Lesona 65: Mataupu Faavae ma Feagaiga 49–50

Mataupu Faavae ma Feagaiga 50, Vaega 1

Aloese Mai i le Faaseseina

I lo latou naunau e oo i meaalofa faaleagaga, o nisi o uluai tagata liliu mai i Katelani, Ohaio, sa faaseseina i le mafaufau faapea o nisi o faaaliga e le masani ai e mai le Agaga Paia e tusa lava pe sa lei i ai. Na ofoina mai e le Alii le taitaiga e fesoasoani ai ia i latou ia iloatino mea sa mai ia te Ia ma mea sa lei mai ia te Ia. O lenei lesona ua faamoemoe e fesoasoani i tamaiti aoga ia malamalama i le ala e mafai ai e le Alii ona fesoasoani ia i latou ia iloa le upu moni ma aloese mai le taufaasesē.

Gaoioiga E Ono Mafai Ona Aoao Ai

O le pusi tositosi

Mafaufau e faasoa atu le tala lenei. E mafai ona e faaali atu se ata o se skunk a o e faia.

Na faasoa mai e Elder Gary E. Stevenson o le Korama Aposetolo e Toasefululua le tala lenei:

O le Toeaina Matua o Grover … lea e nofo i se fale i se nuu maotua, e mamao mai le aai. Ua amata ona toeaina lava Uncle Grover. Sa ma mafaufau e tatau ona feiloai atu o ma atalii ia te ia a o le’i maliu. I se tasi la o aoauli, sa faia ai se matou tietiega umi i lona fale faatauvaa. Sa matou nonofo faatasi e eva ma faailoa atu o ia i o ma atalii. E lei umi le talanoaga, ae mananao le ma fanau tama laiti e toalua, masalo e lima ma le ono tausaga, e o i fafo e taaalo.

I le faalogo mai o Uncle Grover i le la talosaga, na punou mai ai o ia ma faafesagai lelei ona foliga ia i laua. … Sa ia fai atu ia i laua, i lona leo pāū, “Ia faaeteete—o le tele ia o skunk i fafo i o.” O le faalogo ai i lea tala, sa ma tetei ma Lesa; sa ma popole nei sausau i laua e se skunk! E lei umi ae o i fafo tamaiti e taaalo a o faaauau pea le matou evaga.

Mulimuli ane, ina ua matou i totonu o le taavale e o i le fale, sa ou fesili i tamaiti, “Na lua vaai i se skunk?” Sa tali mai le toatasi o i laua, “leai, ma te le’i vaai i ni skunks, ae na ma vaai i se tamai pusi e i ai tosi paepae i lona tua!” (Gary E. Stevenson, “Aua E Te Taufaasese Mai Ia Te Aʼu,” Liahona,, Nov. 2019, 93)

• Aisea e te manatu ai e lei iloa e tamaiti le skunk?

• O le a le tulaga matautia o le lē iloaina o le natura moni o se mea?

• E faapefea ona fesootai lenei tala i le mea e manao Satani ia tatou talitonu i ai e uiga ia te ia?

  Mafaufau e valaaulia tamaiti aoga e galulue ma se paga e tusi se faauigaga mo le upu taufaasese. A ua lava le taimi e tusitusi ai, e mafai ona e fesili i nisi o i latou e faasoa mai a latou tali i le vasega. Afai e aoga, mafaufau e faasoa atu le faauigaga o loo maua i le Taiala i Tusitusiga Paia: “I tusitusiga paia, o le faasese o le faia lea o se tasi ia talitonu i se mea e le moni” (Taiala i Tusitusiga Paia, “Faasese, Taufaasese,” scriptures.ChurchofJesusChrist.org).

  Mafaufau e lisi tali a tamaiti aoga i fesili nei i luga o le laupapa.

• O a nisi o auala o loo taumafai ai Satani e faasese ia tupulaga talavou i aso nei?

• Aisea e te manatu ai e manuia lelei le taufaasese a Satani i nisi taimi?

Valaaulia tamaiti aoga e saili musumusuga mai le Agaga Paia e fesoasoani ia i latou ia iloa ma aloese mai le faaseseina.

Taufaasese i le uluai Au Paia

Ina ua taunuu Iosefa Samita i Katelani, Ohaio, i le amataga o Fepuari 1831, na ia matauina “o nisi o manatu ese lava ma agaga sese na fetolofi mai i totonu” i nisi o le Au Paia (i le Talafaasolopito, 1838–1856 [Talafaasolopito o le Ekalesia], vol. A-1, 93, josephsmithpapers.org).

Na faamaumau e Ioane Uitimera le mea lenei e uiga i lenei vaitaimi.

O nisi sa i ai ni faaaliga ma sa le mafai ona ou iloa mea na latou vaaia, sa manatu nisi ia i latou lava, sa ia i latou le pelu a Lapana, ma sasau solo ai [pei o se fitafita o tietie i se solofanua], o nisi sa fai ni amioga faapei o se Initia o faatinoina le saeina o se vaega o le pa’u o le ulu, o nisi e faasesee pe masasau solo i … [luga] o le fola, faapei o le televave o se gata. … O lea na faatauaso ai e le tiapolo mata o ni soo lelei ma faamaoni. (John Whitmer, History, 1831–circa 1847, 26, josephsmithpapers.org)

O atugaluga e uiga i nei faatinoga na taitaia ai Iosefa Samita e ole atu i le Alii ma maua ai le Mataupu Faavae ma Feagaiga 50. I fuaiupu 1–9, na lapataia ai e le Alii ia toeaina o le Ekalesia e uiga i agaga sese ma e oo lava i tagata o le ekalesia o e sa faaseseina isi.

Faitau le Mataupu Faavae ma Feagaiga 50:1–3, ma vaavaai mo lapataiga a le Alii.

• Aisea e te manatu ai e faaaoga e Satani le taufaasese e taitai ese ai i tatou mai ia Iesu Keriso?

Fesoasoani i tamaiti aoga ia malamalama e ui lava e atamai tele Satani i le taufaasese, ae sa ofoina mai ma le alofa e Iesu Keriso ia fautuaga i fuaiupu 10–35 e fesoasoani ai i Ona soo ia iloa le mea moni ma aloese mai le taufaasese.

Mafaufau e faaali atu pe tusi i luga o le laupapa le faamatalaga lē uma lenei. E mafai ona e faatulaga tamaiti aoga i ni vaega toalaiti ma atofa i vaega taitasi se tasi o poloka mau nei. Ona mafai lea e tamaiti aoga ona saunia e faasoa mai mea na latou aoaoina mai le gaoioiga lenei.

Faitau fuaiupu nei, ma vaavaai pe faapefea ona e faaumaina le upu moni lenei: O le a fesoasoani le Alii ia i tatou e aloese mai le taufaasese a o tatou …

• Mataupu Faavae ma Feagaiga 50:17–22

• Mataupu Faavae ma Feagaiga 50:23–25

• Mataupu Faavae ma Feagaiga 50:31,34–35

A uma ua lava se taimi, valaaulia ni tamaiti aoga e lisi a latou suesuega i lalo o fasifuaitau e lē i maea i luga o le laupapa. O tali e mafai ona aofia ai mea nei: … saili e aoao atu ma aoao mai e ala i le Agaga o le Upumoni, … saili ia maua Lona malamalama, … tatalo ia iloa po o le agaga e mai pe le mai le Atua. Ae le i talanoaina fesili nei o se vasega, e ono fesoasoani mo tamaiti aoga e tali ia latou api faamaumau mo suesuega. O le tusia muamua o o latou manatu e mafai ona fesoasoani i tamaiti aoga ia lagona atili ai le to’a ma le naunau e faasoa mai. Atonu e i ai ni fesili faaopoopo a tamaiti aoga e uiga i nei upu moni. Faaalu se taimi e suesue ai a latou fesili. Atonu e mafai e a latou uo i le vasega ona tuuina mai ni malamalamaaga taua e faaopoopo atu i mea e mafai ona e faasoa atu.

Ina ia fesoasoani i tamaiti aoga e tauave le tiutetauave mo lo latou aoaoina, tagai i le aoaoga ua faaautuina “Tetee atu i le matele e tali atu i manatu ma fesili uma ae valaaulia le vasega e tali mai.” O loo maua lenei mea i Tomai o le Atinaega o Faiaoga: Valaaulia le Aoaoina ma le Filiga.

• O le a le uiga o lenei aoaoga?

• E mafai faapefea e lenei aoaoga ona fesoasoani ia te oe e maua ai le fesoasoani a le Alii e aloese ai mai taufaasese a Satani?

A o outou talanoaina le fesili talu ai, e mafai ona fesoasoani le faasino o tamaiti aoga i le lisi i luga o le laupapa o auala e taumafai ai Satani e faasese ia tupulaga talavou. E mafai e le vasega ona matau pe mafai faapefea e aoaoga a le Faaola na latou filifilia ona fesoasoani ia i latou e tali atu ai i se tasi pe sili atu foi o mea taufaasese o loo lisiina.

O se auala manino e aloese ai mai le taufaasese

Na faaiuina e le Alii i se faamautinoaga alofa e faapea ona o Ia, e le manaomia ai ona tatou fefefe. Faitau le Mataupu Faavae ma Feagaiga 50:40–44, ma vaavaai mo le mea na e aoaoina e uiga i le Faaola.

• O le a se mea e tumatila ia te oe mai nei fuaiupu e uiga i le Faaola?

• E mafai faapefea e le iloaina o lenei mea e uiga ia te Ia ona fesoasoani ia i tatou i se lalolagi ua tumu i le taufaasese?

• Na faapefea ona e iloa pe talitonu i nei upu moni e uiga ia Iesu Keriso?

Na aoao mai e Peresitene Russell M. Nelson mea nei e uiga i le auala e mafai ai ona tatou valaaulia le fesoasoani a le Alii e aloese ai mai le taufaasese:

O leo ma uunaiga a le lalolagi ua matua faatosina ma anoanoai. Ae ua tele na’ua leo e taufaasese, faatosina, ma mafai ona tosoesea i tatou mai le ala o feagaiga. Ina ia aloese mai le lotonutimomomo lē maalofia e mulimuli mai ai, ou te aioi atu ia te outou i le asō ia faafetaia’ia mailei a le lalolagi e ala i le faaavanoa o se taimi mo le Alii i lou olaga—i aso taitasi ma aso uma.

Afai o le tele o faamatalaga e te mauaina e sau mai faasalalauga faaleagafesootai po o isi ala faasalalau, o le a faaitiitia la lou tomai e lagona ai musumusuga a le Agaga. Afai e te le o sailia foi le Alii e ala i tatalo i aso taitasi ma le suesueina o le talalelei, ua e tuua oe lava ia e lamatia i filosofia e ono faatosina ae e lē moni. E oo lava i le Au Paia o ē faatuatua e mafai lava ona tosina atu i le manaia o le pa’ō o le faaili o tu’inanau a Papelonia.

O’u uso e ma tuafafine, ou te aioi atu ia te outou ia faaavanoa se taimi mo le Alii! Ia fai lou oe lava faavae faaleagaga ia mausali ma mafai ona tumau i taimi o tofotofoga e ala i le faia o mea e faatagaina e le Agaga Paia e faatasi ma oe i taimi uma. (Russell M. Nelson, “Faaavanoa se Taimi mo le Alii,” Liahona, Nov. 2021, 120)

• O a ni malamalamaaga faaopoopo na e maua e mafai ona fesoasoani ia te oe e aloese ai mai le taufaasese?

Mafaufau e tuu atu i tamaiti aoga se taimi e faasoa mai ai se mea na latou aoaoina pe lagona le musuia e fai e aloese ai mai le faaseseina. Valaaulia i latou e faaauau pea ona saili ni auala e iloa ai upu moni paia ma aloese ai mai le taufaasese. E mafai ona e faasoa atu lou talitonuga i le finagalo ma le tomai o le Alii e fesoasoani ai i tamaiti aoga e faia lenei mea.

Punaoa Faaopoopo

Aisea e manaomia ai ona tatou faaeteete i le taufaasese a Satani?

Na aoao mai Elder Gary E. Stevenson o le Korama a Aposetolo e Toasefululua e faapea:

O Satani, o le tamā o pepelo ma o le taufaasese sili, na te faia ia tatou fesiligia mea o loo i ai moni ma a lē o le amanaiaina o upu moni e faavavau po o le faaliliuina o i latou i se mea e foliga e sili ona faafiafiaina. “Ua sii taua ai o ia i le au paia a le Atua” [Mataupu Faavae ma Feagaiga 76:29] ma faaaluina le fia afe tausaga e fuafua ai ma faataitai le tomai e tauanau ai fanau uma a le Atua ia talitonu o le lelei e leaga ae o le leaga e lelei. (Gary E. Stevenson, “Aua E Te Taufaasese Mai Ia Te Aʼu,” Liahona,, Nov. 2019, 94)

Na saunoa Elder David A.Bednar o le Korama a Aposetolo e Toasefululua:

O manatu ma amioga lamatia faaleagaga e mafai ona foliga mai e faatosina, manaomia, pe faafiafia mai. O lea, i lo tatou lalolagi faaonapo nei, ua manaomia ai e i tatou taitoatasi ona nofouta i le taufaasese o le leaga e faafoliga e lelei. …

O Satani “o le fili o le amiotonu ma i latou e saili atu e fai le finagalo o le Atua” [Taiala i Tusitusiga Paia, “Tiapolo,” scriptures.ChurchofJesusChrist.org]. O le aso atoa, ma aso uma ua na o le pau lona faanaunautaiga ma le faamoemoega atoa o le faia lea o atalii ma afafine o le Atua ia pagatia e pei o ia lava.

O le fuafuaga o le fiafia a le Tama ua mamanu e tuuina mai ai le taitaiga mo Ana fanau, e fesoasoani ai ia i latou ia lagonaina le olioli tumau, ma ia aumaia saogalemu ai i latou ia te Ia i le aiga i ni tino toetu ma faaeaina. O loo galue le tiapolo e fai ia fenumiai ma ia lē fiafia atalii ma afafine o le Atua ma ia faasalaveia lo latou alualu i luma e faavavau. O loo galue ma le lē malolo le fili e osofai elemene o le fuafuaga a le Tama lea e sili ona ita i ai. (David A. Bednar, “Mataala Pea i le Tatalo,” Liahona, Nov. 2019, 33–34)

O le a se mea e mafai ona tatou faia e puipuia ai i tatou mai le taufaasese?

Na aoao mai Elder Gary E. Stevenson o le Korama a Aposetolo e Toasefululua e faapea:

O le usiusitai i poloaiga na tuuina mai i lo tatou perofeta o se ki e le gata i le aloese ai mai faatosinaga o lē taufaasese ae ia lagona ai foi le olioli ma le fiafia tumau. E faigofie lava lenei mamanu faalelagi: amiotonu, po o le usiusitai i poloaiga, e aumaia faamanuiaga, ma o faamanuiaga e aumaia le fiafia, po o le olioli, i o tatou olaga. (Gary E. Stevenson, “Aua E Te Taufaasese Mai Ia Te Aʼu,” Liahona,, Nov. 2019, 95)

Na saunoa mai Peresitene Russell M. Nelson:

Ou te toe faafou atu la’u aioiga mo outou ia fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia.

O le faia o lea mea o le a fesoasoani ia te oe e iloa ai le auala e agai ai i luma i lou olaga, po o le a le mea e fai i taimi o faalavelave, ma le auala e iloatino ai ma aloese mai faaosoosoga ma le taufaasese o le tiapolo. (Russell M. Nelson, “Faalogo ia te Ia,” Liahona, Me 2020, 90)

Na aoao mai Peresitene Henry B. Eyring:

O le mafutaga a le Agaga Paia e faia mea lelei ia sili ona faatosina ae faaitiitia le faatauanau o faaosoosoga. E tatau ona lava lea mafuaaga ia tatou naunau ai e agavaa mo le Agaga ina ia faatasi pea ma i tatou.

E pei lava ona faamalosia i tatou e le Agaga e tetee atu i le leaga, Na te aumaia foi ia i tatou le mana e iloatino ai le mea moni mai le mea sese. O le upu moni e sili ona taua ua na o faaaliga mai le Atua e faamaonia ai. O a tatou mafuaaga faaletagata ma le faaaogaina o o tatou lagona faaletino o le a le lava lea. Ua tatou ola i se taimi e oo lava foi i tagata sili ona atamamai e matua faigata lava ona iloa le eseesega i le va o le mea moni mai togafiti poto. (Henry B. Eyring, “O le Agaga Paia e fai ma au Soa,” Liahona, Nov. 2015, 104)

Aisea na faigofie ai ona faaseseina nisi o le Au Paia i Katelani i lea taimi?

Ina ua auai le Au Paia fou i le Ekalesia i Katelani, sa latou naunau ia iloa meaalofa a le Agaga e pei ona faamatalaina i le Feagaiga Fou. Sa faailoa atu e nisi ni faatinoga uiga ese, leotele, ma fenumiai i totonu o a latou sauniga tapuai. O nei gaoioiga sa gaepu ai lagona o tagata, ae sa le’i faamalolosia ai i latou. Sa fou le Au Paia i lo latou malamalama i faaaliga a le Agaga. I le saunoa ai e uiga i agaga sese, na saunoa ai le Perofeta o Iosefa Samita: “Faatasi ai ma sina lapataiga itiiti, ma sina poto, sa vave ona ou fesoasoani i le usoga ma tuafafine e faatoilalo i latou. … O agaga sese sa faigofie ona iloatino ma teena e le malamalama o faaaliga” (Talafaasolopito, 1838–1856 [Manuscript History of the Church], vol. A-1, 93, josephsmithpapers.org).

Gaoioiga Faaopoopo e Aoao Ai

O se isi auala e amata ai le lesona

E mafai ona e aumaia ni fuamoa se lua i le vasega, tasi le fuamoa mata ma le tasi le fuamoa vela. Faamalamalama atu i le vasega o le fuamoa lē vela e faatusa i le upu moni ma le fuamoa vela e faatusa i le taufaasese. Fesili i tamaiti aoga pe latou te iloa atu po o fea le fuamoa mata ao fea e vela i le tilotilo atu i ai. E faatusa lea i le auala e mafai ai i nisi taimi ona faigata ona iloa le eseesega i le va o le mea moni ma le mea sese. Faaali atu i tamaiti aoga o loo i ai se auala e iloa ai po o le fea fuamoa e le o vela ma po o le fea e vela. Afai e te viliina fuamoa i o latou itu, o le fuamoa e lei vela o le a vili mo na o le tasi pe lua sekone. Ae o le fuamoa vela, o le a vili mo ni nai sekone. E faapena foi, ua faamanuiaina i tatou i le malamalama i le ala e iloa ai po o le a le mea moni ma le mea e sese. (Tagai David Dickson, “Hard-Boiled Deception,” Mo Le Malosi o le Autalavou, Oke. 2022, 24–25.)

Mataupu Faavae ma Feagaiga 50:22–23. “O le mea ua lē faagaeetia ua lē mai i le Atua”

Ina ia fesoasoani i tamaiti aoga ia malamalama i le uiga o le faagaeetiaina, mafaufau e tuu atu ia i latou e mafaufau e uiga i le upu fale, po o le maota. Fesoasoani i tamaiti aoga ia malamalama o le faagaeetiaina o lona uiga o le siitia po o le atiina ae. E mafai foi ona fesoasoani e malamalama i se upu e ala i le iloa e le o le uiga o lena mea. Mo se faataitaiga, e mafai ona e lisiina i luga o le laupapa upu siitia, atiae, ma le faaleleia ua fefiloi ma isi auala e taumafai ai tagata e faatosina, e pei o le faagaeetia, faateia, ma le faaseseina. Ona mafai lea ona e fai atu i tamaiti aoga e filifili mai upu latou te manatu e faasino i le faagaeetiaina. Fesoasoani ia malamalama tamaiti aoga o aoaoga a le Faaola e faagaeetia ai, ae o fesootaiga a Satani e leai.

Mataupu Faavae ma Feagaiga 50:24. “O le mea e mai i le Atua o le malamalama lea”

Ina ia fesoasoani i tamaiti aoga ia malamalama atili i le malamalama e pei ona faaaogaina i le Mataupu Faavae ma Feagaiga 50:24, e mafai ona e faasino atu i latou i le Moronae 7:12–15 po o le 1 Ioane 1:5. Mafaufau e fai i tamaiti aoga e tusi se laina agai i lalo i le ogatotonu o se fasipepa. Tuu atu ia i latou e faaautu le tasi itu “O mea e aumaia le malamalama” ae o le isi itu “O mea e aveese ai le malamalama.” Ona mafai lea e tamaiti aoga ona faaalu sina taimi e faaopoopo ai ni nai aitema i lisi taitasi.