Leksiyon 61: Doktrina ug mga Pakigsaad 46–48

Doktrina ug mga Pakigsaad 46:1–6

“Kamo Dili Mosalikway ni Bisan Kinsa”

Niadtong 1831, tungod sa mga paglutos ug mga pagkabalda, ang pipila ka mga Santos nagsugod og batasan sa pagtugot sa mga miyembro lamang sa Simbahan sa pagtambong og mga miting sa pagsimba. Nabalaka mahitungod niini ug sa ubang mga butang, nag-ampo si Joseph Smith alang sa giya ug nadawat ang pagpadayag nga narekord diha sa Doktrina ug mga Pakigsaad 46. Niini nga pagpadayag, ang Manluluwas misugo sa mga miyembro sa Simbahan sa pag-abiabi sa tanan kinsa “matinguhaon nga nangita sa gingharian” (Doktrina ug mga Pakigsaad 46:5) aron sa pagtambong sa mga serbisyo sa pagsimba. Kini nga leksiyon makatabang sa mga estudyante nga mapalambo ang ilang mga paningkamot sa pagmugna og usa ka maabiabihon nga palibot sa mga miting sa Simbahan.

Mga Posibleng Kalihokan sa Pagkat-on

Pag-abiabi sa tanan

Ikonsiderar ang pagpakita og hulagway sa usa ka lokal nga bilding sa simbahan nga adunay ilhanan nga anaay mga pulong nga “Welcome mga Bisita.” Mahimo usab nimong ipakita kini nga mga pulong diha sa pisara. Ang bidyo nga “Welcome” (1:05) mahimong makatabang ug makaandam sa mga estudyante alang sa panaghisgot karon.

Welcome sa ComeUntoChrist.org

Welcome sa komunidad diin ang tanan naninguha nga magpuyo sama sa gitudlo ni Jesus. Dali ug tan-awa unsa ang among gituhoan sa ComeUntoChrist.org.

Ikonsiderar kon ngano kaha sa imong hunahuna nga kining ilhanan kasagarang makita sa mga balay tigumanan [meetinghouses] nga gipanag-iya sa Ang Simbahan ni Jesukristo sa mga Santos sa Ulahing mga Adlaw.

• Sa unsang paagi ang pagbati og pag-abiabi diha sa simbahan makatampo sa kasinatian sa pagsimba sa usa ka tawo?

  Ikonsiderar ang pagpakita sa mosunod nga mga pangutana ug sa pagdapit sa mga estudyante sa hilom nga paggrado sa ilang kaugalingon sa sukdanan nga 1 (Wala gayod) ngadto sa 5 (Kanunay). Mahimo nilang irekord ang ilang mga tubag sa ilang mga journal sa pagtuon.

• Unsa ka dako ang imong gibati nga pag-abiabi diha sa imong ward, branch, o seminary nga klase?

• Unsa ka sagad nga ikaw naningkamot nga mas makaila sa uban diha sa simbahan?

• Gibati ba nimo nga ang imong mga higala ug ang ubang mga tawo sa inyong kasilinganan mobati nga giabi-abi sa mga serbisyo sa pagsimba sa simbahan?

Sa imong pagtuon karon, pangitaa ang mga pagtulun-an sa Manluluwas nga imong magamit sa pagtabang kanimo ug sa uban nga mabati ang pag-abiabi diha sa simbahan.

Ang mga instruksiyon sa Ginoo mahitungod sa pag-abiabi sa uban

Ipakigbahin ang mosunod nga pagpamubo aron makatabang sa mga estudyante nga makasabot sa konteksto sa mga bersikulo nga ilang tun-an sa Doktrina ug mga Pakigsaad 46.

Niadtong 1831, dihay kabalaka nga ang pipila ka mga miyembro sa Simbahan nagdumili sa pagtugot sa mga tawo nga dili mga miyembro sa pagtambong sa mga miting sa pagsimba sa Simbahan. Kini nga praktis misugod isip resulta sa mga kaaway sa Simbahan nga nagsamok sa mga serbisyo sa pagsimba. Human mag-ampo si Joseph Smith alang sa giya, ang Ginoo mipadayag og importante nga mga pagtulun-an kon sa unsang paagi ang mga Santos kinahanglan nga modumala sa ilang mga miting.

Basaha ang Doktrina ug mga Pakigsaad 46:1–6, mangita sa instruksiyon sa Manluluwas mahitungod niadtong gustong motambong sa mga miting sa simbahan.

• Unsa ang imong nakat-onan gikan niini nga mga bersikulo kon sa unsang paagi ang Ginoo buot nga kita motagad sa uban diha sa atong mga miting sa simbahan?

  Ang mga estudyante mahimong moila og usa ka kamatuoran nga susama sa mosunod: Ang Ginoo misugo kanato sa pag-abi-abi sa tanan diha sa atong mga miting sa simbahan.

  Aron mahatagan og gibug-aton ang kaimportante niini nga kamatuoran, mahimong makatabang nga ipabasa sa mga estudyante ang 3 Nephi 18:22–25. Mahimo usab nimong ipabasa sa mga estudyante ang parapo ubos sa ulohan nga “Tagda ang tanan isip usa ka anak sa Dios” sa seksiyon nga “Higugmaa ang Dios, higugmaa ang inyong silingan” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ([2022], 12).

• Ngano kaha nga ang pag-abiabi sa uban importante kaayo ngadto sa Manluluwas diha sa Iyang Simbahan?

• Unsa ang pipila ka mga hagit sa atong panahon nga tingali makapalisod sa usa ka tawo nga mobati og pag-abiabi diha sa mga miting sa simbahan?

• Unsa ang pipila ka piho nga mga butang nga atong mahimo aron sa pagtabang sa uban nga mobati nga giabiabi diha sa atong mga miting sa simbahan?

Isip kabahin sa panaghisgotan sa miaging pangutana, ikonsiderar ang pagpakita sa bidyo nga “Inviting Others to ‘Come and Stay’” (1:39), nga anaa sa ChurchofJesusChrist.org.

Inviting Others to "Come and Stay"

When people feel welcome at church, they'll naturally want to stay. This video for the Church of Jesus Christ of Latter-day Saints shows normal and natural ways to help visitors feel at home when they come to church for the first time.

Si Jesukristo usa ka ehemplo sa pag-abiabi sa tanan

Ang Manluluwas mao ang hingpit nga ehemplo sa pagdapit ug sa pag-abiabi sa tanan. Pangita og usa o mas daghan pa nga mga ehemplo gikan sa mga kasulatan kang Jesus nga maabi-abihon ug mahigugmaon sa tanan.

Kon ang mga estudyante nagkinahanglan og dugang nga direksiyon, mahimo nimong i-direkta sila ngadto sa mga tudling sa mga kasulatan sama sa Mateo 9:9–13; 19:13–15; Lucas 19:1–10; o 3 Nephi 11:12–15. Ikonsiderar ang pagdapit sa mga estudyante sa pagpakigbahin sa unsay ilang nadiskobrehan ug hisgoti ang ilang mga tubag sa mosunod nga mga pangutana. Mahimo nimong dapiton ang mga estudyante sa paghimo og pipila ka mga mugbo nga mga sulat diha sa ilang mga journal sa pagtuon sa mga ideya kon unsaon nila pagsunod ang ehemplo sa Manluluwas.

Hatagi og gibug-aton ang ehemplo ni Jesukristo: Alang sa dugang nga tabang sa pagdapit sa mga estudyante nga makasabot kon sa unsang paagi ang Manluluwas naghatag og ehemplo sa unsay ilang gitun-an, tan-awa ang pagbansay nga giulohan nga “Hatagi og gibug-aton ang ehemplo ni Jesukristo,” nga makita sa Pagpalambo sa mga Kahanas sa Magtutudlo: Magpunting kang Jesukristo.

Ang mosunod nga mga pangutana mahimong gamiton sa pagtabang sa mga estudyante sa pagpakigbahin sa unsay ilang nakat-onan ug gibati.

• Sa imong pagtuon sa ehemplo sa Manluluwas, sa unsang paagi ang Iyang gugma nakahimo og kalainan alang sa mga tawo nga Iyang gipakig-uban?

• Unsa ang imong nakat-onan mahitungod sa Manluluwas gikan sa unsay imong gitun-an nga mahimo nimong paningkamotan nga sundon sa imong kaugalingong kinabuhi?

Ikonsiderar ang pagdapit sa mga estudyante sa paghunahuna ug sa pagpakigbahin og mga kasinatian nga ilang naangkon diin ilang nakita ang kaayohan nga mahimong moabot gikan sa pagtabang sa uban nga mobati nga giabiabi sa atong mga miting sa simbahan. Mahimo ka usab nga mopakigbahin og usa ka kasinatian gikan sa imong kaugalingong kinabuhi.

Paggamit sa mga pagtulon-an sa Manluluwas

Paghimo og plano sa paggamit sa sugo sa Manluluwas sa pagtabang sa tanan nga mabati ang pag-abiabi diha sa mga miting sa simbahan. Irekord ang imong plano diha sa imong journal sa pagtuon. Hunahunaa ang mosunod nga mga pangutana aron matabangan ka sa imong plano:

• Unsa ang pipila ka piho nga mga paagi nga imong magamit ang tambag sa Manluluwas nga imong gitun-an karon?

• Unsay imong mabuhat sa imong kaugalingon aron mobati nga mas giabiabi diha sa mga miting sa simbahan?

Ikonsiderar ang pagdapit sa mga estudyante sa paghimo sa ilang pinakamaayo nga mga paningkamot sa paglihok sa mga pag-aghat nga ilang nadawat ug sa plano nga ilang gihimo karon. Awhaga ang mga estudyante nga maningkamot nga mahimong sensitibo sa mga panginahanglan niadtong naglibot kanila. Tingali angayan nga dapiton ang mga estudyante sa pagpakigbahin sa ilang kasinatian sa pag-abiabi sa uban diha sa klase atol sa sunod nga leksiyon.

Dugang nga mga Kapanguhaan

Unsa ang kinahanglan nakong buhaton kon ako wala mobati nga giabiabi diha sa mga miting sa simbahan?

Si Presidente Dallin H. Oaks sa Unang Kapangulohan mitudlo:

The Need for a Church

President Oaks teaches the blessings of belonging to the Church of Jesus Christ.

Ang uban moingon nga ang pagtambong sa mga miting sa simbahan wala nakatabang kanila. Ang uban moingon, “Wala koy nakat-onan karon” o “Walay tawo nga mahigalaon kanako” o “Nasilo ko.” Ang personal nga mga kasagmuyo kinahanglan dili gayod mopugong kanato gikan sa doktrina ni Kristo, kinsa mitudlo kanato sa pagserbisyo, dili nga serbisyohan [tan-awa sa Santiago 1:27]. Uban niini sa hunahuna, gihulagway sa laing miyembro ang iyang gitutokan sa pagtambong sa Simbahan:

“Sa mga tuig nga milabay, giusab nako ang akong kinaiya mahitungod sa pagsimba. Dili na ako mosimba alang sa akong kaayohan, apan sa paghunahuna sa uban. Akong gisiguro ang pagpangumusta sa mga tawo kinsa nag-inusarang naglingkod, sa pag-abiabi sa mga bisita, … sa pagboluntaryo alang sa usa ka buluhaton. …

“Sa ato pa, moadto ko sa Simbahan kada semana uban sa tuyo nga mahimong aktibo, dili kay mag-urong lang, ug maghimo og positibo nga kalainan sa mga kinabuhi sa mga tawo.” (Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24)

Nganong angay man nakong paningkamotan ang pagmugna og usa ka maabi-abihon nga palibot sa simbahan?

Si Sister Bonnie L. Oscarson, kanhi Kinatibuk-ang Presidente sa Young Women, mitudlo:

Akong batan-ong mga higala, makagarantiya ko nga sa kanunay adunay tawo sa kada miting sa Simbahan nga imong tambongan kinsa magul-anon, kinsa nagsagubang og mga hagit ug nagkinahanglan og usa ka higala, o kinsa mibati nga siya wala maapil. Aduna kay importanteng butang nga mahatag sa kada miting o kalihokan, ug ang Ginoo nagtinguha nga mangita ka diha sa imong mga higala ug dayon mangalagad sama sa Iyang gibuhat. …

Tinuod nga mitambong kita sa atong senimana nga mga miting sa Simbahan sa pag-apil sa mga ordinansa, pagkat-on sa doktrina, ug madasig, apan ang laing importante kaayong rason sa pagtambong mao nga, isip pamilya sa ward ug isip mga disipulo sa Manluluwas nga si Jesukristo, nagbantay ta sa usag usa, nag-awhag sa usag usa, ug nangita og paagi nga makaserbisyo ug makalig-on sa matag usa. Dili lang ta mga tigdawat ug tigkuha sa unsay gitanyag sa simbahan; gikinahanglan kita nga mahimong mga tighatag ug tigsangkap. Sa mga young women ug young men, sunod higayon nga naa mo sa [kalihokan sa kabatan-onan], imbis nga mag-celfon mo aron motan-aw unsay gibuhat sa inyong mga higala, hunong, tan-aw sa palibot, ug pangutan-a inyong kaugalingon, “Kinsa ang nanginahanglan nako karon?” Tingali ikaw ang hinungdan sa pagtimbaya ug pag-impluwensya sa kinabuhi sa usa ka higala o sa paghatag og pagdasig sa usa ka higala kinsa hilom nga nakigbisog.

Hangyoa ang imong Langitnong Amahan sa pagpakita diha kanimo kadtong naa sa imong palibot nga nanginahanglan sa imong tabang ug pagdasig nimo kon unsay labing maayo nga maserbisyo nimo kanila. Hinumdomi nga ang Manluluwas kasagaran moalagad ngadto sa usa ka tawo matag higayon. (Bonnie L. Oscarson, “Ang mga Panginahanglan nga atong Giatubang,” Liahona, Nob. 2017, 26–27)

Unsaon nako sa pagtabang sa uban nga mobati nga giabiabi?

Si Elder Gerrit W. Gong sa Korum sa Napulog Duha ka Apostoles mitudlo:

Lawak sa Balay Abotanan

Si Elder Gong nagtudlo nga ang Manluluwas nagdapit kanato nga mahimong mga maayong Samarianhon nga moabi-abi sa tanan ngadto sa Iyang Balay Abotanan (buot ipasabot Iyang Simbahan), diin sila makakita og dangpanan.

[Ang Ginoo] mihangyo nato nga himoon ang Iyang [Simbahan] nga dapit sa grasya ug luna, diin ang matag usa makapundok, nga adunay luna ang tanan. Isip mga disipulo ni Jesukristo, ang tanan managsama, nga walay ikaduhang klase nga mga grupo.

Ang tanan giabi-abi sa pagtambong sa mga panagtigom alang sa sakramento, sa ubang mga miting sa Dominggo, ug sosyal nga mga kalihokan. Kita mosimba nga may balaang pagtahod sa atong Manluluwas, mahunahunaon ug mokonsiderar sa usag usa. Kita motan-aw ug moila sa matag tawo. Kita mopahiyom, motupad niadtong nag-inusara, makig-ilaila, lakip na sa bag-ong mga kinabig, bag-ong mibalik og simba nga kaigsoonan, mga batan-ong babaye ug mga batan-ong lalaki, matag minahal nga bata sa Primary.

Maghunahuna sa atong kaugalingon nga anaa sa ilang dapit, kita moabi-abi sa mga higala, mga bisita, mga bag-ong mibalhin, mga indibidwal nga nagkapuliki sa pag-atiman sa daghan kaayong buluhaton. Kita magbangutan, maglipay, ug maanaa alang sa usag usa. Kon kita mapakyas sa pagkab-ot sa atong mga gimithi ug madalidalion, wala masayod, mahukmanon, o adunay gipihigan, mangayo kita og pasaylo sa usag usa ug mohimo og mas maayo. (Gerrit W. Gong, “Lawak sa Balay Abotanan,” Liahona, Mayo 2021, 26)

Dugang nga mga Kalihokan sa Pagkat-on

Paggamit sa mga senaryo

Aron matabangan ang mga estudyante sa paghunahuna sa pipila ka mga pagbati nga mahimong maangkon sa mga tawo samtang sila anaa sa bag-o ug dili pamilyar nga mga sitwasyon diha sa simbahan, ikonsiderar ang paggamit sa usa o labaw pa sa mosunod nga mga senaryo. Ang mga estudyante mahimo usab nga makabuhat og lain nga mga senaryo.

• Si David nagkat-on mahitungod sa ebanghelyo ug bag-ohay lang gidapit sa mga misyonaryo sa pagtambong sa mga miting sa Simbahan sa Dominggo ug sa senemanang mga kalihokan sa kabatan-onan.

• Bag-ohay lang mibalhin si Raquel ngadto sa usa ka bag-o, dili pamilyar nga dapit ug walay nailhan diha sa iyang bag-ong ward o branch.

• Si Blake mipili nga dili moapil sa seminary sulod sa iyang unang duha ka tuig apan karon nakahukom na siya nga motambong.

Human sa paghulagway sa senaryo, dapita ang mga estudyante sa paghisgot sa mosunod nga mga pangutana:

• Unsa ang pipila sa mga pagbati ang tingali masinati niini nga tawo?

• Sa imong hunahuna unsa ang gusto sa Manluluwas nga mahibaloan o buhaton niini nga tawo?

• Unsa ang pipila ka piho nga mga buluhaton nga imong mahimo aron matabangan kining tawhana nga mobati nga mas maabi-abihon?

• Unsa kaha nga mga babag ang tingali motungha diha sa atong mga paningkamot? Unsaon sa pagbuntog niadto nga mga babag?

Nahisakop sa seminary

Kini nga leksiyon mahimong maghatag og maayong kahigayonan nga ang mga estudyante makasukod kon paminaw nila unsa sila ka giabiabi diha sa seminary. Mahimo nimong dapiton sila sa pagtubag sa mga pag-aghat sama sa mosunod:

• Ako mibati nga sama sa usa ka bililhon nga sakop niini nga klase.

• Komportable ko nga mopakigbahin sa akong mga hunahuna ug mga pagbati diha sa klase.

• Mibati ko og kamasaligon nga ako adunay mga higala niini nga klase.

Mahimo nimong dapiton ang mga estudyante sa pagpakigbahin og butang nga makatabang kanila nga mobati nga mas giabiabi sa klase. Pribado o wala nagpaila nga mga tubag mahimong makatabang kanimo sa pag-ila sa mga baroganan sa pagkahisakop nga mahimo nimong hatagan og gibug-aton aron matabangan ang tanan nga mga sakop sa klase nga mobati nga importante ug giabiabi.

Doktrina ug mga Pakigsaad 46:1–2. Ang mga miting kinahanglan nga ipahigayon pinaagi sa Espiritu Santo

Aron sa paghatag og gibug-aton sa panginahanglan sa pag-organisar ug sa pagdumala sa tanan nga mga miting sa simbahan pinaagi sa Espiritu, ikonsiderar ang pagdapit sa mga estudyante sa pagtuon sa Doktrina ug mga Pakigsaad 46:1–2 ug sa pagpakigbahin sa unsay ilang napalgan. Dapita ang mga estudyante sa pagpamalandong kon unsaon nila sa pagdapit sa Espiritu Santo sa pagtabang nga mahimong mas makahuloganon alang kanila ang mga miting sa simbahan. Ang mosunod nga mga pangutana tingali makatabang sa pagsugod og panaghisgotan:

• Unsa ang atong mahimo aron sa pagpakita sa Espiritu nga kita andam nga tudloan?

• Sa unsang paagi nga ang Espiritu Santo makagiya sa atong mga hunahuna ug mga buhat samtang kita motambong sa mga miting sa simbahan?

• Sa unsang paagi nga kita magpadayon nga adubnay espiritu sa balaang pagtahod ug pagkamaabiabihon sa uban?

Doktrina ug mga Pakigsaad 46:5–6. “Matinguhaon nga nangita sa gingharian”

Dapita ang mga estudyante sa pagbasa sa Doktrina ug mga Pakigsaad 46:5–6 ug sa pagmarka sa mga pulong nga “matinguhaon nga nangita.” Aron matabangan ang mga estudyante nga masabtan ang kaimportante sa pagpangita sa Ginoo sa matinguhaon (matinuoron o seryoso) nga paagi, mahimo nimong dapiton ang mga estudyante sa paghisgot sa mga pangutana sama sa mosunod:

• Unsa ang gibuhat o wala gibuhat sa usa ka tawo kinsa matinguhaon nga nangita sa Ginoo?

• Nganong importante ang kinaiya sa matinguhaong pagpangita alang niadtong kinsa motambong sa mga miting sa simbahan? Sa unsang paagi kana makatabang sa usa ka tawo nga mobati sa Espiritu?