“Leksiyon 64—Doktrina ug mga Pakigsaad 49: Ang Kaminyoon tali sa Lalaki ug sa Babaye Gi-orden sa Dios,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 49,” Manwal sa Magtutudlo sa Seminary sa Doktrina ug mga Pakigsaad
Leksiyon 64: Doktrina ug mga Pakigsaad 49–50
Doktrina ug mga Pakigsaad 49
Ang Kaminyoon tali sa Lalaki ug sa Babaye Gi-orden sa Dios
Daghang sayop nga mga ideya ug mga tradisyon ang nanglungtad samtang ang Pagpahiuli nagsugod sa pagkaylap. Mahigugmaong gitul-id sa Manluluwas ang sayop nga mga ideya ug giklaro ang mga punto sa doktrina nga mahinungdanon sa atong kaluwasan, sama sa kaminyoon ug sa pamilya. Kini nga leksiyon gituyo aron matabangan ang mga estudyante nga makasabot sa kamahinungdanon sa kaminyoon ug sa pamilya diha sa plano sa Langitnong Amahan.
Mga Posibleng Kalihokan sa Pagkat-on
Ang katuyoan sa yuta
Sa pagsugod sa klase, ikonsiderar ang pagpakita og mga hulagway nga makapahibalo sa unsay imong ganahan bahin sa yuta. Pangutan-a ang mga estudyante sama sa mosunod nga mga pangutana:
-
Unsay imong ganahan sa kalibotan?
-
Kinsay milalang sa kalibotan? (tan-awa ang Moises 1:33; Abraham 3:22–24).
-
Unsa ang pipila ka mga rason nga si Jesukristo milalang sa kalibotan?
Ang mga estudyante lagmit adunay pipila ka nagkalain-laing mga tubag sa kataposang pangutana. Dayega ug pasalamati sila sa ilang mga tubag. Kon ang mga estudyante dili maghisgot mahitungod sa kaminyoon o pamilya, hisgoti nga si Presidente Russell M. Nelson mihatag og dugang nga rason sa paglalang sa kalibotan. Ipakigbahin ang mosunod nga pamahayag. Human mabasa ang pamahayag, mahimong hangyoon ang mga estudyante sa pagpakigbahin sa ilang mga hunahuna mahitungod niini. Dasiga sila sa pagpangita og mga ebidensiya nga mosuporta niini nga pamahayag sa tibuok leksiyon.
Sa mubo nga pagkasulti, gilalang ang kalibotan aron ang mga pamilya mahimo. (Russell M. Nelson, “The Creation,” Ensign, Mayo 2000, 85)
“Ang kaminyoon gi-orden sa Dios”
Kini nga leksiyon magatutok sa Doktrina ug mga Pakigsaad 49:15–17 ug sa doktrina sa kaminyoon ug pamilya. Kon makabenepisyo ang mga estudyante gikan sa paghisgot og ubang mga hilisgotan nga anaa sa seksiyon, ikonsiderar ang paggamit sa “Dugang nga mga Kalihokan sa Pagkat-on” nga bahin niini nga leksiyon.
Wala madugay human ang mga Santos nagsugod sa pagpuyo sa Kirtland, Ohio, usa ka bag-ong kinabig nga si Leman Copley gusto nga ang mga misyonaryo magsangyaw sa ebanghelyo ngadto sa mga miyembro sa iyang kanhi relihiyosong grupo, ang mga Shaker. Ang mga Shaker mituo nga ang Ikaduhang Pag-anhi nahitabo na ug nga si Kristo mipakita isip usa ka babaye nga ginganlan og Ann Lee. Gisalikway nila ang kaminyoon ug ang pipila ka mga Shakers nagdili sa pagkaon sa karne. Nangayo og katin-awan sa Ginoo si Propeta Joseph Smith ug nakadawat sa Doktrina ug mga Pakigsaad 49. Ang Ginoo misugo nila ni Sidney Rigdon, Parley P. Pratt, ug Leman Copley sa pagdala sa pagpadayag ngadto sa mga Shaker ug sa pagsangyaw sa kamatuoran ngadto kanila.
Ang Doktrina ug mga Pakigsaad 49:15–17 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
Basaha ang Doktrina ug mga Pakigsaad 49:15–17, mangita sa mga pagtulun-an ni Jesukristo kabahin sa kaminyoon ug sa pamilya.
-
Unsa ang imong mga pangutana mahitungod niini nga mga bersikulo?
-
Unsaon kaha nato pagpamubo ang mga pagtulun-an sa Manluluwas gikan niini nga mga bersikulo?
Ikonsiderar ang paghatag sa mga estudyante og pipila ka gutlo sa paghunahuna og pagpamubo nga mga pamahayag. Dayon pagdapit og pipila sa paglista sa ilang mga pamahayag diha sa pisara. Aron magmalamposon ang mga estudyante, tingali kinahanglan kang motabang sa pagklaro sa pipila ka mga hugpong sa mga pulong gikan sa mga bersikulo. Tabangi sila sa pag-ila sa mga kamatuoran sama sa ang kaminyoon tali sa lalaki ug sa babaye gi-orden sa Dios ug ang mga asawa ug mga bana gisugo nga mahimong usa ug magbaton og mga anak.
-
Ngano nga kini nga mga kamatuoran importante nga masabtan sa mga Shaker ug sa uban sa panahon ni Joseph Smith?
Mahimo nimong ipasabot nga ang mga Shakers nagtuo sa hingpit nga dili pagminyo, o paglikay sa kaminyoon ug sekswal nga mga relasyon. Dayon mahimo nimong hisgotan ang komon nga mga pagtuo sa atong panahon nga maoy hinungdan nga ang mga tawo mosalikway sa kaminyoon. Mahimo nimong gamiton ang usa o duha sa mosunod nga mga pangutana.
-
Unsa ang pipila ka kalibotanong pagtuo nga maoy hinungdan nga ang mga tawo mosalikway sa kaminyoon sa atong panahon?
-
Unsa nga ebidensiya ang imong nakita nga si Satanas naningkamot sa pag-usab o paglaglag sa kabalaan sa kaminyoon ug pamilya diha sa plano sa Langitnong Amahan?
Ang mosunod nga handout makatabang sa mga estudyante nga mas masabtan ang mga pagtulun-an sa Manluluwas kabahin sa kaminyoon ug pamilya. Mahimo nimong dapiton ang mga estudyante sa pagtinguha og espirituhanong saksi sa kaimportante sa kaminyoon ug pamilya samtang sila magtuon. Mahimo nimong bahinon ang klase sa katunga ug tahasan ang matag katunga sa pagtuon og usa ka seksiyon sa handout nga sila ra. Human sa igo nga panahon, ipares ang matag estudyante uban sa usa ka tawo gikan sa laing katunga sa klase. Dapita sila sa pagpakigbahin sa unsay ilang nakat-onan sa usag usa ug sa paghisgot mahitungod sa mga pangutana sa panaghisgot.
Ang Kaminyoon ug Pamilya Gi-orden sa Dios
Kaminyoon tali sa lalaki ug sa babaye
Pagtuon:
Basaha ang Marcos 10:6–9; 1 Mga Taga-Corinto 11:11; ug ang mosunod nga pamahayag ni Sister Bonnie L. Oscarson, kanhiay nga Kinatibuk-ang Presidente sa Young Women. Pangitaa ang mga pagtulun-an mahitungod sa kaminyoon tali sa lalaki ug sa babaye.
Gitudloan kita diha sa mga kasulatan, “Hinoon, diha sa Ginoo ang babaye dili gawas sa lalaki, ni ang lalaki gawas sa babaye” [1 Mga Taga-Corinto 11:11]. Alang ni bisan kinsa nga makakab-ot sa kahingpitan sa mga panalangin sa priesthood, kinahanglan gayod nga may bana ug asawa nga na-sealed diha sa balay sa Ginoo, nag-ambahan sa katarong, ug nagpabiling matinud-anon sa ilang mga pakigsaad. Kini mao ang plano sa Ginoo alang sa Iyang mga anak, ug walay igong pakigpulong o pagpanaway sa publiko nga mousab sa unsay napadayag sa Ginoo. … Magmahimo kitang tigpanalipod sa kaminyoon ingon nga gi-orden kini sa Ginoo samtang magpadayon sa pagpakita og gugma ug kaluoy alang niadtong may lahi nga mga ideya. (Bonnie L. Oscarson, “Mga Tigpanalipod sa Pamahayag bahin sa Pamilya,” Liahona, Mayo 2015, 15)
Paghisgot:
-
Sa unsang paagi nga ang kaminyoon tali sa babaye ug sa lalaki makatabang sa pagtuman sa “plano sa Tiglalang alang sa walay kataposan nga destinasyon sa Iyang mga anak”? (“Ang Pamilya: Usa ka Pamahayag ngadto sa Kalibotan,” ChurchofJesusChrist.org).
-
Unsaon nato sa pagpakita og kaluoy niadtong adunay lain-laing mga panglantaw samtang nanalipod gihapon sa doktrina sa Manluluwas mahitungod sa kaminyoon tali sa lalaki ug sa babaye?
“Sumanay ug pun-on ang yuta”
Pagtuon:
Basaha ang Genesis 1:27–28; Salmo 127:3; Marcos 10:13–14; ug ang mosunod nga pamahayag ni Elder Neil L. Andersen sa Korum sa Napulog Duha ka Apostoles. Pangitaa ang mga pagtulon-an sa Ginoo mahitungod sa mga bata.
Samtang kita motan-aw sa mga mata sa usa ka bata, atong makita ang isigkaanak sa Dios nga lalaki o babaye kinsa atong kauban sa kinabuhi sa wala pa dinhi sa yuta.
Usa kini ka talagsaong pribilehiyo sa bana ug asawa kinsa makapanganak aron makahatag og mortal nga lawas alang niining espiritung mga anak sa Dios. Nagatuo kita sa mga pamilya, ug nagatuo kita sa mga anak.
Kon ang usa ka bata matawo sa usa ka bana ug asawa, nagtuman sila og bahin sa plano sa atong Langitnong Amahan sa pagdala og mga anak dinhi sa yuta. Ang Ginoo miingon, “Mao kini ang akong buhat ug ang akong himaya—ang pagpahinabo sa pagkaimortal ug sa kinabuhi nga dayon sa tawo” [Moises 1:39]. Sa dili pa ang imortalidad, kinahanglan nga dunay mortalidad. (Neil L. Andersen, “Mga Bata,” Liahona, Nob. 2011, 28)
Paghisgot:
-
Sa unsang paagi nga ang pagtan-aw sa mga anak ug pamilya nga adunay mahangtorong panglantaw makatabang sa magtiayon sa paghatag og prayoridad sa pipila sa ilang mga desisyon?
-
Unsa ang atong nakat-onan gikan sa ehemplo sa Manluluwas mahitungod kon unsaon nato pagtratar ug pagpakig-uban ang mga bata?
Ikonsiderar ang paghatag sa mga estudyante og panahon sa pagpasabot sa tahas sa kaminyoon ug pamilya diha sa plano sa Langitnong Amahan. Mahimo silang mopili og usa sa kalibotanong mga pagtuo mahitungod sa kaminyoon nga gihisgotan kaganena ug gamiton ang doktrina sa Manluluwas nga gitudlo sa Doktrina ug mga Pakigsaad 49:15–17 aron sa pagtul-id niana nga pagtuo.
Mahimo nimong ipakigbahin ang imong pagpamatuod mahitungod kon sa unsang paagi ang doktrina sa Manluluwas mahitungod sa kaminyoon ug pamilya mipanalangin sa imong kinabuhi. Mahimo usab nga mopakigbahin ang mga estudyante og mga kasinatian ug pagpamatuod.
Ikonsiderar ang pagdapit sa mga estudyante sa pagrekord sa mga impresyon nga ilang naangkon mahitungod sa kamahinungdanon sa kaminyoon ug pamilya sa plano sa Langitnong Amahan.