Leksiyon 66: Doktrina ug mga Pakigsaad 49–50

Doktrina ug mga Pakigsaad 50, Bahin 2

Magtudlo ug magkat-on pinaagi sa Espiritu

Diha sa Doktrina ug mga Pakigsaad 50, ang Manluluwas mitudlo nga ang mga Santos kinahanglan motudlo ug makakat-on sa ebanghelyo pinaagi sa Espiritu sa Kamatuoran. Isip Gamhanan nga Magtutudlo, si Jesukristo mao ang hingpit nga ehemplo sa pagtudlo pinaagi sa Espiritu. Ang tanang miyembro sa Simbahan sa Manluluwas makabaton og mga oportunidad sa pagtudlo ug pagkat-on pinaagi sa Espiritu sa tibuok nilang kinabuhi. Kini nga leksiyon makahatag sa mga estudyante og oportunidad sa pagbansay sa pagtudlo ug pagkat-on pinaagi sa Espiritu sa Kamatuoran.

Mga Posibleng Kalihokan sa Pagkat-on

Si Jesus mao ang hingpit nga magtutudlo sa ebanghelyo

Sa pagsugod sa klase, ikonsiderar ang pagtabang sa mga estudyante sa paghunahuna mahitungod sa matang sa pagka-magtutudlo ang Manluluwas. Usa ka paagi nga mahimo nimo kini mao ang pagsulat diha sa pisara sa ulohan nga Mga Hiyas alang sa Malamposon nga Pagtudlo ug Pagkat-on. Ubos sa ulohan, paghimo og tulo ka mga kolum nga ang una adunay marka nga si Jesukristo.

Dapita ang mga estudyante sa paghisgot kon unsa nga mga hiyas ang naghimo kang Jesukristo nga hingpit nga magtutudlo sa ebanghelyo, ug ilista kini sa pisara. Ang bidyo nga “Teaching in the Savior’s Way with Elder Uchtdorf” (53:34) gikan sa time code 19:01 hangtod sa 20:06 makatabang sa mga estudyante sa paghunahuna mahitungod sa kamahinungdanon sa pagtudlo sama sa Manluluwas.

Dapita ang mga estudyante sa paggamit sa mga hiyas sa Kristohanong pagtudlo ug pagkat-on sa ebanghelyo samtang nagbansay sila sa pagtudlo ug pagkat-on karon.

Basaha ang mosunod nga pamahayag sa Unang Kapangulohan, mangita kon unsa nga mga oportunidad sa pagtudlo sa ebanghelyo ang anaa kanimo karon ug sa umaabot.

Unsa ka mahimayaong oportunidad ang aduna kamo sa pagtudlo sa ebanghelyo ni Jesukristo! Bisan kon kamo aduna o walay usa ka piho nga tawag sa pagtudlo, kamo mga magtutudlo. Isip usa ka disipulo sa Halangdong Magtutudlo, si Jesukristo, kamo adunay mga oportunidad sa pagpakigbahin sa Iyang kahayag bisan asa kamo moadto—diha sa panimalay, sa simbahan, samtang kamo mangalagad ngadto sa uban, ug taliwala sa inyong mga higala. Ang pagtudlo sa ebanghelyo usa ka sagradong pagsalig. Kini usa ka importanteng bahin sa buhat sa Ginoo, ug kini labing maayo og resulta kon kita mobuhat niini sa Iyang pamaagi. (Pagtudlo Sumala sa Pamaagi sa Manluluwas [2022], 1)

• Ngano kaha nga ang pagtudlo sa ebanghelyo ni Jesukristo makita nga usa ka “sagradong pagsalig”?

• Unsa ang imong gibati mahitungod sa pagtudlo sa ebanghelyo?

Kita magtudlo ug magkat-on pinaagi sa Espiritu

Kon nakamugna ka og tulo ka mga kolum diha sa pisara, sulati ang sunod nga duha og Mga Magtutudlo ug Mga Tigkat-on. Dapita ang mga estudyante sa pagdugang og mga hiyas sa mga magtutudlo o mga tigkat-on nga ilang nadiskobrehan sa mosunod nga mga bersikulo.

Basaha ang Doktrina ug mga Pakigsaad 50:13–14, 17–22, mangita kon sa unsang paagi gitinguha sa Manluluwas ang Iyang ebanghelyo nga matudlo.

• Sa imong hunahuna, unsay buot ipasabot sa pagtudlo ug pagkat-on pinaagi sa Espiritu?

• Unsa ang pipila sa mga panalangin nga atong madawat kon magtudlo ug magkat-on kita pinaagi sa Espiritu?

Tabangi ang mga estudyante sa pag-ila og baroganan sama sa kon magtudlo ug magkat-on kita pinaagi sa Espiritu, makasabot kita sa usag usa ug magmalig-on ug dungan nga magmaya. Mahimo nimong pahinumdoman ang mga estudyante nga ang magmalig-on nagpasabot nga mabayaw o madasig.

Aron matabangan ang mga estudyante nga makasabot kon unsay buot ipasabot sa pagtudlo ug pagkat-on pinaagi sa Espiritu, mahimo kang mohatag og pipila ka mga pakisayran sa kasulatan sama sa Alma 31:5; Doktrina ug mga Pakigsaad 42:14; 88:118, 122; ug 130:18–19. Dapita ang mga estudyante nga makigtinabangay uban sa mga pares o diha sa gagmay nga mga grupo aron ilhon kon giunsa nato sa pagtudlo ug pagkat-on pinaagi sa Espiritu. Idugang kini nga mga ideya diha sa mga kolum nga “Mga Magtutudlo” ug “Mga Tigkat-on” diha sa pisara.

Aron matabangan ang mga estudyante nga mobati sa kamahinungdanon niini nga baroganan, mahimo nimong ipakita ang bidyo nga “Come, Follow Me: Rejoice Together” (1:20) sa ChurchofJesusChrist.org​o hisgoti isip usa ka klase ang mosunod nga mga pangutana. Mahimong mapasalamatan sa mga estudyante ang pagkadungog kanimo nga mipakigbahin kon sa unsang paagi ikaw napanalanginan pinaagi sa pagpaminaw ug pagkat-on gikan kanila diha sa seminary.

• Kanus-a nimo nasinati kini nga mga panalangin isip magtutudlo o tigkat-on sa ebanghelyo?

• Unsa ang atong mabuhat sa atong klase sa seminary aron maseguro nga ang tanan makadawat niini nga mga panalangin?

Kita makatudlo sumala sa paagi sa Manluluwas

Dapita ang mga estudyante sa pag-andam og mubo nga leksiyon sa ebanghelyo nga itudlo. Mahimong mangandam ang mga estudyante nga magtinagsa o adunay kapares. Dapita ang mga estudyante sa mainampoong pagkonsiderar sa mga panginahanglan sa ilang mga klasmeyt ug sa pag-ila og mensahe o hilisgotan nga makasulbad niadto nga mga panginahanglan.

Pipila sa mga leksiyon nga kapilian mahimong maglakip sa:

• Usa ka tudling sa doktrinal nga kahanas.

• Usa ka paborito nga bersikulo sa kasulatan o istorya.

• Usa ka “Mahangtorong mga Kamatuoran” nga seksiyon gikan Alang sa Kalig-on sa mga Kabatan-onan: Usa ka Giya sa Paghimo og mga Pagpili.

• Usa ka seksiyon sa leksiyon niini nga semana sa Dali, Sunod Kanako—Alang sa Panimalay ug sa Simbahan.

Ang handout sa ubos makatabang sa mga estudyante sa pag-andam sa ilang leksiyon. Samtang sila mangandam sa pagtudlo, mahimo nimong pahinumduman ang mga estudyante sa mga kinaiya sa mga magtutudlo ug mga tigkat-on sa ebanghelyo nga ilang gilista diha sa pisara. Mahimo nimo silang dapiton sa pagtinguha nga mahimong maayong mga tigkat-on sa ebanghelyo samtang ang mga klasmeyt mopakigbahin sa ilang mga leksiyon. Kon makabaton na sila og igong panahon sa pagpangandam, dapita ang mga estudyante sa pagtudlo sa ilang mensahe ngadto sa kapares o diha sa gamay nga grupo. Kon angay, mahimo kang magdapit og pipila ka mga estudyante nga buot motudlo sa ilang mensahe ngadto sa klase.

Pagtudlo Sumala sa Pamaagi sa Manluluwas

Paghimo og mubo nga leksiyon sa ebanghelyo aron matabangan ang uban nga makat-on mahitungod ni Jesukristo. Tinguhaa ang inspirasyon gikan sa Espiritu Santo samtang mangandam ka ug magtudlo sa imong leksiyon. Ang mosunod nga latid sa leksiyon makatabang kanimo nga maandam sa pagtudlo.

• Hilisgotan sa leksiyon ug/o mga pakisayran sa kasulatan:

• Ang mahinungdanon nga kamatuoran o baroganan nga akong itudlo:

• Unsaon nako pagtutok kini nga leksiyon ngadto ni Jesukristo:

• (Mga) pangutana nga akong ipangutana:

• Giunsa nako pagbati ang gahom niini nga kamatuoran sa akong kinabuhi (pagpamatuod):

• Unsay akong idapit sa mga tigkat-on nga buhaton:

Makat-onan nato ang mga kamatuoran sa ebanghelyo pinaagi sa Espiritu

Human sa kalihokan, dapita ang mga estudyante sa pagtimbang-timbang sa kasinatian sa pagtudlo ug sa pagkat-on. Mahimo nimong tan-awon ang mga lista diha sa pisara ug hisgotan kon sa unsang paagi ang mga estudyante misulay sa paggamit niini nga mga hiyas. Mahimo nilang tubagon ang mosunod nga mga pangutana diha sa ilang mga journal sa pagtuon.

• Unsa ang imong naobserbahan mahitungod sa pagtudlo sumala sa pamaagi sa Manluluwas atol niini nga kalihokan? Unsa ang imong nabantayan mahitungod sa pagkat-on pinaagi sa Espiritu?

• Human niini nga kalihokan, unsay imong gibati mahitungod sa imong abilidad sa pagtudlo pinaagi sa Espiritu?

Dayega ang mga estudyante sa ilang mga paningkamot sa pagtudlo ug sa pagkat-on pinaagi sa Espiritu. Mahimo nimong dapiton ang mga estudyante sa pagpadayon sa paggamit sa ilang nakat-onan samtang magtudlo ug magtuon sa ebanghelyo.

Dugang nga mga Kapanguhaan

Unsa ang akong responsibilidad isip usa ka magtutudlo sa ebanghelyo?

Si Elder Dieter F. Uchtdorf sa Korum sa Napulog Duha ka Apostoles mipahinumdom kanato:

Akong gipaningkamotan sa pagpahinumdom ang akong kaugalingon kanunay nga sa tanan nakong mga paningkamot sa pagtudlo sa ebanghelyo ug pagdala sa mga tawo ngadto ni Jesukristo, Ako dili makakabig ni bisan kinsa.

Ang Espiritu Santo lang ang makahimo niana.

Kita makapamulong sa mga pulong, apan ang pagkabig usa ka butang sa Espiritu. Mahitabo kini kon ang Espiritu Santo motandog sa kasingkasing ug ang usa ka tawo motubag ngadto sa Iyang impluwensiya pinaagi sa pagsunod sa Manluluwas.

Kon, tungod sa pag-agni sa mga pulong o maayong pagkarason sa mga argumento, ang usa ka tawo “nakombinser” sa pagsunod ni Jesukristo, kana nga pagtuo mahimong sama ka lumalabay sa liso nga nahulog diha sa batoon nga mga dapit.

Ang atong trabaho dili ang pagkabig. Dili kana ang atong responsibilidad.

Apan unsa man ang atong trabaho? Ang pagtudlo sa maayo nga balita ni Jesukristo ug sa Iyang ebanghelyo nga napahiuli sa atong panahon! Ug kini atong trabaho ang pagmatuod ug pagsuporta sa atong mga pulong uban sa atong matinuoron ug sinsero nga mga buhat! Sa atong kinabuhi, giunsa nato sa pagpakabuhi ug paglihok.

Kon adunay tawo nga motubag ngadto sa unsay atong gitudlo tali kini kanila ug sa Dios. Apan kita mahimong taytayan nga mosumpay kanila ngadto sa Espiritu Santo. Kita mahimong bintana diin ang Espiritu Santo mosulod ngadto sa ilang mga kinabuhi. Ang atong mga pulong ug ang atong mga aksiyon makatudlo sa doktrina ni Kristo sa paagi nga makatabang sa mga estudyante nga makasinati sa pagsulod sa Espiritu Santo. (Dieter F. Uchtdorf, “A Teacher’s Checklist​” [“Teaching in the Savior‘ s Way with Elder Uchtdorf,” broadcast alang sa tanan nga mga magtutudlo diha sa Simbahan, Hunyo 12, 2022], broadcasts.ChurchofJesusChrist.org)

Unsa ang mga paagi nga ang Espiritu Santo nagtabang sa mga magtutudlo ug sa mga tigkat-on nga makasabot sa usag usa?

Si Elder Dieter F. Uchtdorf sa Korum sa Napulog Duha ka Apostoles mipakigbahin:

Ang Ginoo nagtudlo kanato nga kon ang usa ka magtutudlo motudlo pinaagi sa Espiritu ug ang usa ka tigkat-on modawat pinaagi sa Espiritu, silang duha “makasabot sa usag usa, ug ang duha makadawat og kaayohan ug maglipay nga maghiusa” [Doktrina ug mga Pakigsaad 50:22].

Dili kini butang nga walay kapuslanan. Hunahunaa lang kini: ang Espiritu Santo, usa ka miyembro sa Dios nga Kapangulohan, direktang makigsulti kanato samtang atong ablihan ang atong mga kasingkasing ngadto sa Iyang impluwensiya. Siya makadugang sa konteksto, giladmon, ug pagsabot sa mga pulong nga gipamulong o nadungog. Ang Espiritu Santo mopahiangay niini nga mga mensahe ngadto sa atong piho nga mga panginahanglanon ug mga kahimtang. Siya mohatag og paagi sa pagpakigbahin ug pagdawat og sagradong mga mensahe sa pagpadayag gikan sa atong mahigugmaong Langitnong Amahan. (Dieter F. Uchtdorf, “Five Messages That All of God’s Children Need to Hear​” [debosyonal sa Brigham Young University, Ago. 17, 2021], 1–2, speeches.byu.edu)

Unsaon nako nga mas makat-on pa gikan sa pakigpulong o leksiyon sa ebanghelyo?

Si Elder David A. Bednar sa Korum sa Napulog Duha ka Apostoles mitudlo:

Ang pagkat-on uban ug pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Pinaagi sa kinasingkasing ug pagkamakanunayon sa atong paglihok nga dinasig sa hugot nga pagtuo mapakita nato sa atong Amahan sa Langit ug sa Iyang Anak nga si Jesukristo ang atong pagkaandam nga makat-on ug pagdawat og panudlo gikan sa Espiritu Santo. …

… Kon motambong ka sa imong klase sa Sunday School ug maminaw sa imong magtutudlo nga mopresentar og usa ka hilisgotan, maayo kana. Apan kon naningkamot ka ug nangandam, kon naghunahuna ka sa mga butang nga gidapit ka sa imong magtutudlo sa pagbasa, pagpamalandong, ug pag-ampo sa dili pa magklase, mahimo nga adunay usa ka kusganon nga pagbubu sa Espiritu, ug ang Espiritu Santo mahimo nimo nga magtutudlo. Ang pagpangandam nagdapit og pagpadayag. (David A. Bednar, “Pagkat-on sumala sa Pamaagi sa Ginoo,” Liahona, Okt. 2018, 52-53)

Dugang nga mga Kalihokan sa Pagkat-on

Doktrina ug mga Pakigsaad 50:22. “Ang duha makadawat og kaayohan ug maglipay nga maghiusa”

Dapita ang mga estudyante sa pagbasa sa Doktrina ug mga Pakigsaad 50:22, mangita sa mga panalangin nga moabot kon magtudlo ug magkat-on kita pinaagi sa Espiritu. Ang mga pangutana sa panaghisgot mahimong maglakip sa mosunod:

• Kanus-a kamo napanalanginan sa Espiritu nga mas makasabot sa usa ka magtutudlo sa ebanghelyo?

• Kanus-a kamo nakadawat og espirituhanong pagpalig-on o panabot atol sa leksiyon sa ebanghelyo diha sa panimalay o sa simbahan?

• Kanus-a kamo mibati og kalipay sa pagtudlo o pagkat-on sa ebanghelyo?

Ang mga tigkat-on sa ebanghelyo kinahanglang molihok nga adunay hugot nga pagtuo aron sa pagdapit sa Espiritu

Aron matabangan ang mga estudyante nga mas makasabot sa tahas sa usa ka tigkat-on sa ebanghelyo, ikonsiderar ang pagpasalida sa bidyo nga “A Teacher” (2:52). Niini nga bidyo, si Presidente Howard W. Hunter (1907–95) naggamit og usa ka langgam nga masuso aron sa paghulagway sa responsibilidad sa tigkat-on sa paggamit sa ilang kabubut-on sa pagkat-on pinaagi sa Espiritu.

Human sa bidyo, mahimo nimong hisgotan ang mga pangutana sama sa mosunod:

• Unsa ang gitudlo niini nga istorya mahitungod sa tahas sa tigkat-on sa usa ka setting sa ebanghelyo? ang tahas sa magtutudlo?

• Unsa ang pipila ka mga butang nga atong mahimo aron magamit ang atong kabubut-on ug madapit ang Espiritu Santo nga mahimong magtutudlo sa kamatuoran?

Sa unsang paagi si Jesus usa ka magtutudlo?

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Ang Manluluwas mao ang Gamhanang Magtutudlo. … Si Jesus gihulagway isip usa ka philosopher, ekonomista, social reformer, ug daghan pa. Apan labaw pa niini, ang Manluluwas usa ka magtutudlo. Kon pangutan-on kamo, ‘Unsa man ang trabaho ni Jesus?‘ Adunay usa lamang ka tubag: Siya usa ka magtutudlo. Siya gayod ang angay natong sundon. Siya mao ang gamhanan nga magtutudlo. (Boyd K. Packer, Mine Errand from the Lord [2008], 336)

Dapita ang mga estudyante sa pagpangita og mga asoy sa kasulatan nga si Jesus nagtudlo. Ania ang pipila ka mga pananglitan:

• Juan 3:1–21

• Juan 13:3–17

• 3 Nephi 11:13–15

• 3 Nephi 17:1–9

• Ether 2:18–25

Human sila nakagahin og panahon sa pagtuon, dapita ang mga estudyante sa pagpakigbahin kon sa unsang paagi gipakita ni Jesus ang mga elemento sa epektibo nga pagtudlo sa ebanghelyo.

Ngano nga atong ipunting ang tanan nga pagtudlo sa ebanghelyo diha kang Jesukristo?

Aron matabangan ang mga estudyante nga makasabot kon nganong ang matag leksiyon sa ebanghelyo kinahanglan nga isentro kang Jesukristo, mahimo nimo silang dapiton sa pagtuon sa “Pagtudlo mahitungod ni Jesukristo Bisan Unsa pay Imong Gitudlo” (Pagtudlo sumala sa Pamaagi sa Manluluwas, 6–7). Mahimong ipakigbahin sa mga estudyante ang ilang nadiskobrehan samtang ilang gitun-an kini nga kapanguhaan. Mahimo kang mohatag og ehemplo sa usa ka tudling sa doktrinal nga kahanas. Dayon dapita ang mga estudyante sa pagkonsiderar kon sa unsang paagi kana nga tudling makatudlo mahitungod ni Jesukristo, sa Iyang kinaiya, sa Iyang mga hiyas, sa Iyang kinabuhi, sa Iyang misyon, o sa Iyang ebanghelyo.