Lesson 51: Doktrina at mga Tipan 37–40

Doktrina at mga Tipan 37; 38:1–9, 28–33

Magtipon “sa Ohio”

Ang mga miyembro ng Ang Simbahan ni Jesucristo ng mga Banal sa mga Huling Araw ay nagtitipon sa maraming paraan. Ang unang pagkakataon na nagtipon ang mga miyembro ng Simbahan sa iisang pangkat ay nang iutos ng Panginoon ang Kanyang mga tao na magtipon “sa Ohio” (Doktrina at mga Tipan 37:1). Ang mga miyembro ng Simbahan sa New York at iba pang mga lugar ay nagsakripisyo nang malaki upang magtipon sa Ohio. Ang lesson na ito ay makatutulong sa mga estudyante na maunawaan kung bakit iniutos ng Tagapagligtas sa Kanyang mga tao na magtipon.

Mga Posibleng Aktibidad sa Pag-aaral

“[Magtungo] kayo sa Ohio”

Upang maipaturo ang kapangyarihan ng pagtitipon, isaalang-alang ang sumusunod na aktibidad. Bigyan ang isang estudyante ng isang maliit na patpat at sabihin sa kanya na baliin ito. Pagkatapos, bigyan ang estudyante ng isang bungkos ng maliliit na patpat at sabihin sa kanya na baliin ang bungkos. Ang pagbali rito ay dapat mahirap ngunit posibleng magawa. Sa huli, bigyan ang estudyante ng gayunding bungkos ng maliliit na patpat, ngunit magdagdag ng isang malaking patpat. Sabihin sa estudyante na baliin ang bungkos na ito. Hindi dapat mabali ang bungkos na ito. Sabihin sa mga estudyante na isipin kung sino ang maaaring kumatawan sa maliliit na patpat (mga indibiduwal) at kung sino ang maaaring kumatawan sa malaking patpat (si Jesucristo). Pag-isipan ang mga tanong na tulad ng mga sumusunod upang matulungan ang mga estudyante na matuklasan ang kapangyarihan ng pagtitipon sa Tagapagligtas.

• Ano ang itinuturo nito sa atin tungkol sa kapangyarihan ng pagtitipon? Tungkol sa kapangyarihan ng pagtitipon sa Tagapagligtas?

  Ang sumusunod na self-assessment ay makatutulong sa mga estudyante na pag-isipan ang kanilang mga personal na kalagayan sa oras ng lesson. Sabihin sa kanila na isipin kung paano nila sasagutin ang bawat tanong. Talakayin ang huling tanong bilang klase, at isulat sa pisara ang mga sagot ng mga estudyante para magamit na reperensya.

• Sa iyong palagay, bakit iniutos ng Tagapagligtas sa Kanyang mga tao na magtipon?

• Anong mga pagpapala ang kailangan mo sa iyong buhay na maaaring nagmumula sa pagtitipon kasama ang iba pang mga miyembro ng Simbahan?

• Ano ang ilang lugar na pinagtitipunan natin ngayon para madama ang kapangyarihan ng Tagapagligtas?

Maraming tao sa Ohio ang tumugon sa mensahe ng Pagpapanumbalik at sumapi sa Simbahan ng Tagapagligtas. Kabilang sa kanila ang isang pastor na nagngangalang Sidney Rigdon. Naunawaan ni Sidney at ng kanyang asawang si Phebe na kung tatanggapin nila ang Aklat ni Mormon at sasapi sa Simbahan, mawawala ang kanilang tahanan at kabuhayan. Mapanalangin nilang pinag-isipan ang bagay na ito at nabinyagan sila. Maraming miyembro ng kongregasyon ni Rigdon ang sumapi rin sa Simbahan.

Sa New York, maraming miyembro ng Simbahan ang nakaranas ng matinding pag-uusig. Sa ilang pagkakataon, pinagbabantaan ng kanilang mga kaaway ang buhay ng mga lider ng Simbahan, at nagpupulong nang lihim upang pagplanuhan ang paglipol sa kanila (tingnan sa Doktrina at mga Tipan 38:13, 28–29). Nang dumating si Sidney Rigdon sa New York upang makilala si Joseph Smith, ipinahayag niya kung paano tinanggap ang ebanghelyo ng Tagapagligtas sa Ohio. Nakatanggap si Joseph Smith ng paghahayag na may mga tagubilin na makatutulong sa mga Banal sa New York sa mga paghihirap na dinaranas nila.

Basahin ang Doktrina at mga Tipan 37:1–4, at alamin kung ano ang iniutos ng Panginoon na gawin ng mga miyembro ng Kanyang Simbahan.

Ang sumusunod na mapa ay makatutulong sa mga estudyante na makita ang distansya na kakailanganing lakbayin ng ilan para magtipon sa Ohio.

• Ano kaya ang naging reaksyon ng mga miyembro ng Simbahan sa kautusang ito? Bakit?

• Ano ang nalalaman mo tungkol sa Tagapagligtas na makatutulong sa iyo na kumilos nang may pananampalataya kapag tila mahirap sundin ang Kanyang mga kautusan?

Hindi nagtagal matapos matanggap ang utos na pumunta sa Ohio, nagtipon ang mga lider ng Simbahan para sa isang kumperensya at tinalakay nila ang paglipat. Ang pagsunod sa utos ay nangahulugang pag-iwan sa ari-arian at, para sa ilang mga Banal, pamilya. Natanggap ni Joseph Smith ang Doktrina at mga Tipan 38 sa kumperensyang ito. (Tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 120–27.)

Basahin ang Doktrina at mga Tipan 38:1–7, at alamin kung ano ang itinuro ng Panginoon tungkol sa Kanyang sarili.

• Paano nakatulong sa mga Banal ang pag-unawa sa mga bagay na ito tungkol sa Tagapagligtas upang magawa ang mga kinakailangang sakripisyo para magtipon?

Pinagpapala ng Panginoon ang Kanyang mga Banal kapag nagtitipon sila sa Kanya

Maaaring gawin ng mga estudyante ang kasanayan sa pag-aaral ng mga banal na kasulatan na paggawa ng listahan sa pamamagitan ng pagmamarka ng mga pagpapala ng pagtitipon sa sumusunod na scripture passage.

Basahin ang Doktrina at mga Tipan 38:28–33, at alamin ang mga paraan na mapagpapala ang mga Banal sa pamamagitan ng pagsunod sa utos ng Tagapagligtas na magtipon sa Ohio.

• Paano pagpapalain ng Tagapagligtas ang mga miyembro ng Simbahan dahil sa pagtitipon sa Ohio?

• Ano ang ilang dahilan kung bakit iniutos ng Tagapagligtas sa Kanyang mga tao na magtipon?

  Maaaring makatukoy ang mga estudyante ng katotohanang tulad ng sumusunod: Tinitipon ng Panginoon ang Kanyang mga tao upang sila ay protektahan at espirituwal na palakasin.

• Ano ang ilang paraan na pinoprotektahan at espirituwal na pinalalakas tayo ng Tagapagligtas kapag sinusunod natin ang Kanyang utos na magtipon?

Maaari mong anyayahan ang dalawang estudyante na basahin ang mga sumusunod na salaysay sa klase, o pagpartner-partnerin ang mga estudyante at anyayahan sila na basahin ang mga salaysay sa isa’t isa. Ang mga salaysay na ito ay makatutulong sa mga estudyante na makita kung paano tinupad ng Panginoon ang Kanyang mga pangako na makakasama Siya ng mga Banal at aakayin sila noong 1831 (tingnan sa Doktrina at mga Tipan 38:7, 33). Maaari mong banggitin na ang mga salaysay na ito ay makapagbibigay sa atin ng tiwala na pagpapalain tayo ng Panginoon kapag sinunod natin ang Kanyang utos na magtipon sa ating panahon.

Ang Fayette Branch

Pinamunuan ni Lucy Mack Smith ang Fayette Branch. Naglakbay sila sakay ng barko sa Erie Canal at patawid sa Lake Erie. Pagdating nila sa lawa, naharangan ng makapal na yelo sa daungan ang kanilang paglalayag. Ang mga Banal na pinanghihinaan ng loob ay nilalamig at nagugutom, at nagsimula silang magtalu-talo. Sinabi ni Lucy sa kanila:

“Nasaan ang inyong pananampalataya? Nasaan ang inyong pananalig sa Diyos? Kung iaakyat ninyo ang inyong mga kahilingan sa langit, na sana ay mabitak ang yelong ito at makapaglayag tayo, kasingtiyak na buhay ang Diyos, mangyayari ito.”

Nang sandaling iyon nakarinig si Lucy ng ingay na parang sumasabog na kulog. Ang yelo na nasa daungan ay nabitak at nagkaroon ng sapat na espasyo upang makalayag ang barko sa pagitan nito. Nagpasalamat, sama-samang nagdasal ang mga Banal. Ligtas silang naglakbay patungong Kirtland, Ohio (Tingnan sa Mga Banal, 1:138–40).

Ang Colesville Branch

Pinamunuan ni Newel Knight ang Colesville Branch. Habang nasa malayo si Newel, natumba ang kanyang tiyang si Electa Peck at nabali ang kanyang balikat. Sinubukan ng isang surgeon na ibsan ang sakit na nadarama niya at sinabi nito na isang himala kung makakapaglakbay siya sa loob ng ilang linggo. Nanaginip si Electa na si Newel ay bumalik at ipinatong ang kanyang mga kamay sa kanya at gumaling siya. Nang bumalik si Newel, narinig niya ang nangyari sa kanyang tiya at pinuntahan niya ito. Hiniling niya na basbasan siya ni Newel. Si Newel ay lumapit sa kama, inalis ang sakit sa pangalan ni Jesucristo, at iniutos na gumaling si Electa. Kinaumagahan bumangon si Electa, nagbihis, at nagpatuloy sa paglalakbay. (See Newel Knight, The Rise of the Latter-day Saints: The Journals and Histories of Newel Knight, ed. Michael Hubbard MacKay at William G. Hartley [2019], 32–33.)

Maaari mong anyayahan ang mga estudyante na magtipon sa mga grupo para talakayin ang mga sumusunod na tanong. Para maiba, maaari silang magtipon batay sa isang katangian tulad ng kanilang height o taas o ang taon kung kailan sila ipinanganak. Ipaalala sa mga estudyante na tingnan ang listahan ng mga lugar na pagtitipunan sa pisara.

• Ano ang itinuturo sa iyo ng mga salaysay na ito tungkol sa kung paano tayo mapoprotektahan at espirituwal na mapalalakas ng Tagapagligtas kapag nagtitipon tayo sa Kanya?

• Paano ka personal na napagpala dahil sa pagtanggap sa paanyaya ng Tagapagligtas na matipon sa Kanya?

Ang sarili nating pagtitipon

Sabihin sa mga estudyante na sagutin ang mga sumusunod na tanong sa kanilang study journal. Maaaring anyayahan ang mga handang estudyante na ibahagi sa klase ang kanilang mga sagot. Maaari mong ibahagi kung paano ka napagpala dahil natipon ka kasama ng mga Banal tulad ng iniutos ng Tagapagligtas.

• Sa iyong palagay, paano ka inaanyayahan ng Tagapagligtas na matipon sa Kanya?

• Isinakripisyo ng mga Banal ang kanilang mga bukid upang sundin ang utos ng Panginoon na magtipon (tingnan sa Doktrina at mga Tipan 38:37). Anong mga sakripisyo ang iniuutos sa atin ng Panginoon para matanggap ang mga pagpapala ng pagtitipon?

• Ano ang natutuhan mo tungkol sa Tagapagligtas na tutulong sa iyo na tanggapin ang Kanyang paanyaya na magtipon sa Kanya?

Karagdagang Resources

Ano ang isinakripisyo ng mga Banal upang magtipon sa Ohio?

Itinala ni Newel Knight:

Bilang pagsunod sa mga kautusan na ibinigay, ako, kasama ng Colesville Branch, ay nagsimulang magsagawa ng mga paghahanda upang pumunta sa Ohio. …

Tulad ng maaaring asahan, obligado kaming isakripisyo ang aming ari-arian. …

Dahil ginawa namin ang lahat ng makakaya namin para sa paglalakbay, nagpaalam kami sa lahat ng mahal namin sa mundong ito … [at] nagsimula kami [noong Abril 1831] para sa Ohio. (Newel Knight autobiography and journal, circa 1846–1847, 28–29, Church History Library, Salt Lake City; isinamoderno ang pagbabaybay, paggamit ng malalaking titik, at pagbabantas)

Bakit iniuutos ng Panginoon sa Kanyang mga tao na magtipon?

Itinuro ni Pangulong Henry B. Eyring ng Unang Panguluhan:

Nalaman natin mula sa karanasan na masaya tayo kapag tayo’y nagkakaisa. … Hangad [ng ating Ama sa Langit] na ipagkaloob ang sagradong pangarap nating iyon na magkaisa dahil mahal Niya tayo.

Hindi Niya ito maipagkakaloob sa atin nang hiwa-hiwalay tayo. Ang galak sa pagkakaisa na gustung-gusto Niyang ibigay sa atin ay hindi sa pag-iisa. Hangarin natin ito at maging marapat para dito na kasama ang iba. Hindi nakakagulat kung gayon na hinihimok tayo ng Diyos na magtipon upang mapagpala Niya tayo. Nais Niya tayong magtipon sa mga pamilya. Nagtatag Siya ng mga klase, ward, at branch at inutusan tayong magkita-kita nang madalas. Nasa mga pagtitipong iyon, na nilayon ng Diyos para sa atin, ang ating malaking oportunidad. Magagawa nating ipagdasal at pagsikapan ang pagkakaisang magpapasaya at magpapaibayo sa kapangyarihan nating maglingkod. (Henry B. Eyring, “Nagkakaisa ang Ating mga Puso,” Liahona, Nob. 2008, 69)

Sinabi ni Sister Reyna I. Aburto, dating tagapayo sa Relief Society General Presidency:

Sa simula pa lamang, hinangad na ng Diyos na tipunin at ayusin ang Kanyang mga anak para “isakatuparan ang [ating] kawalang-kamatayan at buhay na walang hanggan” [Moises 1:39]. Nasasaisip ang layuning iyon, inutusan Niya tayong magtayo ng mga sambahan kung saan tayo ay tumatanggap ng kaalaman at mga ordenansa ng kaligtasan at kadakilaan; gumagawa at tumutupad ng mga tipan na nagbibigkis sa atin kay Jesucristo; pinagkakalooban ng “kapangyarihan ng kabanalan” [Doktrina at mga Tipan 84:20]; at sama-samang nagtitipon nang madalas para alalahanin si Jesus at palakasin ang isa’t isa sa Kanya. Ang organisasyon ng Simbahan at ang mga gusali nito ay itinatag para sa ating espirituwal na pakinabang. “Ang Simbahan ang suporta sa pagtatatag natin ng mga walang-hanggang pamilya” [L. Tom Perry, “Ang Tradisyon ng Ilaw at Patotoo,” Liahona, Dis. 2012, 30]. (Reyna I. Aburto, “Tayo ang Simbahan ni Jesucristo ng mga Banal sa mga Huling Araw,” Liahona, Mayo 2022, 11)

Doktrina at mga Tipan 38:32. Kailan ibinigay ng Panginoon sa mga Banal ang Kanyang batas at kailan Niya sila pinagkalooban ng kapangyarihan mula sa itaas?

Hindi nagtagal matapos dumating si Propetang Joseph Smith sa Ohio, inihayag ng Panginoon ang Kanyang batas na nakatala ngayon sa Doktrina at mga Tipan 42. Kalaunan, noong 1836, pinagkalooban ng Panginoon ang Kanyang mga Banal ng kapangyarihan mula sa itaas sa Kirtland Temple (tingnan sa Doktrina at mga Tipan 95:8; 110:9).

Mga Karagdagang Aktibidad sa Pag-aaral

Mga video tungkol sa pagtitipon sa ating panahon

Maaari mong gamitin ang isa o mahigit pa sa mga sumusunod na video, na matatagpuan sa ChurchofJesusChrist.org, upang matulungan ang mga estudyante na maunawaan ang mga pagpapala ng pagtitipon sa ating panahon. Maaaring makatulong ang mga ito kapag tinalakay ng mga estudyante ang sarili nilang pagtitipon.

Para makakita ng halimbawa ng mga kabataan na nag-aanyaya sa iba na magtipon kasama nila, maaari mong panoorin ang “You Can Do This as a Quorum or Class” (4:04; panoorin mula sa time code na 0:10 hanggang 2:14).

Para makakita ng halimbawa kung paano napagpala ang isang dalagita sa pamamagitan ng pagtitipon sa Young Women camp, panoorin ang “Why Am I Here?” (4:10).

Upang matulungan ang mga estudyante na maaaring nag-iisip kung bakit dapat silang magtipon sa mga aktibidad ng Simbahan gayong nadarama nila na wala silang masyadong napapala sa mga ito, panoorin ang “Ang mga Pangangailangan na Nasa Ating Harapan” (11:57; panoorin mula sa time code na 5:59 hanggang 8:25).

Doktrina at mga Tipan 38:8–12. Ang mga makatatagal sa Ikalawang Pagparito ng Tagapagligtas

Upang matulungan ang mga estudyante na matalakay ang ilan sa mga turo ng Tagapagligtas tungkol sa Kanyang pagbabalik, maaari kang magpakita ng larawan ng Ikalawang Pagparito ng Tagapagligtas. Sabihin sa mga estudyante na basahin ang Doktrina at mga Tipan 38:8–12, at alamin kung sino ang “makatatagal sa araw” (talata 8) ng Ikalawang Pagparito (mananatili sa mundo kasama ng Tagapagligtas). Sabihin sa mga estudyante na ibahagi ang nalaman nila, at talakayin kung paanong ang pagiging malinis at dalisay ay nagtutulot sa atin na makatagal sa araw ng Ikalawang Pagparito ng Tagapagligtas.

Maaari mo ring pag-aralan ang talinghaga tungkol sa mga trigo at mga damo sa Mateo 13:24–30 (tingnan din sa Doktrina at mga Tipan 86:1–7).

Doktrina at mga Tipan 38:30. “Kung kayo ay handa kayo ay hindi matatakot”

Upang matulungan ang mga estudyante na madama ang kahalagahan ng pagiging handa, maaari mong talakayin ang mga pagkakataon na nadama mong handa ka o hindi ka handa at anyayahan ang mga estudyante na magbahagi ng sarili nilang mga karanasan. Pag-usapan kung ano ang kailangan nating paghandaan.

Maaari mo ring basahin ang pahayag na ito ni Pangulong Russell M. Nelson at talakayin ang mga sumusunod na tanong:

“Hinihikayat ko kayong gumawa ng mga hakbang para maging temporal na handa. Ngunit mas inaalala ko ang inyong espirituwal at emosyonal na paghahanda” (Russell M. Nelson, “Yakapin ang Bukas nang may Pananampalataya,” Liahona, Nob. 2020, 74).

• Paano tayo makapaghahanda sa temporal, emosyonal, at espirituwal?

• Paano natin maisasama ang Tagapagligtas sa ating paghahanda?

• Sa iyong palagay, paano makatutulong sa atin ang pagiging handa sa mga paraang ito para hindi tayo matakot?

Come, Follow Me: Voices of the Restoration [Pumarito Ka, Sumunod Ka sa Akin: Mga Tinig ng Pagpapanumbalik]

Maaari mong anyayahan ang mga estudyante na basahin at talakayin ang salaysay tungkol sa paglipat ni Phebe Carter sa Ohio. Tingnan sa bahaging “Voices of the Restoration [Mga Tinig ng Pagpapanumbalik]” para sa Doktrina at mga Tipan 37–40 sa Pumarito Ka, Sumunod Ka sa Akin—Para sa Tahanan at Simbahan. Maaaring talakayin ng mga estudyante ang mga sakripisyong ginawa niya upang matipon kasama ng mga Banal sa Ohio at kung ano ang natutuhan nila tungkol sa pagsunod sa Tagapagligtas mula sa kanyang halimbawa.

Isang pagsasadula tungkol sa pagtitipon sa Ohio

Sa halip na basahin ang salaysay tungkol sa pamumuno ni Lucy Mack Smith sa isang grupo ng mga Banal sa Ohio, maaari mong anyayahan ang mga estudyante na isadula ito. Maaari mong gamitin ang script na matatagpuan sa artikulong “Lucy Leads the Way” sa Friend, Mayo 2018, 12–13.