Lesson 63: Doktrina at mga Tipan 46–48

Doktrina at mga Tipan 46:7–33, Bahagi 2

“Masigasig Ninyong Hanapin ang mga Pinakamahusay na Kaloob”

Sa pagsisikap nating maging katulad ni Jesucristo, maaaring panghinaan tayo ng loob dahil sa ating mga kahinaan. Dahil kay Jesucristo, matatanggap natin ang Espiritu Santo at mga espirituwal na kaloob na tutulong sa atin na maging higit na katulad ng Tagapagligtas. Ang lesson na ito ay makatutulong sa mga estudyante na maging higit na katulad ni Jesucristo kapag hinahangad nila ang mga kaloob ng Espiritu.

Mga Posibleng Aktibidad sa Pag-aaral

Paghahangad na maging katulad ng Diyos

Maaari mong simulan ang klase sa pamamagitan ng pag-anyaya sa mga estudyante na mag-isip ng mga kahinaan o kakulangan na maaaring maging sanhi ng pagkabigo o makahadlang sa atin sa pagiging katulad ng Ama sa Langit at ni Jesucristo. Ipasulat sa maraming estudyante ang kanilang mga sagot sa pisara.

Ipagpalagay na inamin ng isang tao na nararanasan niya ang ilan sa mga kahinaan sa pisara at iniisip niyang, “Hindi ko madaraig ang mga bagay na ito. Ganito na talaga ako.”

• Ano ang nalalaman mo tungkol kay Jesucristo na makatutulong sa taong ito na makaunawa?

Mga Kaloob ng Espiritu

Isa sa mga paraan na matutulungan tayo ng Ama sa Langit at ni Jesucristo na madaig ang ating mga kahinaan ay sa pamamagitan ng pagbibigay sa atin ng mga espirituwal na kaloob.

• Ano ang nalalaman o naaalala mo tungkol sa mga espirituwal na kaloob?

Maaaring sumagot ang mga estudyante ng mga katotohanang natutuhan nila mula sa nakaraang lesson (“Doktrina at mga Tipan 46:7–33, Bahagi 1”). Kung hindi mo pa naituturo ang lesson na ito, maaari kang maging pamilyar dito para matulungan mo ang mga estudyante na maunawaan ang mga espirituwal na kaloob kung kinakailangan.

Basahin ang Doktrina at mga Tipan 46:8 at bigyang-diin ang paanyaya ng Tagapagligtas na may kaugnayan sa mga espirituwal na kaloob.

Ano sa palagay mo ang ibig sabihin ng paghahangad ng mga espirituwal na kaloob?

• Paano makatutulong sa atin ang paghahangad ng mga espirituwal na kaloob sa ating mga pagsisikap na maging katulad ng Diyos?

Ipinaliwanag ni Brother Tad R. Callister, dating Sunday School General President, kung paano tayo tinutulungan ng mga espirituwal na kaloob na ito na maging higit na katulad ng Diyos:

Ang Pagbabayad-sala ni Jesucristo

Itinuturo sa atin ni Brother Callister kung paano tayo tinutulungan ng Pagbabayad-sala ni Jesucristo na lampasan ang mga balakid tungo sa ating pag-unlad.

Dahil sa Pagbabayad-sala ni Cristo, tayo ay marapat na tumanggap ng kaloob na Espiritu Santo at ng mga kalakip na espirituwal na kaloob nito. Ang mga kaloob na ito ay mga katangian ng pagiging banal; kung gayon, sa tuwing nagkakaroon tayo ng isang kaloob ng Espiritu, tayo ay nagiging mas katulad ng Diyos. Walang duda na iyon ang dahilan kung bakit hinihikayat tayo ng mga banal na kasulatan nang ilang ulit na hangarin ang mga kaloob na ito.

Itinuro ni Pangulong George Q. Cannon: “Hindi dapat sabihin ng sinuman na, ‘Ah, hindi ko kontrolado ito; likas na sa akin ito.’ Hindi siya mabibigyang-katwiran dito, dahil ipinangako ng Diyos na … bibigyan tayo ng mga kaloob para alisin ang [ating mga kahinaan]. … Kung hindi perpekto ang sinuman sa atin, tungkulin nating ipagdasal na mapasaatin ang kaloob na gagawin tayong perpekto.” (Tad R. Callister, “Ang Pagbabayad-sala ni Jesucristo,” Liahona, Mayo 2019, 87)

• Ano ang natutuhan mo mula sa pahayag na ito tungkol sa mga espirituwal na kaloob?

  Tulungan ang mga estudyante na maunawaan na inaanyayahan tayo ng Ama sa Langit na hangarin ang mga kaloob ng Espiritu upang tayo ay maging higit na katulad Niya.

• Ano ang ilang espirituwal na kaloob na maaaring hangarin ng isang tao para madaig ang mga kahinaang natukoy kanina sa lesson?

Maaari mong anyayahan ang mga estudyante na magsulat ng mga espirituwal na kaloob sa tabi ng katugmang kahinaan sa pisara. Halimbawa, kung ang galit ay nakasulat sa pisara, maaaring matukoy ng mga estudyante ang kaloob na pagpapasensya. Kung isinulat ng mga estudyante ang kawalan ng kumpiyansa, maaari nilang hangarin ang kaloob na tapang o pananampalataya.

Upang matulungan ang mga estudyante sa aktibidad na ito, maaari mo silang anyayahang rebyuhin ang mga espirituwal na kaloob sa Doktrina at mga Tipan 46:13–25. Maaari mo ring gamitin ang pahayag ni Brother Callister para ipaalala sa mga estudyante na ang mga katangiang tulad ng kay Cristo, tulad ng mga nakalista sa Moroni 7:45 o Doktrina at mga Tipan 4:5–6, maaari din itong ituring na mga espirituwal na kaloob. Ipaalala sa mga estudyante na ang iba pang mga espirituwal na kaloob ay hindi nakalista sa mga banal na kasulatan.

Pag-isipan ang iyong mga pagsisikap na maging katulad ng Ama sa Langit at ni Jesucristo. Sagutin sa iyong study journal ang mga sumusunod na tanong:

• Ano ang isang kahinaan o kakulangan na gusto mong madaig?

• Anong mga espirituwal na kaloob ang maaari mong hangarin para madaig ang kahinaang iyon?

Paano natin hinahanangad ang mga espirituwal na kaloob?

Hikayatin ang mga estudyante na gamitin ang sumusunod na mga aktibidad sa pag-aaral upang maghanap ng mga paraan na matutulungan sila ng Ama sa Langit at ni Jesucristo sa paghahangad nila ng mga espirituwal na kaloob na inilista nila sa kanilang journal.

Basahin ang Doktrina at mga Tipan 46:7–10, 30–33. Maghanap ng patnubay na tutulong sa iyo na maghangad ng mga espirituwal na kaloob.

• Sa iyong palagay, bakit makatutulong sa iyo ang mga pagkilos na natukoy mo sa iyong mga pagsisikap na maghangad ng mga espirituwal na kaloob?

Maaaring makatulong na ipaalala sa mga estudyante na ang paghahangad ng mga espirituwal na kaloob ay habambuhay na gagawin, at ibinibigay sa kanila ng Panginoon ang mga ito ayon sa Kanyang kalooban at panahon (tingnan sa Moroni 10:17).

Ibinahagi ni Elder Mervyn B. Arnold, dating miyembro ng Pitumpu, ang isa pang paraan na makahahangad tayo ng mga espirituwal na kaloob mula sa Diyos:

Kapag hinahangad nating magtamo ng espirituwal na kaloob, maaari nating pag-aaralan ang mga halimbawa at turo ng Tagapagligtas na nauukol sa partikular na kaloob na iyon at pagkatapos ay sikaping ipamuhay ang mga turong iyon. (Mervyn B. Arnold, “Messages from the Doctrine and Covenants: Seek Ye the Best Gifts,” Ensign, Mar. 2005, 66)

Upang matulungan ang mga estudyante na maghandang ipamuhay ang payo mula sa naunang pahayag, maaari mo silang anyayahang mag-isip ng isang espirituwal na kaloob at ipakita ang mga turo ni Elder Arnold sa klase. Halimbawa, kung pipiliin ng mga estudyante ang kaloob na katapangan, maaari mong itanong:

• Paano nagpakita ng katapangan si Jesucristo sa buong buhay Niya? (Tingnan sa Mateo 26:47–56.)

• Ano ang itinuro sa atin ng Tagapagligtas tungkol sa katapangan sa mga banal na kasulatan? (Tingnan sa Josue 1:9.)

• Ano ang magagawa ng isang tao para magamit ang katapangan sa kanyang buhay?

• Ano ang maaaring gawin ng isang tao para makatanggap ng tulong ng Tagapagligtas sa paghahangad niya ng kaloob na katapangan?

Pagkatapos ng talakayang ito, i-display ang mga sumusunod na tagubilin at sabihin sa mga estudyante na pag-aralan nang mag-isa ang isang espirituwal na kaloob.

Tingnan sa iyong journal ang kaloob na isinulat mo na gusto mong matamo. Gawin ang mga sumusunod na hakbang:

1. Saliksikin ang mga banal na kasulatan para sa halimbawa ng Tagapagligtas na nagpapakita ng kaloob na iyon.

2. Maghanap ng mga scripture passage na naglalaman ng mga karagdagang turo tungkol sa kaloob na iyon.

3. Maglista ng dalawa o tatlong bagay na magagawa mo para magamit ang kaloob na iyon sa iyong buhay.

4. Magsulat ng isang bagay na gagawin mo para matanggap ang tulong ng Tagapagligtas habang patuloy mong hinahangad ang kaloob na iyon. Kung kinakailangan, sumangguni sa Doktrina at mga Tipan 46:7–10, 30–33.

Maaari mong tapusin ang klase sa pag-anyaya sa mga estudyante na ibahagi ang kaloob na hinahangad nila at ang natutuhan nila mula sa halimbawa ng Tagapagligtas. Ipaalala sa kanila na huwag magbahagi ng mga kahinaan na pinagsisikapan nilang madaig na masyadong personal para pag-usapan. Hikayatin ang mga estudyante na kumilos nang tapat ayon sa mga impresyong natanggap nila at patuloy na humingi ng tulong sa Ama sa Langit sa paghahangad nila ng mga espirituwal na kaloob.

Karagdagang Resources

Paano ako makakakilos nang may pananampalataya habang sinisikap kong magkaroon ng mga espirituwal na kaloob?

Itinuro ni Elder Juan Pablo Villar ng Pitumpu:

Paggamit ng Ating mga Espirituwal na Kalamnan

Itinuro ni Elder Villar na kailangan nating kumilos ayon sa ating pananampalataya kay Jesucristo at hindi lamang basta magbasa at matuto tungkol sa pananampalataya.

Dahil sa Panunumbalik ng ebanghelyo, maaari nating maunawaan kung paano tayo tinutulungan ng Ama sa Langit na magkaroon ng mga espirituwal na kaloob. Mas malamang na bibigyan Niya tayo ng mga oportunidad na paunlarin ang mga kaloob na iyon sa halip na ipagkaloob lang sa atin ang mga iyon nang walang espirituwal at pisikal na pagsisikap. Kung nakaayon tayo sa Kanyang Espiritu, matututo tayong tukuyin ang mga oportunidad na iyon at pagkatapos ay kumilos ayon doon.

Kung hangad nating magkaroon ng higit na pasensya, maaaring kailanganin nating gamitin iyon habang naghihintay ng isang sagot. Kung nais nating magkaroon ng higit na pagmamahal para sa ating kapwa, maaari natin itong pag-ibayuhin sa pamamagitan ng pagtabi sa isang taong hindi natin kilala sa simbahan. (Juan Pablo Villar, “Paggamit ng Ating mga Espirituwal na Kalamnan,” Liahona, Mayo 2019, 96)

Paano ako matutulungan ng mga espirituwal na kaloob sa mga pagsubok sa buhay ko?

Ibinahagi ni Pangulong Dallin H. Oaks:

Dapat nating hangarin ang mga espirituwal na kaloob. Maaakay tayo ng mga ito patungo sa Diyos. Maaari tayong protektahan ng mga ito mula sa kapangyarihan ng kaaway. Maaari nitong punan ang ating mga kakulangan at ayusin ang ating mga kahinaan. …

Nakita kong ipinamuhay ang alituntuning iyon sa tahanan kung saan ako lumaki. Sa pagpanaw ng kanyang asawa, wala nang katuwang ang aking ina. Ipinagdasal niya nang husto kung ano ang kanyang kailangan para magampanan ang kanyang responsibilidad na palakihin ang kanyang tatlong maliliit na anak! Naghangad siya, naging karapat-dapat siya, at pinagpala siya! Nasagot ang kanyang mga dalangin sa maraming paraan, kabilang na ang pagtanggap ng mga espirituwal na kaloob. Marami siyang natanggap, ngunit yaong hindi ko malilimutan ay ang mga kaloob na pananampalataya, patotoo, at karunungan. Isa siyang kahanga-hangang babae sa Sion, isang mabuting halimbawa ng isang banal na kasulatan na gustung-gusto niyang banggitin—ang pangako ni Lehi sa kanyang anak na si Jacob na ang Diyos ay “ilalaan ang iyong mga paghihirap para sa iyong kapakinabangan” (2 Ne. 2:2). (Dallin H. Oaks, “Spiritual Gifts,” Ensign, Set. 1986, 72)

Mga Karagdagang Aktibidad sa Pag-aaral

Doktrina at mga Tipan 46:7, 32. Pagpapasalamat

Maaaring makinabang ang mga estudyante sa isang talakayan tungkol sa pasasalamat habang pinag-aaralan nila ang Doktrina at mga Tipan 46. Ang isang paraan para magawa ito ay anyayahan ang mga estudyante na basahin ang Doktrina at mga Tipan 46:7, 32, at hanapin ang inulit na kautusan.

Talakayin sa mga estudyante ang kahalagahan ng pasasalamat. Bilang bahagi ng talakayan, maaari mong ipanood ang “Pangulong Russell M. Nelson: Isang Panalangin ng Pasasalamat, Pag-asa, at Paggaling para sa Mundo mula sa Propeta​” (11:47) o sabihin sa mga estudyante na maghanap ng pahayag mula sa mga lider ng Simbahan o kumanta ng isang himno tungkol sa kapangyarihan ng pasasalamat.

President Russell M. Nelson on the Healing Power of Gratitude​ - subtitled

In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.

Doktrina at mga Tipan 46:33. Ipamuhay ang kabutihan at kabanalan

Maaari mong panoorin ang “No Cussing Club” (4:56). Sabihin sa mga estudyante na alamin kung paano ginamit ng mga kabataang ito ang mga kaloob na kabutihan at kabanalan. Bilang alternatibo, maaari mong anyayahan ang mga estudyante na tukuyin ang iba’t ibang espirituwal na kaloob na maaaring kinailangan ng binatilyo upang madaig ang mga balakid at maisakatuparan ang ginawa niya.

No Cussing Club

One boy’s crusade to encourage clean language has far-reaching effects.

Doktrina at mga Tipan 47. Regular na pagsusulat ng kasaysayan o mga pangyayari

Sabihin sa mga estudyante na mag-isip ng isang paboritong pangyayari mula sa kasaysayan ng Simbahan o isang kuwento mula sa kanilang family history. Bigyan sila ng pagkakataong magbahagi sa klase o sa maliliit na grupo.

• Ano ang kahalagahan ng pag-alaala sa mga pangyayaring ito?

Basahin ang Doktrina at mga Tipan 47:1-4, at alamin ang tungkuling ibinigay kay John Whitmer.

• Paano maiiba Ang Simbahan ni Jesucristo ng mga Banal sa mga Huling Araw kung walang talaan ng kasaysayan ng Simbahan?

Maaaring interesado ang mga estudyante na malaman pa ang tungkol sa kasaysayan ng Simbahan sa inyong bansa sa pamamagitan ng pagsasaliksik sa “Mga Kasaysayan mula sa Iba’t Ibang Panig ng Mundo” sa bahaging “Kasaysayan ng Simbahan” ng Gospel Library. Hikayatin ang mga estudyante na gamitin ang maraming resources na makukuha upang matulungan silang maging pamilyar sa kasaysayan ng Simbahan tulad ng bahaging “Kasaysayan ng Simbahan” ng Gospel Library, history.ChurchofJesusChrist.org, o ng mga serye ng aklat na Mga Banal. Maaari mo ring anyayahan ang mga estudyante na magtakda ng mithiin na magsulat ng journal o iba pang paraan ng pagtatala ng personal na kasaysayan.

Doktrina at mga Tipan 47. Ang kalooban ng Panginoon ay masusunod

Sabihin sa mga estudyante na basahin ang section heading ng Doktrina at mga Tipan 47 at alamin ang nadama ni John Whitmer tungkol sa kanyang tungkulin bilang mananalaysay ng Simbahan. Talakayin sa mga estudyante ang posibilidad na maaaring hilingin sa kanila na gampanan ang isang gawain o tungkulin sa Simbahan na mas gusto nilang hindi gawin. Maaari mong ibahagi ang iyong patotoo na kapag hinangad nating gawin ang kalooban ng Panginoon, tutulungan Niya tayo sa mga gawaing ito.

Nang tawagin si Elder Neil L. Andersen Korum ng Labindalawang Apostol bilang Pitumpu, itinuro niya:

Whom the Lord Calls, the Lord Qualifies

Elder Neil L. Andersen delivers a message titled "Whom the Lord Calls, the Lord Qualifies."

Narinig kong sabihin ni Pangulong Monson, “Sinuman ang tawagin ng Panginoon, ginagawang karapat-dapat ng Panginoon.” Alam ko na ito ay totoo, at binibigyan ako nito ng pag-asa sa kabila ng sarili kong mga kakulangan. Alam ko na kapag tayo ay nasa gawain ng Panginoon, makakasama natin siya, palalakasin niya tayo, daragdagan niya ang ating mga kakayahan. Naranasan ko na ito. Nadama ko na ang kanyang nagpapalakas na Espiritu. Sa mga susunod na buwan at taon, lubos ko siyang kakailanganin. (Neil L. Andersen, “Whom the Lord Calls, the Lord Qualifies,” Ensign, Mayo 1993, 82)

Maaari mo ring ipaalala sa mga estudyante na kapag binigyan sila ng tila mahirap na tungkulin sa Simbahan, maaari nilang hangarin ang mga kaloob ng Espiritu na tutulong sa kanila na magampanan ang kanilang mga tungkulin.