37-р хичээл: Сургаал ба Гэрээ 20–22

Сургаал ба Гэрээ 21

Бошиглогчийн үгсийг итгэлтэй, тэвчээртэй хүлээн авах

Сургаал ба Гэрээ 21-р бүлгийг 1830 оны 4-р сарын 6-нд Есүс Христийн Хожмын Үеийн Гэгээнтнүүдийн Сүм байгуулагдах үед хүлээн авчээ. Энэ илчлэлтэд Аврагч бошиглогчийн зөвлөгөөг дагах тухай Өөрийн Сүмийн гишүүдэд зааварчилсан юм. Энэ хичээл суралцагчдад Их Эзэний бошиглогчийн үгсийг итгэлтэй, тэвчээртэй дагахад тусална.

Боломжит суралцах үйл ажиллагаа

Зөвлөгөөг дагах

Дараах жишээг үзүүл. Эсвэл та суралцагчдын хэрэгцээ, нөхцөл байдалд тохируулан, өөр жишээ гаргаж болно.

Ерөнхий чуулганыг сонсож байхдаа та найзаасаа “Бошиглогч сая юу гэж хэлснийг сонссон уу? Би түүнтэй санал нийлж байгаа эсэхээ мэдэхгүй байна!” гэсэн мессежийг хүлээн авсан гэж төсөөл.

• Хэрэв танд иймэрхүү мессеж ирвэл ямар санагдах байсан бэ?

• Бошиглогчийн зөвлөгөөг дагах эсэхийг шийдэхээсээ өмнө ямар зүйлсийг бодож үзэх нь таны найзад чухал байж болох вэ?

Өнөөдөр бошиглогчийн талаар заасан Их Эзэний зарим сургаалыг судлах болно гэдгийг суралцагчдад тайлбарла. Бошиглогчийн зөвлөгөөг дагах нь хэр чухал болохыг дотроо эргэцүүлэн бодоход тэднийг урь. Их Эзэний бошиглогчийг дагах хүсэл эрмэлзэл, чадварыг нэмэгдүүлэхэд туслах үнэнийг хайж олоход урамшуул.

Бүхий л тэвчээр хийгээд итгэлд

Сургаал ба Гэрээ 21 нь 1830 оны 4-р сарын 6-нд Есүс Христийн Хожмын Үеийн Гэгээнтнүүдийн Сүм зохион байгуулагдахад Их Эзэний Иосеф Смитэд өгсөн илчлэлт юм. Энэ илчлэлтийн нэг хэсэг болгон, Их Эзэн бошиглогчийг дагах тухай чухал зөвлөгөөг өгчээ.

Сургаал ба Гэрээ 21:1–3-ыг уншаад, Их Эзэний бошиглогч Иосеф Смитийг тодорхойлсон нэршлүүдийг хайж ол.

• Эдгээр нэр дээр үндэслэхэд, Бурханаар дуудагдсан бошиглогчтой байна гэдэг нь Их Эзэний шинэхэн байгуулсан Сүмийн гишүүдийн хувьд яагаад адислал байсан бэ?

Сургаал ба Гэрээ 21:4–6 бол төгс эзэмших судрын хэсэг юм. Төгс эзэмших сургаалын судрын хэсгийг амархан олохын тулд онцгойлон тэмдэглэхэд суралцагчдыг урь.

Сургаал ба Гэрээ 21:4–5-ыг уншаад, Их Эзэн гэгээнтнүүдэд Өөрийн бошиглогч Иосеф Смитийг хэрхэн хүлээж авах ёстой гэж зөвлөснийг олж мэд.

4–5-р шүлэг дэх төлөөний үгсээр хэнийг төлөөлүүлэн хэлж байгааг ойлгох нь суралцагчдад тустай байж болох юм. Самбар дээр “та нар” (Сүмийн гишүүд; “түүний” (Иосеф Смит, бошиглогч); “миний” (Есүс Христ) гэсэн үгсийг, тодорхойлолттой нь хамт бичих талаар бодож үз.

• Эдгээр шүлгийн ямар үг хэллэг танд онцгой санагдсан бэ? Яагаад?

• Та эдгээр шүлгээс Их Эзэний бошиглогчдыг дагах эсэхэд эргэлзэж байгаа хүнд тусалж болох юуг сурсан бэ?

Хэрэв шаардлагатай бол 5-р шүлэг дэх “бүхий л тэвчээр хийгээд итгэлд” гэсэн үг хэллэгийг онцол. Ахлагч Нийл Л.Андэрсэны захиасыг хуваалцахаас өмнө, Их Эзэний бошиглогчийн үгсийг сонсоход яагаад тэвчээр хийгээд итгэл заримдаа хэрэгтэй байдаг тухай суралцагчдаас асуух нь тустай байж болно.

Арван хоёр төлөөлөгчийн чуулгын ахлагч Нийл Л.Андэрсэн бошиглогчийг дагахыг хичээж байгаагаа хэрхэн итгэлтэй, тэвчээртэй байдлаар харуулахыг заасан.

Заримдаа та нарын үзэл бодол Их Эзэний бошиглогчийн сургаалтай эхэндээ бүрэн дүүрэн нийцэхгүй байвал битгий гайхаарай. Энэ нь суралцах, даруусах, өвдөг сөхрөн залбирах мөч юм. Цаг хугацаа өнгөрөхөд бид Тэнгэрлэг Эцэгээсээ сүнслэг байдлын илүү тодорхой байдлыг ихээр хүлээн авах болно гэдгээ мэдэж, Бурханд итгэж, итгэлээр урагш алхдаг. (Ахлагч Нийл Л.Андэрсэн, “Бурханы бошиглогч,” 2018 оны 4-р сарын Ерөнхий чуулган, 30)

Дагахад хүндрэлтэй байдаг бошиглогч, төлөөлөгчдийн зөвлөгөөний талаар бодоход суралцагчдыг урь. Тэвчээр, итгэлээ нэмэгдүүлэх нь хэрхэн бошиглогчийн зөвлөгөөг дагахад тэдэнд туслах талаар тунгаан бодоход суралцагчдыг урь.

Их Эзэний бошиглогчийг дагаснаар ирдэг адислалууд

Сургаал ба Гэрээ 21:6-г уншина уу. Их Эзэний бошиглогчдоор дамжуулан хэлсэн үгсийг итгэлтэй, тэвчээртэй хүлээн авдаг хүмүүст өгсөн гурван амлалтыг олж мэд.

• 6-р шүлэг дээрх Их Эзэний сургаал дээр үндэслэн, та дараах мэдэгдлийг хэрхэн гүйцээж бичих вэ? Биднийг Их Эзэний бошиглогчдоор дамжуулан хэлсэн үгсийг итгэлтэй, тэвчээртэй хүлээн авах үед …

  Суралцагчид энэ мэдэгдлийг дараах байдлаар гүйцээж болно. Биднийг Их Эзэний бошиглогчдоор дамжуулан хэлсэн үгсийг итгэлтэй, тэвчээртэй хүлээн авах үед Тэр харанхуйн хүчийг сарниулж, тэнгэрээс бидэнд адислалуудыг цутгаж, биднийг дайснаас хамгаалах болно.

• Эдгээр амлалт ямар утга учиртай болохыг та өөрийн үгээр хэрхэн дүгнэх вэ?

  Суралцагчдад сэгсрэх гэдэг нь ямар нэгэн зүйлийг байрнаас нь хөдөлгөх эсвэл хайрцаг эсвэл тулгуураас нь салгах гэсэн утгатай гэдгийг ойлгох нь тустай байж болно. Энэ шүлгийг бошиглогчийн үгсийг хүлээн авдаг нэгэнд тэнгэрээс адислал цутгагддаг гэж орчуулж болох юм.

• Эдгээр амлалт танд Их Эзэний тухай ойлгоход хэрхэн тусалж байна вэ?

• Их Эзэний бошиглогчдыг дагах хүсэлд маань эдгээр амлалт хэрхэн нөлөөлөх вэ?

Өнөөдөр Их Эзэний бошиглогчдыг дагах

Дараах үйл ажиллагаа нь орчин үеийн бошиглолын зөвлөгөөг амьдралдаа дагахыг хичээхэд суралцагчдад тусална. Дараах зааврыг үзүүлж, суралцагчдад уг үйл ажиллагааг гүйцэтгэх хангалттай хугацаа гаргаж өг.

Амьдралдаа хэрэгжүүлэхийг хүсэж буй орчин үеийн бошиглогч, төлөөлөгчийн өгсөн урилгыг ол. Өсвөр үеийнхний бат бөх байдлын төлөө: Сонголт хийхэд туслах хөтөч гарын авлагыг ашиглах эсвэл сүүлийн үеийн ерөнхий чуулганд өгсөн чухал зөвлөгөө, урилгыг ол.

Судалсныхаа дараа, судлах тэмдэглэл дээрээ дараах асуултуудад хариул.

• Та ямар зөвлөгөө, урилгыг олсон бэ?

• Бошиглогчийн урилгад анхаарал тавихад хэр их тэвчээр, итгэл танд хэрэгтэй байна вэ?

• Энэ зөвлөгөөг дагаснаар хүлээж авч болох ямар адислалуудыг та анзаарсан бэ?

• Уг зөвлөгөөг амьдралдаа дагахын тулд та ямар тодорхой үйлдэл хийх вэ?

Суралцагчдыг судалж дууссаны дараа, судлах тэмдэглэлдээ бичсэн хариултуудаа хуваалцах боломжийг олго. Ярилцлагын нэг хэсэг болгон, цөөн суралцагчийг яг одоо ярилцаж буй бошиглогчдын зөвлөгөөнд анхаарлаа хандуулснаар тэд болон бусад хүн хэрхэн адислагдсан тухай хуваалцахад урь. Та мөн өөрийн хувийн жишээг хуваалцаж болно.

Тавьсан зорилгынхоо төлөө үйлдэж, бошиглогчдын сургаалыг дагаснаар Есүс Христтэй харилцах харилцаанд нь хэрхэн нөлөөлж буйд анхаарлаа хандуулахад суралцагчдыг уриал. Дараагийн хичээлээр тэд тавьсан зорилгодоо хэрхэн ахиц дэвшил гаргаснаа үнэлж дүгнэх боломжтой болно гэдгийг суралцагчдад хэл.

Цээжил

Та энэ хичээлийн турш төгс эзэмших сургаалын эшлэл, судрын түлхүүр үг хэллэгийг цээжлэхэд нь суралцагчдад тусалж, дараа дараагийн хичээлүүд дээрээ давтаж болно. Бошиглогчийн “үгийг та нар миний амнаас гарсан мэтээр бүхий л тэвчээр хийгээд итгэлд хүлээн авах ёстой” гэдэг нь Сургаал ба Гэрээ 21:4–6 дээрх түлхүүр үг хэллэг юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.

Нэмэлт эх сурвалж

Бошиглогчийг дагаснаар ямар адислалуудыг хүлээн авдаг вэ?

Ерөнхийлөгч Харолд Б.Лий (1899–1973) ийн заасан.

Энэ Сүмийн гишүүд бидэнд байдаг цорын ганц аюулгүй байдал бол Сүмийг зохион байгуулсан өдөр Их Эзэний Сүмд хандан хэлсэн зүйлсийг ширхэгчлэн биелүүлэх явдал мөн. Бид Их Эзэний бошиглогчоороо дамжуулан өгөх үгс хийгээд зарлигуудыг ‘тэрээр тэдгээрийг хүлээн авсан үед, та нар миний өмнө бүхий л цэвэр ариун байдалд алхан; … миний амнаас гарсан мэтээр бүхий л тэвчээр хийгээд итгэлд’ (С ба Г 21:4–5) хүлээн авах ёстой. Зарим зүйлд итгэл, тэвчээр шаардагдах болно. Сүмийн эрх мэдэлтнүүдээс ирж байгаа зүйл та нарт таалагдахгүй байж ч болно. Энэ нь та нарын улс төрийн болон нийгмийн талаарх үзэл бодолтой мөн нийгмийн амьдралтай зарим талаараа зөрчилдөж магадгүй. Гэхдээ эдгээр зүйлийг Их Эзэний амаас гарч буй үг хэмээн тэвчээртэй, итгэлтэй сонсох аваас ‘тамын үүд та нарыг дийлэх нь үгүй; … Их Эзэн Бурхан чиний өмнөөс харанхуйн хүчийг зайлуулж, чиний сайн сайхан, өөрийн нэрийн алдар суугийн төлөө тэнгэрийг сэгсрэх болно’ (С ба &Г 21:6) хэмээн заажээ. (Teachings of Presidents of the Church: Harold B. Lee [2000], 84–85)

Арван хоёр төлөөлөгчийн чуулгын ахлагч Үлиссэс Соарэс ийн заасан.

[Их Эзэний бошиглогчдыг] дагаснаар бидний амьдрал илүү аз жаргалтай, төвөг багатай, бэрхшээл, асуудлууд маань туулахад амар хялбар болж, энэ өдрүүдэд бидэн рүү довтлох дайсны дайралтуудаас хамгаалах сүнслэг хуяг дуулгыг бий болгодог. (Үлиссэс Соарэс, “Бошиглогчид Ариун Сүнсний хүчээр ярьдаг,” 2018 оны 4-р сарын Ерөнхий чуулган, 124)

Бошиглогчид хэрхэн Бурханы үгийг хүлээн авдаг вэ?

Арван хоёр төлөөлөгчийн чуулгын ахлагч Квинтин Л.Күк ийнхүү заав.

Сүмийн тэнгэрлэгээр оноогдсон зорилгуудыг ерөнхийлөн тэргүүлдэг Сүмийн ахмад удирдагчид тэнгэрлэг туслалцаа хүлээн авдаг гэдэгт бат итгэлтэй байгаарай. Тэрхүү удирдамж Сүнснээс мөн заримдаа Аврагчаас шууд ирдэг. Сүнслэг удирдамжийн хоёр төрөл хоёулаа өгөгдсөн. Би ийм туслалцаа хүлээн авсандаа талархаж явдаг. Гэхдээ “бүхнийг чадагч Их Эзэн биднийг сургахаар зориуд сонгох” үед удирдамж нь Их Эзэний цаг хугацаанд шат шатаар, дүрэм дүрмээр өгөгддөг. Сүмийг бүхэлд нь удирдах удирдамж зөвхөн Түүний бошиглогчид ирдэг. (Квинтин Л.Күк, “Бурхантай уулзахаар бэлтгэ,” 2018 оны 4-р сарын Ерөнхий чуулган, 145)

Бошиглогчдын сургаал яагаад заримдаа олонд танигдаагүй байдаг вэ?

Арван хоёр төлөөлөгчийн чуулгын ахлагч Дэйл Г.Рэнланд ийнхүү заасан.

Тэнгэрлэг Эцэг маань Өөрийн хүүхдүүдийг хүслээрээ, зориуд Өөртэй нь адил болохыг сонгоосой мөн Өөрийнхөө эдэлдэг тийм амьдралд тэнцээсэй хэмээн хүсдэг. Тийн үйлдэх явцдаа Түүний хүүхдүүд тэнгэрлэг хувь заяандаа хүрч, Түүнд байгаа бүхний өв залгамжлагчид болдог билээ. Энэхүү шалтгааны улмаас Сүмийн удирдагчид Бурханы зарлиг, сургаалыг Түүний хүслийн эсрэг амар хялбар болгож эсвэл бусдын таашаалд хүргэхээр өөрчилж болохгүй. (Дэйл Г.Рэнланд, “Бидний сайн хоньчин,” 2017 оны 4-р сарын Ерөнхий чуулган, 16)

Нэмэлт суралцах үйл ажиллагаа

Үзмэрч, орчуулагч, бошиглогч, төлөөлөгч, ахлагч

Суралцагчдыг Сургаал ба Гэрээ 21:1 дээрх Аврагч Иосеф Смитийг тодорхойлоход ашигласан нэршлийг эрж хайхыг хүс. Эдгээр нэршил бүрийг Gospel Library аппликэйшн дээрх судруудын удирдамжийг ашиглан тодорхойлж болно. (“Орчуулах” гэсэн үгийг олоод, “орчуулагч” гэдэг үгийг судал)

• Иосеф Смитэд өгсөн нэр цол Сэргээлтэд гүйцэтгэх түүний чухал үүргийг ойлгоход танд хэрхэн туслах вэ?

Бошиглогчийг дагаснаар ирдэг адислалууд

Бошиглогчийн үгсийг дагах нь хэрхэн бидэнд мөнх бус амьдралыг туулахад тусалдаг талаар ойлгоход нь суралцагчдад туслахын тулд “Бошиглогчийг дага” (4:16) видеог үзүүлэхийг бод. Уг видеог үзэж байхдаа, бошиглогчийн зөвлөгөөг дагах нь тэдний амьдралыг хэрхэн адисалж болохыг тунгаан бодоход суралцагчдыг урь.

Бичвэр мессеж

Суралцагчдад Сургаал ба Гэрээ 21-д сурсан зүйлээ тайлбарлах дадлага хийхэд нь туслахын тулд хичээлийн эхэнд үзсэн жишээг эш татахыг бод.

Сурсан зүйлээ ашиглан найздаа илгээж болох мессежийн хариултыг бэлдэх цагийг суралцагчдад олго. Цөөн суралцагчийг сайн дураараа хариултаа хуваалцахад урь.

Бошиглогч бол Аврагчийн Сүмийн гол цөм юм

Сургаал ба Гэрээ 21 дээрх Их Эзэний сургаалууд нь Сүмийг зохион байгуулсан өдөр илчлэгдсэн гэдгийг суралцагчдад сануул. Аврагчийн Сүмд бошиглогч, төлөөлөгчид ямар чухал ач холбогдолтойг цаашид илүү сайн таньж мэдэхэд суралцагчдад туслахын тулд Ефес 2:19–20; 4:11–14-ийг судлахад урь.

Суралцагчид дээрх шүлгүүдийг Сургаал ба Гэрээ 21:4–6-тай холбогдох эшлэл болгох юм уу холбоос үүсгэж болно. Суралцагчдыг Аврагчийн Сүмд бошиглогчтой байх нь яагаад чухал гэж боддог талаар хэлэлцэхэд урь.