“Сургаал ба Гэрээ 35: Библийн Иосеф Смитийн Орчуулга,” Сургаал ба Гэрээний семинарын багшийн гарын авлага (2025)
“Сургаал ба Гэрээ 35,” Сургаал ба Гэрээний семинарын багшийн гарын авлага
49-р хичээл: Сургаал ба Гэрээ 30–36
Сургаал ба Гэрээ 35
Библийн Иосеф Смитийн Орчуулга
1830 оны зун бошиглогч Иосеф Смит Хаан Жеймсийн Библийг сүнсээр өдөөгдөн орчуулж, засаж эхэлсэн юм. Тэрээр үүнийг Бурханы бошиглогчийн хувьд хийх хамгийн чухал үйл хэрэг хэмээн үзсэн. Энэ хичээл нь Их Эзэн Библийн Иосеф Смитийн Орчуулгаар дамжуулан илчилсэн зүйлд талархалтай байхад суралцагчдад тусална.
Боломжит суралцах үйл ажиллагаа
Библийн Иосеф Смитийн Орчуулга
Суралцагчдад Библийн Иосеф Смитийн Орчуулгыг танилцуулахын тулд дараах мэдэгдлүүдийг өг. Суралцагчдыг дараах мэдэгдэл бүр үнэн эсвэл худал эсэхийг таахад урь.
-
1830 онд Мормоны Номыг хэвлэгдэн гарсны дараахан Их Эзэн Иосеф Смитэд Библийн орчуулгыг эхлүүлэхийг даалгажээ.
-
Иосеф Смит Библийг англи хэл рүү орчуулахын тулд еврей болон грек хэл дээрх эх бичвэрийг харав.
-
Их Эзэн Библийн Иосеф Смитийн Орчуулгын нэг хэсэг болгон Агуу Үнэт Сувд дахь Мосе болон Иосеф Смит—Матай номуудыг илчлэв.
-
Их Эзэн Есүс Христийн Хожмын Үеийн Гэгээнтнүүдийн Сүмийн заадаг сургаалын зарим үнэнийг Иосеф Смитэд Библийг орчуулах үед нь илчилсэн.
-
Их Эзэн Библийн Иосеф Смитийн Орчуулгаар дамжуулан таны амьдралыг адисалсан юм.
Эдгээр мэдэгдлийн болон тухайн сэдвийн талаарх бусад асуултын хариултыг уг хичээлийн туршид эрэлхийлэхэд суралцагчдыг урь. Тэднийг онцгойлон тав дахь мэдэгдэл өөрсдийнх нь хувьд үнэн эсэхийг тунгаан бодоход урь.
Суралцагчдыг судлах тэмдэглэл дээрээ ном зураад, “Иосеф Смитийн Орчуулга” гэж гарчиглахад урь. Хичээлийн туршид, зурсан зургийнхаа гадна талд Библийн Иосеф Смитийн Орчуулгад талархдаг шалтгаануудаа эсвэл тэдэнд утга учиртай ойлголтуудыг тойруулан бичихэд урамшуул.
Иосеф Смитийн Орчуулгын адислал
Огайогийн Көртландад Оливер Каудери өөр итгэлийн номлогч асан Сидней Ригдонд баптисм хүртээсний дараа Сидней Ригдон бошиглогч Иосеф Смиттэй уулзахаар Нью-Йоркийн Фейетте рүү аялжээ. Сургаал ба Гэрээ 35 нь Их Эзэний Иосеф Смит, Сидней Ригдон хоёрт өгсөн илчлэлт юм.
Сургаал ба Гэрээ 35-р хэсгийн оршил болон 17–20-р шүлгийг уншаад, бид Иосеф Смитийн Орчуулгатай холбоотой юу сурч болохыг олж мэд.
-
Та эдгээр шүлгээс юу сурч мэдсэн бэ?
-
Их Эзэн Библийн сүнслэг өөрчлөлтийг ямар зорилгоор өгсөн бэ (20-р шүлгийг үзнэ үү)?
Эдгээр шүлэгт Их Эзэн Библийн Иосеф Смитийн Орчуулгаар дамжуулан Есүс Христ биднийг авралд хөтлөхөд туслах нэмэлт үнэнүүдийг илчилсэн гэсэн үнэнг заажээ. Та суралцагчдад хоёр дахь асуултад хариулахад нь туслахын тулд дараах мэдээллийг хэлж өгөхийг хүсэж болох юм.
Их Эзэнийг бошиглогч Иосеф Смитээр дамжуулан Библид сүнслэгээр өдөөгдсөн засвар, нэмэлтүүдийг илчлэх үед Сидней Ригдон энэ илчлэлтэд дуулгавартай байж, бичээчээр үйлчилж эхлэв. Уг ажил нь нэг хэлнээс нөгөө хэл рүү хөрвүүлэх шууд орчуулга байсангүй. Иосеф илчлэлт эрэлхийлж, сүнслэгээр өдөөгдсөн засвар, нэмэлтүүдийг бичих үедээ Хаан Жеймсийн Библийн хувилбарыг эхлэл болгон ашигласан.
Дараах үйл ажиллагаа нь тодруулсан зарчмыг илүү сайн ойлгож, Иосеф Смитийн Орчуулгатай илүү танил болоход нь суралцагчдад туслах болно. “Иосеф Смитийн Орчуулга” гэсэн гарчигтай тараах материалыг тарааж өг. Суралцагчдыг нэг эсвэл хэд хэдэн хэсгийг бие даан судлахаар сонгож, юу сурснаа ангийнхандаа заахаар бэлтгэхэд суралцагчдыг урь. Судлах явцдаа Иосеф Смитийн Орчуулгад талархдаг шалтгаануудыг эсвэл утга учир бүхий чухал ойлголтуудыг судлах тэмдэглэл дээрээ, зурсан зургаа тойруулан бичихийг суралцагчдад сануул.
Иосеф Смитийн Орчуулга
Их Эзэн Библийн Иосеф Смитийн Орчуулгаар дамжуулан нэмэлт сургаалуудыг сэргээсэн.
Та судраасаа Мосегийн номыг олж чадах уу? Их Эзэн Библийн Иосеф Смитийн Орчуулгаар дамжуулан Мосегийн сургаал, үзэгдэл, бусад нэмэлт мэдлэгийг сэргээсэн юм. Эдгээр нь Агуу Үнэт Сувд дахь Мосегийн номд багтсан байдаг.
Мосе 1:3–4, 6, 8, 39-ийг уншина уу. Мосе үзэгдлийнхээ үеэр өөрийнхөө болон Их Эзэний тухай юу мэдэж авсныг олж мэд. (Та мөн Мосегийн ном дахь хамгийн дуртай шүлгүүдээ хайж олж болно.)
-
Биднийг Аврагчийг дагахыг хичээх үед эдгээр шүлэг дэх сургаалууд бидэнд хэрхэн тусалж болох вэ?
-
Эдгээр шүлэгт Их Эзэний илчилсэн зүйлд хэн нэгэн яагаад талархдаг байж болох вэ?
Их Эзэн Библийн Иосеф Смитийн Орчуулгаар дамжуулан “энгийн бөгөөд эрхэм үнэнүүдийг” сэргээсэн.
Та Библид зарим чухал үнэн алга болсон эсвэл тодорхойгүй байж болох талаар сонсож байсан уу? Библи нь итгэж болох, сүнслэгээр өдөөгдсөн ном юм. Гэсэн хэдий ч Нифай “тодорхой болон эрхэм үнэт зүйл” нь алга болсон эсвэл тодорхойгүй байсныг заасан (1 Нифай 13:28–29). Тухайлбал, Библи дээр Шинэ Гэрээнээс өмнө баптисмыг шууд дурддаггүй бөгөөд Ноагийн библийн түүх Их Эзэн хүмүүст сэрэмжлүүлж мөн үерээс өмнө наманчлах боломжийг тэдэнд өгсөн гэдгийг тайлбарладаггүй.
Их Эзэн Иосеф Смитийн Орчуулга дахь эрхэм үнэнүүдийг хэрхэн сэргээснийг харахын тулд Мосе 6:64–66 ба 8:16–17, 20-ийг уншина уу.
-
Баптисм нь Адамын өдрүүдээс хойш өгөгдсөн зарлиг гэдгийг мэдэх нь өнөөдөр бидэнд хэрхэн тусалж болох вэ?
-
Их Эзэн үргэлж биднийг наманчлахад урьж, уучлахад бэлэн байдгийг мэдэх нь бидэнд хэрхэн тусалж болох вэ?
-
Эдгээр үнэн Есүс Христээр дамжуулан авралд хүргэхэд бидэнд хэрхэн тусалдаг вэ?
Иосеф Смитийн Орчуулга дахь Их Эзэний илчлэлт Сургаал ба Гэрээн дэх нэмэлт илчлэлтүүд рүү хөтөлсөн.
Судраас судлах нь нэмэлт илчлэлт хүлээн авахад танд тусалж байсан уу? Энэ нь Иосефт тусалсан. Тэрээр сүнслэгээр орчуулж байхдаа Енохын тухай болон түүний хүмүүсийн Сионыг байгуулсан (Мосе 7:18–21-ийг үзнэ үү) тухай олж мэдсэн ба төд удалгүй Их Эзэн гэгээнтнүүдэд Сионы хүмүүс (Сургаал ба Гэрээ 38, 42, 45-ыг үзнэ үү) болоход нь туслах зааварчилгааг Иосефт илчилсэн билээ.
Үүний өөр нэгэн жишээ нь Иосеф Смит, Сидней Ригдон хоёр Иохан 5:29-ийг орчуулж байх үед тохиолдсон юм. Тэдэнд тэнгэр болон тамын тухай асуултууд байсан нь одоогийн Сургаал ба Гэрээ 76-д цэдэглэгдсэн гайхамшигт үзэгдлийг хүлээн авахад хүргэжээ. Энэхүү үзэгдэл энэ амьдралын дараа хүмүүсийн өвлөн авах боломжтой алдар суугийн гурван зэрэглэлийн тухай үнэнийг багтаасан байдаг.
Сургаал ба Гэрээ 76:22–24, 50–53 ба 58–62-ыг уншаад, Есүс Христийн тухай мөн Түүнтэй болон Тэнгэрлэг Эцэгтэй хамт амьдрахаар хэрхэн эргэн очих талаар юу сурснаа тэмдэглэ.
-
Та ямар үг, хэллэгийг тэмдэглэсэн бэ? Яагаад?
-
Яагаад хэн нэгэн эдгээр үнэнийг мэдэж байгаадаа талархаж болох вэ?
Их Эзэн Иосеф Смитийн Орчуулгаар дамжуулан Библийн шүлгүүдийн талаар сургаалын тодорхой байдал хийгээд нэмэлт ойлголтыг өгсөн.
Агуу Үнэт Сувдаас өөр Библийн Иосеф Смитийн Орчуулгыг хаанаас олохоо та мэдэх үү? Дийлэнх нь судрын арын хэсэгт байрлах Библийн Иосеф Смитийн Орчуулгын түүвэрт эсвэл Gospel Library аппликэйшны Судлах тусламж хэсэгт байгаа Иосеф Смитийн Орчуулгын хавсралтад байдаг. Доор байгаа жишээ, тайлбарыг харж; эдгээр эх сурвалжийг хэрхэн ашиглах талаар олж мэд.
Зарим хэлэнд, Иосеф Смитийн Орчуулгын хэсгүүдийг Библийн Хожмын үеийн гэгээнтнүүдийн хувилбар дээрх зүүлт тайлбар хэсгээс эсвэл дижитал төхөөрөмжүүд дээрээс “Холбоотой агуулга” гэсэн хэсгээс олж болно.
Библийн дараах хэсгүүдийг уншаад, Иосеф Смитийн Орчуулгыг ашиглан сүнслэгээр өдөөгдөн гарсан өөрчлөлтүүдийг олж тогтоо.
Иохан 1:16–18 (Иосеф Смитийн Орчуулга, Иохан 1:16–19)
Иохан 4:24 (Иосеф Смитийн Орчуулга, Иохан 4:26)
-
Эдгээр сүнсний өдөөлтөөр гарч ирсэн өөрчлөлт Есүс Христийн тухай танд юу зааж байна вэ?
-
Эдгээр зүйлийг илүү сайн ойлгох нь яагаад адислал байдаг вэ?
© 2023 by Intellectual Reserve, Inc. All rights reserved.
Суралцагчдыг судалж байхдаа сурч мэдсэн, мэдэрсэн зүйлээ хуваалцахад урь. Шаардлагатай бол, нээлтийн үйл ажиллагааны эхний дөрвөн мэдэгдлийн хариултыг суралцагчдад өг (1. Үнэн, 2. Худал, 3. Үнэн, 4. Үнэн). Суралцагчдад олж авсан ойлголтоо эсвэл Иосеф Смитийн Орчуулгад яагаад талархдагаа судлах тэмдэглэлдээ бичихэд нь зориулан хэдэн минут гаргаж өг. Бичсэн зүйлсээ эсвэл хичээлийн эхэнд үзсэн тав дахь мэдэгдэл яагаад үнэн болохыг сайн дураараа хуваалцахад цөөн суралцагчийг урь. Та бошиглогч Иосеф Смитийн тухай мөн түүний энэ үйл хэрэг Тэнгэрлэг Эцэг, Есүс Христ хоёрыг таньж мэдэхэд бидэнд хэрхэн тусалдаг талаар гэрчлэлээ хуваалцаж болох юм.