“Lesona 57—Fotopampianarana sy Fanekempihavanana 42:29–39: Natokana ho an’ny Tompo,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 42:29–39,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 57: Fotopampianarana sy Fanekempihavanana 41–44
Fotopampianarana sy Fanekempihavanana 42:29–39
Natokana ho an’ny Tompo
Nisy vondrona mpikamban’ny Fiangonana nipetraka tao amin’ny toeram-pambolena sy fiompian’i Isaac sy i Lucy Morley, izay nanana faniriana lehibe hiaina ny filazantsaran’i Jesoa Kristy sy hifampikarakara. Tamin’ny alalan’ny Mpaminany Joseph Smith no nanambaran’ny Tompo ny lalàn’ny fanokanana, mba hanampiana ny Olomasina hikarakara ny mahantra. Ity lesona ity dia afaka manampy ireo mpianatra hampitombo ny faniriany hiaina ny lalàn’ny fanokanana.
Sahanasa fianarana azo atao
“Ianareo no tanako”
Ny Filoha Dieter F. Uchtdorf, izay tao amin’ny Fiadidiana Voalohany tamin’izany, dia nizara izao manaraka izao:
“You Are My Hands”
As disciples of Jesus Christ, our Master, we are called to support and heal rather than condemn.
Nisy tantara iray notantaraina izay nilaza fa nandritra ny fanjerana baomba tany amin’ny tanàna iray tamin’ny Ady Lehibe faha-II, dia niharan’ny fahasimbana goavana ny sarivongana lehiben’i Jesoa Kristy iray. Rehefa hitan’ny mponina teo amin’ilay tanàna tao anatin’ny korontan-javatra rava ilay sarivongana dia nitomany izy ireo satria marika tian’izy ireo fatratra izay maneho ny finoany sy ny fisian’ Andriamanitra eo amin’ny fiainany izany.
Afaka nanamboatra ny ankamaroan’ny simba tamin’ilay sarivongana ihany ireo manam-pahaizana, saingy tena simba ny tanany ka tsy azo naverina tamin’ny laoniny. Nisy olona sasany nanoro hevitra mba haka mpanao sary sokitra hanao tanana vaovao, nefa ny hafa dia naniry ny hamelana izany amin’izao, mba ho mpampahatsiahy mandrakizay ny loza nateraky ny ady. Tamin’ny farany dia nijanona tanteraka tsy nisy tanana ilay sarivongana. Kanefa nasian’ireo mponina teo amin’ilay tanàna soratra tsotra iray teo amin’ny fototr’ilay sarivongan’i Jesoa Kristy izay manao hoe: “Ianareo no tanako.” (Dieter F. Uchtdorf, “Ianareo no tanako,” Liahona, mey 2010)
-
Inona no nisongadina taminao tamin’io tantara io?
-
Amin’ny fomba ahoana no ahafahantsika ho tanan’i Jesoa Kristy?
Asao ny mpianatra hanoratra hoe “Ny tanany” na hanoritra ny iray amin’ireo tanany ao anatin’ny diariny. Asao izy ireo hisaintsaina ny faniriany manokana ho lasa tanan’ny Tompo. Amin’ny fiafaran’ny lesona dia hanana fahafahana hanoratra ny eritreriny sy ny zavatra tsapany izy ireo.
Ny lalàn’ny fanokanana
Tany am-piandohan’ny taona 1831 dia nifindra monina tany Ohio ireo mpikamban’ny Fiangonana nipetraka tany New York. Maro tamin’ireo Olomasina ireo no nahantra ary namela ny ankamaroan’ny fananany. Tany Ohio dia nisy vondrona lehibe iray nahitana mpikambana vaovao nipetraka tao amin’ny toeram-pambolena sy fiompian’i Isaac sy i Lucy Morley. Nanangana vondrona iombonana iray izy ireo izay nantsoina hoe “ilay Fianakaviana.” Ny iray amin’ireo zavatra inoana niombonan’izy ireo dia ny hoe an’ny mpikambana rehetra tao amin’ny vondrona ny fananan’ny tena manokana rehetra. Niresaka momba ny zavatra nataon’izy ireo ny Tompo rehefa nanambara ny lalàny tamin’i Joseph Smith Izy. Ankoatra ireo lalàna hafa, ny Tompo dia nanambara ireo fitsipiky ny lalàn’ny fanokanana. Ny fianarana sy ny fiainana ireo fitsipika ireo dia fomba iray ahafahan’ny Olomasina ho tanan’ny Tompo.
Asao ny mpianatra hizara ny zavatra henony momba ny lalàn’ny fanokanana, na hametraka izay fanontaniana mety hananan’izy ireo. Afaka mijery ny famaritana ny fanokanana ny mpianatra, na azonao omena ity iray ity izay avy amin’ny Loholona D. Todd Christofferson ao amin’ny Kôlejin’ny Apôstôly Roambinifolo.
Ny manokana dia midika hoe fanokanana zavatra iray ho masina, natolotra ho an’ny tanjona masina. (D. Todd Christofferson, “Reflections on a Consecrated Life,” Liahona, Nov. 2010, 16)
Nangataka ny Olomasina tany Ohio ny Tompo mba hanokana ny fananany ho Azy amin’ny alalan’ny fanomezana izany ho an’ny Fiangonany.
Vakio ny Fotopampianarana sy Fanekempihavanana 42:29–38 mba hitadiavana ny antony nangatahin’ny Tompo azy ireo hanao izany.
Ireo mpianatra dia mety hahita ireto antony manaraka ireto: mba hanehoana ny Tompo ny fitiavantsika Azy (andininy 29), mba hikarakarana ny mahantra (andininy 30–31, 34), mba hividianana tany izay ahafahan’ny Olomasina mivondrona rehefa miverina ny Mpamonjy (andininy 35–36), ary mba hanorenana trano fiangonana sy tempoly (andininy 35). Mety hanampy ny manazava fa ilay Jerosalema Vaovao voalaza ao amin’ny andininy 35 dia manondro ny “toerana hiangonan’ny Olomasina sy hanjakan’i Kristy tenany mihitsy miaraka amin’izy ireo mandritra ny Arivotaona” (Torolalana ho an’ny Soratra Masina, “Jerosalema Vaovao,” scriptures.ChurchofJesusChrist.org).
-
Nahoana araka ny eritreritrao no nanasa ny Olomasina hahatsiaro sy hikarakara ny mahantra ny Tompo?
-
Inona avy ireo fahamarinana azontsika ianarana avy amin’ireo andininy ireo?
Ankoatra ireo fahamarinana hitan’ny mpianatra dia ampio izy ireo hahita fa manompo Tompo isika amin’ny alalan’ny fanampiana ireo mahantra ary manasa antsika ny Tompo mba hanokana izay ananantsika mba hikarakarana ny mahantra sy hanorenana ny fanjakany.
Mba hanampiana ny mpianatra hahatakatra ny zavatra novakiny dia azonao atao ny mangataka azy ireo hilalao an-tsehatra ny zavatra nangatahana mba hataon’ireo mpikamban’ny Fiangonan’ny Tompo naverina tamin’ny laoniny tany am-piandohana. Alamino ho vondrona manana habe samihafa ireo mpianatra, toy ny fianakaviana. Mizarà zavatra madinika azo tsapain-tanana, toy ny vatomamy na vola madinika, eo anivon’ireo vondrona, saingy aza zaraina mitovy izany. Omena betsaka kokoa noho ny vondrona hafa ny vondrona sasany. Azonao atao mihitsy aza ny mizara ireo zavatra azo tsapain-tanana ireo mba tsy hahazoan’ny vondrona sasany na inona na inona. Asao ny mpianatra haneho ny zavatra tokony hitranga araka ny torolalan’ny Tompo ao amin’ny Fotopampianarana sy Fanekempihavanana 42:29–35. Ampio ny mpianatra haka sary an-tsaina ny zavatra ilain’ny “fianakaviana” sy ny fomba hanomezana izany. Hevero ny hanome toe-javatra vitsivitsy izay mety iainan’ny fianakaviany sy ny fomba mety hamaritana izay ilainy avy amin’izany. Raha ilaina, dia azo ampiasaina ho toy ny trano fitehirizan’ny Tompo ny vilia baolina iray. Ary koa ny mpianatra iray na roa dia afaka mandray anjara amin’ilay filankevitra voalaza ao amin’ny andininy 31 sy 34, izay nantsoin’ny Tompo mba hahazoana antoka fa nahazo izay nilainy ny rehetra.
Rehefa mizara ny valinteniny amin’ireto fanontaniana manaraka ireto ny mpianatra, dia mitadiava fomba hanampiana azy ireo hahatakatra fa ny fitsipiky ny fanokanana dia mitovy ho an’ireo zanaky ny fanekempihavanan’ Andriamanitra rehetra, amin’ny fotoampitantanana rehetra. Na izany aza, ny fomba manokana angatahin’ Andriamanitra amin’ny vahoakany mba hampiharana ny lalàn’ny fanokanana dia mety tsy hitovy.
-
Ahoana avy ireo fomba angatahan’ny Tompo mba hanokanana izay ananantsika amin’izao fotoana izao?
-
Inona avy ireo ohatra sasantsasany izay maneho ny fampiasana ny fotoanao sy ny talentanao ary ny fitahiana azonao avy amin’ Andriamanitra mba hanampiana ny hafa?
-
Ahoana no fomba ahafahantsika mikarakara ny zavatra ilain’ny mahantra?
3:1Fast Offerings: A Simple Commandment with a Marvelous Promise
Excerpt from President Henry B. Erying’s talk “Is Not This the Fast That I Have Chosen?” He discusses the blessings of the fast and the story of a humble woman who pays a generous fast offering.
2:3Syrian Refugee - “The moment I was shot I knew I would never walk again”
With millions impacted by the Syrian civil war that broke out in 2011 many have fled for safety and refuge. Watch and listen to Nadia’s story; A 12 year old Syrian refugee child, who while fleeing Syria, was shot in the back and paralyzed.
4:32A Thousand Days
By digging wells and boreholes in drought-stricken countries of Africa, The Church of Jesus Christ of Latter-day Saints helps provide health and happiness to entire villages.
-
Inona no fantatrao momba an’i Jesoa Kristy, izay mety hanosika anao hanokana ny fotoanao sy ny talentanao ary ny fanananao ho Azy?
-
Nahoana araka ny eritreritrao no tian’ny Mpamonjy isika hanompo Azy amin’ny alalan’ny fanompoana ny olona sahirana? (Mba hahitana hevi-baovao fanampiny dia azonao atao ny mijery ny iray na maromaro amin’ireto andinin-tsoratra masina ireto: Jakoba 2:17–19; Môzià 4:21–25; Fotopampianarana sy Fanekempihavanana 38:24–27; 104:14–17.)
-
Nahoana araka ny eritreritrao no mahatonga antsika hitovy kokoa amin’i Kristy ny fanampiantsika ny sahirana?
Mety hanampy ny mampahafantatra ny mpianatra fa ao anatin’ny fanafiana masina any amin’ny tempoly, dia manao fanekempihavanana ny mpikambana fa hitandrina ny lalàn’ny fanokanana amin’ny alalan’ny fanokanana “ny fotoan’izy ireo, ny talentany, ary ny zavatra rehetra izay nitahian’ny Tompo azy ireo mba hananganana ny Fiangonan’i Jesoa Kristy eto an-tany” (Boky torolalan’ny Fiangonana maneran-tany: Manompo ao amin’ Ny Fiangonan’i Jesoa Kristy ho an’ny Olomasin’ny Andro Farany, 27.2, ChurchofJesusChrist.org).
Raha toa ka nanao ny sarin’ny tanany tao anatin’ny diary fandalinany ireo mpianatra dia azonao atao ny mangataka azy ireo mba hameno izany mandritra ity sahanasa manaraka ity.
Makà fotoana kely hanombantombanana ny fanirianao ho tanan’ny Tompo. Ny fisaintsainana sy ny fanoratana ao amin’ny diary dia fomba iray ahafahanao miezaka mandre ny feon’ny Mpamonjy sy ny zavatra asainy ataonao. Azonao atao ny mandinika ny iray na maromaro amin’ireto manaraka ireto sy manoratra ny momba izany:
Hevero ny hampiseho ireto fehezan-teny tari-dalana manaraka ireto mba hosaintsainin’ny mpianatra sy hosoratan’izy ireo ny momba azy.
-
Teny izay mamaritra ny fahatsapanao momba ny fiainana ny lalàn’ny fanokanana
-
Fomba tianao hizarana izay nomen’ny Tompo anao mba hanampiana ny hafa
-
Izay olana rehetra anananao mikasika ny fiainana ny lalàn’ny fanokanana sy ny fomba ahafahanao mitodika amin’ny Tompo mba handresena izany
Azonao atao ny mangataka ny mpianatra hizara ny eritreriny amin’ny iray kilasy sy any an-trano miaraka amin’ny fianakaviany. Azonao atao ihany koa ny mizara ny eritreritrao sy ny fijoroana ho vavolombelona anananao.