Leksiyon 62: Doktrina ug mga Pakigsaad 46–48

Doktrina ug mga Pakigsaad 46:7–33, Bahin 1

Mga Gasa sa Espiritu

Ang Langitnong Amahan nagpanalangin sa matinud-anong mga miyembro sa Simbahan og espirituhanong mga gasa. Kini nga mga gasa nagtugot kanato nga mahimong mas mahisama sa Manluluwas ug mopanalangin niadtong naglibot kanato. Kini nga leksiyon makatabang sa mga estudyante nga mobati sa gugma sa Langitnong Amahan alang kanila samtang ilang mahibaloan kon nganong Iya kitang gipanalanginan og espirituhanong mga gasa.

Mga Posibleng Kalihokan sa Pagkat-on

Kini mao ang una sa duha ka mga leksiyon mahitungod sa mga gasa sa Espiritu. Ang bahin 1 magatutok sa mga katuyoan sa Langitnong Amahan sa pagpanalangin kanato og espirituhanong mga gasa. Ang bahin 2​makatabang sa mga estudyante nga makaila kon unsaon nila sa pagtinguha og espirituhanong mga gasa. Kon ang oras sa klase limitado ug usa lamang ka leksiyon niini nga hilisgotan ang matudlo, ikonsiderar kon sa unsang paagi ang mga leksiyon epektibong mahiusa.

Ebidensiya sa gugma sa Langitnong Amahan

Ikonsiderar ang pagsugod sa klase pinaagi sa pag-awit o pagpaminaw og usa ka himno o kanta mahitungod sa gugma sa Langitnong Amahan alang sa Iyang mga anak, sama sa “My Heavenly Father Loves Me [Gihigugma Ako sa Langitnong Amahan]” (2:58). Kon ang mga estudyante gidapit sa pagbuhat sa kalihokan sa pagpangandam, kini mahimong maayong panahon sa pag-follow up. O mahimo nimong hangyoon ang mga estudyante sa pagpamalandong ug dayon mopakigbahin sa mga tubag sa mga pangutana sama sa mosunod:

• Kanus-a ang Espiritu Santo nagdasig kanimo sa paghunahuna, pagsulti, o pagbuhat og usa ka butang nga nakapanalangin sa imong kinabuhi o sa mga kinabuhi sa uban?

• Unsay gitudlo niini nga kasinatian diha kanimo mahitungod sa gugma sa Langitnong Amahan alang sa Iyang mga anak?

Mga Gasa sa Espiritu

Ang mga panalangin ug mga abilidad nga gihatag sa Dios kanato pinaagi sa Espiritu Santo gitawag og espirituhanong mga gasa.

• Unsa ang imong nahibaloan mahitungod sa espirituhanong mga gasa ug sa katuyoan niini?

Aron matabangan ang mga estudyante nga makasabot sa tinguha sa unang mga miyembro sa Simbahan nga makadawat og mga gasa sa Espiritu, mahimo nimong basahon gikan sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 126–29(anaa sa saints.ChurchofJesusChrist.org). Sa laing paagi, mahimo nimong ipakigbahin ang mosunod nga pagpamubo.

Ang unang mga kinabig ngadto sa Simbahan sa Kirtland ,mahinamon sa saad nga sila makadawat og espirituhanong mga gasa. Apan, ang uban nasayop sa pagsabot kon sa unsang paagi kini nga mga gasa gipakita.

Ang ubang mga Santos sa Kirtland mipakita sa ilang mga gituohan gamit ang grabe kaayo nga mga pamaagi, nagmaya sa unsay ilang gituohan nga mga gasa sa Espiritu. Pipila ka mga tawo miangkon nga nakabaton og mga panan-awon nga dili nila mapasabot. Ang uban nagtuo nga ang Espiritu Santo mipahimo nila nga mopadailos o mopabagnos sa ilang sampot diha sa yuta. Usa ka tawo mag-untol-untol libot sa kwarto o maglabyog-labyog gikan sa kisame sa higayon nga magtuo siya nga gibati niya ang Espiritu. Ang laing tawo milihok sama sa usa ka aliwas.

Pagkakita niini nga mga gawi, ang ubang mga kinabig nawad-an og kadasig ug miundang sa bag-ong simbahan. (Mga Santos, 1:128)

• Unsa ang pipila ka pangutana o sayop nga pagsabot nga mahimong aduna ang mga tawo mahitungod sa mga gasa sa Espiritu sa atong panahon?

Mahimong dapiton ang mga estudyante sa pagpakigbahin sa ilang kaugalingong mga pangutana mahitungod sa espirituhanong mga gasa. Dasiga ang mga estudyante sa pagpangita og mga pagtulun-an nga makatabang kanila nga mas makasabot sa espirituhanong mga gasa ug sa unsang paagi kini nga mga gasa ebidensiya sa gugma sa Dios.

Ang Ginoo mipadayag sa mga kamatuoran mahitungod sa espirituhanong mga gasa

Si Propeta Joseph Smith nagtinguha og langitnong giya kon unsaon sa pagtabang ang mga Santos sa Kirtland. Isip kabahin sa pagpadayag nga nadawat sa Propeta, gitudlo sa Ginoo ang mga baroganan nga makatabang sa mga Santos nga makalikay nga malingla ug makatabang kanila nga makasabot sa tinuod nga mga gasa sa Espiritu.

Basaha ang Doktrina ug mga Pakigsaad 46:7–8, mangita sa pahimangno nga gihatag sa Ginoo ngadto sa mga Santos.

• Unsa ang gitudlo sa Ginoo niini nga mga bersikulo mahitungod kon unsaon nato sa paglikay nga malingla?

Basaha ang Doktrina ug mga Pakigsaad 46:9–12, 26. Pangita og mga tubag sa mosunod nga mga pangutana:

• Kinsa ang gihatagan og espirituhanong mga gasa?

• Nganong ang Langitnong Amahan mohatag og espirituhanong mga gasa ngadto sa Iyang mga anak?

  Ipakita ang miaging duha ka pangutana aron matan-aw sa mga estudyante samtang magtuon sila. Mahimo silang magtuon nga mag-inusara o diha sa gagmay nga mga grupo. Human sila adunay igong panahon sa pagtuon, dapita sila sa paghisgot sa ilang mga tubag sa mga pangutana.

  Isip kabahin sa inyong panaghisgotan, tabangi ang mga estudyante sa pag-ila sa mosunod nga kamatuoran: Ang Langitnong Amahan mopanalangin sa Iyang mga anak og espirituhanong mga gasa aron ang tanan makabenepisyo.

• Sa unsang paagi nga ang pagkahibalo sa katuyoan sa espirituhanong mga gasa makatabang kanato sa pag-ila niini sa atong mga kinabuhi?

Pagsabot og dugang pa mahitungod sa espirituhanong mga gasa

Aron matabangan ang mga estudyante nga makat-on mahitungod sa espirituhanong mga gasa nga gihisgotan diha sa Doktrina ug mga Pakigsaad 46, hatagi sila sa handout nga giulohan og “Kini nga mga Gasa Gikan sa Dios.” Mahimo kining kompletohon sa mga estudyante nga magtinagsa o diha sa mga grupo. Makatabang usab ang pagpakita sa mosunod nga mga kahulogan:

• Pagkasayod sa mga kalainan sa pagdumala (bersikulo 15): Kini nga gasa makatabang sa mga lider sa pag-ila sa espirituhanong mga gasa sa uban ug sa unsang paagi sila makatabang sa nagkadaiyang mga katungdanan sa pagserbisyo.

• Pagkahibalo sa mga nagkalain-lain nga mga paagi (bersikulo 16): Kini nga gasa makatabang sa mga indibidwal sa pagtino kon ang usa ka pagtulun-an o impluwensiya gikan sa Dios o gikan sa ubang tinubdan.

• Gasa sa panagna (bersikulo 22): “Ang pagpamatuod ni Jesus mao man ang espiritu sa panagna” (Pinadayag 19:10). Ang personal nga pagpadayag mao ang tinubdan sa pagpamatuod, ug ang pagpamatuod makapahimo sa usa ka tawo sa pagpanagna o pagpamatuod sa buhat sa Dios.

• Ang pag-ila sa mga espiritu (bersikulo 23): Kini nga gasa nagtugot sa usa ka tawo sa pag-ila o pagsabot sa tinuod ug tinago nga mga tinguha sa uban. Kini nga gasa nagtabang sa usa ka tawo nga mabantayan ang tinago nga mga dautan ug makita ang kaayo diha sa uban.

“Kini nga mga Gasa Gikan sa Dios”

Basaha ang Doktrina ug mga Pakigsaad 46:13–26​ug ilha ang lain-laing espirituhanong mga gasa nga gihatag sa Dios ngadto sa Iyang mga anak. Aron mas masabtan kon sa unsang paagi kini nga mga gasa makabenepisyo sa mga anak sa Dios, ipares ang matag bersikulo sa tukma nga senaryo.

Espirituhanong mga Gasa		Espirituhanong mga Gasa
Espirituhanong mga Gasa Doktrina ug mga Pakigsaad 46:13	Espirituhanong mga Gasa Samtang nagserbisyo isip presidente sa iyang klase sa Young Women, si Michelle nakaila sa lain-laing kalig-on sa iyang mga miyembro sa klase. Kini nga pag-ila nakatabang kaniya sa paghimo og mga buluhaton nga nagtugot sa iyang mga sakop sa klase sa pagtampo ug sa pagserbisyo sa makahuluganon nga mga paagi.
Espirituhanong mga Gasa Doktrina ug mga Pakigsaad 46:14	Espirituhanong mga Gasa Samtang namati si Samantha sa mga pagpamatuod sa uban, dili siya segurado nga makaapil siya kanila sa pagsulti nga siya nasayod nga ang Simbahan tinuod. Apan ang pagpamati sa ilang mga pagpamatuod nakadugang sa iyang pagtuo sa Manluluwas. Kini nga pagtuo nagdasig kaniya sa pagpadayon sa pagpuyo nga matinud-anon.
Espirituhanong mga Gasa Doktrina ug mga Pakigsaad 46:15	Espirituhanong mga Gasa Si Lucy giimbitar sa usa ka party. Bisan kon wala ‘y naghatag sa iya og mga detalye, siya adunay usa ka dili komportable nga pagbati sa pagtambong. Siya matinahoron nga mibalibad sa imbitasyon, ug bisan kini lisod, siya mibati nga siya nagbuhat sa husto nga butang.
Espirituhanong mga Gasa Doktrina ug mga Pakigsaad 46:16	Espirituhanong mga Gasa Ang Ginoo mitabang sa daghang mga propeta sa pagpanagna sa umaabot nga mga panghitabo, lakip sa pangalagad ni Jesukristo (tan-awa sa Isaias 7:14; 1 Nephi 11:27–28; Mosiah 3:5–10).
Espirituhanong mga Gasa Doktrina ug mga Pakigsaad 46:17–18	Espirituhanong mga Gasa Samtang si Robert naningkamot sa pagkinabuhi sa ebanghelyo, kanunay nga nag-ampo, ug nagtuon sa mga kasulatan, iyang nahibaloan nga si Jesukristo mao ang iyang Manluluwas.
Espirituhanong mga Gasa Doktrina ug mga Pakigsaad 46:19–20	Espirituhanong mga Gasa Ang buhat sa misyonaryo lisod alang ni Elder Vasquez ug Elder Cox. Bisan pa niana, sila determinado sa pagserbisyo inubanan sa hugot nga pagtuo kang Jesukristo. Paglabay sa panahon nagsugod sila nga makakita og mga kasingkasing nga nalukmay ug mga milagro nga nanghitabo sa kinabuhi sa mga tawo nga ilang gitudloan.
Espirituhanong mga Gasa Doktrina ug mga Pakigsaad 46:21	Espirituhanong mga Gasa Sa dihang nasakit si Mark, siya nasayod nga siya makapangayo sa iyang amahan og panalangin sa pagkapari. Sa daghang mga higayon, kini nga mga panalangin nagdala kaniya og dugang nga kalinaw ug kalig-on.
Espirituhanong mga Gasa Doktrina ug mga Pakigsaad 46:22	Espirituhanong mga Gasa Usa ka post sa social media ang naghinungdan sa usa sa mga higala ni Alice sa pagduhaduha sa iyang pagtuo. Sa diha nga siya mipakigbahin sa post diha ni Alice, nakabantay si Alice nga ang impormasyon dili gikan sa Dios.
Espirituhanong mga Gasa Doktrina ug mga Pakigsaad 46:23	Espirituhanong mga Gasa Gihangyo si Judie sa pagtudlo diha sa iyang klase sa Young Women. Samtang nagtinguha siya sa panabang sa Langitnong Amahan, gibati niya nga gigiyahan sa iyang pagpangandam ug nakatudlo og makapalig-on nga leksiyon.
Espirituhanong mga Gasa Doktrina ug mga Pakigsaad 46:24–25	Espirituhanong mga Gasa Si Sister Erickson gitawag nga moserbisyo og misyon didto sa laing nasod. Samtang nagtinguha siya sa tabang sa Dios ug naningkamot sa pagkat-on sa pinulongan, iyang nakita nga siya makasabot sa uban ug mipakigbahin sa iyang pagpamatuod sa gamhanang paagi.

Kon nahuman na sa mga estudyante ang kalihokan, ipakigbahin kanila ang mga tubag: 1e, 2b, 3a, 4h, 5i, 6g, 7f, 8d, 9c, 10j. Paghatag og katin-awan kon gikinahanglan.

• Unsa ang imong nakat-onan mahitungod kon giunsa sa pagpanalangin sa Langitnong Amahan ang Iyang mga anak pinaagi sa mga gasa sa Espiritu?

  Ipasabot nga ang mga estudyante mahimong makabantay sa Langitnong Amahan nga nagpanalangin kanila og espirituhanong mga gasa agig dugang niadtong gilista diha sa mga kasulatan. Sama pananglit, pinaagi sa Espiritu Santo, Siya mahimong mopanalangin kanila og pailub diha sa usa ka tensiyonado nga sitwasyon, ang abilidad sa pagpasaylo sa usa ka tawo kinsa nakasilo kanila, kaisog sa panahon sa panginahanglan, o mas dakong tinguha sa pagserbisyo sa usa ka tawo. Ikonsiderar ang pagdapit sa mga estudyante sa paghunahuna og dugang espirituhanong mga gasa nga anaa kanato ug sa unsang paagi kini usa ka pagpakita sa gugma sa Dios. Mahimo nimong ilista ang pipila niini diha sa pisara.

• Unsa ang pipila ka mga espirituwal nga mga gasa ang gipanalangin sa Langitnong Amahan kanimo?

• Sa unsang paagi nga Siya mipanalangin kanimo pinaagi sa espirituhanon nga mga gasa sa uban?

• Sa unsa nga paagi ang imong kasinatian mahitungod sa espirituhanong mga gasa nakaapekto sa imong relasyon ngadto sa Langitnong Amahan?

Dugang nga mga Kapanguhaan

Asa pa ako makakat-on og dugang mahitungod sa espirituhanong mga gasa?

Alang sa detalyado nga pagpasabot sa pipila ka espirituhanong mga gasa nga gihisgotan niini nga leksiyon, tan-awa diha sa Manwal sa Estudyante sa Bag-ong Tugon (2018), “1 Mga Taga-Corinto 12–14.”

Doktrina ug mga Pakigsaad 46:7–8: Sa unsang paagi ang kaaway naglimbong sa mga tawo ngadto sa pagtuo nga sila mibati sa Espiritu?

Bisan og ang espiritwal nga mga pagpanglimbong nga nasinati sa pipila ka mga Santos sa Kirtland dili komon sa Simbahan karon, ang kaaway nanglimbong gihapon sa mga tawo, nga mosangpot sa kinaiya nga dili uyon sa ebanghelyo ni Jesukristo.

Si Elder Dale G. Renlund sa Korum sa Napulog Duha ka Apostoles mipakigbahin sa mosunod:

Usa ka tawo kausa misulti kanako mahitungod sa iyang mga panglimbasog aron sa pagpalig-on sa pinansiyal nga sitwasyon sa iyang pamilya. Siya nagkaideya nga mangawkaw og mga pundo isip usa ka solusyon, nag-ampo mahitungod niini, ug mibati nga nakadawat siya og positibo nga pagpadayag aron sa pagbuhat sa ingon. Ako nasayod nga siya nalimbongan tungod kay nagtinguha siya og pagpadayag nga sukwahi sa usa ka sugo sa Dios. Si Propeta Joseph Smith mipasidaan, “walay mas dako og kadaotan ngadto sa mga anak sa tawo kay sa mahimutang ubos sa impluwensiya sa usa ka mini nga espiritu [samtang] sila nagtuo nga anaa kanila ang Espiritu sa Dios” [Joseph Smith] [diha sa Times and Seasons, Abr. 1, 1842, 744, josephsmithpapers.org]. (Dale G. Renlund, “Usa ka Sistema sa mga Lagda alang sa Personal nga Pagpadayag,” Liahona, Nob. 2022, 17-18)

Gikinahanglan ba ang gasa sa Espiritu Santo aron makadawat og espirituhanong mga gasa?

Si Propeta Joseph Smith mitudlo:

Kita … nagtuo sa panagna, sa mga pinulongan, sa mga panan-awon, ug sa mga pagpadayag, sa mga gasa, ug sa mga pagpang-ayo; ug nga kining mga butanga dili maangkon kon wala ang gasa sa Espiritu Santo. (Mga Pagtulun-an sa mga Presidente sa Simbahan: Joseph Smith [2007], 137)

Unsa pa ang pipila sa ubang espirituhanong mga gasa nga anaa kanato?

Si Elder John C. Pingree Jr. sa Seventy mitudlo:

Pipila ka espirituhanong mga gasa ang nahisulat sa kasulatan [tan-awa sa 1 Mga Taga-Corinto 12:1–11, 31; Moroni 10:8–18; Doktrina ug mga Pakigsaad 46:8-26], apan dunay daghan pa. Ang pipila ka ehemplo maglakip sa kapuangod, pagpadayag og paglaum, pakigsandurot sa mga tawo, pag-organisar sa epektibong paagi, pagsulti o pagsulat nga madanihon, pagtudlo og klaro, ug pagkugi. (John C. Pingree Jr., “Ako Adunay Buhat alang Kanimo,” Liahona, Nob 2017, 33)

Si Elder Marvin J. Ashton (1915–1994) sa Korum sa Napulog Duha ka Apostoles namulong kabahin sa dugang pang espirituhanong mga gasa:

Dugang nga mga Kalihokan sa Pagkat-on

Matag usa kanato adunay lain-lain apan importante nga mga gasa

Kini nga kalihokan mahimong gamiton imbis nga ang handout.

Sa dili pa magklase, isulat ang mga numero 13 hangtod sa 25 sa sinulagma nga mga dapit diha sa usa ka piraso nga papel. Dayon guntinga ang papel ngadto sa 13 ka mga piraso sa puzzle, nga adunay usa ka numero sa matag piraso sa puzzle.

Human mailhan ang gipabaga pagkasuwat nga kamatuoran sa leksiyon, iapud-apud ang mga piraso sa puzzle ngadto sa mga estudyante. Ipasabot nga ang mga numero diha sa mga piraso nagpakita sa mga bersikulo sa Doktrina ug mga Pakigsaad 46​ug ang matag usa niining mga bersikulo naghingalan og usa ka gasa sa Espiritu. Dapita ang mga estudyante sa pagbasa og kusog sa mga bersikulo nga mohaom sa mga numero nga gihatag ngadto kanila.

Human mabasa ang matag bersikulo, hangyoa ang mga estudyante sa pagsugyot og sitwasyon diin kana nga gasa makabenepisyo sa mga anak sa Dios. Samtang mopakigbahin sila, dapita ang klase nga magtinabangay sa pagporma sa puzzle. Ipasabot nga sama nga ang mga estudyante gihatagan og lain-laing mga piraso nga gikinahanglan aron makompleto ang puzzle, kitang tanan gihatagan og lain-laing espirituhanong mga gasa aron makabenepisyo sa usag usa (tan-awa sa bersikulo 12).

Pagkahibalo ug pagtuo

Mahimong makabenepisyo ang mga estudyante gikan sa pag-ila nga ang gasa sa pagtuo​kang Jesukristo usa ka mahinungdanon nga gasa gikan sa Dios, bisan kon wala pa kita maka-angkon sa gasa sa pagkasayod nga Siya mao ang Anak sa Dios (tan-awa sa Doktrina ug mga Pakigsaad 46:13–14).

Si Elder Jeffrey R. Holland sa Korum sa Napulog Duha ka Apostoles mipakigbahin:

Usa ka 14 anyos nga batan-on miingon nako nga medyo nagduha-duha, “Brother Holland, dili pa ko makasulti nga ako nasayod nga ang Simbahan tinuod, apan mituo ko nga kini tinuod.” Gigakos nako og hugot kaayo ang maong batan-on. Giingnan nako siya uban sa tanang kainit sa akong kalag nga ang pagtuo​usa ka bililhon nga pulong, gani mas bililhon nga buhat, ug dili kinahanglan nga siya mangayog pasaylo tungod kay “mituo lamang.” (Jeffrey R. Holland, “Nagatuo Ako,” Liahona, Mayo 2013, 94-95)

Mahimong mangita ang mga estudyante og balaanong gitudlo nga mga tinubdan aron mas makasabot kon sa unsang paagi ang Ginoo nagpasidungog niadtong adunay gasa sa pagtuo. Sama pananglit, mahimo silang magtuon og dugang gikan sa pakigpulong ni Elder Holland sa “Nagatuo Ako” o Alma 32:16–27.