх зөвлөгөөг өгсөн. Энэ хичээл нь сайн мэдээг хуваалцахаар хичээж зүтгэхэд суралцагчдад тусална.

Боломжит суралцах үйл ажиллагаа

Сайн мэдээг хуваалцахад тулгардаг зовнил

Дараах жишээ болон асуултуудыг хуваалцсанаар хичээлээ эхэл.

Ариун ёслолын цуглаан дээр үг хэлж буй хүнийг номлолын ажлын ач холбогдлын талаар хуваалцаж байхад Конор сайн мэдээний талаар бусадтай ярих санааг эсэргүүцэж байв. Конор угийн дуу цөөтэй хүн. Түүнчлэн тэр Сүмийн гишүүн бус хүнтэй хэзээ ч сайн мэдээний тухай яриа өрнүүлж байгаагүй. Тэр энэ яриа хэрхэн өрнөх бол гэдэгт санаа зовдог. Төрөлхийн дуу цөөтэй зан чанар, туршлага муутай байдал нь түүнийг хэн нэгэнтэй сайн мэдээний талаар яриа эхлүүлэхэд таагүй байдалд оруулдаг.

• Номлолын ажлын талаар ойлгоход Конорт юу тусална гэж та бодож байна вэ?

• Аврагчийн сайн мэдээг хуваалцахад хүмүүс ихэвчлэн өөр юунд санаа зовдог вэ?

Өмнөх хичээл дээр суралцагчид Сүм зохион байгуулагдсаны дараахан олон хүн номлолд үйлчлэхээр дуудагдсан талаар сурч мэдсэн гэдгийг нь сануул. Эдгээр эрэгтэйн зарим нь номлолд дуудагдахаас өмнө сэргээгдсэн сайн мэдээний тухай мэдээд удаа ч үгүй байлаа.

Шинээр дуудагдсан эдгээр номлогч юунд санаа зовниж байсан талаар хуваалцахад суралцагчдыг урь. Та мөн сайн мэдээг бусадтай хуваалцахад юунд нь санаа зовдог талаараа бодохыг суралцагчдаас хүсэж болно. Дараа нь тэдэнд суралцахад бэлтгэхэд нь туслахын тулд дараахыг хуваалц.

Өнөөдөр та нар Их Эзэний сайн мэдээг хуваалцахад тань туслах Түүний хүслийг таньж мэдэхэд дэм болох Сургаал ба Гэрээ 30–36 дахь Түүний сургаалаас суралцах болно. Судлах явцдаа та Есүс Христийн сайн мэдээг хуваалцах хүсэл эрмэлзэл, чадавхаа дээшлүүлэхэд туслах сургаалуудыг эрэлхийл.

Их Эзэн номлогчдодоо тус дэм болох зөвлөгөөг өгдөг

Дараах шүлгүүд дэх Их Эзэний зөвлөгөөг судлах цагийг суралцагчдад гаргаж өг. Үүнийг гүйцэтгэх нэг арга нь ангийг таван бүлэг болгон хуваах явдал юм. Бүлэг бүрд цаас өгч, “Их Эзэнээс номлогчдод өгөх тустай зөвлөгөө” гэх мэт гарчигтай хуудсыг боловсруулахад тэднийг урь.

Бүлэг болгонд нэг багц шүлгийг хуваарилж өг. Дараа нь суралцагчид шүлгээс олж мэдсэн дор хаяж гурван зөвлөгөөг хуудсандаа нэмж болно. Хэрэв тэд хүсвэл, хуудаснууддаа зураг чимэглэл нэмж болно. Тэгээд та суралцагчдыг хийж дуусгасан хуудсаа ангийнхантайгаа хуваалцахад урьж болно.

Дараах шүлгүүдийг уншаад, Их Эзэн танд сайн мэдээг хуваалцах илүү их хүсэл эрмэлзэл, чадамжтай болоход туслахын тулд өгсөн зөвлөгөөг олж мэд.

Сургаал ба Гэрээ 30:5, 8–11 (5-р шүлэг дээр гарсан Петр Витмерийн “ах” нь Оливер Каудери байсан ба тэрээр эхэн үеийн илчлэлтэд номлохоор дуудагдаад байсан юм [Сургаал ба Гэрээ 28:14–16-г үзнэ үү].)

Сургаал ба Гэрээ 31:4–9, 11–13

Сургаал ба Гэрээ 32:1–5

Сургаал ба Гэрээ 33:8–12, 16–17

Сургаал ба Гэрээ 35:13–15, 24

Суралцагчдыг судалж дуусах үед сурч мэдсэн зүйлээ хуваалцах боломжийг тэдэнд олго. Ийн үйлдэх нэг арга зам нь өөр өөр суралцагчийг тухайн шүлгүүдээс олж мэдсэн хамгийн утга учиртай зөвлөгөөг хуваалцаж, энэ зөвлөгөөнөөс сурсан үнэнийг хуваалцахад урих явдал юм. Та эдгээр үнэнийг самбар дээр бич эсвэл тэднийг самбар дээр бичихэд урь.

Суралцагчид дараах жишээнүүдтэй адил үнэнүүдийг дурдаж болно. Үүнд: Бусдаас эмээхийн оронд бид Их Эзэний сайн мэдээг хуваалцахдаа Түүний тусламжид найдаж болно (Сургаал ба Гэрээ 30:11-ийг үзнэ үү); Их Эзэн бидний заах хүмүүсийн зүрх сэтгэлийг нээх болно (Сургаал ба Гэрээ 31:7-г үзнэ үү); биднийг Их Эзэний сайн мэдээг хуваалцахаар эрэлхийлэх үед Тэр бидэнтэй хамт байх болно (Сургаал ба Гэрээ 32:3-ыг үзнэ үү); биднийг сайн мэдээг хуваалцахаар амаа нээхэд Их Эзэн бидэнд юу хэлэхээ мэдэхэд туслах болно (Сургаал ба Гэрээ 33:8–10-ыг үзнэ үү); Их Эзэн Өөрт нь үйлчилдэг сул дорой хүмүүст Өөрийн Сүнсний хүчийг өгдөг (Сургаал ба Гэрээ 35:13–14-ийг үзнэ үү).

• Их Эзэн яагаад сайн мэдээг хуваалцахад маань туслахад бэлэн байдаг гэж та бодож байна вэ?

• Сайн мэдээг номлох хичээл зүтгэлд маань Их Эзэний тухай эдгээр үнэн бидэнд хэрхэн тусалж болох вэ?

Сайн мэдээг хуваалцахаар амаа нээх санаа

Их Эзэний “амаа нээх” (Сургаал ба Гэрээ 33:8–10 болон 30:5, 11-ийг үзнэ үү) сайн мэдээг хуваалцах зарлигийг биелүүлэх тодорхой арга замуудын талаар олж мэдэж, ярилцахад нь суралцагчдад туслах цаг гарга. Ийн үйлдэх тодорхой бөгөөд хүрч болохуйц арга замыг харахад суралцагчдад туслах нь сайн мэдээг хуваалцах тэдний итгэлтэй байдлыг нэмэгдүүлж чадна.

Үүнийг гүйцэтгэх нэг арга нь дараах видеонуудын нэг эсвэл хэд хэдийг үзүүлэх явдал юм. Хүмүүсийн амаа нээж, Их Эзэний адислалуудыг урьсан өөр өөр арга замуудыг олж харахад суралцагчдыг урь. Та мөн ChurchofJesusChrist.org дээрх “Сайн мэдээг хуваалцах нь” хуудаснаас бусад эх сурвалжийг хуваалцаж болно.

Дараах видеонуудад хэрхэн “амаа нээх” (Сургаал ба Гэрээ 30:5), Есүс Христийн сайн мэдээг туршлагаараа мэдэж авахад нь энгийн бөгөөд утга учиртай байдлаар бусдыг урих санаануудыг хуваалцдаг.

Бусдыг "ирээд, харахад" урих нь

Хүмүүс ирнэ. Тэднийг урих л хэрэгтэй. Энэ видео нь "Ирээд, хар" урилгыг хэрхэн Есүс Христийн Хожмын Үеийн Гэгээнтнүүдийн Сүмийн гишүүд өдөр тутмын амьдралын энгийн хэсэг болгож болохыг харуулдаг.

Бусдыг "Ирж, туслахад" урих нь

Хүмүүс туслахыг хүсдэг. Ихэнхдээ тэднийг урих л хэрэгтэй байдаг. Энэхүү бичлэгээр Есүс Христийн Хожмын Үеийн Гэгээнтнүүдийн Сүм дэх үйлчлэлийн боломжуудаар дамжуулан тусламжийн гараа сунгахад хүмүүсийг урих нь амархан байдаг гэдгийг харуулдаг.

Sharing the Gospel

What we call “member missionary work” is not a program but an attitude of love and outreach to help those around us.

• Танд сайн мэдээг хуваалцсан ямар ямар туршлагууд байгаа вэ? Эдгээр туршлагад бэлтгэхэд танд хамгийн их тус болсон зүйл юу вэ?

Төлөвлөгөө гаргах

Сайн мэдээг бусадтай хуваалцахын тулд юу хийх талаар энгийн төлөвлөгөө бичих цагийг суралцагчдад гаргаж өг. Дараах асуултууд тэдэнд юу бичих талаарх санаануудыг өгнө.

• Танд сайн мэдээг хуваалцах боломжтой ямар хүн байна вэ?

• Та өнөөдрийн сурсан зүйлээс энэ хүнд Есүс Христэд илүү ойртоход туслах ямар энгийн бөгөөд утга учиртай арга замуудыг сурч мэдсэн бэ?

• Танд төлөвлөгөөгөө хэрэгжүүлэхэд ямар саад бэрхшээл тулгарна гэж та бодож байна вэ?

• Танд эдгээр саад бэрхшээлийг давахад туслах Аврагчийн тухай ямар үнэнийг та Сургаал ба Гэрээ 30–36-аас сурч мэдсэн бэ?

Та суралцагчдыг өнөөдөр мэдэрсэн зүйлийнхээ дагуу итгэлтэйгээр үйлдэхэд хэрхэн урамшуулж болох талаар бодож үз. Та тэднийг бичсэн зүйлээ хэрэгжүүлэх хугацааг тодорхойлоход урьж болох юм. Тэднээр дамжуулан бусдын зүрх сэтгэлд хүрэх Аврагчийн чадварыг итгэлтэйгээр хуваалц.

Сурсан зүйлсийнхээ дагуу амьдрахад суралцагчдыг урих. Суралцагчдын сурсан зүйлсийнхээ дагуу амьдрах төлөвлөгөөг хэрхэн шалгах сургалтыг Багшийн хөгжүүлбэл зохих ур чадвар гарын авлагын “Суралцаж байгаа зүйлсийнхээ дагуу амьдрахад суралцагчдыг урь” гарчигтай хэсгээс үзнэ үү.

Нэмэлт эх сурвалж

Хэрэв хүмүүс миний хуваалцсан зүйлийг хүлээн зөвшөөрөхгүй бол яах вэ?

Арван хоёр төлөөлөгчийн чуулгын ахлагч Дийтр Ф.Угдорф ийн заасан.

Номлолын ажил бол зүрх сэтгэл доторхоо хуваалцах явдал юм

Ахлагч Угдорф номлолын ажилд хэрхэн оролцох талаар таван санаа өгөв.

Хүмүүсийг хөрвүүлэх ажил бол таны ажил биш гэдгийг ойлго. Энэ нь Ариун Сүнсний үүрэг юм. Харин та зүрх сэтгэл доторхоо хуваалцаж, итгэл үнэмшлийнхээ дагуу амьдрах үүрэгтэй.

Тиймээс хэн нэгэн хүн сайн мэдээний захиасыг шууд хүлээн авахгүй бол сэтгэлээр бүү уна. Энэ бол хувь хүнийхээ хувьд алдаа гаргаж байгаа хэрэг биш.

Энэ нь тухайн хувь хүн, Тэнгэрлэг Эцэг хоёрын хоорондын асуудал юм.

Харин та бол Бурханыг болон Түүний хүүхдүүд болох хөршөө хайрлах үүрэгтэй.

Итгэ, хайрла, үйлд.

Энэ замыг дагах юм бол Бурхан танаар дамжуулан гайхамшгийг үзүүлж, Өөрийн эрхэм хүүхдүүдийг адислах болно. (Дийтр Ф.Угдорф, “Номлолын ажил бол зүрх сэтгэл доторхоо хуваалцах явдал юм,” 2019 оны 4-р сарын Ерөнхий чуулган, 17)

Сургаал ба Гэрээ 33:9. “Нуруун дээрээ боодлуудыг үүрэх болно” гэдэг нь юу гэсэн утгатай вэ?

Арван хоёр төлөөлөгчийн чуулгын ахлагч Дэвид А.Бэднар энэ зүйрлэлд дараах ойлголтыг санал болгосон.

Honorably Hold a Name and Standing

The fire of the covenant will burn in the heart of every faithful member of this Church who shall worship and honorably hold a name and standing in the Lord’s holy house.

Энэ зүйрлэлд боодлуудаар [үр тарианы] Сүмийн шинээр баптисм хүртсэн гишүүдийг төлөөлүүлжээ. Хадгалах газрууд [тариа хадгалах газрууд] нь ариун сүмүүд юм. Ахлагч Нийл А.Максвэлл “Биднийг баптисм хүртэх үед нүд маань баптисмын усан сангаас цаашаа, ариун сүм рүү харах ёстой болдог нь тодорхой. Эдгээр боодлыг овоолж цуглуулах газар нь ариун сүмүүд байх ёстой” хэмээн тайлбарласан юм (Жон Л.Харт, “Make Calling Focus of Your Mission,” Church News, 1994 оны 9-р сарын 17, 4). Энэхүү зааварт боодлуудыг хаягдахгүй байлгаж болохын тулд ариун сүмийн ариун ёслолууд болон гэрээнүүд чухал гэдгийг тодорхойлж, чухалчилдаг билээ. (Дэвид A.Бэднар, “Нэр алдрыг хүндтэйгээр хадгалж мөн зогсох нь,” 2009 оны 4-р сарын Ерөнхий чуулган, 108–109)

Энэ бэлгэдлийг судруудад хэрхэн ашигладаг тухай өөр нэг жишээг Алма 26:5-аас үзнэ үү.

Би сайн мэдээг бусадтай хэрхэн энгийнээр хуваалцаж болох вэ?

Арван хоёр төлөөлөгчийн чуулгын ахлагч Гари И.Стивэнсон ийн заасан.

Гэрчлэлээ тордох ба хуваалцах нь

Ахлагч Стивэнсон гэрчлэл гэж юу болох мөн гэрчлэлээ хүчирхэг хэвээр байлган, үг үйлсээрээ хуваалцахын ач холбогдлын талаар заав.

Та бусадтай сүнслэг мэдрэмжээ хуваалцах үедээ гэрчлэлээ хуваалцаж байдаг. Сүмийн гишүүний хувиар танд Сүмийн албан ёсны хурал, албан бус хурал дээр мөн гэр бүл, найз нөхөд болон бусад хүнтэй ганц ганцаараа ярилцах үед гэрчлэлээ хэлэх, хуваалцах боломж гардаг.

Гэрчлэлээ хуваалцах өөр нэг арга зам нь таны зөв шударга зан чанар юм. Есүс Христийн талаарх таны гэрчлэл зөвхөн юу хэлж, ярьдгийг чинь бус, мөн хэн гэдгийг чинь илтгэдэг.

Та дуу хоолойгоороо гэрчлэлээ хуваалцан, үйлдлээрээ Есүс Христийг дагах амлалтаа харуулах болгондоо бусдыг “Христэд ир” [Моронай 10:32] гэж урьж байдаг.

Сүмийн гишүүд бүх цаг мөчид, бүх зүйлд, бүх газарт Бурханы гэрч болон зогсдог. Үүнийг цахим ертөнцөд өөрсдийн болон бусдын бүтээсэн урам зориг өгөхүйц контент ашиглан үйлдэх хязгааргүй олон боломж бий. Бид онлайнаар ч бай хайрлаж, хуваалцаж, урихдаа гэрчлэлээ хуваалцаж байдаг. Есүс Христийн сайн мэдээ амьдралд тань хэрхэн нөлөөлдгийг олон нийтийн сүлжээг ашиглан харуулах үед Твиттер дэх жиргээ, мессеж, пост зэрэг нь илүү дээш чиглэсэн, ариун зорилготой болж ирдэг. (Гари И.Стивэнсон, “Гэрчлэлээ тордох ба хуваалцах нь,” Лиахона, 2022 оны 11-р сар, 112)

Нэмэлт суралцах үйл ажиллагаа

Феб, Сидней Ригдон хоёрын хөрвөлтийн тухай олж мэдэх

Суралцагчид Сургаал ба Гэрээ 30–36 дээр цэдэглэгдсэн илчлэлтээр сайн мэдээг номлохоор дуудагдсан номлогчдын цөөн хэдийнх нь мэдэрсэн амжилтын талаар суралцахдаа баяртай байж болох юм.

Парлей П.Пратт болон түүний хамтрагчид сайн мэдээг “аглаг буйдад леменчүүдийн дунд” (Сургаал ба Гэрээ 32:2) номлох ажлаа гүйцэтгэж байхдаа Огайогийн Мэнторт очсон гэдгийг тайлбарла. Тэнд Парлей шашны номлогч байсан найз Сидней Ригдонд хичээл заасан.

Суралцагчид Сидней, Феб Ригдон хоёрыг хөрвөгдөхөд хүргэсэн үйл явдлын товч түүхийг “Сэргээлтийн дуу хоолой: Эхэн үеийн хөрвөгчид” хэсгээс уншиж болно (Ирээд, Намайг дага—Гэр орон болон Сүмд зориулав: Сургаал ба Гэрээ 2025; Гэгээнтнүүд: Хожмын үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], х. 100–101-ийг мөн үзнэ үү).

Энэ түүхийг уншсаны дараа, онцгой санагдсан зүйлээ хуваалцахад суралцагчдыг урь. Сиднейгээс гадна өөр бүс нутгаас 100 гаруй хүн хөрвөгдөж, эхэн үеийн Сүмд агуу адислал болж байсныг мөн дурдаарай.

Дэлхийг үерлүүлэх мэт арчиж хаях

Сайн мэдээг хуваалцахдаа олон нийтийн сүлжээг хэрхэн ашиглах талаар олж мэдэхэд нь суралцагчдад туслахын тулд “Sweep the Earth as with a Flood—Highlight” (2:56) видеог хуваалцана уу. Та суралцагчдыг төхөөрөмжөө гаргаж ирээд, ангиас гарахын өмнө хуваалцмаар санагдсан сайн мэдээнд төвлөрсөн захиасыг хуваалцахад урьж болно эсвэл тэд гэртээ хариад хуваалцаж болно.

Саяхан буцаж ирсэн номлогчид

Өөрийн бүс дэх саяхан буцаж ирсэн нэг юм уу хэд хэдэн номлогчийг ангидаа авчирч, бусдад сайн мэдээг заах туршлагаасаа хуваалцахад урь. Тэд мөн гишүүдийг найз нөхөд, гэр бүлийн гишүүдтэйгээ сайн мэдээг хэрхэн хуваалцаж байсныг харсан талаараа ярьж болох юм. Иймэрхүү үйл ажиллагаа явуулах зөвшөөрлийг авахдаа институт, семинарын удирдагчтайгаа зөвлөлд.