Lesson 52: Doktrina at mga Tipan 37–40

Doktrina at mga Tipan 38:15–27, 34–42

Maging Isa

Nagbigay ang Panginoon ng mga tagubilin sa Kanyang mga Banal habang naghahanda silang gumawa ng malalaking sakripisyo upang magtipon sa Ohio. Sa Kanyang paghahayag sa mga Banal, inihayag ng Tagapagligtas ang Kanyang pagkatao at inanyayahan ang Kanyang mga tao na mamuhay nang katulad Niya. Ang lesson na ito ay makatutulong sa mga estudyante na maging higit na katulad ng Tagapagligtas sa pamamagitan ng pagpapahalaga sa iba at paghahangad ng pagkakaisa.

Mga Posibleng Aktibidad sa Pag-aaral

Nais ng Panginoon na maging katulad Niya tayo

Maaari mong simulan ang lesson sa pamamagitan ng pag-anyaya sa bawat estudyante na isulat ang lima sa kanilang mga interes. Pagkatapos ay hatiin ang klase sa maliliit na grupo. Anyayahan silang ibahagi ang kanilang mga interes at ilista ang anumang pagkakatulad nila. Pagkatapos, sabihin sa kanila na talakayin kung bakit kung minsan ay mahirap para sa mga taong may iba’t ibang interes na magkaisa at kung bakit mahalaga ang pagkakaisa para sa mga disipulo ni Cristo.

Sabihin sa mga estudyante na isipin ang isang tao na maaari nilang pakitunguhan nang mas mabuti o kung kanino sila maaaring magkaroon ng mas magandang ugnayan. Hikayatin ang mga estudyante na humingi ng inspirasyon sa pamamagitan ng Espiritu Santo upang matulungan silang pakitunguhan nang mas mabuti ang taong ito o mas mapaganda ang kanilang ugnayan sa taong ito. Sabihin sa kanila na pag-isipan kung paano makatutulong sa pagkakaroon ng pagkakaisa ang pakikitungo sa mga ugnayan sa ganitong paraan.

Noong Disyembre ng 1830, ginagawa ni Joseph Smith ang inspiradong rebisyon ng Biblia at natanggap niya ang tinatawag na ngayon na Moises 6–7 sa Mahalagang Perlas. Ang mga kabanatang ito ay salaysay tungkol sa isang propetang nagngangalang Enoc at sa kanyang mga tao. Dahil sa kanilang kabutihan at pagkakaisa, tinawag ng Panginoon ang mga tao na ito na Sion.

Sa Doktrina at mga Tipan 38, iniutos ng Tagapagligtas sa mga Banal na magtipon sa Ohio. Itinuro Niya sa kanila ang tungkol sa Kanyang pagkatao at binigyang-diin Niya ang mga alituntunin ng pagtatayo ng Sion. Ang pagsunod sa mga alituntuning ito ay makatutulong sa mga Banal na ihanda ang kanilang sarili na tanggapin ang batas ng Tagapagligtas at mapagkalooban ng Kanyang kapangyarihan (tingnan sa Doktrina at mga Tipan 38:32).

Basahin ang Doktrina at mga Tipan 38:24–27, at alamin kung anong mga katangian ang gusto ni Jesucristo na taglayin natin.

Habang binabasa ng mga estudyante ang Doktrina at mga Tipan 38:24–27, maaari mong ipaliwanag ang inulit na parirala sa talata 24–25. Maaari mo ring anyayahan ang ilang estudyante na isadula ang talinghaga sa talata 26–27.

• Sa iyong palagay, ano ang ibig sabihin ng pahalagahan ang iyong kapatid gaya ng iyong sarili? (Tingnan sa Mateo 22:36–39; Juan 13:34–35; Jacob 2:17–19.)

• Ano ang matututuhan natin tungkol sa Tagapagligtas mula sa talinghaga sa talata 26–27?

• Ano ang itinuturo sa atin ng talata 24–27 tungkol sa kung paano tayo maaaring maging katulad ni Jesucristo?

  Tulungan ang mga estudyante na tumukoy ng isang alituntuning tulad nito: Maaari tayong maging katulad ni Jesucristo kapag pinahahalagahan natin ang iba at naghahangad tayo ng pagkakaisa bilang Kanyang mga disipulo.

  Gamitin ang ilan sa mga sumusunod na tanong o iba pa na naiisip mo para matulungan ang mga estudyante na maunawaan ang alituntuning ito. Maaari mong anyayahan ang mga estudyante na mag-isip sa oras ng talakayan ng mga tao na gusto nilang magkaroon ng mas magandang ugnayan.

• Paano naging halimbawa si Jesucristo ng pagpapahalaga sa iba? Ng paghihikayat na magkaisa?

• Bakit mahirap kung minsan na makipagkaisa sa iba pang mga miyembro ng Simbahan?

• Anong kaibhan ang magagawa sa iyong buhay kapag nagpakita ka ng higit na pagmamahal sa iba at naging mas kaisa ng Simbahan?

Maaari mong ipapanood ang video na “One in Christ” (4:48), na matatagpuan sa ChurchofJesusChrist.org, upang matulungan ang mga estudyante na maunawaan kung paano tayo tinutulungan ng Tagapagligtas na magkaisa.

Basahin ang Doktrina at mga Tipan 38:34–36, 39–42, at alamin kung paano inanyayahan na magkaisa ang mga Banal na naghahandang magtipon sa Ohio.

• Ano ang nakita mo na makatutulong sa mga lumipat sa Ohio na pahalagahan ang isa’t isa at magkaisa?

Ang ating mga pagsisikap na pahalagahan ang iba at maghangad ng pagkakaisa

Gamitin ang mga salita ng mga propeta para bigyang-diin ang doktrina at mga alituntunin: Para magawa ito, tingnan ang training na may pamagat na, “Teach from the scriptures and the words of latter-day prophets” sa Teacher Development Skills. Maaari mong gawin ang kasanayan na, “maghanda ng mga paanyaya na tutulong sa mga estudyante na maiugnay ang mga katotohanang matatagpuan sa mga banal na kasulatan sa sinasabi ng mga buhay na propeta” tulad ng nakalarawan sa sumusunod na pahayag ni Elder Renlund.

Nagturo si Elder Dale G. Renlund ng Korum ng Labindalawang Apostol ng mga paraan na maaari tayong magkaisa bilang mga disipulo ni Cristo. Basahin ang pahayag o panoorin ang video na “Winawakasan ng Kapayapaan ni Cristo ang Pagkapoot” (12:39; panoorin mula sa time code na 4:49 hanggang 6:32) sa ChurchofJesusChrist.org.

Ang pagkakaisa ay nangangailangan ng pagsisikap. Nabubuo ito kapag nagsisikap tayong magkaroon ng pag-ibig ng Diyos sa ating puso at nakatuon tayo sa ating walang hanggang tadhana. Pinagkakaisa tayo ng ating karaniwan, pangunahing pagkakakilanlan bilang mga anak ng Diyos at ng ating katapatan sa mga katotohanan ng ipinanumbalik na ebanghelyo. Bunga nito, ang ating pagmamahal sa Diyos at ang ating pagiging disipulo ni Jesucristo ay lumilikha ng tunay na malasakit sa iba. Pinahahalagahan natin ang maraming iba’t ibang katangian, pananaw, at talento ng ibang tao. Kung hindi natin kayang unahin ang ating pagiging disipulo kay Jesucristo kaysa sa ating mga personal na interes at pananaw, kailangan nating muling suriin ang ating mga priyoridad at magbago.

Maaaring masabi natin na, “Siyempre maaari tayong magkaisa—kung sasang-ayon ka sa akin!” Mas mabuti kung itatanong natin, “Ano ang magagawa ko upang magkaroon ng pagkakaisa? Paano ako tutugon upang matulungan ang taong ito na mas mapalapit kay Cristo? Ano ang magagawa ko upang mabawasan ang pagtatalo at makabuo ng isang mapagmahal at mapagmalasakit na komunidad sa Simbahan?”

Kapag puspos ng pag-ibig ni Cristo ang ating buhay, tumutugon tayo sa mga ‘di-pagkakasundo nang may kaamuan, pagtitiis, at kabaitan. Mas inaalala natin ang damdamin ng ibang tao kaysa sa sarili nating damdamin. Sinisikap nating “mamagitan at magtaguyod ng pagkakaisa” [Dallin H. Oaks, “Pagtatanggol sa Ating Saligang-Batas na Binigyang-Inspirasyon ng Langit,” Liahona, Mayo 2021, 107]. Hindi tayo nakikibahagi sa “away tungkol sa mga kuru-kuro,” hindi hinuhusgahan ang mga hindi natin makasundo, at hindi gumagawa ng anumang ikatitisod ng iba [tingnan sa Roma 14:1–3, 13, 21]. Sa halip ay iniisip natin na ang mga hindi natin makasundo ay ginagawa ang lahat ng kanilang makakaya batay sa mga karanasan nila sa buhay. (Dale G. Renlund, “Winawakasan ng Kapayapaan ni Cristo ang Pagkapoot,” Liahona, Nob. 2021, 84)

Sabihin sa mga estudyante na ibahagi kung paano sila napagpala sa pagsisikap na pahalagahan ang iba at magkaisa bilang mga disipulo ni Cristo.

Sabihin sa mga estudyante na mapanalanging suriin kung gaano nila nagagawa nang mabuti ang pagpapahalaga sa iba at pagpapatibay ng kanilang mga ugnayan.

Maaaring sagutin ng mga estudyante ang mga sumusunod na tanong sa kanilang study journal.

Mapanalanging pumili ng isang ugnayan na nais mong patibayin sa isang indibiduwal o sa isang grupo. Sagutin ang isa o mahigit pa sa mga sumusunod na tanong:

• Ano ang magagawa mo para pahalagahan ang tao o mga taong ito at magpakita ng pagmamahal sa kanila?

• Paano ka makababaling sa Tagapagligtas para madaig ang mga balakid na kinakaharap mo?

• Paano makatutulong sa iyo ang paggawa nito na maging higit na katulad ng Tagapagligtas?

Karagdagang Resources

Paano natin mapagsisikapan na magkaroon ng higit na pagkakaisa?

Itinuro ni Elder D. Todd Christofferson ng Korum ng Labindalawang Apostol:

Magkakaisa ang ating puso’t isipan kapag ginawa nating sentro ng ating buhay ang Tagapagligtas at sinunod natin ang mga hinirang Niyang mamuno sa atin. (D. Todd Christofferson, “Sa Sion ay Magsitungo,” Liahona, Nob. 2008, 38)

Hindi natin pahihintulutan ang anumang rasismo, pagtatangi sa lahi, o ibang pagkakahati-hati sa Simbahan ni Cristo sa mga huling araw. Inutos sa atin ng Panginoon, “Maging isa; at kung hindi kayo isa kayo ay hindi sa akin” [Doktrina at mga Tipan 38:27]. Dapat tayong maging masigasig sa pag-alis ng pagtatangi at diskriminasyon sa Simbahan, sa ating mga tahanan, at higit sa lahat, sa ating mga puso. Habang nadaragdagan ang pagkakaiba-iba ng mga miyembro ng ating Simbahan, lalong dapat maging taos-puso at magiliw ang ating pagtanggap. Kailangan natin ang isa’t isa. (D. Todd Christofferson, “Ang Doktrina ng Pagiging Kabilang,” Liahona, Nob. 2022, 53)

Itinuro ni Elder Quentin L. Cook ng Korum ng Labindalawang Apostol:

Kahit iba-iba ang mga wika at magaganda at nagpapasigla ang mga tradisyong pangkultura, kailangang mabuklod ang ating mga puso sa pagkakaisa at pagmamahal. Binigyang-diin ng Panginoon: “Pahalagahan ng bawat tao ang kanyang kapatid gaya ng kanyang sarili. … Maging isa; at kung hindi kayo isa kayo ay hindi sa akin” [Doktrina at mga Tipan 38:25, 27]. Kahit pinahahalagahan natin ang angkop na pagkakaiba-iba ng mga kultura, ang ating mithiin ay magkaisa sa kultura, mga kaugalian, at mga tradisyon ng ebanghelyo ni Jesucristo sa lahat ng aspeto. (Quentin L. Cook, “Tanglaw Ko ang Diyos,” Liahona, Mayo 2015, 65)

Paano natin maitatangi at mapahahalagahan ang iba?

Itinuro ni Pangulong Russell M. Nelson:

Sa lahat ng kontinente at isla sa karagatan, ang matatapat ay tinitipon sa Ang Simbahan ni Jesucristo ng mga Banal sa mga Huling Araw. Ang mga pagkakaiba sa kultura, wika, kasarian, lahi, at nasyonalidad ay nawawalan ng kabuluhan sa pagpasok ng mga Banal sa landas ng tipan at sa paglapit sa ating pinakamamahal na Manunubos.

Sa huli, nalalaman natin na tanging pag-unawa lamang sa tunay na Pagkaama ng Diyos ang magdudulot ng lubos na pagpapahalaga sa tunay na kapatiran ng tao. Ang pag-unawang iyan ay nagbibigay-inspirasyon sa atin na magtayo ng tulay ng pagkakaisa sa halip na mga pader ng paghihiwalay. (Russell M. Nelson, “Remarks at Worldwide Priesthood Celebration” [mensaheng ibinigay sa pagdiriwang ng “Be One,” Hunyo 1, 2018], newsroom.ChurchofJesusChrist.org)

Ibinahagi ni Elder Jeffrey R. Holland ng Korum ng Labindalawang Apostol:

Madalas, at karaniwang hindi sinasadya, tayo ay hindi sensitibo sa mga kalagayan at paghihirap ng mga nakapaligid sa atin. Lahat tayo ay mayroong problema, at sa huli ang bawat tao ang magiging responsable sa sarili niyang kaligayahan. Wala sa atin ang hindi nakaranas ng hirap o nabigyan ng maraming oras at pera na wala na tayong gagawin kundi ang tulungan ang mga taong “nalulumbay” (“Panginoon, Kayo’y Laging Susundin,” Mga Himno, blg. 164). Gayon pa man, sa pagtulad sa halimbawa ng buhay ng Tagapagligtas, naisip ko na maaari tayong makahanap ng paraan para mas marami tayong magawa tungkol sa bagay na ito kaysa sa dati. …

… Kung maibabalik ko lang ang panahon ng aking kabataan at magkaroon ng isa pang pagkakataon na matulungan ang mga tao, na sa panahong iyon, ay hindi ko lubos na napansin. Gusto ng mga kabataan na madama nilang kabilang sila at mahalaga, na madamang mahalaga sila sa iba. … Ang mga pakikisamang hindi ko nagawa, mga kaibigang hindi ko napagmalasakitan, na nagpadama ng bahagyang lungkot sa akin ngayon nitong buong nakalipas na mga taon. (Jeffrey R. Holland, “Come unto Me,” Ensign, Abr. 1998, 21)

Mga Karagdagang Aktibidad sa Pag-aaral

Mga Video

Ang mga sumusunod na video, na matatagpuan sa ChurchofJesusChrist.org, ay makatutulong sa mga estudyante na madama ang kahalagahan ng pagkakaisa sa Simbahan ni Jesucristo. Maaari mong ipanood ang isa sa mga video bago magbahagi ng mga karanasan at mag-assess sa sarili ang mga estudyante sa katapusan ng lesson na ito. Sabihin sa kanila na maghanap ng matututuhan nila tungkol sa pagkakaisa.

“Be One”

“We Don’t Need to Be the Same to Be One”

Doktrina at mga Tipan 38:15–22. Ang mga katangian at hangarin ng Tagapagligtas para sa Kanyang mga tao

Maaari mong isulat sa pisara ang dalawang heading: “Mga titulo o katangian ng Tagapagligtas” at “Ang hangarin ng Tagapagligtas para sa Kanyang mga tao.” Maaari mong hatiin sa dalawa ang klase at magtalaga ng heading sa bawat kalahati. Sabihin sa mga estudyante na basahin at isulat ang natuklasan nila sa ilalim ng mga heading na nakatalaga sa kanila.

Talakayin kung ano ang nalaman ng mga estudyante at kung paano maaaring nakatulong ang kaalamang ito sa mga naunang Banal habang naghahanda silang magtipon sa Ohio. Maaari mo ring talakayin kung paano tayo makatutugon kapag iniutos sa atin ng Tagapagligtas na gawin ang isang bagay na mahirap.

Doktrina at mga Tipan 38:35. Pangangalaga sa mga maralita at nangangailangan

Upang matulungan ang mga estudyante na matuklasan at maunawaan ang pagbibigay-diin ng Simbahan sa pangangalaga sa mga maralita at nangangailangan, maaari mong gamitin ang Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw (ChurchofJesusChrist.org). Maaaring pag-aralan ng mga estudyante ang mga bahagi 1.2 ,1.2.2, at 22.0–22.3, na inaalam ang mga paraan na mapangangalagaan natin ang mga nangangailangan.

Maaaring makakita ang mga estudyante ng mga halimbawa sa mensahe ni Pangulong Dallin H. Oaks na “Pagtulong sa mga Maralita at Naghihirap,” Liahona, Nob. 2022, 6–8.

Maaaring makahanap ang mga estudyante ng mga pagkakataong paglingkuran ang iba sa JustServe.org kung available.

Maaari mo ring ipapanood ang video na “A Good Samaritan” (5:44), na matatagpuan sa ChurchofJesusChrist.org, at talakayin kung ano ang natutuhan o nadama ng mga estudyante tungkol sa pagtulong sa mga nangangailangan.

Doktrina at mga Tipan 38:24–25. “Pahalagahan ng bawat tao ang kanyang kapatid gaya ng kanyang sarili”

Ang sumusunod na pagsusuri sa sarili ay makatutulong sa mga estudyante na makita kung paano nila pahahalagahan ang iba gaya ng kanilang sarili. Sabihin sa mga estudyante na mapanalanging isipin ang kanilang mga sagot. Pagkatapos, maaari silang pumili ng isang bagay na pagtutuunan nila para matulungan silang pagbutihin ang kanilang pag-uugali at saloobin sa iba.

Ang Pag-uugali at Saloobin Ko sa Iba

Mga Tugon: 1 = hindi kailanman; 2 = paminsan-minsan; 3 = madalas; 4 = halos palagi; 5 = palagi

____ Taos-puso kong hinahangad ang walang hanggang kapakanan at kaligayahan ng ibang tao. (Mosias 28:3)

___ Sinisikap kong unawain ang damdamin ng iba at tingnan ang kanilang pananaw. (Judas 1:22)

___ Pinatatawad ko ang mga taong nakasakit o nagkasala sa akin. (Efeso 4:32)

____ Sinisikap kong tulungan ang ibang tao kapag sila ay nahihirapan o pinanghihinaan ng loob. (Mosias 18:9)

___ Kapag naaangkop, sinasabi ko sa iba na mahal ko sila at nagmamalasakit ako sa kanila. (Juan 13:34–35)

___ Naghahanap ako ng mga pagkakataon na makapaglingkod sa ibang tao. (Mosias 2:17)

___ Nagsasabi ako ng magagandang bagay tungkol sa iba. (Doktrina at mga Tipan 42:27)

___ Mabait at matiyaga ako sa iba, kahit mahirap silang pakisamahan. (Moroni 7:45)

___ Nagagalak ako sa mga tagumpay ng iba. (Alma 17:2–4)