“Lesona 58—Fotopampianarana sy Fanekempihavanana 45:1–8: -Ilay mpisolovava miaraka amin’ny Ray,-” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 45:1–8,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 58: Fotopampianarana sy Fanekempihavanana 45
Fotopampianarana sy Fanekempihavanana 45:1–8
“Ilay mpisolovava eo amin’ny Ray”
Raha niresaka tamin’ny mpikamban’ny Fiangonana nandritra ny valanaretina niseho maneran-tany ny Filoha Russell M. Nelson dia nilaza hoe, “Fantatry ny Raintsika fa rehefa manemitra antsika manodidina ny tebiteby sy ny tahotra, dia ny mihaino ny Zanany no hanampy antsika indrindra” (“Henoy Izy,” Liahona, mey 2020). Mba hampitoniana ny tahotra sy ny fiahiahian’ny Olomasina tany am-piandohan’ny taona 1831, dia nanasa azy ireo ny Tompo hihaino ny feony sy hino ny anarany. Ity lesona ity dia afaka manampy ireo mpianatra hahatakatra kokoa ilay asa nanirahana an’i Jesoa Kristy sy ny toetran’i Jesoa Kristy rehefa mahatakatra ny sasany amin’ireo anarana fiantsoana Azy sy anaram-boninahitra nomena Azy izy ireo.
Sahanasa fianarana azo atao
Ny dikan’ny anarana
Zarao ho vondrona kely ny mpianatra, ary asao izy ireo hizara antsipiriany momba ny dikan’ny anarana nomena azy na ny anaran’ny fianakaviany. Raha toa ka tsy azon’ny mpianatra antoka ny momba ny antsipiriany na ny dikany, dia afaka manazava ny zavatra tiany momba ny anarany izy ireo. Rehefa avy nizara tao anatin’ny vondrona ny mpianatra, dia asao ny mpianatra vitsivitsy hizara amin’ny iray kilasy ny zavatra nianarany momba ny anaran’ny mpiara-mianatra iray.
Vakio ity teny manaraka nambaran’ny Loholona Jonathan S. Schmitt ao amin’ny Fitopololahy ity:
Fomba tsotra iray ahafantarantsika ny olona iray ny fianarana ny mombamomba ny anarany. …
Nahafantatra sy niantso ny olona tamin’ny anarany i Jesoa. Hoy ny Tompo tamin’i Isiraely fahiny, “Aza matahotra hianao, fa efa nanavotra anao Aho, Efa niantso ny anaranao Aho; Ahy hianao” [Isaia 43:1; nampiana fanamafisana]. …
Tahaka ny ahafantaran’i Jesoa antsika tsirairay amin’ny anarantsika, dia fomba iray ahafahantsika mahafantatra tsara kokoa an’i Jesoa ny fianarana ny mombamomba ireo anarany maro. … Ireo anaran’i Jesoa dia anarana fiantsoana izay manampy antsika hahatakatra ny asa nanirahana Azy, ny tanjony, ary ny toetrany. Rehefa mahafantatra ireo anarana maron’i Jesoa isika dia ho takatsika kokoa ny asa masina nanirahana Azy sy ny toetrany tsy misy fitiavan-tena. Ny fahafantarana ireo anarany maro dia manentana antsika ho tonga tahaka Azy kokoa. (Jonathan S. Schmitt, “Dia ny mahafantatra Anao,” Liahona, nôv. 2022)
Asao ny mpianatra hizara ny zavatra hitany fa manan-danja avy amin’ny teny nambaran’ny Loholona Schmitt.
Hevero ny hanao lisitra eny amin’ny solaitrabe ny valintenin’ny mpianatra amin’ireto fanontaniana manaraka ireto.
-
Inona avy ireo anarana fiantsoana an’i Jesoa Kristy na anaram-boninahitra nomena Azy izay mampianatra anao bebe kokoa momba ny toetrany sy ny asa nanirahana Azy?
-
Nahoana no mety hampitombo ny fanirianao hanaraka Azy ny fahatakarana bebe kokoa ny momba anarana fiantsoana Azy sy ny anaram-boninahitra nomena Azy?
Rehefa avy nomena fotoana nifanakalozana hevitra momba ny fanontaniana teo aloha ireo mpianatra, dia asehoy ity fahamarinana manaraka ity: Ny fahafantarana ireo anarana fiantsoana an’i Jesoa Kristy sy ireo anaram-boninahitra nomena Azy dia afaka manampy antsika hahatakatra kokoa ny asa masina nanirahana Azy sy ny toetrany tsy misy fitiavan-tena.
Asao ny mpianatra hanombantombana ny fanirian’izy ireo manokana hahafantatra misimisy kokoa momba an’i Jesoa Kristy. Ampiasao ity hevitra manaraka ity na mitadiava iray hafa anao manokana. Amporisiho ny mpianatra handinika amim-pahanginana sy hamaly ao amin’ny diary fandalinan’izy ireo.
Ampiasao ity fanombanana manaraka ity mba hanombantombanana ny fanirianao sy ny ezaka ataonao mba hahatakarana kokoa ny momba ny Mpamonjy.
1 = mahalana; 2 = indraindray; 3 = matetika
-
Maniry ny hahatakatra kokoa ny asa masin’i Jesoa Kristy aho.
-
Rehefa mandalina ny soratra masina aho dia mitady amin’ny nahim-po ireo anarana fiantsoana an’i Jesoa Kristy sy ireo anaram-boninahitra nomena Azy.
-
Zava-dehibe amiko ny mahafantatra ny toetran’i Jesoa mba hahafahako manaraka azy tsara kokoa.
Rehefa mianatra kokoa momba ny Mpamonjy ianao amin’ny alalan’ny fandalinana ireo anarana fiantsoana Azy sy ireo anaram-boninahitra nomena Azy, dia angataho ao anatin’ny vavaka ny Rainao any An-danitra hanampy anao hampitombo ny fanirianao hanaraka ny Zanany.
Mpisolovavantsika sy namantsika
Afaka mahatakatra tsara kokoa ny asa nanirahana an’i Jesoa sy ny toetrany ny mpianatra amin’ny alalan’ny fandalinana ny iray amin’ireo anarany maro. Rehefa avy nifanakalo hevitra momba ny anjara asany amin’ny maha-mpisolovavantsika eo amin’ny Ray Azy ireo mpianatra dia hanana fahafahana handalina samirery ireo anarana fiantsoana an’i Jesoa sy ireo anaram-boninahitra nomena Azy.
Azonao atao ny mampiseho sarin’i Jesoa tao Getsemane rehefa mandray anjara amin’ity sahanasa manaraka ity ny mpianatra:
Vakio ny Fotopampianarana sy Fanekempihavanana 45:3–5, mba hitadiavana anaram-boninahitra iray nomena an’i Jesoa Kristy sy anjara asa iray sahaniny.
Saintsaino ireo anaram-boninahitra nomena an’i Jesoa Kristy: Ity sahanasa manaraka ity dia afaka manampy ireo mpianatra hahafantatra kokoa momba ny Mpamonjy amin’ny alalan’ny fahatakarana ny fiantsoana Azy hoe Mpisolovavantsika eo amin’ny Ray. Mba hahitana fanofanana bebe kokoa mikasika ny fomba hanampiana ireo mpianatra hifantoka amin’ny anaram-boninahitra nomena an’i Jesoa Kristy dia jereo ny fanofanana “Ampianaro ny momba ireo anaram-boninahitra nomena an’i Jesoa Kristy sy ireo anjara asany ary ireo toetra nananany” hita ao amin’ny Fahaiza-manao ho fampivoarana ny mpampianatra: Mifantoka amin’i Jesoa Kristy. Ity fanofanana ity dia afaka manampy amin’ny fampivelarana ny fahaiza-manao eo amin’ny “Fametrahana fanontaniana izay manampy ny mpianatra hamantatra ireo anjara asan’i Jesoa Kristy, ireo anaram-boninahitra nomena Azy, ireo tandindona momba Azy, ary ireo toetrany.”
Hevero ny hametraka fanontaniana toy ireto manaraka ireto mba hanampiana ireo mpianatra hampitombo ny fahatakarany ireo anjara asan’i Jesoa Kristy amin’ny maha-Mpisolovavantsika eo amin’ny Ray Azy. Azonao atao ny manazava fa ny famaritana iray omena ny teny hoe mpisolovava dia olona izay manome fanohanana sy fiarovana ho an’ireo izay mila fanampiana.
-
Ahoana ny fahazoanao ny teny hoe mpisolovava?
-
Araka ireo andininy ireo dia ahoana no hanatanterahan’i Jesoa Kristy ny anjara asany amin’ny maha-Mpisolovavantsika eo amin’ny Ray Azy?
-
Inona ny zavatra azontsika ianarana mikasika ny toetran’ny Mpamonjy avy amin’ireo andininy ireo?
Hevero ny hiaraka hamaky amin’ny mpianatra ity teny manaraka ity izay nambaran’ny Filoha Russell M. Nelson. Asao ny mpianatra hizara ny fomba nampitomboan’ireo fampianarana fanampiny avy amin’ny Filoha Nelson ireo ny fitiavan’izy ireo sy ny fankasitrahany an’i Jesoa Kristy.
I Jesoa no Mpisolovavantsika eo amin’ny Ray Azy (jereo ny 1 Jaona 2:1; F&F 29:5; 32:3; 45:3; 110:4). Ny teny hoe mpisolovava dia midika hoe “olona iray izay miangavy ho an’ny hafa.” Misy teny hafa mifandray amin’izany ampiasaina ao amin’ny soratra masina, toy ny hoe mpanelanelana na mpanalalana (jereo ihany koa ny 1 Timoty 2:5; 2 Nefia 2:28; F&F 76:69). …
… Ny fahatakarana Azy amin’ny maha-mpisolovava sy mpanelanelana ary mpanalalana antsika amin’ny Ray dia manome toky antsika ny amin’ny fahatakarany an-tsaina sy ny fahamarinany ary ny famindrampony tsy manam-paharoa. (jereo ny Almà 7:12). (Russell M. Nelson, “Jesus the Christ—Our Master and More” [Fampaherezam-panahy tao amin’ny Oniversite Brigham Young, 2 feb. 1992], 4, speeches.byu.edu)
Mety ho fotoana tsara ao amin’ny lesona izany mba hanomezana fotoana ny mpianatra hisaintsaina ny fahatsapany momba ny Mpamonjy. Hevero ny hanoratra ireto fanontaniana manaraka ireto eny amin’ny solaitrabe ary asao ny mpianatra hanoratra ny valinteniny ao amin’ny diary fandalinan’izy ireo. Raha ilaina, dia mangataha mpianatra vitsivitsy hizara ny zavatra tsapany sasantsasany amin’ny iray kilasy.
-
Inona no tsapanao rehefa miezaka maka sary an-tsaina ny Mpamonjy mitalaho ho anao sy miaro anao ianao?
-
Nahoana no manamafy orina ny fahavononanao hijanona eo amin’ny lalan’ny fanekempihavanana ny fahafantarana fa miaro anao i Jesoa Kristy?
Mianatra amin’i Jesoa Kristy
Rehefa mandalina ireto andinin-tsoratra masina manaraka ireto ny mpianatra ka mila fanampiana amin’ny famantarana ny anaram-boninahitr’i Jesoa Kristy ao amin’ny andininy 1, dia mety hilainao ny manazava fa niresaka ny anjara asany masina amin’ny maha-Mpahary ny zava-drehetra Azy Izy.
Manana anarana fiantsoana sy anaram-boninahitra maro hafa i Jesoa Kristy. Vakio ny Fotopampianarana sy Fanekempihavanana 45:1, 7, 59 mba hahitana ny hafa.
Manapaha hevitra raha tokony hiara-hiasa amin’ny hafa na hiasa irery ireo mpianatra ao amin’ity sahanasa manaraka ity.
Amporisiho ireo mpianatra mba hieritreritra fomba vaovao handaminana ny zavatra nianarany. Ohatra, afaka mamorona drafitra ao amin’ny diary fandalinany ireo mpianatra amin’ny alalan’ny fanoratana anarana na anaram-boninahitra nomena an’i Kristy eo afovoan’ny pejy iray. Rehefa mahita soratra masina sy andian-teny hafa izay manampy azy ireo hahatakatra kokoa ny anaram-boninahitra nofidiny izy ireo, dia afaka manoratra izany amin’ny fitodika sy habe samihafa manodidina ilay pejy. Avy eo dia afaka manao tsipika izy ireo mba hampifandray ireo soratra masina sy ireo andian-teny amin’ilay anarana na anaram-boninahitra.
Misafidiana anarana na anaram-boninahitra iray ao amin’ny fandalinanao izay tianao hianarana kokoa. Ampiasao ireo loharanom-pahalalana izay azonao ampiasaina, toy ny Application Médiathèque de l’Évangile sy ny fanampiana amin’ny fandalinana soratra masina, mba hianarana ny zavatra ampianarin’ilay anarana na anaram-boninahitra momba an’i Jesoa Kristy. Azonao atao ihany koa ny mandalina ny tenin’ireo mpaminanin’ny andro farany mba hianarana misimisy kokoa. Rehefa vitanao izany fandalinana izany, dia valio ireto fanontaniana manaraka ireto:
-
Inona no zavatra nianaranao na tsapanao androany ka nampitombo ny fitiavanao sy ny fanirianao hanaraka ny Mpamonjy?
-
Amin’ny fomba ahoana no mety hitahian’ny fanohizana ny fandalinana sy ny fianarana kokoa momba ny anaran’i Jesoa Kristy ny fiainanao?
Hevero ny hanasa ny mpianatra hizara antsipiriany sy hevi-baovao manan-danja avy amin’ny fandalinany. Mety hisy fahafahana amin’ireo lesona manaraka hifanakalozana hevitra kokoa mahakasika ny zavatra nianaran’ny mpianatra androany momba ireo anarana fiantsoana an’i Jesoa Kristy sy ny anaram-boninahitra nomena Azy.