Seminare
Lesona 66—Mataupu Faavae ma Feagaiga 50, Vaega 2: Aoao Atu ma Aoao Mai e ala i le Agaga

“Lesona 66—Mataupu Faavae ma Feagaiga 50, Vaega 2: Aoao Atu ma Aoao Mai e ala i le Agaga,” Tusi Lesona a le Faiaoga Seminare o le Mataupu Faavae ma Feagaiga (2025)

“Mataupu Faavae ma Feagaiga 50, Vaega 2, ” Tusi Lesona a le Faiaoga Seminare o le Mataupu Faavae ma Feagaiga

Lesona 66: Mataupu Faavae ma Feagaiga 49–50

Mataupu Faavae ma Feagaiga 50, Vaega 2

Aoao Atu ma le Aoao Mai e ala i le Agaga

aoaoina i le potuaoga

I le Mataupu Faavae ma Feagaiga 50, na aoao mai ai le Faaola e tatau i le Au Paia ona aoao atu ma aoao mai le talalelei e ala i le Agaga o le Upu moni. I le avea ai ma Faiaoga Sili, o Iesu Keriso o le faataitaiga atoatoa o le aoao atu e ala i le Agaga. O tagata uma o le Ekalesia a le Faaola o le a maua avanoa e aoao atu ai ma aoao mai e ala i le Agaga i o latou olaga atoa. O lenei lesona e mafai ona tuu atu ai i tamaiti aoga le avanoa e faataitai ai le aoao atu ma le aoao mai e ala i le Agaga o le Upu Moni.

Gaoioiga E Ono Mafai Ona Aoao Ai

O Iesu o le faiaoga atoatoa o le talalelei

Ina ia amata le vasega, mafaufau e fesoasoani i tamaiti aoga e mafaufau e uiga i le ituaiga faiaoga sa i ai le Faaola. O se tasi o auala e mafai ona e faia ai lenei mea o le tusia lea o le ulutala Uiga Auaumama mo le Faamanuiaina i le Aoao Atu ma le Aoaoina Mai i luga o le laupapa. I lalo ifo o le ulutala, fai ni koluma se tolu ma faailoga le koluma muamua Iesu Keriso.

Valaaulia tamaiti aoga e talanoaina po o a uiga na avea ai Iesu Keriso ma faiaoga atoatoa o le talalelei, ma lisi i luga o le laupapa. O le vitio “Teaching in the Savior’s Way with Elder Uchtdorf” (53:34) mai le faailotaimi 19:01 i le 20:06 e mafai ona fesoasoani i tamaiti aoga e mafaufau ai i le taua o le aoao atu e pei o le Faaola.

53:39

Aoao Atu i le Ala a le Faaola ma Elder Uchtdorf

Ua faasoa mai e Elder Dieter F. Uchtdorf le auala e mafai ai ona tatou maua le olioli i le aoao atu i le ala a le Faaola i lenei faasalalauga mo faiaoga uma i le Ekalesia, na lolomiina i le aso 12 Iuni, 2022.

Valaaulia tamaiti aoga e faaaoga uiga o le aoao atu ma le aoaoina mai o le talalelei faaKeriso a o latou faataitai ona aoao atu ma aoao mai i le asō.

Faitau le saunoaga lenei a le Au Peresitene Sili, ma vaavaai po o a avanoa e aoao atu ai le talalelei o le a e maua i le taimi nei ma i le lumanai.

Oka se avanoa ina a matagofie e te maua e aoao atu ai le talalelei a Iesu Keriso! Pe i ai se valaauga faapitoa pe leai e aoao atu, o oe o se faiaoga. I le avea ai ma se soo o le Faiaoga Sili, o Iesu Keriso, ua e maua ai avanoa e faasoa atu ai Lona malamalama i soo se mea lava e te alu i ai—i le aiga, i le lotu, a o e auauna atu i isi, ma i au uo. O le aoao atu o le talalelei o se faatuatuaga paia. O se vaega taua o le galuega a le Alii, ma e sili ona aoga pe a tatou faia i Lana ala. (Aoao Atu i le Ala a le Faaola [2022],1)

  • Aisea e mafai ai ona vaaia le aoao atu o le talalelei a Iesu Keriso o se “faatuatuaga paia”?

  • O le a sou lagona e uiga i le aoaoina atu o le talalelei?

Matou te aoao atu ma aoao mai e ala i le Agaga

O Iesu o loo aoao atu i le Au Paia

Afai na e fatuina ni koluma se tolu i luga o le laupapa, faaigoa isi koluma e lua Faiaoga ma Tagata Aoao. Valaaulia tamaiti aoga e faaopoopo uiga o faiaoga po o tagata aoao latou te mauaina i fuaiupu nei.

Faitau le Mataupu Faavae ma Feagaiga 50:13–14, 17–22, ma vaavaai pe o a auala e finagalo le Faaola e aoao atu ai Lana talalelei.

  • O le a sou manatu i le uiga o le ia aoao atu ma aoaoina mai e ala i le Agaga?

  • O a nisi o faamanuiaga tatou te maua pe a tatou aoao atu ma aoao mai e ala i le Agaga?

Fesoasoani i tamaiti aoga e faailoa mai se mataupu faavae e pei o le pe a tatou aoao atu ma aoao e ala i le Agaga, tatou te malamalama i le tasi ma le isi, ma tatou te faagaeetia ma olioli faatasi. E mafai ona e faamanatu i tamaiti aoga o le faagaeetiaina o lona uiga o le siitia pe atiina ae.

Ina ia fesoasoani i tamaiti aoga ia malamalama i le uiga o le aoao atu ma aoao mai e ala i le Agaga, e mafai ona e tuuina atu ni nai mau e pei o le Alema 31:5; Mataupu Faavae ma Feagaiga 42:14; 88:118, 122; ma le 130:18–19. Valaaulia tamaiti aoga e galulue ma paga po o ni vaega toalaiti e faailoa mai pe faapefea ona tatou aoao atu ma aoao mai e ala i le Agaga. Faaopoopo manatu nei i koluma o le “Faiaoga” ma “Tagata Aoao” i luga o le laupapa.

Ina ia fesoasoani i tamaiti aoga ia lagonaina le taua o lenei mataupu faavae, e mafai ona e faaali atu le vitio “Sau, Mulimuli Mai ia te A’u: Olioli Faatasi” (1:20) ChurchofJesusChrist.org pe talanoaina o se vasega ia fesili nei. Atonu e talisapaia e tamaiti aoga le faalogo atu ia te oe o faasoa mai pe na faapefea ona faamanuiaina oe e ala i le faalogo ma aoao mai ia i latou i le seminare.

1:20

Come, Follow Me: Rejoice Together

As we rely upon the Spirit in teaching and receiving the gospel, we will be mutually edified and rejoice together.

  • O anafea na e maua ai nei faamanuiaga o se faiaoga o le talalelei po o se tagata aoao?

  • O le a se mea e mafai ona tatou faia i la tatou vasega seminare ia mautinoa ai e mafai e tagata uma ona maua nei faamanuiaga?

E mafai ona tatou aoao atu i le ala a le Faaola

Valaaulia tamaiti aoga e saunia se lesona puupuu o le talalelei e aoao atu. E mafai e tamaiti aoga ona sauniuni taitoatasi pe faatasi ma se paga. Valaaulia tamaiti aoga e mafaufau ma le agaga tatalo i manaoga o tagata o a latou vasega ma faailoa mai se savali po o se autu e mafai ona talanoaina ai na manaoga.

O nisi o filifiliga o lesona e ono aofia ai:

aikona o le pepa e tufa atuO le tufaaga o loo i lalo e mafai ona fesoasoani i tamaiti aoga e saunia ai a latou lesona. A o latou sauni e aoao atu, e mafai ona e faamanatu i tamaiti aoga ia uiga o faiaoga ma tagata aoao o le talalelei sa latou lisiina i luga o le laupapa. E mafai ona e valaaulia i latou e saili ia avea ma ni tagata aoao lelei o le talalelei a o faasoa mai e tagata o le vasega a latou lesona. A lava loa le taimi o a latou sauniuniga, valaaulia tamaiti aoga e aoao atu a latou savali i se paga po o se vaega toalaiti. Pe a talafeagai, e mafai ona e valaaulia ni nai tamaiti aoga naunau e aoao atu a latou savali i le vasega.

Aoao Atu i le Ala a le Faaola

Fatu se lesona puupuu o le talalelei e fesoasoani ai i isi e aoao e uiga ia Iesu Keriso. Saili musumusuga mai le Agaga Paia a o sauni ma aoao atu lau lesona. O le otootoga o le lesona lenei e mafai ona fesoasoani ia te oe e saunia ai e aoao atu.

  • Autu o le lesona ma/po o mau faasino:

  • O le upu moni autu po o le mataupu faavae o le a ou aoao atu:

  • O le auala o le a ou taulai atu ai lenei lesona ia Iesu Keriso:

  • Fesili o le a ou fesili atu:

  • O le ala na ou lagonaina ai le mana o lenei upu moni i lo’u olaga (molimau):

  • O le mea o le a ou valaaulia tagata aoao e fai:

Tatou te aoaoina upu moni o le talalelei e ala i le Agaga

A uma le gaoioiga, valaaulia tamaiti aoga e iloilo le aafiaga faafaiaoga ma le aoaoina mai. E mafai ona e tagai i lisi o i luga o le laupapa ma talanoaina pe na faapefea ona taumafai tamaiti aoga e faaaoga nei uiga auaumama. E mafai ona latou tali fesili nei i a latou api faamaumau mo su’esu’ega.

  • O le a se mea na e matauina e uiga i le aoao atu i le ala a le Faaola i le taimi o lenei faatinoga? O le a se mea na e maitauina e uiga i le aoaoina e le Agaga?

  • A uma lenei gaoioiga, o le a sou lagona e uiga i lou tomai e aoao atu e ala i le Agaga?

Ia viia tamaiti aoga i a latou taumafaiga e aoao atu ma aoao e ala i le Agaga. E mafai ona e valaaulia tamaiti aoga e faaauau pea ona faataitai mea sa latou aoaoina a o latou aoao atu ma suesue i le talalelei.