Leksiyon 63: Doktrina ug mga Pakigsaad 46–48

Doktrina ug mga Pakigsaad 46:7–33, Bahin 2

“Pangitaa sa Matinguhaon nga Paagi ang Labing Maayo nga mga Gasa”

Samtang kita naningkamot nga mahimong sama ni Jesukristo, kita mahimong mawad-an og kadasig tungod sa atong mga kahuyang. Tungod ni Jesukristo, makadawat kita sa Espiritu Santo ug sa espirituhanong mga gasa aron sa pagtabang kanato nga mas mahisama sa Manluluwas. Kini nga leksiyon makatabang sa mga estudyante nga mahimong mas mahisama ni Jesukristo samtang nagtinguha sila og mga gasa sa Espiritu.

Mga Posibleng Kalihokan sa Pagkat-on

Nagtinguha nga mahisama sa Dios

Mahimo nimong sugdan ang klase pinaagi sa pagdapit sa mga estudyante sa paghunahuna og mga kahuyang o mga pagkadili hingpit nga mahimong hinungdan sa kasagmuyo o sa pagpugong kanato sa pagkahimong sama sa Langitnong Amahan ug ni Jesukristo. Dapita ang pipila ka mga estudyante sa pagsulat sa ilang mga tubag diha sa pisara.

Handurawa nga ang usa ka tawo miangkon nga nakasinati siya og pipila ka mga kahuyang nga anaa diha sa pisara ug naghunahuna, “Dili ko makabuntog niini nga mga butang. Ingon ani na gyod ko.”

• Unsa ang imong nahibaloan mahitungod kang Jesukristo nga makatabang nga masabtan niini nga tawo?

Mga Gasa sa Espiritu

Usa sa mga paagi nga ang Langitnong Amahan ug si Jesukristo makatabang kanato nga mabuntog ang atong mga kahuyang mao ang pinaagi sa paghatag kanato og espirituhanong mga gasa.

• Unsa ang imong nahibaloan o nahinumduman mahitungod sa espirituhanong mga gasa?

Mahimong motubag ang mga estudyante gamit ang mga kamatuoran nga ilang nakat-onan gikan sa miaging leksiyon (“Doktrina ug mga Pakigsaad 46:7–33, Bahin 1”). Kon wala ka makatudlo niini nga leksiyon, mahimo kang mopamilyar niini aron matabangan nimo ang mga estudyante nga makasabot sa espirituhanong mga gasa kon gikinahanglan.

Basaha ang Doktrina ug mga Pakigsaad 46:8 ug hisgoti ang pagdapit sa Manluluwas nga may kalabotan sa espirituhanong mga gasa.

Unsa kaha sa imong hunahuna ang gipasabot sa pagtinguha sa espirituhanong mga gasa?

• Sa unsang paagi nga ang pagtinguha og espirituhanong mga gasa makatabang kanato sa atong mga paningkamot nga mahisama sa Dios?

Si Brother Tad R. Callister, kanhi Kinatibuk-ang Presidente sa Sunday School, mipasabot kon sa unsang paagi kining espirituhanong mga gasa makatabang kanato nga mas mahisama sa Dios:

Ang Pag-ula ni Jesukristo

Si Brother Callister nagtudlo nato sa unsa nga paagi nga ang Pag-ula ni Jesukristo nakatabang nato nga makabuntog sa mga babag sa atong kauswagan.

Tungod sa Pag-ula ni Kristo, kita mahimong makadawat sa gasa sa Espiritu Santo ug sa nag-uban niini nga espirituhanong mga gasa. Kini nga mga gasa mao ang mga hiyas sa pagkadiosnon; busa, matag higayon nga kita makaangkon og gasa sa Espiritu, kita mahimong mas sama sa Dios. Walay duha-duha ngano nga ang mga kasulatan mitambag nato sa daghang mga okasyon sa pagpangita niini nga mga gasa.

Si Presidente George Q. Cannon mitudlo: “Walay tawo nga angay nga moingon, ‘Ah, wala na koy mahimo niini; mao na kini ang akong kinaiya.’ Dili siya kahatagan og kaangayan niini, tungod sa rason nga ang Dios misaad … nga mohatag sa mga gasa nga mowagtang [sa atong mga kahuyang]. … Kon si bisan kinsa kanato dili hingpit, kini atong katungdanan ang pag-ampo alang sa gasa nga makahimo kanatong hingpit.” (Tad R. Callister, “Ang Pag-ula ni Jesukristo,” Liahona, Mayo 2019, 87)

• Unsay imong nakat-onan gikan niini nga pamahayag mahitungod sa espirituhanong mga gasa?

  Tabangi ang mga estudyante nga makasabot nga ang Langitnong Amahan nagdapit kanato sa pagtinguha og mga gasa sa Espiritu aron kita mahimong mas mahisama Kaniya.

• Unsa ang pipila ka espirituhanong mga gasa ang mahimong tinguhaon sa usa ka tawo aron sa pagbuntog sa mga kahuyang nga gihisgotan kaganeha diha sa leksiyon?

Mahimo nimong dapiton ang mga estudyante sa pagsulat og espirituhanong mga gasa tupad sa usa ka katugbang nga kahuyang sa pisara. Pananglitan, kon ang kasuko gisulat diha sa pisara, mahimong makaila ang mga estudyante sa gasa sa pailob. Kon ang mga estudyante misulat og kakulang sa pagsalig, sila mahimong magtinguha sa gasa sa kaisog o hugot nga pagtuo.

Aron matabangan ang mga estudyante niini nga kalihokan, mahimo nimo silang dapiton sa pagrebyo sa espirituhanong mga gasa diha sa Doktrina ug mga Pakigsaad 46:13–25. Mahimo usab nimong gamiton ang pamahayag ni Brother Callister sa pagpahinumdom sa mga estudyante nga ang Kristohanong mga hiyas, sama niadtong gilista sa Moroni 7:45 o Doktrina ug mga Pakigsaad 4:5–6, mahimo usab nga isipon nga espirituhanong mga gasa. Pahinumdomi ang mga estudyante nga ang ubang espirituhanong mga gasa wala malista sa mga kasulatan.

Pamalandongi ang imong mga paningkamot nga mahimong sama sa Langitnong Amahan ug ni Jesukristo. Tubaga ang mosunod nga mga pangutana diha sa imong journal sa pagtuon:

• Unsa ang usa ka kahuyang o pagkadili hingpit nga gusto nimong mabuntog?

• Unsa nga espirituhanong mga gasa ang mahimo nimong tinguhaon sa pagbuntog niana nga kahuyang?

Unsaon nato sa pagtinguha og espirituhanong mga gasa?

Awhaga ang mga estudyante sa paggamit sa mosunod nga mga kalihokan sa pagtuon aron sa pagpangita sa mga paagi nga ang Langitnong Amahan ug si Jesukristo makatabang kanila samtang sila nagtinguha sa espirituhanong mga gasa nga ilang gilista diha sa ilang mga journal.

Basaha ang Doktrina ug mga Pakigsaad 46:7–10, 30–33. Pangita og giya nga makatabang kanimo sa pagtinguha og espirituhanong mga gasa.

• Ngano sa imong hunahuna nga ang mga aksiyon nga imong naila makatabang kanimo sa imong mga paningkamot sa pagtinguha og espirituhanong mga gasa?

Mahimong makatabang ang pagpahinumdom sa mga estudyante nga ang pagtinguha og espirituhanong mga gasa usa ka tibuok kinabuhi nga proseso, ug ang Ginoo mohatag kanila sumala sa Iyang kabubut-on ug panahon (tan-awa sa Moroni 10:17).

Si Elder Mervyn B. Arnold, kanhi sa Seventy, mipakigbahin og laing paagi nga kita mahimong magtinguha og espirituhanong mga gasa gikan sa Dios:

Kon kita magtinguha nga makaangkon og espirituhanong gasa, kita mahimong magtuon sa mga ehemplo ug sa mga pagtulun-an sa Manluluwas nga may kalabotan nianang partikular nga gasa ug dayon maningkamot sa paglakip niadto nga mga pagtulun-an nganhi sa atong kinabuhi. (Mervyn B. Arnold, “Messages from the Doctrine and Covenants: Seek Ye the Best Gifts,” Ensign, Mar. 2005, 66)

Aron matabangan ang mga estudyante sa pag-andam sa paggamit sa tambag gikan sa miaging pamahayag, mahimo nimo silang dapiton sa paghunahuna og usa ka espirituhanong gasa ug pagpakita kon unsaon pagbuhat sa mga pagtulun-an ni Elder Arnold diha sa klase. Sama pananglit, kon ang mga estudyante mopili sa gasa sa kaisog mahimo kang mangutana:

• Giunsa pagpakita ni Jesukristo ang kaisog sa tibuok Niyang kinabuhi? (Tan-awa sa Mateo 26:47–56.)

• Unsa ang gitudlo sa Manluluwas kanato mahitungod sa kaisog diha sa mga kasulatan? (Tan-awa sa Josue 1:9.)

• Unsa ang mahimo sa usa ka tawo aron sa pagpraktis sa paggamit og kaisog sa ilang kinabuhi?

• Unsa nga mga aksiyon ang mahimo sa usa ka tawo sa pagdapit sa tabang sa Manluluwas samtang sila nagtinguha sa gasa sa kaisog?

Human niini nga panaghisgot, ipakita ang mosunod nga mga instruksiyon ug dapita ang mga estudyante sa pagtuon og usa ka espirituhanong gasa nga sila ra.

Tan-awa sa imong journal ang gasa nga imong gisulat nga gusto nimong pangitaon. Kompletoha ang mosunod nga mga lakang:

1. Pangitaa ang mga kasulatan alang sa usa ka ehemplo sa Manluluwas nga nagpakita niana nga gasa.

2. Pangita og mga tudling sa kasulatan nga adunay dugang nga mga pagtulun-an mahitungod niana nga gasa.

3. Ilista ang duha o tulo ka butang nga imong mabuhat sa pagpraktis sa paggamit niana nga gasa sa imong kinabuhi.

4. Isulat ang imong buhaton aron sa pagdapit sa tabang sa Manluluwas samtang nagpadayon ka sa pagpangita niana nga gasa. Kon gikinahanglan, tan-awa sa Doktrina ug mga Pakigsaad 46:7–10, 30–33.

Mahimo nimong taposon pinaagi sa pagdapit sa mga estudyante sa pagpakigbahin sa gasa nga ilang gipangita ug unsay ilang nakat-onan gikan sa ehemplo sa Manluluwas. Pasidan-i sila nga dili mopakigbahin sa mga kahuyang nga ilang gisulayan sa pagbuntog nga personal ra kaayo nga hisgotan. Awhaga ang mga estudyante nga magmatinud-anong molihok sa mga impresyon nga ilang nadawat ug magpadayon sa pagdapit og tabang gikan sa Langitnong Amahan samtang sila nagtinguha og espirituhanong mga gasa.

Dugang nga mga Kapanguhaan

Unsaon nako sa paglihok diha sa hugot nga pagtuo samtang nagtinguha ko sa pagpalambo og espirituhanong mga gasa?

Si Elder Juan Pablo Villar sa Seventy mitudlo:

Pagbansay sa Atong Espiritwal nga mga Braso

Si Elder Villar nagtudlo nga kinahanglan nato nga buhaton ang atong pagtuo diha ni Jesukristo ug dili lang mobasa ug magkat-on kabahin sa hugot nga pagtuo.

Salamat sa Pagpahiuli sa ebanghelyo, atong masabtan kon sa unsang paagi ang atong Langitnong Amahan motabang nato nga mapalambo ang espirituhanong mga gasa. Adunay posibilidad nga hatagan kita Niya og mga kahigayonan sa pagpalambo niana nga mga gasa kaysa ihatag lang kini kanato nga walay espiritwal ug pisikal nga paningkamot. Kon ang Iyang Espiritu anaa kanato, makat-on kita sa pag-ila niana nga mga kahigayonan ug dayon buhaton kini.

Kon magtinguha kita og dugang nga pasensiya, mahimong atong makaplagan ang atong mga kaugalingon nga nagkinahanglan sa pagbansay niini samtang naghulat sa tubag. Kon gusto kita nga makabaton og dugang nga gugma sa atong silingan, ato kining masugdan pinaagi sa pagtupad sa dili kaila diha sa simbahan. (Juan Pablo Villar, “Pagbansay sa Atong Espiritwal nga mga Kaunoran,” Liahona, Mayo 2019, 96)

Sa unsa nga paagi nga ang espirituhanong mga gasa makatabang kanako sa mga pagsulay sa akong kinabuhi?

Si Presidente Dallin H. Oaks mipakigbahin:

Angay kitang magtinguha sa espirituhanong mga gasa. Sila naggiya kanato ngadto sa Dios. Sila makapanalipod kanato gikan sa gahom sa kaaway. Makabalos sila sa atong mga kakulangan ug makaayo sa atong mga pagkadili hingpit. …

Nakita nako kana nga baroganan nga nagalihok sa panimalay diin ako nagdako. Tungod sa pagkawala sa iyang bana, ang akong biyuda nga inahan dili kompleto. Nag-ampo gayod siya og maayo alang sa unsay iyang gikinahanglan aron matuman ang iyang responsibilidad nga mabuhi ang iyang tulo ka gagmayng anak! Siya nangita, siya takos, ug siya napanalanginan! Ang iyang mga pag-ampo gitubag sa daghang paagi, lakip na ang pagkadawat og espirituhanong mga gasa. Siya adunay daghan, apan ang ako gayod nga mahinumdoman mao ang mga gasa sa hugot nga pagtuo, pagpamatuod, ug kaalam. Siya usa ka gamhanan nga babaye sa Zion, usa ka mahinungdanon nga ehemplo sa usa ka kasulatan nga iyang ganahan nga ikutlo mao ang saad ni Lehi ngadto sa iyang anak nga lalaki nga si Jacob nga ang Dios “mopahinungod sa imong mga kasakit alang sa imong kaayohan” (2 Ne. 2:2). (Dallin H. Oaks, “Spiritual Gifts,” Ensign, Sept. 1986, 72)

Dugang nga mga Kalihokan sa Pagkat-on

Doktrina ug mga Pakigsaad 46:7, 32. Pagpasalamat

Mahimong makabenepisyo ang mga estudyante gikan sa usa ka panaghisgot mahitungod sa pagpasalamat samtang magtuon sila sa Doktrina ug mga Pakigsaad 46. Usa ka paagi sa pagbuhat niini mao ang pagdapit sa mga estudyante sa pagbasa sa Doktrina ug mga Pakigsaad 46:7, 32, mangita sa gibalik-balik nga sugo.

Hisgoti ang kamahinungdanon sa pagpasalamat ngadto sa mga estudyante. Isip kabahin sa panaghisgotan, mahimo nimong tan-awon ang “President Russell M. Nelson on the Healing Power of Gratitude” (11:47) o dapita ang mga estudyante sa pagpangita og pamahayag gikan sa mga lider sa Simbahan o pag-awit og himno mahitungod sa gahom sa pagpasalamat.

President Russell M. Nelson on the Healing Power of Gratitude​ - subtitled

In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.

Doktrina ug mga Pakigsaad 46:33. Pagbansay sa hiyas ug pagkabalaan

Ikonsiderar ang pagtan-aw sa “No Cussing Club” (4:56). Dapita ang mga estudyante sa pagpangita kon sa unsang paagi kini nga kabatan-onan nagpraktis sa mga gasa sa hiyas ug pagkabalaan. Sa laing paagi, mahimo nimong dapiton ang mga estudyante sa pag-ila sa lain-laing espirituhanong mga gasa nga lagmit gikinahanglan sa batan-ong lalaki aron mabuntog ang mga babag ug matuman ang iyang gibuhat.

No Cussing Club

One boy’s crusade to encourage clean language has far-reaching effects.

Doktrina ug mga Pakigsaad 47. Pagtipig og usa ka regular nga kasaysayan

Dapita ang mga estudyante sa paghunahuna og usa ka paborito nga hitabo gikan sa kasaysayan sa Simbahan o usa ka asoy gikan sa kasaysayan sa ilang pamilya. Tugoti sila sa pagpakigbahin diha sa klase o sa ginagmay nga mga grupo.

• Unsa ang bili sa paghinumdom niini nga mga panghitabo?

Basaha ang Doktrina ug mga Pakigsaad 47:1–4, mangita sa tawag nga nadawat ni John Whitmer.

• Sa unsang paagi ang Simbahan ni Jesukristo sa mga Santos sa Ulahing mga Adlaw mahimong lahi kon walay rekord sa kasaysayan sa Simbahan?

Mahimong interesado ang mga estudyante nga makat-on pa og dugang mahitungod sa kasaysayan sa Simbahan sa inyong nasod pinaagi sa pagpangita sa “Global Histories” diha sa “Kasaysayan sa Simbahan” nga seksiyon sa Gospel Library. Awhaga ang mga estudyante sa paggamit sa daghang mga kapanguhaan nga anaa aron sa pagtabang kanila nga mahimong pamilyar sa kasaysayan sa Simbahan sama sa “Kasaysayan sa Simbahan” nga seksiyon sa Gospel Library history.ChurchofJesusChrist.org, o sa mga Santos​nga serye sa libro. Mahimo usab nimong dapiton ang mga estudyante sa paghimo og mga tumong sa paghupot og journal o ubang pamaagi sa pagrekord sa personal nga kasaysayan.

Doktrina ug mga Pakigsaad 47. Ang kabubut-on sa Ginoo matuman

Dapita ang mga estudyante sa pagbasa sa ulohan nga seksiyon sa Doktrina ug mga Pakigsaad 47 ug pangitaa ang mga pagbati ni John Whitmer mahitungod sa iyang calling isip tigtipig sa kasaysayan sa Simbahan. Hisgoti uban sa mga estudyante ang posibilidad nga sila mahimong hangyoon sa pagtuman sa usa ka buluhaton o calling sa Simbahan nga mas gusto nilang dili buhaton. Mahimo nimong ipakigbahin ang imong pagpamatuod nga samtang kita magtinguha sa pagbuhat sa kabubut-on sa Ginoo, Siya motabang kanato niini nga mga buluhaton.

Sa dihang si Elder Neil L. Andersen sa Korum sa Napulog Duha ka Apostoles gitawag isip usa ka Seventy, siya mitudlo:

Whom the Lord Calls, the Lord Qualifies

Elder Neil L. Andersen delivers a message titled "Whom the Lord Calls, the Lord Qualifies."

Nakadungog ko ni Presidente Monson nga miingon, “Kon kinsa ang tawagon sa Ginoo, ang Ginoo mohimo kaniyang sarang.” Nasayod ko nga kini tinuod, ug kini naghatag kanako og paglaom sa pagtan-aw lapas sa akong kaugalingong mga kakulangon. Ako nasayod nga kon kita anaa sa sugo sa Ginoo, siya magauban kanato, siya molig-on kanato, siya mopalig-on sa atong mga abilidad. Nasinati ko kini. Nabati ko ang iyang makapadasig nga Espiritu. Sa umaabot nga mga bulan ug mga tuig, gikinahanglan kaayo nako siya. (Neil L. Andersen, “Whom the Lord Calls, the Lord Qualifies,” Ensign, Mayo 1993, 82)

Mahimo usab nimong pahinumduman ang mga estudyante nga kon hatagan sila og daw lisod nga calling sa Simbahan, mahimo silang magtinguha sa mga gasa sa Espiritu nga makatabang kanila sa pagtuman sa ilang mga buluhaton.