“Lesona 56—Fotopampianarana sy Fanekempihavanana 42: Ireo lalàn’ny Tompo,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 42,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 56: Fotopampianarana sy Fanekempihavanana 41–44
Fotopampianarana sy Fanekempihavanana 42
Ireo lalàn’ny Tompo
Ao amin’ny Fotopampianarana sy Fanekempihavanana 42, ny Tompo dia nanatanteraka ny fampanantenany tamin’ny Olomasina fa hanome azy ireo ny lalàny Izy rehefa nifindra tany Ohio izy ireo. Nametraka lalàna ankapobeny momba ny fitondran-tena ho an’ny mpikamban’ny Fiangonana izy. Ity lesona ity dia hanampy ireo mpianatra haneho ny fitiavany ny Tompo amin’ny alalan’ny fankatoavana ny didiny.
Sahanasa fianarana azo atao
Fomba fijery roa samy hafa
Atombohy amin’ny fanasana ireo mpianatra hisaintsaina ary avy eo hizara ny eritreriny momba ity fanontaniana manaraka ity ny fotoam-pianarana:
-
Raha miainga avy amin’ny zavatra hitanao eto amin’izao tontolo izao ankehitriny, nahoana araka ny eritreritrao no mila didy avy amin’ Andriamanitra isika?
Soraty ny hoe mankatò sy ny hoe tsy mankatò any an-tampon’ny tsanganana roa samy hafa eo amin’ny solaitrabe. Azon’ny mpianatra tanisaina ao amin’ny tsanganana mifanaraka amin’izany avy eo ny antony mety hankatoavan’ny olona na tsy hankatoavany ireo didy.
Asao ny mpianatra haka fotoana fohy hisaintsainana ny antony itandreman’izy ireo na tsia ny didin’ Andriamanitra.
Rehefa mandalina ianao androany, dia katsaho ny fitarihan’ny Fanahy Masina mba hanampiana anao hahatakatra kokoa ny antony nanomezan’ny Tompo didy, sy ny fomba ahafahanao manohy ny fankatoavanao, na manatsara izany mihitsy aza.
Ny lalàn’ny Tompo
Nampanantena ny Olomasina ny Tompo fa homeny azy ireo ny lalàny rehefa tafangona ao Ohio izy ireo (jereo ny Fotopampianarana sy Fanekempihavanana 38:32). Fotoana fohy taorian’ny nahatongavan’izy ireo tao Ohio, ny Mpaminany Joseph Smith sy ireo loholona niisa 12 dia nampiray ny finoan’izy ireo tao anatin’ny vavaka natao tamin-kitsimpo (Fotopampianarana sy Fanekempihavanana 41:3) ary nangataka ny Tompo mba hanambara ny lalàny.
Vakio ny Fotopampianarana sy Fanekempihavanana 42:1–3 mba hahitana ny valintenin’ny Tompo.
-
Inona no zavatra nisongadina taminao tao amin’ireo andininy ireo?
Avy eo ny Tompo dia nampianatra didy maromaro izay tiany hiainan’ny olony.
Ho an’ny sahanasa manaraka dia afaka misafidy izay andininy hovakiny ireo mpianatra, na azonao atao ny mampiandraikitra izany azy ireo. Asao ny mpianatra hanoratra ny didy hitany eny amin’ny solaitrabe sy ny (ireo) andininy nahitany azy ireo.
Vakio farafahakeliny ny roa amin’ireto andian-tsoratra masina manaraka ireto, ka tadiavo ny didin’ny Tompo:
Araka ny voalazan’ny andininy 29, nahoana isika no tokony hitandrina ny didin’ny Tompo?
Ity andininy ity dia mampianatra fa rehefa mitandrina ny didin’ny Tompo isika dia maneho ny fitiavantsika Azy. Ny mpianatra dia afaka manisy marika io fahamarinana ao amin’ny andininy 29 io ary mampifandray ny andinin-tsoratra masina amin’ny Jaona 14:15. Afaka mamaky ny Fotopampianarana sy Fanekempihavanana 41:5 koa ny mpianatra, mba hitadiavana hoe inona koa no dikan’ny fankatoavantsika amin’ny Tompo.
Hevero ny hizara ny mpianatra ao anatina vondrona mba hamaky sy hamaly ireto fanontaniana manaraka ireto.
Ny Ho zatovo mahery!: Torolalana amin’ny fanaovana safidy dia mampianatra hoe:
Mba hanampiana anao hanao safidy tsara dia manome didy Andriamanitra. Manao izany Izy satria tiany ianao. Ary ny antony tsara indrindra hankatoavana ny didin’ Andriamanitra dia satria tia Azy ianao. Ny fitiavana no ampahany manan-danja indrindra ao amin’ireo didin’ Andriamanitra. (Ho zatovo mahery!: Torolalana amin’ny fanaovana safidy [2022], 11)
-
Ahoana no ilazana fa ny didin’ Andriamanitra dia maneho ny fitiavany?
-
Ahoana no ilazana fa ny fankatoavantsika ny didin’ Andriamanitra dia maneho Aminy fa tia Azy isika?
Ny didiny
Ny mpianatra sasany dia mety ho te hanao ity sahanasa manaraka ity alalan’ny fampiasana didy iray tsy voatanisa ao amin’ny Fotopampianarana sy Fanekempihavanana 42. Hevero ny hanitatra ireo karazana didy mba hamaly ireo zavatra ilain’ny mpianatrao sy ny faniriany izany.
Misafidiana didy iray ao amin’ny fizarana 42 izay tianao hianarana kokoa na hosaintsainina.
Rehefa mandalina ianao, dia miomàna hizara izao manaraka izao momba ny didy nofidinao. Azonao atao ny manoratra ny eritreritrao ao amin’ny diary fandalinanao.
-
Andinin-tsoratra masina hafa, na teny nambara nandritra ny fihaonamben’ny Fiangonana maneran-tany, na andiam-pehezanteny ao amin’ny Ho zatovo mahery! (boky kely) izay mampitombo ny fahatakaranao io didy io
-
Ny antony heverinao fa mahatonga ny Ray any An-danitra be fitiavana sy mahafantatra ny zava-drehetra hanome antsika io didy io
-
Ny fomba eritreretinao hoe anampian’ny fitandremana io didy io antsika hanaraka ny Mpamonjy sy haneho ny fitiavana Azy ary ho tonga tahaka Azy kokoa
-
Ny zavatra niainanao nandritra ny fitandremana io didy io (tsy voatery atao; aza zaraina raha masina loatra na mahakasika loatra ny tena manokana izany)
Omeo fotoana ahafahana mizara izay zavatra nianarany ireo mpianatra. Azonao atao ny manasa azy ireo hizara ny eritreriny ao anaty vondrona kely.
Raha toa ka efa nanoratra didy teny amin’ny solaitrabe ireo mpianatra dia azonao atao ny manasa azy ireo hanisy boribory manodidina ireo didy izay vao avy nianarany. Avy eo dia asao ny mpianatra mba hisafidy didy iray na roa izay heveriny fa tena ilaina horesahina ao an-dakilasy. Angataho izy ireo haka sary an-tsaina ny olona iray manana fahasarotana amin’ny fahatakarana sy fitandremana io didy io. Asao ny iray kilasy hiara-hiasa hanampy io olona io. Azonao atao ny manomboka amin’ny fanasana ireo mpianatra izay nandalina ireo didy ireo mba hizara hevitra vitsivitsy avy amin’ny fandalinany. Asao koa ny mpianatra hafa hizara ny eritreriny izay mety hanampy. Azonao atao ny mametraka fanontaniana fanaraha-maso toy izao manaraka izao: “Inona avy ireo sakana mety hatrehin’io olona io?” “Ahoana no ahafahantsika manampy azy ireo handresy ireo sakana ireo?” “Ahoana no ahafahantsika manampy azy ireo hahatakatra sy hahatsapa ny fitiavan’ny Tompo amin’ny alalan’io didy io?”
Ny fankatoavako ny didin’ Andriamanitra
Tadidio ny zavatra nianaranao sy tsapanao nandritra ity lesona ity, ka mifidiana didy iray izay heverinao fa tian’ny Tompo hifantohanao. Valio ao anatin’ny diary fandalinanao ireto fanontaniana manaraka ireto:
-
Ahoana no ahafahan’ny fankatoavana io didy io hitahy ny fiainako?
-
Ahoana no hanampian’io didy io ahy haneho ny fitiavako ny Ray any An-danitra sy i Jesoa Kristy ary hanaraka Azy Ireo?
-
Inona no zavatra iray manokana tiako hatao mba hanehoana ny fitiavako ny Tompo sy hitandremana io didy io?
Amporisiho ny mpianatra hanao drafitra mba hitandremana tsara kokoa ilay didy nofidin’izy ireo.