Lesson 61: Doktrina at mga Tipan 46–48

Doktrina at mga Tipan 46:1–6

“Huwag Ninyong Paalisin ang Sinuman”

Noong 1831, dahil sa mga pag-uusig at kaguluhan, sinimulan ng ilang Banal ang gawing mga miyembro lamang ng Simbahan ang dadalo sa mga pulong para sa pagsamba. Nag-aalala tungkol dito at sa iba pang mga bagay, nanalangin si Joseph Smith para humingi ng patnubay at natanggap niya ang paghahayag na nakasulat sa Doktrina at mga Tipan 46. Sa paghahayag na ito, iniutos ng Tagapagligtas sa mga miyembro ng Simbahan na tanggapin ang lahat ng tao na “masigasig na naghahanap ng kaharian” (Doktrina at mga Tipan 46:5) para makadalo sa mga pagsamba. Ang lesson na ito ay makatutulong sa mga estudyante na mapagbuti ang kanilang mga pagsisikap na maipadama ang kabaitan at malugod na pagtanggap sa mga miting ng Simbahan.

Mga Posibleng Aktibidad sa Pag-aaral

Malugod na tinatanggap ang lahat

Maaari kang mag-display ng larawan ng isang lokal na gusali ng simbahan na may karatula na nagsasaad ng “Visitors Welcome.” Maaari mo ring i-display ang mga salitang ito sa pisara. Ang video na “Welcome” (1:05) ay maaaring makatulong at makapaghanda sa mga estudyante para sa talakayan sa araw na ito.

Welcome ComeUntoChrist.org

Maligayang pagdating sa isang komunidad kung saan lahat ay nagsisikap na mamuhay ayon sa itinuro ni Jesus. Halikayo at tingnan ang aming pinaniniwalaan sa ComeUntoChrist.org.

Isipin kung bakit sa palagay mo ay madalas na nakikita ang karatulang ito sa mga meetinghouse na pagmamay-ari ng Ang Simbahan ni Jesucristo ng mga Banal sa mga Huling Araw.

• Kapag nadama ng isang tao na malugod siyang tinatanggap sa simbahan, paano ito makakaambag sa kanyang karanasan sa pagsamba?

  Maaari mong i-display ang mga sumusunod na tanong at sabihin sa mga estudyante na tahimik na i-rate ang kanilang sarili sa scale na 1 (Hindi kailanman) hanggang 5 (Palagi). Maaari nilang isulat ang kanilang mga sagot sa kanilang study journal.

• Gaano mo nararamdamang malugod kang tinatanggap sa iyong ward, branch, o klase sa seminary?

• Gaano kadalas kang nagsisikap na mas makilala ang ibang tao sa mga sitwasyon sa simbahan?

• Sa palagay mo, madarama ba ng iyong mga kaibigan at iba pang mga tao sa iyong lugar na malugod silang tinatanggap sa mga pagsamba sa Simbahan?

Sa pag-aaral mo ngayon, alamin ang mga turo ng Tagapagligtas na magagamit mo para matulungan ka at ang iba na madama na malugod kayong tinatanggap sa simbahan.

Ang mga tagubilin ng Panginoon tungkol sa malugod na pagtanggap sa iba

Ibahagi ang sumusunod na buod upang matulungan ang mga estudyante na maunawaan ang konteksto ng mga talatang pag-aaralan nila sa Doktrina at mga Tipan 46.

Noong 1831, nagkaroon ng alalahanin na may ilang miyembro ng Simbahan na tumatangging payagan ang mga taong hindi miyembro na dumalo sa mga pulong para sa pagsamba ng Simbahan. Ang gawaing ito ay bunga ng panggagambala ng mga kaaway ng Simbahan sa mga pulong para sa pagsamba. Matapos manalangin ni Joseph Smith para humingi ng patnubay, inihayag ng Panginoon ang mahahalagang turo tungkol sa kung paano dapat pangasiwaan ng mga Banal ang kanilang mga miting.

Basahin ang Doktrina at mga Tipan 46:1–6, at alamin ang tagubilin ng Tagapagligtas hinggil sa mga taong gustong dumalo sa mga miting ng simbahan.

• Ano ang natutuhan mo mula sa mga talatang ito tungkol sa nais ng Panginoon na paraan ng pakikitungo natin sa iba sa ating mga miting ng Simbahan?

  Maaaring matukoy ng mga estudyante ang katotohanang tulad ng sumusunod: Iniutos sa atin ng Panginoon na malugod na tanggapin ang lahat sa mga miting natin sa simbahan.

  Para mabigyang-diin ang kahalagahan ng katotohanang ito, maaaring makatulong na ipabasa sa mga estudyante ang 3 Nephi 18:22–25. Maaari mo ring ipabasa sa mga estudyante ang talata sa ilalim ng heading na “Tratuhin ang lahat bilang anak ng Diyos” sa bahaging “Mahalin ang Diyos, mahalin ang inyong kapwa” ng Para sa Lakas ng mga Kabataan: Isang Gabay sa Paggawa ng mga Pagpili ([2022], 12).

• Sa iyong palagay, bakit napakahalaga sa Tagapagligtas na malugod na tanggapin ang iba sa Kanyang Simbahan?

• Ano ang ilang hamon sa ating panahon na maaaring maging dahilan para mahirapan ang isang tao na madama na malugod siyang tinatanggap sa mga miting ng simbahan?

• Ano ang ilang partikular na bagay na magagawa natin para matulungan ang iba na madama na malugod silang tinatanggap sa mga miting natin sa simbahan?

Bilang bahagi ng talakayan tungkol sa naunang tanong, maaari mong ipanood ang video na “Inviting Others to ‘Come and Stay’” (1:39), na matatagpuan sa ChurchofJesusChrist.org.

Inviting Others to "Come and Stay"

When people feel welcome at church, they'll naturally want to stay. This video for the Church of Jesus Christ of Latter-day Saints shows normal and natural ways to help visitors feel at home when they come to church for the first time.

Si Jesucristo ay isang huwaran ng malugod na pagtanggap sa lahat ng tao

Ang Tagapagligtas ang perpektong huwaran ng pag-anyaya at malugod na pagtanggap sa lahat ng tao. Maghanap ng isa o mahigit pang halimbawa mula sa mga banal na kasulatan tungkol sa malugod na pagtanggap at pagiging mapagmahal ni Jesus sa lahat ng tao.

Kung kailangan ng mga estudyante ng karagdagang tagubilin, maaari mong patingnan sa kanila ang mga talata sa mga banal na kasulatan tulad ng Mateo 9:9–13; 19:13–15; Lucas 19:1–10; o 3 Nephi 11:12–15. Maaari mong anyayahan ang mga estudyante na ibahagi ang nalaman nila at talakayin ang kanilang mga sagot sa mga sumusunod na tanong. Maaari mong anyayahan ang mga estudyante na magsulat sa kanilang study journal ng mga ideya kung paano nila matutularan ang halimbawa ng Tagapagligtas.

Bigyang-diin ang halimbawa ni Jesucristo: Para sa karagdagang tulong sa pag-anyaya sa mga estudyante na makita kung paano ipinapakita ng Tagapagligtas ang natututuhan nila, tingnan ang training na may pamagat na “Bigyang-diin ang halimbawa ni Jesucristo,” na matatagpuan sa Mga Kasanayan para sa Pag-unlad ng Guro: Magtuon kay Jesucristo.

Ang mga sumusunod na tanong ay magagamit upang matulungan ang mga estudyante na maibahagi ang natutuhan at nadama nila.

• Sa pag-aaral mo ng halimbawa ng Tagapagligtas, paano nakagawa ng kaibhan ang Kanyang pagmamahal sa mga taong nakaugnayan Niya?

• Ano ang isang bagay na natutuhan mo tungkol sa Tagapagligtas mula sa napag-aralan mo na maaari mong subukang tularan sa sarili mong buhay?

Maaari mong anyayahan ang mga estudyante na pag-isipan at ibahagi ang mga karanasan nila kung saan nila nakita ang kabutihan na maaaring magmula sa pagtulong sa iba na madama na malugod silang tinatanggap sa ating mga miting ng simbahan. Maaari ka ring magbahagi ng isang karanasan mula sa sarili mong buhay.

Pagsasabuhay ng mga turo ng Tagapagligtas

Gumawa ng plano na sundin ang utos ng Tagapagligtas na tulungan ang lahat na madama na malugod silang tinatanggap sa mga miting ng simbahan. Isulat ang plano mo sa iyong study journal. Pag-isipan ang sumusunod na mga tanong para tulungan ka sa iyong plano:

• Ano ang ilang partikular na paraan na masusunod mo ang payo ng Tagapagligtas na pinag-aralan mo ngayon?

• Ano ang magagawa mo para mas madama mo na malugod kang tinatanggap sa mga miting ng simbahan?

Maaari mong anyayahan ang mga estudyante na ibigay ang lahat ng kanilang makakaya para magawa ang mga pahiwatig na maaaring natanggap nila at ang planong ginawa nila ngayon. Hikayatin ang mga estudyante na sikaping maging sensitibo sa mga pangangailangan ng mga nakapaligid sa kanila. Maaaring angkop na anyayahan ang mga estudyante na ibahagi sa klase ang kanilang karanasan sa malugod na pagtanggap sa iba sa susunod na lesson.

Karagdagang Resources

Ano ang dapat kong gawin kung hindi ko nadarama na malugod akong tinatanggap sa mga miting ng simbahan?

Itinuro ni Pangulong Dallin H. Oaks ng Unang Panguluhan:

The Need for a Church

President Oaks teaches the blessings of belonging to the Church of Jesus Christ.

Sinasabi ng ilan na ang pagdalo sa mga miting sa simbahan ay hindi nakatutulong sa kanila. Sabi ng iba, “Wala akong natutuhan ngayon” o “Walang kumausap sa akin” o “Sumama ang loob ko.” Ang mga personal na kabiguan ay hindi dapat humadlang sa atin sa doktrina ni Cristo, na nagturo sa atin na maglingkod, hindi para paglingkuran [tingnan sa Santiago 1:27]. Isinasaisip ito, inilarawan ng isa pang miyembro ang layunin niya sa pagsisimba:

“Ilang taon na ang nakalipas, binago ko ang pag-uugali ko tungkol sa pagsisimba. Hindi na ako pumupunta sa simbahan para sa sarili ko, kundi para sa iba. Nagpasiya akong batiin ang mga taong mag-isang nakaupo, kausapin ang mga bisita, … magboluntaryo sa isang gawain. …

“Sa madaling salita, pumupunta ako sa simbahan kada linggo para maging aktibo, hindi para walang gawin, at makagawa ng mabuti sa buhay ng mga tao.” (Dallin H. Oaks, “Ang Pangangailangan para sa Isang Simbahan,” Liahona, Nob. 2021, 24–25)

Bakit dapat kong sikaping maipadama ang kabaitan at malugod na pagtanggap sa simbahan?

Itinuro ni Sister Bonnie L. Oscarson, dating Young Women General President:

Mga bata kong kaibigan, tinitiyak ko sa inyo na sa bawat miting ng Simbahan na dinadaluhan ninyo ay may isang taong nalulungkot, na nahihirapan at nangangailangan ng kaibigan, o nakadarama na hindi siya kabilang. May mahalagang bagay kayong maitutulong sa lahat ng miting o aktibidad at nais ng Panginoon na tingnan ninyo ang mga kaedad ninyo at pagkatapos ay maglingkod tulad ng gagawin Niya. …

Totoo na dumadalo tayo sa mga miting natin sa Simbahan tuwing linggo upang makibahagi sa mga ordenansa, matutuhan ang doktrina, at mabigyang-inspirasyon, ngunit ang isa pang napakahalagang dahilan sa pagdalo ay, bilang isang ward at mga disipulo ng Tagapagligtas na si Jesucristo, pinangangalagaan natin ang isa’t isa at naghahanap ng paraan na paglingkuran at palakasin ang bawat isa. Hindi lang tayo basta tumatanggap at kumukuha sa ibinibigay ng simbahan; kailangan tayong magbigay at tumulong. Mga kabataang lalaki at babae, sa susunod na nasa [mga aktibidad ng mga kabataan] kayo, sa halip na kunin ang inyong phone at tingnan ang ginagawa ng inyong mga kaibigan, tumigil kayo at tumingin sa inyong paligid at tanungin ang inyong sarili, “Sino ang nangangailangan sa akin ngayon?” Maaaring maging susi kayo sa pagtulong at pag-impluwensya sa buhay ng isang kabataan o sa pagpapalakas ng loob ng isang kaibigan na tahimik na nagdurusa.

Hilingin sa inyong Ama sa Langit na ipakita sa inyo ang mga nangangailangan ng tulong ninyo at ipabatid sa inyo kung paano ninyo sila pinakamainam na mapaglilingkuran. Alalahanin na madalas ay isa-isang pinaglilingkuran ng Tagapagligtas ang mga tao. (Bonnie L. Oscarson, “Ang mga Pangangailangan na Nasa Ating Harapan,” Liahona, Nob. 2017, 26)

Paano ko matutulungan ang iba na makadama na malugod silang tinatanggap?

Itinuro ni Elder Gerrit W. Gong ng Korum ng Labindalawang Apostol:

Silid sa Bahay-Panuluyan

Itinuro ni Elder Gong na inaanyayahan tayo ng Tagapagligtas na maging mabubuting Samaritano na tinatanggap ang lahat sa Kanyang Bahay-Panuluyan (ibig sabihin, ang Kanyang Simbahan), kung saan makatatagpo sila ng kanlungan.

Pinakikiusapan tayo [ng Panginoon] na gawin ang Kanyang [Simbahan] na isang lugar ng biyaya at puwang, kung saan makapagtitipon ang bawat isa, na may silid para sa lahat. Bilang mga disipulo ni Jesucristo, lahat ay pantay-pantay, walang mas mababa.

Lahat ay malugod na tinatanggap sa mga sacrament meeting, sa iba pang mga miting sa araw ng Linggo, at mga pagtitipon. Mapitagan nating sinasamba ang ating Tagapagligtas, inaalala at isinasaalang-alang ang isa’t isa. Pinapansin at binabati natin ang bawat tao. Ngumingiti tayo, tinatabihan natin sa upuan ang mga nakaupong mag-isa, nakikipagkilala tayo, pati na sa mga bagong binyag, sa nagbalik na mga kapatid, sa mga kabataang babae at lalaki, sa bawat mahal na batang Primary.

Nakikinita ang ating sarili sa kanilang sitwasyon, malugod nating binabati ang mga kaibigan, bisita, bagong lipat, at abalang mga indibiduwal na napakaraming obligasyon. Tayo ay nagdadalamhati, nagagalak, at laging nariyan para sa bawat isa. Kapag nabigo tayo sa ating mga inaasam at nagpabigla-bigla, nakalimot, nanghusga, o nakasakit ng damdamin, hinihingi natin ang kapatawaran ng isa’t isa at nagpapakabuti tayo. (Gerrit W. Gong, “Silid sa Bahay-Panuluyan,” Liahona, Mayo 2021, 25–26)

Mga Karagdagang Aktibidad sa Pag-aaral

Paggamit ng mga sitwasyon

Upang matulungan ang mga estudyante na pag-isipan ang ilan sa mga nadarama ng mga tao kapag natatagpuan nila ang kanilang sarili sa bago at hindi pamilyar na mga sitwasyon sa simbahan, maaari mong gamitin ang isa o mahigit pa sa mga sumusunod na sitwasyon. Maaari ding mag-isip ang mga estudyante ng ibang sitwasyon.

• Natututo si David tungkol sa ebanghelyo at kamakailan ay inanyayahan siya ng mga missionary na dumalo sa mga miting ng simbahan tuwing Linggo at sa mga lingguhang aktibidad ng mga kabataan.

• Kamakailan ay lumipat si Raquel sa isang bago at di-pamilyar na lugar at wala siyang kakilala sa kanyang bagong ward o branch.

• Pinili ni Blake na huwag mag-seminary sa unang dalawang taon niya ngunit ngayon ay nagpasiya na siyang dumalo.

Matapos ilarawan ang sitwasyon, sabihin sa mga estudyante na talakayin ang mga sumusunod na tanong:

• Ano ang ilan sa mga damdaming maaaring nararanasan ng taong ito?

• Ano sa palagay mo ang nais ng Tagapagligtas na malaman o gawin ng taong ito?

• Ano ang ilang partikular na bagay ang maaari mong gawin para matulungan ang taong ito na madama na mas malugod siyang tinatanggap?

• Anong mga balakid ang maaaring humadlang sa ating mga pagsisikap? Paano madaraig ang mga balakid na iyon?

Pagiging kabilang sa seminary

Ang lesson na ito ay maaaring magbigay ng magandang pagkakataon para ipa-assess sa mga estudyante kung gaano nila nadaramang malugod silang tinatanggap sa seminary. Maaari mo silang anyayahang sumagot sa mga prompt o pahiwatig na tulad ng mga sumusunod:

• Nadarama ko na mahalaga akong miyembro ng klaseng ito.

• Komportable akong ibahagi sa klase ang mga saloobin at nadarama ko.

• Kumpiyansa ako na may mga kaibigan ako sa klaseng ito.

Maaari mong anyayahan ang mga estudyante na magbahagi ng isang bagay na makatutulong sa kanila na madama na mas malugod silang tinatanggap sa klase. Ang mga pribado o anonymous na sagot ay maaaring makatulong sa iyo na matukoy ang mga alituntunin ng pagiging kabilang na maaari mong bigyang-diin para tulungan ang lahat ng miyembro ng klase na madama na sila ay kailangan at malugod na tinatanggap.

Doktrina at mga Tipan 46:1–2. Ang mga miting ay pinangangasiwaan sa pamamagitan ng Espiritu Santo

Para mabigyang-diin na kailangang iorganisa at pangasiwaan ang lahat ng miting sa simbahan sa pamamagitan ng Espiritu, maaari mong anyayahan ang mga estudyante na pag-aralan ang Doktrina at mga Tipan 46:1–2 at ibahagi ang nalaman nila. Sabihin sa mga estudyante na pag-isipan kung paano nila maaanyayahan ang Espiritu Santo na tumulong na gawing mas makabuluhan ang mga miting ng simbahan para sa kanila. Ang mga sumusunod na tanong ay maaaring makatulong sa pagsisimula ng talakayan:

• Ano ang magagawa natin para maipakita sa Espiritu na handa tayong maturuan?

• Paano magagabayan ng Espiritu Santo ang ating mga iniisip at ginagawa kapag dumadalo tayo sa mga miting ng simbahan?

• Paano natin mapapanatili ang diwa ng pagpipitagan at malugod na pagtanggap sa iba?

Doktrina at mga Tipan 46:5–6. “Masigasig na naghahanap ng kaharian”

Ipabasa sa mga estudyante ang Doktrina at mga Tipan 46:5–6 at markahan ang pariralang “masigasig na naghahanap.” Upang matulungan ang mga estudyante na maunawaan ang kahalagahan ng paghahanap sa Panginoon nang masigasig (tapat o seryoso), maaari mong sabihin sa mga estudyante na talakayin ang mga tanong na tulad ng mga sumusunod:

• Ano ang ginagawa o hindi ginagawa ng isang tao na masigasig na naghahanap sa Panginoon?

• Bakit mahalaga ang pag-uugaling paghahanap nang masigasig sa mga dumadalo sa mga miting ng simbahan? Paano iyon makatutulong sa isang tao na madama ang Espiritu?