Leksiyon 67: Doktrina ug mga Pakigsaad 49–50

Sukda ang Imong Nakat-onan 4

Doktrina ug mga Pakigsaad 41-50

Ang paghatag og panahon sa mga estudyante sa pagsukod sa espirituhanong paglambo makatabang kanila nga maduol ngadto sa Manluluwas ug maningkamot nga mahimong mas mahisama Kaniya. Makakita usab sila sa pag-uswag nga ilang nahimo ug kon diin sila mahimong molambo. Kini nga leksiyon makatabang sa mga estudyante sa paghinumdom ug sa pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila sa paglambo sa espirituhanong paagi.

Mga Posibleng Kalihokan sa Pagkat-on

Pagtimbang-timbang sa imong espirituhanong mga timaan

Ang mosunod makaandam sa mga estudyante sa pagtandi sa pisikal nga mga timaan ngadto sa ebidensiya nga ilang makaplagan sa ilang espirituhanong paglambo. Mahimo nilang kompletohon kini nga kalihokan nga magtinagsa o isip usa ka klase pinaagi sa pagdrowing og mapa diha sa pisara.

Pagpili og usa ka lokal nga destinasyon ug pagdrowing og usa ka mapa gikan sa imong kasamtangan nga lokasyon ngadto niana nga destinasyon. Paglakip og mga timaan nga motabang sa usa ka tawo nga mahibalo nga anaa sila sa husto nga dalan.

• Hain nga mga timaan ang imong gilakip? Ngano man?

• Unsa ang papel sa mga timaan sa pagtabang kanimo sa pagpangita sa destinasyon?

  Kon magdrowing ka og mapa diha sa pisara, mahimo nimong ilisan ang orihinal nga destinasyon sa hugpong sa mga pulong nga “Mahimong sama ni Jesukristo.” Samtang motubag ang mga estudyante sa sunod nga pangutana, mahimo nimong ilisan ang pipila ka mga timaan sa mga tubag sa mga estudyante.

  Paghunahuna og usa ka paagi aron sa pagtabang sa mga estudyante sa pagbalhin ngadto sa paghunahuna mahitungod sa ilang kaugalingong mga kinabuhi. Mahimo kang mosulti og sama sa mosunod sa imong kaugalingong mga pulong.

• Kon ang atong destinasyon mao ang mahimong mas susama ni Jesukristo, unsa kaha ang pipila sa espirituhanong mga timaan nga makatabang kanimo nga mahibalo nga anaa ka sa saktong dalan?

Ang makita og klaro ang atong pag-uswag nagkinahanglan sa pagpamalandong ug sa giya sa Espiritu Santo. Paggahin og panahon sa pag-ila sa pipila ka pag-uswag nga imong nahimo pinaagi sa pagpangita sa espirituhanong mga timaan sa imong kinabuhi. Sa laing pagkasulti, pangitaa ang ebidensiya nga ikaw nahimong mas sama ni Jesukristo samtang nagtuon ka sa Doktrina ug mga Pakigsaad sa bag-ohay lang nga mga semana.

Mahimo nimong hatagan og panahon ang mga estudyante sa pagpamalandong ug sa paghunahuna sa ilang kaugalingon. Human sa igong panahon, dapita sila sa pagpakigbahin sa unsay ilang nadiskobrehan.

Sa laing paagi, mahimo nimong gamiton ang mosunod nga mga kalihokan aron matabangan ang mga estudyante sa pagpamalandong sa ilang espirituhanong pag-uswag sa bag-ohay lang nga mga semana. Ang mga kalihokan sa pagsukod niini nga leksiyon nagfollow up sa miaging mga leksiyon sa seminary. Kon kini nga mga leksiyon gipahiangay o wala itudlo, ang mga kalihokan sa pagsukod kinahanglan usab nga ipahiangay aron mapakita ang mga kasinatian nga nabatonan sa imong mga estudyante.

Sa matag kalihokan, mahimo nimong ipasabot ngadto sa mga estudyante nga ang pagsukod sa ilang pagkat-on niini nga mga paagi mahimong sama sa pagtala og mga timaan sa usa ka panaw nga nagpamatuod nga sila nagpaingon sa husto nga direksiyon. Mahimong sensitibo sa mga estudyante nga tingali wala mobati nga sila nag-uswag o wala pa makakita og positibo nga kausaban sa ilang kinabuhi, ug paghunahuna og mga paagi sa pagdasig kanila sa ilang mga paningkamot.

Pagbati og dugang nga tinguha sa pagpuyo og usa ka gipahinungod nga kinabuhi

Kini nga kalihokan makatabang sa mga estudyante sa pagpamalandong sa ilang tinguha sa pagpuyo og usa ka gipahinungod nga kinabuhi sama sa gibuhat sa Manluluwas. Kini nga kalihokan mokuha og tubag gikan sa unsay lagmit nakat-onan sa mga estudyante mahitungod sa pagpuyo og usa ka gipahinungod nga kinabuhi diha sa Doktrina ug mga Pakigsaad 42:29–42. Pipila sa mosunod nga mga pangutana makatabang sa mga estudyante sa pagrebyo sa ilang pagsabot sa balaod sa pagpahinungod.

• Unsa ang imong nahinumdoman mahitungod sa balaod sa pagpahinungod?

• Hain nga mga bersikulo gikan sa Doktrina ug mga Pakigsaad 42 ang makatabang kanato nga mas makasabot niini nga balaod?

• Unsa ang pipila ka mga ehemplo sa unsay mahimo sa mga kabatan-onan aron mapuy-an ang balaod sa pagpahinungod karon?

  Pipila sa mga bersikulo nga mahimong hisgotan sa mga estudyante naglakip sa mga bersikulo 29–38. Kon ang mga estudyante wala maghisgot sa bisan hain niini, tingali maayo nga ipabasa nila ang mga bersikulo ug ipakigbahin ang ilang nadiskobrehan. Atol sa leksiyon mahitungod sa balaod sa pagpahinungod, ang mga estudyante mahimong misulat sa “Iyang mga kamot” o nagpalakra sa usa sa ilang mga kamot diha sa ilang journal. Tingali ilang gisukod ang ilang tinguha nga mahisama sa mga kamot sa Ginoo sa ilang pakig-inter-aksyon sa uban. Kon gibuhat kini sa mga estudyante, mahimo nimo silang dapiton sa pagpangita niini nga entry diha sa ilang journal sa pagtuon ug sa pagtan-aw kon giunsa nila sa pagtubag. Ang mosunod nga mga pangutana makatabang sa mga estudyante sa pagtimbang-timbang kon sa unsang paagi ang ilang mga pagbati mahitungod sa balaod sa pagpahinungod mahimong nausab. Mahimong motubag ang mga estudyante diha sa ilang journal sa pagtuon.

• Unsa ang imong gibati mahitungod sa pagpahinungod sa imong panahon, mga talento, ug uban pang mga butang nga gipanalangin kanimo sa Ginoo sa pagtukod sa Iyang gingharian, lakip ang pagtabang niadtong nanginahanglan?

• Kumusta ang imong pagbati karon kompara niadtong nagtuon ka sa balaod sa pagpahinungod pipila ka semana ang milabay? Unsa kahay nakaapekto sa imong gibati?

Human mahatagi og panahon ang mga estudyante sa pagpamalandong, mahimo nimo silang dayegon sa matinud-anong pagtimbang-timbang sa ilang mga pagbati. Mahimo nimong dapiton ang mga estudyante sa pagpakigbahin kon unsay ilang nakat-onan o nadiskobrehan gikan niini nga kalihokan. Ikonsiderar ang pagtabang sa mga estudyante sa pagpamalandong kon sa unsang paagi ang pagpuyo og usa ka gipahinungod nga kinabuhi makaapekto kanila 1, 5, o 10 ka tuig gikan karon. Mahimo usab nimong ipakigbahin ang mga paagi diin napanalanginan ka sa imong paningkamot sa pagpuyo og usa ka gipahinungod nga kinabuhi ug sa unsang paagi kini nakatabang kanimo nga mahimong mas mahisama kang Kristo.

Awhaga ang mga estudyante sa pagtinguha og pagpadayag kon sa unsang paagi sila mahimong mas andam pa sa pagbuhat sa tanan nga ilang mahimo aron sa pagtabang niadtong nanginahanglan ug sa pagtukod sa gingharian sa Dios dinhi sa yuta karon.

Pagkamasulundon ngadto sa mga sugo sa Dios

Aron matabangan ang mga estudyante sa pagsukod sa ilang kasamtangang mga paningkamot sa pagsunod sa mga sugo sa Dios, dapita sila sa pagrebyo sa Doktrina ug mga Pakigsaad, mangita sa mga sugo nga bag-o lang nilang nakat-onan. Mahimo nimong awhagon sila sa paglista og pipila sa mga sugo nga gipadayag diha sa Doktrina ug mga Pakigsaad 42:18–52 diha sa pisara.

• Sa unsang paagi nga ang atong pagkamasulundon sa mga sugo ikatandi sa espirituhanong mga timaan sa atong panaw aron mahimong mas sama ni Jesukristo?

Kon ang mga estudyante nagtakda og tumong sa miaging leksiyon nga mas motuman sa mga sugo, ang mosunod nga pag-aghat sa journal makatabang kanila sa pagpamalandong sa ilang tumong.

Pamalandongi ang usa ka sugo nga bag-o lang nimong gibati nga gidasig sa Espiritu Santo nga pagatutokan.

• Unsaon nimo sa paghulagway ang imong mga paningkamot sa pagtuman niini nga sugo?

• Giunsa sa Manluluwas pagpanalangin kanimo sa imong mga paningkamot?

• Aduna bay paagi nga paminaw nimo makabuhat ka pa og mas maayo? Unsay imong buhaton?

• Aduna pa bay laing sugo nga imong gibati nga gidasig sa Espiritu Santo nga pagatutokan? Unsay imong buhaton?

Ipasabot ang mga tahas sa Espiritu Santo

Kini nga pagbansay makatabang sa mga estudyante sa pagpasabot kon unsay ilang nakat-onan mahitungod sa Espiritu Santo diha sa ilang pagtuon sa Doktrina ug mga Pakigsaad. Mahimo nimong isulat ang “Mga Tahas sa Espiritu Santo” diha sa pisara. Hangyoa ang mga estudyante sa paglista og lain-laing mga tahas sa Espiritu Santo, uban sa nagsuporta nga kasulatan kon mahimo. Hisgoti kon nganong importante kini nga mga tahas nga buhaton sa Espiritu Santo.

Sa ubos mao ang pipila sa mga tahas sa Espiritu Santo. Mahimong basahon sa mga estudyante ang may kalabotan nga mga bersikulo ug dayon maghimo og sitwasyon diin ang pagsabot sa usa ka piho nga tahas sa Espiritu Santo makatabang sa usa ka tawo. Dayon dapita ang mga estudyante sa paggamit sa mga kasulatan sa pagpasabot sa tahas sa Espiritu Santo sa pagtabang sa tawo nga anaa sa sitwasyon.

• Nagpahigayon sa pagsangyaw ug sa pagdawat sa ebanghelyo (Doktrina ug mga Pakigsaad 42:5–6, 13–14; 50:13–14, 17–22)

• Nagpamatuod sa Langitnong Amahan ug ni Jesukristo (Doktrina ug mga Pakigsaad 42:17)

• Naggiya kanato ug nagtabang kanato nga maandam alang sa Ikaduhang Pag-anhi ni Jesukristo (Doktrina ug mga Pakigsaad 45:56–57)

• Naghatag og espirituhanong mga gasa (Doktrina ug mga Pakigsaad 46:11)

• Naghinlo kanato gikan sa sala (Doktrina ug mga Pakigsaad 50:29)

Dugang nga mga Kalihokan sa Pagkat-on

Pagsukod sa paghimo ug pagtuman sa mga pakigsaad

Kini nga kalihokan mokuha og tubag gikan sa unsay lagmit nakat-onan sa mga estudyante mahitungod sa paghimo ug pagtuman sa mga pakigsaad diha sa Doktrina ug mga Pakigsaad 40, 42, 45, ug 49. Ikonsiderar ang paghatag sa mosunod nga pamahayag gikan ni Elder Dieter F. Uchtdorf o ipakita ang bidyo nga “Si Jesukristo Mao ang Kalig-on sa Kabatan-onan” gikan sa time code 00:35 hangtod sa 2:36. Ang mga estudyante mahimong mamalandong sa mosunod nga mga pangutana samtang magtuon sila niini nga pamahayag gikan ni Elder Uchtdorf.

• Unsa ang imong gipaningikamotan nga buhaton aron sa pagdugang sa imong koneksiyon ngadto sa Langitnong Amahan ug ni Jesukristo?

• Sa unsang paagi sa imong hunahuna nga ang pagpaningkamot sa pagtuman sa imong mga pakigsaad nakatabang kanimo nga mobati nga mas duol ngadto sa Langitnong Amahan ug kang Jesukristo?

Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo?

Ako nagtuo nga Siya mosugod sa pagpadayag sa Iyang dakong gugma alang kaninyo. Siya mahimong mosulti niini, apan kini usab modagayday pag-ayo—bisan gikan sa Iyang presensiya—nga dili masaypan, kusganon nga mabati gayod ninyo ang Iyang gugma alang kaninyo! …

Si Jesus mahimong nagpasabot nga ang inyong mga pakigsaad Kaniya—gihimo sa dihang kamo gibunyagan ug gibag-o matag higayon nga kamo moambit sa sakramento—naghatag ninyo og espesyal nga koneksiyon ngadto Kaniya. Ang matang sa koneksiyon nga gihulagway sa mga kasulatan nga magkahiusa sa pagsangon aron nga, uban sa Iyang tabang, kamo makapas-an sa bisan unsa nga ipapas-an. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9)

Dapita ang mga estudyante sa pagpamalandong kon unsa ang ilang pagbati mahitungod sa mga pakigsaad nga ilang gihimo. Mahimo nimong ihatag ang pipila o ang tanan sa mosunod nga mga pamahayag ug dapita ang mga estudyante sa pagsukod sa ilang koneksiyon ngadto sa Langitnong Amahan ug ni Jesukristo. Dapita ang mga estudyante sa pagrekord kon unsay ilang gibati diha sa ilang mga journal isip tinuod/bakak nga mga pamahayag o sa sukdanan gikan sa 1 ngadto sa 10.

• Nangita ko og mga oportunidad sa pag-ampo ngadto sa akong Langitnong Amahan.

• Ako andam sa pagdala diha sa akong kaugalingon sa ngalan ni Kristo.

• Naningkamot ko nga mahinumdom kanunay sa Manluluwas.

• Ako matinguhaon sa pagpaningkamot nga motuman sa mga sugo sa Dios.

• Nabati nako ang makahupay ug naggiya nga impluwensiya sa Espiritu sa akong kinabuhi.

• Kon ako makasala, ako dili mawagtangan og paglaom. Naghinulsol ko ug padayong naningkamot.

Sa kataposan niini nga kalihokan, mahimo nimong dayegon ang mga estudyante sa matinud-anong pagtimbang-timbang sa ilang mga pagbati. Mahimo nimong dapiton ang mga estudyante sa pagpakigbahin sa mga pamahayag nga importante ngadto kanila. Ikonsiderar ang pagtabang sa mga estudyante nga makasabot sa espesyal nga koneksiyon ngadto kang Jesukristo nga atong madawat samtang kita naghimo ug naghupot sa mga pakigsaad.