Fotopampianarana sy Fanekempihavanana 45

Fotopampianarana sy Fanekempihavanana 45

Topimaso ankapobeny

Ireo famantarana rehetra manodidina antsika dia mijoro ho vavolombelona fa efa akaiky ny Fiavian’ny Mpamonjy Fanindroany. Ny sasany dia be voninahitra, fa ny hafa kosa tena mahakivy. Mba hampitony ny tahotra sy ny ahiahy izay tsapan’ny Olomasina maro tany am-piandohan’ny taona 1831, dia nanasa azy ireo ny Tompo mba hihaino ny feony sy hino ny anarany. Nampianatra ny fomba ahafahantsika miomana ho amin’ny Fiaviany Fanindroany Izy.

Diniho ireo anaram-boninahitra nomena an’i Jesoa Kristy: Ny soratra masina dia mirakitra anarana fiantsoana sy anaram-boninahitra miisa 100 mahery izay mamariparitra an’i Jesoa Kristy. Rehefa mamantatra ireo anarana fiantsoana ny Mpamonjy sy ireo anaram-boninahitra nomena Azy ny mpianatra, dia asao izy ireo hisaintsaina ny fomba nanatanterahany ireo anjara asany ireo teo amin’ny fiainan’izy ireo sy ny fiainan’ny olona manodidina azy ireo. Raha mila fanazavana fanampiny momba ny fomba nanaovan’ny Mpamonjy izany dia jereo ny fizarana “Ampianaro ny momba ireo anarana fiantsoana an’i Jesoa Kristy sy ireo anjara asany ary ireo toetra nananany” ao amin’ny Mampianatra araka ny fomban’ny Mpamonjy. Afaka mahita ohatra iray momba ny fomba hanaovana izany koa ianao ao amin’ny lesona amin’ity herinandro ity izay mitondra ny lohateny hoe “Fotopampianarana sy Fanekempihavanana 45:1–8.”

Miomana hampianatra

Ity fampahalalana manaraka ity dia manome hevitra anao momba ny zavatra mety hilaina homanina ho an’ny lesona tsirairay.

Fotopampianarana sy Fanekempihavanana 45:1–8

Tanjon’ny lesona: Mba hanampiana ny mpianatra hahatakatra kokoa ilay asa nanirahana an’i Jesoa Kristy sy ny toetrany, rehefa mahatakatra ny sasany amin’ireo anarana fiantsoana Azy sy ireo anaram-boninahitra nomena Azy izy ireo.

• Fanomanana ny mpianatra: Hevero ny hanasa ny mpianatra mba hianatra momba ny fiavian’ny anaran’izy ireo na ny dikan’ny anaran’izy ireo, ary ho vonona hizara izay antsipiriany mety ho hitan’izy ireo.

• Sary haseho: I Jesoa Kristy tao Getsemane

Fotopampianarana sy Fanekempihavanana 45:9–75, Tapany 1

Tanjon’ny lesona: Mba hanampiana ny mpianatra hahatakatra kokoa ny fomba ahafahantsika mahita fiadanana rehefa mandinika ireo famantarana izay hialoha ny Fiavian’ny Mpamonjy Fanindroany isika.

• Fanomanana ny mpianatra: Hevero ny hanasa ny mpianatra hieritreritra ireo porofo hitany fa miaina amin’ny andro farany isika.

• Fitaovana ilaina: Sahanasa fampifanarahana “Famantarana ny Fiavian’ny Mpamonjy Fanindroany”

• Horonan-tsary: “Aza matahotra” (5:14)

Fotopampianarana sy Fanekempihavanana 45:9–75, Tapany 2

Tanjon’ny lesona: Mba hanampiana ireo mpianatra hiomana ho amin’ny Fiavian’i Jesoa Kristy Fanindroany.

• Fanomanana ny mpianatra: Azonao atao ny manasa ireo mpianatra hamaky ny tonon’ny hira iray momba ny Fiaviana Fanindroany na hihira izany ho hira fanokafana. Angataho izy ireo hieritreritra ny antony maha-zava-dehibe ny fahavononan’izy ireo alohan’ny fiverenan’ny Mpamonjy. Safidy anankiray hafa ihany koa ny mihira ny “Que l’Esprit soit avec nous” (Cantiques, no. 78), ary mitady ny fomba ahafahan’ny Fanahy Masina manampy antsika mba hiomana ho amin’ny Fiavian’ny Mpamonjy Fanindroany.

• Taratasy zaraina: “Miomana ho amin’ny Fiavian’ny Tompo Fanindroany”