Seminare
Lesona 67—Iloilo Lou Aoaoina 4: Mataupu Faavae ma Feagaiga 41–50

“Lesona 67—Iloilo Lou Aoaoina 4—Mataupu Faavae ma Feagaiga 41–50,” Tusi Lesona a le Faiaoga Seminare o le Mataupu Faavae ma Feagaiga (2025)

“Iloilo Lou Aoaoina 4,” Tusi Lesona a le Faiaoga Seminare o le Mataupu Faavae ma Feagaiga

Lesona 67: Mataupu Faavae ma Feagaiga 49–50

Iloilo Lou Aoaoina 4

Mataupu Faavae ma Feagaiga 41–50

o ni talavou o loo tilotilo i se faafanua

O le tuuina atu i tamaiti aoga o se taimi e iloilo ai le tuputupu a’e faaleagaga e mafai ona fesoasoani ia i latou e faalatalata atili atu ai i le Faaola ma taumafai ai ia avea atili e faapei o Ia. E mafai foi ona latou vaaia le alualu i luma sa latou faia ma le mea e mafai ona latou faaleleia atili. O lenei lesona e mafai ona fesoasoani i tamaiti aoga e manatua ma iloilo ai pe na faapefea i o latou aafiaga i le suesueina o le Mataupu Faavae ma Feagaiga ona fesoasoani i lo latou tuputupu a’e ai faaleagaga.

Gaoioiga E Ono Mafai Ona Aoao Ai

Iloilo ou faailoga faaleagaga

O mea nei e mafai ona saunia ai tamaiti aoga e faatusatusa faailoga faaletino i faamaoniga latou te ono maua i lo latou tuputupu ae faaleagaga. E mafai ona latou faamaeaina taitoatasi lenei gaoioiga pe i se vasega foi e ala i le tusia o se faafanua i luga o le laupapa.

Filifili se taunuuga i le lotoifale ma tusi se faafanua mai lou nofoaga o i ai nei agai i lena taunuuga. Ia aofia ai faailoga o le a fesoasoani i se tasi ia iloa o loo latou i ai i le ala sa’o.

  • O a faailoga na e faaaofia ai? Aisea?

  • O le a le matafaioi o loo faia e faailoga iloga e fesoasoani ai ia te oe e saili se taunuuga?

    Afai na e tusia se faafanua i luga o le laupapa, e mafai ona e suia le taunuuga muamua i le fasifuaitau “Avea e Pei o Iesu Keriso.” A o tali mai tamaiti aoga i le isi fesili, e mafai ona e suia nisi o faailoga i tali a tamaiti aoga.

    Mafaufau i se auala e fesoasoani ai i tamaiti aoga ia suia i le mafaufau e uiga i o latou lava olaga. E mafai ona e fai atu se tala e pei o lenei i au lava upu.

  • Afai o lo tatou taunuuga o le avea atili e faapei o Iesu Keriso, mata o a nisi o faailoga faaleagaga e mafai ona fesoasoani e te iloa ai o loo e i ai i luga o le ala?

O le mafai ona iloa manino o lo tatou alualu i luma e manaomia ai le mafaufau loloto ma le taitaiga a le Agaga Paia. Faaalu sina taimi e faailoa mai ai nisi o tulaga agai i luma na e faia e ala i le vaavaai mo ni faailoga faaleagaga i lou olaga. I se isi faaupuga, vaavaai mo faamaoniga ua avea atili oe e pei o Iesu Keriso a o e suesueina le Mataupu Faavae ma Feagaiga i vaiaso talu ai nei.

Atonu e te manao e tuu atu i tamaiti aoga se taimi e mafaufau loloto ai ma manatunatu na o i latou lava. A lava loa se taimi, valaaulia i latou e faasoa mai mea na latou mauaina.

I se isi itu, e mafai ona e faaaogaina gaoioiga nei e fesoasoani ai i tamaiti aoga e tomanatu i lo latou alualu i luma faaleagaga i vaiaso talu ai nei. O faatinoga iloilo i lenei lesona e tulitataoina ia lesona muamua a le seminare. Afai na fetuunaia nei lesona pe le’i aoaoina foi, o le a manaomia foi ona fetuunai ia gaoioiga o iloiloga e atagia ai aafiaga na maua e au tamaiti aoga.

Faatasi ai ma gaoioiga taitasi, atonu e te manao e faamamafa atu i tamaiti aoga o le iloiloina o lo latou aoaoina i nei auala e mafai ona pei o le makaina o faailoga i se faigamalaga e faamautu ai o loo latou agai atu i le itu sa’o. Ia nofouta i tamaiti aoga o e atonu e le o lagonaina lo latou alualu i luma pe lei vaai foi i se suiga lelei i o latou olaga, ma mafaufau i ni auala e uunaia ai i latou i a latou taumafaiga.

Lagonaina se manao faateleina e ola i se olaga faapaiaina

O lenei gaoioiga e mafai ona fesoasoani i tamaiti aoga e manatunatu ai i lo latou manao e ola i se olaga faapaiaina e pei ona sa faia e le Faaola. O lenei gaoioiga e utuvai mai i mea atonu na aoaoina e tamaiti aoga e uiga i le ola ai i se olaga faapaiaina i le Mataupu Faavae ma Feagaiga 42:29–42. O nisi o fesili nei e mafai ona fesoasoani i tamaiti aoga e iloilo ai lo latou malamalama i le tulafono o le faapaiaga.

  • O le a se mea e te manatua e uiga i le tulafono o le faapaiaga?

  • O a fuaiupu mai le Mataupu Faavae ma Feagaiga 42 e mafai ona fesoasoani tatou te malamalama atili ai i lenei tulafono?

  • O a nisi o faataitaiga o mea e mafai e tagata talavou ona fai e ola ai i le tulafono o le faapaiaga i aso nei?

    O nisi o fuaiupu e ono ta’ua e tamaiti aoga e aofia ai fuaiupu 29–38. Afai e le ta’ua e tamaiti aoga se tasi o nei mea, atonu e lelei le tuu atu ia i latou e faitau ia fuaiupu ma faasoa mai mea na latou mauaina. I le taimi o le lesona e uiga i le tulafono o le faapaiaga, atonu na tusia e tamaiti aoga “Ona aao” pe tusi le auivi o se tasi o o latou lima i totonu o a latou api talaaga. Atonu na latou iloiloina lo latou manao ia faapei o aao o le Alii i a latou fegalegaleaiga ma isi. Afai na faia e tamaiti aoga lenei mea, e mafai ona e valaaulia i latou e sue le faamatalaga lenei i totonu o a latou api faamaumau mo suesuega ma vaai pe na faapefea ona latou tali atu. O fesili nei e mafai ona fesoasoani i tamaiti aoga e iloilo ai pe na faapefea ona suia o latou lagona e uiga i le tulafono o le faapaiaga. E mafai ona tali mai tamaiti aoga i a latou api talaaga.

  • O a ni ou lagona e uiga i le faapaiaina o lou taimi, taleni, ma isi mea ua faamanuiaina ai oe e le Alii i le fausiaina o Lona malo, e aofia ai le fesoasoani atu ia i latou o e le tagolima?

  • E faapefea ona faatusatusa ou lagona i le taimi na e suesueina ai le tulafono o le faapaiaga i ni nai vaiaso talu ai? O le a sou manatu i le aafiaga o ou lagona?

A uma ua lava se taimi e tomanatu ai tamaiti aoga, e mafai ona e faamalo atu ia i latou mo le iloiloina faamaoni o o latou lagona. Atonu e mafai ona e valaaulia tamaiti aoga e faasoa mai mea na latou aoaoina pe maua mai lenei gaoioiga. Mafaufau e fesoasoani i tamaiti aoga e manatunatu pe mafai faapefea e le ola i se olaga faapaiaina ona aafia ai i latou i le 1, 5, po o le 10 tausaga mai le taimi nei. E mafai foi ona e faasoa atu ni auala ua faamanuiaina ai oe i au taumafaiga e ola i se olaga faapaiaina ma pe na faapefea ona fesoasoani ia te oe e avea atili ai e faapei o Keriso.

Uunaia tamaiti aoga e saili faaaliga i auala e mafai ai ona latou naunau atili e faia mea uma latou te mafaia e fesoasoani ai ia i latou o e le tagolima ma fausia le malo o le Atua i le lalolagi i aso nei.

Usiusitai i poloaiga a le Atua

Ina ia fesoasoani i tamaiti aoga e iloilo a latou taumafaiga talu ai nei e usitai i poloaiga a le Atua, valaaulia i latou e iloilo le Mataupu Faavae ma Feagaiga, ma vaavaai mo poloaiga na latou aoaoina lata mai nei. E mafai ona e uunaia i latou e lisi nisi o poloaiga o loo faaalia mai i le Mataupu Faavae ma Feagaiga 42:18–52 i luga o le laupapa.

  • E mafai faapefea ona faatusatusa lo tatou usiusitai i poloaiga i faailoga faaleagaga i la tatou malaga ia avea atili e faapei o Iesu Keriso?

Afai e faatu e tamaiti aoga se sini i se lesona talu ai ina ia tausia atili ai poloaiga, o le uunaiga lenei o le api talaaga e mafai ona fesoasoani ia i latou e toe manatunatu ai i la latou sini.

Mafaufau i se poloaiga na e lagonaina talu ai nei le musuia e le Agaga Paia e taulai atu i ai.

  • E faapefea ona e faamatalaina au taumafaiga e tausia lenei poloaiga?

  • E faapefea ona faamanuiaina oe e le Faaola i au taumafaiga?

  • Pe o i ai se auala e te lagona e mafai ai ona sili atu ona e faia? O le a se mea o le a e faia?

  • Pe o i ai se isi poloaiga e te lagona le musuia e le Agaga Paia e taulai atu i ai? O le a se mea o le a e faia?

Faamatala ia matafaioi a le Agaga Paia

O lenei gaoioiga e mafai ona fesoasoani i tamaiti aoga e faamalamalama ai mea ua latou aoaoina e uiga i le Agaga Paia i la latou suesuega o le Mataupu Faavae ma Feagaiga. E mafai ona e tusia “Matafaioi a le Agaga Paia” i luga o le laupapa. Fai atu i tamaiti aoga e lisi ni matafaioi eseese a le Agaga Paia, faatasi ma se mau lagolago pe a mafai. Talanoaina pe aisea ua avea ai nei matafaioi taua ma matafaioi a le Agaga Paia e faatino.

I lalo atu o loo i ai nisi o matafaioi a le Agaga Paia. E mafai e tamaiti aoga ona faitau ia fuaiupu e o faatasi ai ona maua lea o se tulaga e mafai ai e le malamalama i se matafaioi patino a le Agaga Paia ona fesoasoani i se tasi. Ona valaaulia lea o tamaiti aoga e faaaoga tusitusiga paia e faamatala ai le matafaioi a le Agaga Paia e fesoasoani ai i le tagata o loo i ai i lea tulaga.