“Lesona 64—Mataupu Faavae ma Feagaiga 49: O Le Faaipoipoga i le va o se Alii ma se Tamaitai Ua Faauuina e le Atua,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 49,” Tusi Lesona a le Faiaoga Seminare o le Mataupu Faavae ma Feagaiga
Lesona 64: Mataupu Faavae ma Feagaiga 49–50
Mataupu Faavae ma Feagaiga 49
O Le Faaipoipoga i le va o se Alii ma se Tamaitai Ua Faauuina e le Atua
E tele manatu ma tu masani sese sa i ai a o amata ona tatala mai le Toefuataiga. Sa faasa’oina ma le alofa e le Faaola manatu sese ma faamanino vaega o aoaoga faavae e taua i lo tatou faaolataga, e pei o le faaipoipoga ma le aiga. O lenei lesona ua faamoemoe e fesoasoani i tamaiti aoga ia malamalama i le taua o le faaipoipoga ma le aiga i le fuafuaga a le Tama Faalelagi.
Gaoioiga E Ono Mafai Ona Aoao Ai
O le faamoemoega o le lalolagi
Ina ia amata le vasega, mafaufau e faaali atu ata e fesootai mai ai mea e te fiafia i ai e uiga i le lalolagi. Fai atu i tamaiti aoga fesili e pei o nei :
-
O a mea e te fiafia ai i le lalolagi?
-
O ai na foafoaina le lalolagi? (tagai Mose 1:33; Aperaamo 3:22–24).
-
O a nisi o mafuaaga na foafoaina ai e Iesu Keriso le lalolagi?
Atonu o le a eseese tali a tamaiti aoga i le fesili mulimuli. Faailoa atu ma faafetai atu ia i latou mo a latou tali. Afai e le talanoa tamaiti aoga e uiga i le faaipoipoga po o le aiga, ia ta’ua faapea, na tuuina mai e Peresitene Russell M. Nelson se mafuaaga faaopoopo mo le foafoaga o le lalolagi. Faasoa atu le faamatalaga lenei. A uma ona faitau le faamatalaga, mafaufau e fai atu i tamaiti aoga e faasoa mai o latou manatu e uiga i ai. Fautuaina i latou e vaavaai mo faamaoniga e lagolago ai lenei faamatalaga i le aluga o le lesona.
I le aoteleina faafaigofie, na foafoaina le lalolagi ina ia i ai aiga. (Russell M. Nelson, “O Le Foafoaga,” Liahona, Me 2000, 85)
“O le faaipoipoga ua faauuina e le Atua”
O lenei lesona o le a taulai atu i le Mataupu Faavae ma Feagaiga 49:15–17 ma le aoaoga faavae o le faaipoipoga ma le aiga. Afai e mafai ona manuia tamaiti aoga mai le talanoaina o isi autu o loo i ai i le vaega, mafaufau e faaaoga le vaega o “Gaoioiga Faaopoopo e Aoao Ai” o lenei lesona.
E lei leva ona amata faamautu le Au Paia i Katelani, Ohaio, ae manao se tagata faatoa liliu mai e igoa ia Limani Copley i faifeautalai e talai atu le talalelei i tagata o lana vaega faalelotu muamua, o le au Sieka. Sa talitonu le au Sieka ua uma ona tupu le Afio Mai Faalua ma sa faaali mai Keriso o se fafine e igoa ia Ana Lee. Sa latou teena le faaipoipoga ma sa faasa e nisi o le au Sieka ona aai i aano o manufasi. Sa ole atu le Perofeta o Iosefa Samita i le Alii mo se faamaninoga ma maua mai ai le Mataupu Faavae ma Feagaiga 49. Sa faatonuina e le Alii ia Sini Rikitone, Pale P. Palate, ma Limani Copley e avatu le faaaliga i le au Sieka ma folafola atu le upu moni ia i latou.
O leMataupu Faavae ma Feagaiga 49:15–17 o se fuaitau o le atamai i aoaoga faavae. Mafaufau e valaaulia tamaiti aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.
Faitau i le Mataupu Faavae ma Feagaiga 49:15–17, ma saili mo aoaoga a Iesu Keriso e uiga i le faaipoipoga ma le aiga.
-
O a ni au fesili o i ai e uiga i fuaiupu?
-
E mafai faapefea ona tatou aoteleina aoaoga a le Faaola mai nei fuaiupu?
Mafaufau e tuu atu i tamaiti aoga ni nai minute e mafaufau ai i faamatalaga o aotelega. Ona valaaulia lea o nisi e lisi mai a latou faamatalaga i luga o le laupapa. Mo tamaiti aoga ina ia faamanuiaina, atonu e manaomia ona e fesoasoani e faamanino nisi o fasifuaitau mai fuaiupu. Fesoasoani ia i latou e faailoa upu moni e pei o le faaipoipoga i le va o se alii ma se tamaitai ua faauuina e le Atua ma ua poloaiina ava ma tane ina ia tasi ma ia faia ni fanau.
-
Aisea na taua ai nei upu moni mo le au Sieka ma isi i aso o Iosefa Samita ina ia malamalama ai?
Atonu e te manao e ta’u atu i ai sa talitonu le au Sieka i le matuai teena o le faaipoipoga po o le vaosia mai le faaipoipoina ma sootaga faafeusuaiga. Ona mafai lea ona outou talanoaina talitonuga masani i o tatou aso e mafua ai ona teena e tagata le faaipoipoga. E mafai ona e faaaogaina se tasi po o fesili uma e lua nei.
-
O a nisi o talitonuga faalelalolagi e mafua ai ona teena e tagata le faaipoipoga i o tatou aso?
-
O le a se faamaoniga ua e vaaia i le taumafai o Satani e suia pe faaleaga le paia o le faaipoipoga ma le aiga i le fuafuaga a le Tama Faalelagi?
O le tufaaga lenei e mafai ona fesoasoani i tamaiti aoga e malamalama atili ai i aoaoga a le Faaola e uiga i le faaipoipoga ma le aiga. Atonu e te manao e valaaulia tamaiti aoga e saili se molimau faaleagaga i le taua o le faaipoipoga ma le aiga a o latou suesue. E mafai ona e vaevaeina le vasega i le afa ma tofi afa taitasi e suesue e i latou lava se vaega e tasi o le tufaaga. A uma ua lava se taimi, faapaga tamaiti taitasi ma se tasi mai le isi afa o le vasega. Valaaulia i latou e faasoa mai mea na latou aoaoina i le tasi ma le isi ma talanoa e uiga i fesili o le talanoaga.
O le Faaipoipoga ma le Aiga ua Faauuina e le Atua
O le faaipoipoga i le va o se alii ma se tamaitai
Suesue:
Faitau le Mareko 10:6–9; 1 Korinito 11:11; ma le saunoaga lenei a Sister Bonnie L. Oscarson, o lē sa avea muamua ma Peresitene Aoao o Tamaitai Talavou. Vaavaai mo aoaoga e uiga i le faaipoipoga i le va o se alii ma se tamaitai.
Ua aoaoina i tatou i tusitusiga paia, “A e ui lava ina faapea, e leai se tane pe a le o i ai le fafine, e leai foi se fafine pe a le o i ai le tane, i le Alii” [1 Korinito 11:11]. Mo le mauaina e soo se tagata o le atoatoaga o faamanuiaga o le perisitua, e tatau ona i ai se tane ma se ava ua faamauina i le maota o le Alii, o galulue faatasi i le amiotonu, ma tumau faamaoni i a laua feagaiga. O le fuafuaga lenei a le Alii mo Ana fanau, ma e le mafai e talanoaga po o faitioga lautele ona suia mea ua folafola mai e le Alii. … Ia avea i tatou ma tagata e puipuia le faaipoipoga e pei ona faauuina e le Alii a o faaauau pea ona faaalia le alofa ma le agaalofa mo i latou e eseese manatu. (Bonnie L. Oscarson, “O Tagata e Puipuia le Folafolaga o le Aiga,” Liahona, Me 2015, 15)
Talanoa:
-
E faapefea e le faaipoipoga i le va o se tamaitai ma se alii ona fesoasoani e faataunuu “le fuafuaga a le Foafoa mo le taunuuga e faavavau o Lana fanau”? (“O Le Aiga: O Se Folafolaga i le Lalolagi,” ChurchofJesusChrist.org).
-
E mafai faapefea ona tatou faaalia le agaalofa ia i latou e eseese manatu a o puipuia pea le aoaoga faavae a le Faaola o le faaipoipoga i le va o se alii ma se tamaitai?
“Ia uluola, ma ia tumu ai le laolagi”
Suesue:
Faitau le Kenese 1:27–28; Salamo 127:3; Mareko 10:13–14; ma le saunoaga lenei a Elder Neil L. Andersen o le Korama a Aposetolo e Toasefululua. Vaavaai mo aoaoga a le Alii e uiga i tamaiti.
Pe a tatou vaai atu i mata o se tamaitiiti, ua tatou vaai i se atalii po o se afafine o le Atua o lē na tatou tutu faatasi i le muai olaga.
O se faamanuiaga maoae mo se tane ma se ava le fanauina o ni fanau ina ia maua ni tino faaletino o nei fanau agaga a le Atua. Tatou te talitonu i aiga ma e tatou te talitonu foi i le fanau.
Pe a fanau mai se tamaitiiti i se tane ma se ava, ua la faataunuuina se vaega o le fuafuaga a lo tatou Tama Faalelagi i le aumaia o fanau i le lalolagi. Sa fetalai mai le Alii, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” [Mose 1:39]. A o le’i oo mai le tino ola pea, e tatau ona i ai le tino faaletino. (Neil L. Andersen, “Tamaiti,” Liahona, Nov. 2011, 28)
Talanoa:
-
E mafai faapefea e le vaai atu i tamaiti ma le aiga ma se vaaiga e faavavau ona fesoasoani i se ulugalii faaipoipo e faamuamua nisi o a laua faaiuga?
-
O le a se mea e mafai ona tatou aoao mai le faataitaiga a le Faaola e faatatau i le ala tatou te taulima ai ma mafuta ma tamaiti?
Mafaufau e avatu se taimi i tamaiti aoga e faamatala ai le matafaioi o le faaipoipoga ma le aiga i le fuafuaga a le Tama Faalelagi. E mafai ona latou filifilia se tasi o talitonuga faalelalolagi e uiga i le faaipoipoga na talanoaina muamua ma faaaoga le aoaoga faavae a le Faaola o loo aoao mai i le Mataupu Faavae ma Feagaiga 49:15–17 e faasa’o ai lena talitonuga.
Atonu e te manao e faasoa atu lau molimau e uiga i le ala ua faamanuiaina ai lou olaga e le aoaoga faavae a le Faaola e uiga i le faaipoipoga ma le aiga. E mafai foi e tamaiti aoga ona faasoa mai aafiaga ma molimau.
Mafaufau e valaaulia tamaiti aoga e tusifaamaumau ni uunaiga na latou maua e uiga i le taua o le faaipoipoga ma le aiga i le fuafuaga a le Tama Faalelagi.