“Төгс эзэмших сургаалын дадлага 3: Сүнслэг мэдлэг олж авах ба цээжлэх,” Сургаал ба Гэрээний семинарын багшийн гарын авлага (2025)
“Төгс эзэмших сургаалын дадлага 3,” Сургаал ба Гэрээний семинарын багшийн гарын авлага
50-р хичээл: Сургаал ба Гэрээ 30–36
Төгс эзэмших сургаалын давтлага 3
Сүнслэг мэдлэг олж авах ба цээжлэх
Төгс эзэмших сургаал нь Есүс Христ болон Түүний сайн мэдээн дээр амьдралаа суурилуулахад суралцагчдад тусална. Энэ хичээл нь төгс эзэмших сургаалын судрын хэсгүүд болон тэдгээрийн зааж буй сургаалыг давтах боломжийг суралцагчдад олгоно. Мөн энэ нь сүнслэг мэдлэг олж авахад туслах тэнгэрлэг зарчмуудыг мэдэж авч, амьдралдаа хэрэгжүүлэхэд тэдэнд тусална.
Боломжит суралцах үйл ажиллагаа
Төгс эзэмших сургаалыг давтах: Цээжлэх
Хэрэв суралцагчид энэ жил төгс эзэмших сургаалын хэд хэдэн судрын эшлэл, түлхүүр үг хэллэгтэй танилцсан бол судрын эшлэл, түлхүүр үг хэллэгүүдийг тогтоох дадлага хийхэд тэднийг урих нь зүйтэй. Суралцагчид судруудыг хэрэгтэй үедээ олохын тулд тэдгээрийг хангалттай сайн мэддэг болох итгэлээ нэмэгдүүлж чадна.
Ангид 10 орчим минут өгч мөн хичээлээс гадуурх цагаар аль болох цээжлэхэд суралцагчдыг урамшуулан дэмж. Төгс эзэмших сургаалыг судлах үндсэн материал (2023)-д байгаа төгс эзэмших сургаалын судрын эшлэл, дагалдах түлхүүр үг хэллэгүүдийн жагсаалтын хүснэгтийг харуул.
Өнөөдөр цээжлэхийг хүссэн төгс эзэмших сургаалын судрын нэг хэсгийг сонгоорой. Судрын эшлэл, түлхүүр үг хэллэгийг цээжлэхэд туслах бүтээлч аргыг бодож ол.
Суралцагчид ганцаараа үүн дээрээ ажиллаж эсвэл ижил хэсгийг цээжилж буй ангийн бусад суралцагчийг олж болно. Суралцагчдыг үүнд хэдэн минут зарцуулсны дараа цээжлэхдээ ашигласан зөвлөмж, арга барилаа бусадтайгаа хуваалцахад урамшуулан дэмж.
Хичээлийн дараагийн хэсэг рүү орохоос өмнө болон дараагийн хичээлүүдэд та ангид хэд хэдэн судрын түлхүүр үг хэллэгийг уншиж өгч, дагалдах судрын эшлэлүүдийг цээжээрээ хэлэхийг суралцагчдаас хүс. Төгс эзэмших сургаалын хэсгүүдийг байнга ашиглах нь суралцагчдад тэдгээрийг урт хугацааны санах ойдоо хадгалж, хэрэгтэй үед тэдгээрийг санахад тусална.
Суралцагчдад цээжлэхэд нь хэрхэн туслах нэмэлт санаануудыг “Төгс эзэмших сургаалыг давтах үйл ажиллагаа” хэсгийн хавсралт материалд оруулсан.
Сүнслэг мэдлэг олж авах зарчмуудыг мэдэж авч, хэрэгжүүлэх
Суралцагчдыг сүнслэг мэдлэг олж авах зарчмуудыг давтахад урь. Санал болгож буй давтах үйл ажиллагааг “Төгс эзэмших сургаалыг давтах үйл ажиллагаа” хавсралт хэсэгт оруулсан. Тухайн зарчмын тайлбарыг Төгс эзэмших сургаалыг судлах үндсэн материал (2023)-ын “Сүнслэг мэдлэг олж авах” хэсгийн 5–12-р догол мөрөөс олж болно.
Эдгээр зарчмыг бодит нөхцөл байдалд хэрэгжүүлэхэд нь суралцагчдад туслахын тулд дараах жишээг ашигла.
Ням гаргийн анги эхлэхийн өмнө танай найз Ноэлл хажууд чинь суулаа. Тэр самбар луу харж, уншиж буй зүйлдээ сэтгэл дундуур харагдав. Өнөөдрийн хичээл бошиглогчийг дагахад төвлөрч байсан юм. Ноэлл бошиглогчид сэтгэл дундуур байгаа хүмүүсийн тухай саяхан уншсан гэдгээ хэллээ. Тэр яагаад бошиглогч хүмүүсийн хэрэгцээг илүү сайн мэддэггүй, хүмүүсийн гаргаж буй саналд яагаад хариу үзүүлдэггүй талаар гайхаж байв.
-
Та энэ жишээнд тус болохын тулд сүнслэг мэдлэг олж авах зарчмуудыг хэрхэн ашиглаж болох вэ?
-
Төгс эзэмших сургаалын хэсгүүдэд тусалж болох юу заасан байна вэ?
Суралцагчдын хувьд мэдлэг олж авах зарчмуудыг ашиглах дадлага хийх нэг арга бол эдгээр зарчмыг ойлгох үед тухайн жишээнд байгаа хүний бодол санаа, үйлдэл хэрхэн өөр байж болохыг эргэцүүлэн бодох явдал юм.
Ийн үйлдэхэд нь суралцагчдад туслахын тулд та тэднийг жижиг бүлгүүдэд хувааж, мэдлэг олж авах нэг зарчмыг сонгох боломжийг гаргаж өг. Энэ зарчмыг илүү сайн ойлгохын тулд Төгс эзэмших сургаалыг судлах үндсэн материал дахь холбогдох догол мөрийг судлахад тэднийг урь. Семинартаа бошиглогчдын тухай судалж байсан судруудыг олоход суралцагчдад тусал (Сургаал ба Гэрээ 1:37–38; 21:4–6; 28:2 гэх мэт). Дараах зааврыг харуулж, бүлгээрээ хамтдаа гүйцэтгэхэд суралцагчдыг урь.
Итгэлээр үйлдэх
Ноэллын санаа зовж буй зүйлийнхээ хариуд итгэлээрээ үйлдэж болох дор хаяж хоёр үйлдлийг гаргаж ир.
Та яагаад тэдгээр үйлдлийг санал болгож байгаагаа тайлбарла эсвэл өөрт тохиолдсон туршлагаасаа хуваалц.
Илүү ихийг мэдэхийг эрэлхийлэх үедээ Их Эзэнд болон Түүний үйлчлэгчдэд илүү их итгэдэг болоход нь тус болох, Ноэллын мэддэг байж болох бошиглогчдын тухай зарим үнэнийг жагсаа.
-
Ноэллын хувьд одоогийн асуултууддаа хариулт олохдоо аль хэдийн мэддэг, итгэдэг зүйлдээ үнэнч байх нь яагаад чухал гэж та бодож байна вэ?
Утга санаа, асуултыг мөнхийн талаас нь шинжлэн судлах
Тэнгэрлэг Эцэгийн авралын төлөвлөгөөнд бошиглогчид ямар үүрэг гүйцэтгэдгийг бич.
Бошиглогчдод зориулсан Их Эзэний зорилгыг Ноэлл болон бусад хүн тэдний үүргийг юу гэж боддогтой зэрэгцүүлэн харьцуул.
Тэнгэрээс томилогдсон эх сурвалжуудаар дамжуулан илүү гүн гүнзгий ойлголт олж авахаар эрэлхийлэх
Найдваргүй эх сурвалжуудаас үүдэн хэн нэгэнд гарах сөрөг нөлөөллүүдийг жагсааж бич.
Сургаал ба Гэрээнээс (эсвэл тэнгэрээс томилогдсон бусад эх сурвалжаас) Ноэллд тус болох нэг эсвэл хэд хэдэн судрын хэсгийг ол.
Хэрэв Ноэлл Бурхан яагаад бошиглогчдыг дууддагийг ойлгосон бол түүний хүлээж авч болох дор хаяж хоёр адислалыг бич.
Суралцагчдад хийсэн, сурсан зарим зүйлээ хуваалцах боломж олго. Үүнийг гүйцэтгэх нэг арга зам бол Ноэлл санаа зовоосон асуудлаа шийдэхдээ сүнслэг мэдлэг олж авах зарчмуудыг хэрэгжүүлэхийг сонгосон гэж төсөөлж бодоход урих явдал юм. Суралцагчид Ноэллыг сүнслэг мэдлэг олж авах нэг эсвэл хэд хэдэн зарчмыг хэрэгжүүлэх үед түүнд юу тохиолдож болох талаар бичиж болно.
Дараа нь суралцагчид бичсэн зүйлээ хуваалцаж, яагаад ийм байдлаар жишээг бичсэнээ тайлбарлаж болно. Суралцагчдыг хуваалцсаны дараа, өнөөдөр амьдралд нь тус болох юу сурч, мэдэрснээ бодоход урьж болно.