Lesson 53: Doktrina at mga Tipan 37-40

Doktrina at mga Tipan 39–40

“Isang Dakilang Pagpapala na Hindi Mo Pa Nalalaman”

Si James Covel ay nagtrabaho bilang Methodist minister sa New York sa loob ng 40 taon. Nang marinig niya ang mensahe ng Pagpapanumbalik, nangako siyang susundin ang anumang utos na ibinigay sa kanya sa pamamagitan ni Propetang Joseph Smith. Iniutos ng Tagapagligtas kay James na magpabinyag at magtipon kasama ng mga Banal sa Ohio at nangako sa kanya ng dakilang kapangyarihan kung gagawin at tutuparin niya ang mga sagradong tipan. Ang lesson na ito ay makatutulong sa mga estudyante na magkaroon ng hangaring gumawa at tumupad ng mga tipan kay Jesucristo upang mas matamo ang Kanyang kapangyarihan.

Mga Posibleng Aktibidad sa Pag-aaral

Paggawa at pagtupad ng mga tipan sa Diyos

Maaari kang magpakita sa mga estudyante ng isang bagay gaya ng lampara, na magagamit lang nang husto kapag nakasaksak sa isang power source. Itanong sa mga estudyante kung ano ang magagawa ng lampara nang ito lang kumpara sa kapag nakasaksak ito sa power source. Sabihin sa mga estudyante na talakayin kung paano ito maaaring kumatawan sa ating mga tipan sa Diyos.

Basahin ang “Tipan” sa Gabay sa mga Banal na Kasulatan at ang sumusunod na pahayag ni Pangulong Russell M. Nelson, at alamin ang kahulugan ng mga tipan.

Ang tipan ay … sagradong pangako sa Diyos. Siya ang nagbibigay ng mga kondisyon. Maaaring piliin ng bawat tao na tanggapin ang mga kondisyong iyon. Kung tatanggapin ng isang tao ang mga kondisyon ng tipan at susundin ang batas ng Diyos, siya ay tatanggap ng mga pagpapalang nauugnay sa tipang iyon. (Russell M. Nelson, “Mga Tipan,” Liahona, Nob. 2011, 86.)

• Paano mo ilalarawan o bibigyang kahulugan ang tipan?

• Anong mga tipan ang ginawa mo na sa Panginoon?

• Paano naimpluwensyahan ng mga tipang ito ang iyong buhay?

Inaanyayahan ako ni Jesucristo na makipagtipan sa Kanya

Si James Covel ay isang Methodist minister. Nang malaman niya ang tungkol kay Propetang Joseph Smith, nangako si Covel sa Panginoon “na kanyang susundin ang alinmang kautusan na ibibigay sa kanya ng Panginoon sa pamamagitan ni Joseph, ang Propeta” (Doktrina at mga Tipan 39, section heading).

Basahin ang Doktrina at mga Tipan 39:1–9 at alamin ang natutuhan mo tungkol kay Jesucristo na makahihikayat sa isang tao na makipagtipan sa Kanya.

• Ano ang nalaman mo tungkol sa Tagapagligtas?

• Ano ang ipinagagawa sa atin ng Tagapagligtas para matanggap ang Kanyang kapangyarihan?

Upang matulungan ang mga estudyante na matukoy ang isang alituntunin, maaari nilang kumpletuhin sa pisara o sa kanilang study journal ang sumusunod na pahayag: “Kung tayo ay __________, matatanggap natin ang ___________.”

Maaaring tumukoy ang mga estudyante ng alituntuning tulad nito: Kung tayo ay gagawa at tutupad ng mga sagradong tipan sa Diyos, matatanggap natin ang Kanyang kapangyarihan.

Kung gagamitin ang object lesson, isaksak ang lamp upang ipakita na ang paggawa ng mga tipan ay tumutulong sa atin na matanggap ang kapangyarihan ng Tagapagligtas. Maaari mong itanong sa mga estudyante kung paano nito maipapakita ang alituntuning natukoy nila.

Basahin ang Doktrina at mga Tipan 39:10–15 at alamin ang ipinagawa ng Panginoon kay James Covel para makipagtipan sa Kanya.

• Ano ang ipinangako ni Jesucristo kay James Covel kung gagawin niya ang tipang ito?

• Paano naaangkop sa atin ngayon ang payo ng Panginoon kay James Covel?

• Kailan mo nakita ang impluwensya ng Tagapagligtas sa iyong buhay o sa buhay ng isang taong kilala mo?

Takot, pag-uusig, at mga alalahanin ng sanlibutan

Si James Covel ay may malaking pamilya, mga kaibigan, at malapit na komunidad sa New York. Iniutos sa kanya ng Tagapagligtas na magpabinyag at lumipat kasama ng mga Banal sa Ohio. Ang pagsapi sa Simbahan ay magiging isang sakripisyo para kay James Covel.

Basahin ang section heading ng Doktrina at mga Tipan 40 gayundin ang talata 1–3, at alamin ang desisyong ginawa ni James Covel.

Maaaring magandang pagkakataon ito para sanayin ang paggamit ng mga alituntunin ng pagtatamo ng espirituwal na kaalaman. Maaari ninyong talakayin kung paano maaaring kumilos si James Covel nang may pananampalataya. Gayundin, isiping talakayin kung paano niya sana nakita ang kanyang mga desisyon at ang payo ng Panginoon nang may walang-hanggang pananaw.

• Paano maaaring maging dahilan ang “takot na mausig” (talata 2) sa isang tao para tanggihan o sirain ang kanilang mga tipan sa Diyos?

• Ano ang ilan sa “mga alalahanin ng sanlibutan” (talata 2) na nagtutulak sa mga tao na tanggihan ang mga tipan sa Diyos sa panahon ngayon?

Basahin ang sumusunod na pahayag ni Pangulong Russell M. Nelson o panoorin ang video na “Daigin ang Mundo at Makasumpong ng Kapahingahan” (18:31), na matatagpuan sa ChurchofJesusChrist.org, mula sa time code na 4:21 hanggang 5:39. Habang nagbabasa o nanonood ka, alamin ang kapangyarihang ipinangako sa mga taong gumagawa at tumutupad ng mga tipan sa Diyos:

Ang paggawa at pagtupad ng mga tipan ay talagang nagpapadali sa buhay! Ang bawat taong nakikipagtipan sa mga bautismuhan at sa mga templo—at tinutupad ang mga iyon—ay mas higit na nakatatamo ng kapangyarihan ni Jesucristo. Pagnilayan sana ninyo ang kagila-gilalas na katotohanang iyon!

Ang gantimpala sa pagtupad ng mga tipan sa Diyos ay kapangyarihang nagmumula sa langit—kapangyarihang nagpapalakas sa atin upang mas makayanan ang ating mga pagsubok, tukso, at dalamhati. Pinadadali ng kapangyarihang ito ang ating buhay. Ang mga taong nagsasabuhay ng mga nakatataas na batas ni Jesucristo ay nakatatamo ng Kanyang nakatataas na kapangyarihan. Sa gayon, ang mga tumutupad sa tipan ay nagiging karapat-dapat sa isang espesyal na uri ng kapahingahan na dumarating sa kanila sa pamamagitan ng kanilang kaugnayan dala ng pakikipagtipan sa Diyos. (Russell M. Nelson, “Daigin ang Mundo at Makasumpong ng Kapahingahan,” Liahona, Nob. 2022, 96)

• Ano ang pinakanapansin mo sa pahayag ni Pangulong Nelson?

Bigyan ang mga estudyante ng pagkakataong pagnilayan ang hangarin nilang gumawa at tumupad ng mga tipan sa Tagapagligtas para matanggap ang Kanyang kapangyarihan. Maaaring magsulat ang mga estudyante sa kanilang journal o sa mga piraso ng papel. Maaari din nilang talakayin ang natutuhan o nadama nila sa maliliit na grupo o sa klase.

Para tapusin ang lesson, maaari mong ibahagi kung paano mo nakita ang kapangyarihan ng Tagapagligtas sa iyong buhay nang gumawa ka ng mga tipan sa Diyos. Hikayatin ang mga estudyante na patuloy na sikaping gawin at tuparin ang kanilang mga tipan at magtiwala sa pangako ng Panginoon na pagpapalain sila sa kanilang mga pagsisikap.

Karagdagang Resources

Paano ako pinagpapala ng pakikipagtipan sa Diyos?

Itinuro ni Pangulong Russell M. Nelson:

Lahat ng nakipagtipan sa Diyos ay maaaring makatanggap ng espesyal na uri ng pagmamahal at awa. …

Kapag kayo at ako ay nakipagtipan sa Diyos, nagiging mas malapit ang ating ugnayan sa Kanya kaysa noong bago tayo makipagtipan. Ngayon ay nakabigkis na tayo sa isa’t isa. Dahil sa ating tipan sa Diyos, hindi Siya kailanman mapapagod sa Kanyang mga pagsisikap na tulungan tayo, at hindi kailanman mauubos ang Kanyang maawaing pasensya sa atin. Ang Diyos ay may espesyal na pagmamahal para sa bawat isa sa atin. Malaki ang inaasahan Niya para sa atin. …

Nakikita ba ninyo ang kahalagahan nito? Ang mga tumutupad sa kanilang mga tipan sa Diyos ay magiging grupo ng mga kaluluwang kayang labanan ang mga kasalanan! Ang mga tumutupad sa kanilang mga tipan ay magkakaroon ng lakas na labanan ang palagiang impluwensya ng mundo. (Russell M. Nelson, “Ang Walang Hanggang Tipan,” Liahona, Okt. 2022, 5–6, 8)

Ipinaliwanag ni Elder David A. Bednar ng Korum ng Labindalawang Apostol:

Ang mga pangako at pagpapala ng tipan ay hindi magiging posible kung wala ang ating Tagapagligtas na si Jesucristo. Inaanyayahan Niya tayong umasa sa Kanya [tingnan sa Doktrina at mga Tipan 6:36], lumapit sa Kanya [tingnan sa 3 Nephi 12:20; Moroni 10:32–33], matuto tungkol sa Kanya [tingnan sa Mateo 11:29; Doktrina at mga Tipan 19:23], at ibuklod ang ating sarili sa Kanya [tingnan sa Doktrina at mga Tipan 43:9] sa pamamagitan ng mga tipan at ordenansa ng Kanyang ipinanumbalik na ebanghelyo.

Ang mga tipan at ordenansa ang mga building block na nagtutulot sa atin na maitatag ang ating buhay sa “bato na ating Manunubos” [Helaman 5:12] at sa Kanyang Pagbabayad-sala. Dahil ang matapat na pagtupad sa mga sagradong tipan ay matibay na nagbibigkis sa atin sa Tagapagligtas, Siya ay nagiging ang pinakadakilang pinagmumulan ng espirituwal na patnubay at lakas sa ating buhay. (David A. Bednar, “Nakabigkis sa Tagapagligtas sa Pamamagitan ng mga Tipan,” Para sa Lakas ng mga Kabataan, Peb. 2022, 5)

Paano ko mapapalalim at mapapalakas ang aking katapatan sa Tagapagligtas?

Itinuro ni Elder Neil L. Andersen ng Korum ng Labindalawang Apostol:

Una, maaari nating ituon nang mas lubusan ang ating sarili sa buhay, mga turo, karingalan, kapangyarihan, at nagbabayad-salang sakripisyo ni Jesus. Sabi ng Tagapagligtas, “Isaalang-alang ako sa bawat pag-iisip” [Doktrina at mga Tipan 6:36]. Ipinapaalala sa atin ni Apostol Juan, “Tayo’y umiibig sapagkat siya ang unang umibig sa atin” [1 Juan 4:19]. Habang lalo nating nararanasan ang Kanyang pagmamahal, lalo pa natin Siyang minamahal at, natural na natural, higit nating [tinutularan] ang Kanyang halimbawa ng pagmamahal at pangangalaga sa mga tao sa ating paligid. Sa bawat matwid na pagsulong palapit sa Kanya, nakikita natin Siya nang mas malinaw [tingnan sa David B. Haight, “Temples and Work Therein,” Ensign, Nob. 1990, 61]. Sinasamba natin Siya, at sinisikap natin sa ating mumunting paraan na tularan Siya [tingnan sa Mosias 5:13].

Sumunod, habang lalo nating nakikilala at minamahal ang Tagapagligtas, lalo pa nating ninanais na ipangako sa Kanya ang ating katapatan at tiwala. Nakikipagtipan tayo sa Kanya. Nagsisimula ito sa ating mga pangako sa binyag, at pinagtitibay natin ang mga pangakong ito at ang iba pa kapag nagsisisi tayo araw-araw, humihingi ng kapatawaran, at sabik na umaasam na tumanggap ng sakramento bawat linggo. Nangangako tayo na “lagi siyang alalahanin at susundin ang kanyang mga kautusan” [Doktrina at mga Tipan 20:77].

Kapag handa na tayo, tinatanggap natin ang mga ordenansa at tipan ng templo. Nadarama ang impluwensya ng kawalang-hanggan sa ating mga sagrado at tahimik na sandali sa bahay ng Panginoon, masaya tayong nakikipagtipan sa Diyos at pinatitibay natin ang ating pagpapasiya na tuparin ang mga iyon.

Ang paggawa at pagtupad ng mga tipan ay nagtutulot na mas tumimo sa ating puso ang pagmamahal ng Tagapagligtas. (Neil L. Andersen, “Higit na Paglapit sa Tagapagligtas,” Liahona, Nob. 2022, 74)

Saan ko malalaman ang iba pa tungkol kay James Covel?

Jed Woodworth, “James Covel and the ‘Cares of the World,’” sa Revelations in Context, na matatagpuan sa bahaging Church History ng Gospel Library

“James Covel,” na matatagpuan sa Historical Resources sa bahaging Church History ng Gospel Library

Mga Karagdagang Aktibidad sa Pag-aaral

Alternatibong simula ng lesson

Isulat ang salitang “Pagtapos” sa pisara.

• Ano ang karaniwang sinisimulan ng mga tinedyer ngunit nahihirapan silang tapusin ito?

• Ano ang nahihirapang tapusin ng mga tao?

Sabihin sa mga estudyante na pag-isipan kung may isang bagay sila na sinimulan na iniisip nila na sana ay natapos nila pero hindi nila ito natapos. Sa pag-iisip tungkol sa pagiging disipulo ni Jesucristo, maaari mong sabihin sa mga estudyante na isipin kung bakit maaaring magsimula ang ilan sa landas ng tipan ngunit pinipili ng mga ito na huwag magpatuloy. Maaari mong ibahagi na sa Doktrina at mga Tipan 39–40, pag-aaralan ng mga estudyante ang salaysay tungkol sa isang lalaking hindi nagpatuloy sa kanyang sinimulan. Sa pag-aaral nila, maaaring alamin ng mga estudyante ang mga alituntuning sinubukan ng Panginoon na ituro sa lalaking ito na makatutulong sa atin na maging mga tagatapos.

Ang talinghaga tungkol sa manghahasik (tingnan sa Doktrina at mga Tipan 40:2)

Ang karanasan ni James Covel ay isang magandang halimbawa ng talinghaga ng Tagapagligtas tungkol sa manghahasik (tingnan sa Mateo 13:18–23). Maaari mong balikan ang talinghaga at talakayin kung paano ipinapakita ni James Covel ang binhi “sa mga tinikan” (talata 22). Iniutos sa atin ng Tagapagligtas na itanim nang malalim ang salita ng Diyos sa “mabuting lupa“ (talata 23). Maaaring kabilang sa mga tanong sa talakayan ang:

• Ano kaya ang kahalintulad ng tinikan o matinik na lupa sa ating panahon?

• Anong “mga alalahanin ng sanlibutan“ (Doktrina at mga Tipan 40:2) ang makakaapekto sa ating espirituwal na pag-unlad?

• Ano ang magagawa natin upang maitanim nang malalim ang salita ng Diyos sa ating puso?

Ang panaginip ni Lehi

Maaari mong anyayahan ang mga estudyante na pag-aralan ang mga grupo ng mga tao sa panaginip ni Lehi (tingnan sa 1 Nephi 8:19–34). Talakayin kung paanong ang kuwento ni James Covel ay isang halimbawa ng mga taong nakita ni Lehi sa 1 Nephi 8:24–28. Maaari mong anyayahan ang mga estudyante na ibahagi kung ano ang magagawa natin para kumilos nang may pananampalataya kapag nahaharap sa mga tukso ng mundo. Maaaring basahin ng mga estudyante ang 1 Nephi 8:33–34 at talakayin kung ano ang ginawa ng mga taong hindi ikinahihiya ang bunga para kumilos nang may pananampalataya.

Muling isulat ang kuwento ni James Covel

Matapos pag-aralan ng klase ang mga bahagi 39 at 40, sabihin sa kanila na kunwari ay may pagkakataon silang isulat muli ang kuwento ni James Covel. Maaari mong hilingin sa kanila na isipin na kunwari ay gumawa ng ibang desisyon si James matapos matanggap ang payo ng Tagapagligtas sa bahagi 39. Maaari mong sabihin sa mga estudyante na talakayin kung ano kaya ang buhay ni James Covel kung iba ang pinili niya.

• Anong mga pagpapala kaya ang natanggap niya?

• Anong mga pagkakataon kaya ang maaaring naibigay sa kanya?

Ipinapaliwanag ni Pangulong Nelson ang mga sagradong tipan

Ang video na “Elder Nelson Talks about Covenants“ (4:45) mula sa time code na 0:00 hanggang 1:12 ay magagamit sa simula ng lesson upang matulungan ang mga estudyante na maunawaan kung ano ang mga tipan. Mapapanood ang video na ito sa ChurchofJesusChrist.org.