65-р хичээл: Сургаал ба Гэрээ 49–50

Сургаал ба Гэрээ 50, 1-р хэсэг

Хууран мэхлэгдэхээс зайлсхийх

Огайогийн Көртланд дахь эхэн үеийн зарим хөрвөгч сүнслэг бэлгүүдийг авах хүсэлдээ автан, зарим хачин тохиолдлыг Ариун Сүнснээс биш байсан ч мөн гэж бодон хууран мэхлэгджээ. Их Эзэн юу Өөрөөс нь ирсэн мөн юу Өөрөөс нь ирээгүйг ялган танихад туслах удирдамжийг тэдэнд өгөв. Энэ хичээл нь суралцагчдад Их Эзэн хэрхэн үнэнийг таньж мэдэн, хууран мэхлэгдэхээс зайлсхийхэд тусалж чадахыг ойлгоход туслах зорилготой.

Боломжит суралцах үйл ажиллагаа

Судалтай муурын зулзага

Дараах түүхийг хуваалцахыг бод. Хуваалцахдаа өмхий хүрний зургийг үзүүл.

Арван хоёр төлөөлөгчийн чуулгын ахлагч Гари Э.Стивэнсон дараах түүхийг хуваалцжээ.

Элэнц авга ах Гровер хотоос хол хөдөө байшинд амьдардаг байв. Авга ах Гровер их хөгширсөн байлаа. Түүнийг нас барахаас өмнө хөвгүүдээ түүнтэй танилцуулах хэрэгтэй гэж бид бодсон юм. Тиймээс нэг өдөр бид түүний жирийн л нэг гэр лүү машинаар олон цаг явж очсон. Бид түүнтэй уулзаад, хөвгүүдээ танилцуулахаар хамт суув. Ярилцаад удаа ч үгүй байхад, тэр үед тав, зургаан настай байсан хоёр хүү маань гадаа гарч тогломоор байна гэлээ.

Авга ах Гровер тэдний хүсэлтийг сонсоод, доош тонгойсноо тэдэн рүү ширтэв. … Тэрээр: “Болгоомжтой байгаарай, гадаа олон өмхий хүрэн байгаа шүү” гэж баргил, сөөнгө дуугаар тэдэнд хэлэв. Үүнийг сонсоод Лиса бид хоёр маш их цочирдсон ба өмхий хүрнийг тэдэн рүү шингэнээ цацах вий гэж санаа зовов. Биднийг үргэлжлүүлэн ярьж хөөрч байх хооронд хөвгүүд удалгүй гадаа тоглохоор гарсан юм.

Дараа нь машиндаа суугаад гэр лүүгээ явахдаа би хөвгүүдээсээ “Та нар өмхий хүрэн харсан уу?” гэж асуулаа. Тэдний нэг нь: “Үгүй ээ, бид ямар ч өмхий хүрэн хараагүй. Гэхдээ бид нуруун дээрээ цагаан судалтай хар муурын зулзага харсан!” гэж хариулж билээ. (Гари Э.Стивэнсон, “Намайг бүү мэхэл,” 2019 оны 10-р сарын Ерөнхий чуулган, 103–107)

• Таны бодлоор хүүхдүүд яагаад өмхий хүрнийг таниагүй вэ?

• Ямар нэг зүйлсийн жинхэнэ мөн чанарыг танихгүй байх нь ямар аюултай вэ?

• Энэ түүх Сатаны бидэнд өөрийн талаар итгүүлэхийг хүсдэг зүйлтэй хэрхэн холбогдож байна вэ?

  Суралцагчдыг хамтрагчтайгаа хамтарч ажиллан хууран мэхлэх гэдэг үгийн тодорхойлолтыг бичихэд урихыг бод. Тэдэнд хангалттай хугацаа гаргаж өгсний дараа хэдэн хүнийг тодорхойлолтоо ангийнхантайгаа хуваалцахад урь. Тус болно гэж үзвэл, Судруудын удирдамж дээрх “Судруудад заль мэхийг хууран мэхлэх явдал гэсэн байдаг” гэх тодорхойлолтыг хуваалцахыг бод (Судруудын удирдамж, “Заль мэх, залилах, залилан,” scriptures.ChurchofJesusChrist.org).

  Дараах асуултуудад өгсөн суралцагчдын хариултыг самбарт жагсаан бичихийг бод.

• Сатан өнөө үед өсвөр үеийнхнийг ямар ямар арга замаар хуурч мэхлэх гэж оролддог вэ?

• Сатан хууран мэхлэхдээ яагаад заримдаа маш сайн ажилладаг гэж та бодож байна вэ?

Суралцагчдыг хууран мэхлэлтийг таньж, тэдгээрээс зайлсхийхэд туслах Ариун Сүнсний өдөөлтийг эрэлхийлэхэд урь.

Эхэн үеийн гэгээнтнүүд дундах хууран мэхлэлт

Иосеф Смит 1831 оны 2-р сарын эхээр Огайогийн Көртландад ирээд, гэгээнтнүүдийн дунд шургалан орсон зарим хачин ойлголт, худал сүнсийг анзаарчээ (History, 1838–1856 [Manuscript History of the Church], vol. A-1, 93-д, josephsmithpapers.org).

Жон Витмер энэ цаг үеийн тухай дараах зүйлсийг тэмдэглэн үлдээсэн юм.

Зарим нь үзэгдэл үзсэн ч юу харснаа хэлж чадахгүй, зарим нь өөрсдөө Лебений сэлмийг хүлээн авсан гэж хоосон төсөөлөлдөө автан [морь унасан цэрэг шиг] үүнийгээ эргүүлэн далайдаг, зарим нь хуйх хэрчин авч буй индиан шиг үйлдэл гаргаж могой мэт шалан дээр гулсаж, хөлбөрч байв. Ийнхүү чөтгөр зарим сайн, үнэнч шавийн харааг сохолсон байв. (John Whitmer, History, 1831–circa 1847, 26, josephsmithpapers.org)

Иосеф Смит эдгээр үйлдэлд санаагаа чилээн, Их Эзэнээс лавлан асууснаар Сургаал ба Гэрээ 50-ийг хүлээн авав. 1–9-р шүлэгт Их Эзэн Сүмийн ахлагчдад худал сүнснүүдийн талаар, тэр бүү хэл бусдыг хууран мэхэлсэн гишүүдийн талаар сэрэмжлүүлжээ.

Сургаал ба Гэрээ 50, 1–3-ыг уншаад, Их Эзэний сэрэмжлүүлгүүдээс нэгийг нь ол.

• Сатан яагаад биднийг Есүс Христээс холдуулахын тулд хууран мэхлэлтийг ашигладаг гэж та бодож байна вэ?

Хэдийгээр Сатан хууран мэхлэхдээ тун овсгоотой ч Есүс Христ дагалдагчдадаа үнэнийг таньж мэдэн, хууран мэхлэгдэхээс зайлсхийхэд нь туслахын тулд 10–35-р шүлэг дээрх зөвлөгөөг хайраар өгсөн гэдгийг ойлгоход нь суралцагчдад тусал.

Дараах гүйцэд биш, тодоор бичсэн мэдэгдлийг самбарт бичих юм уу үзүүлэхийг бод. Та суралцагчдыг жижиг бүлгүүдэд хуваагаад, бүлэг тус бүрд дараах судрын хэсгүүдийн нэгийг оноохыг бод. Дараа нь суралцагчид дараах үйл ажиллагаанаас сурсан зүйлээ хуваалцахаар бэлдэж болно.

Доорх шүлгүүдийг уншаад, Их Эзэн биднийг … үед хууран мэхлэгдэхээс зайлсхийхэд тусалдаг гэсэн үнэнийг хэрхэн гүйцээн бичиж болохыг олж мэд.

• Сургаал ба Гэрээ 50:17–22

• Сургаал ба Гэрээ 50:23–25

• Сургаал ба Гэрээ 50:31; 34–35

Хангалттай хугацаа өгсний дараа суралцагчдыг олсон зүйлсээ самбар дахь дутуу үг хэллэгийн доор бичихэд урь. Дараах хариултууд багтсан байж болно. Үүнд: … Үнэний Сүнсээр зааж, суралцахыг эрэлхийлдэг, … Түүний гэрлийг хүлээн авахын тулд эрэлхийлдэг, … сүнс Бурханаас эсэхийг мэдэхийн тулд залбирдаг бай. Дараах асуултуудыг ангиараа авч үзэхийн өмнө эдгээр асуултад судлах тэмдэглэлдээ хариулж бичих нь суралцагчдад тус болж болох юм. Эхлээд санаа бодлоо буулгаж бичих нь суралцагчдад өөртөө илүү итгэлтэй, хуваалцах хүсэлтэй болоход тусална. Суралцагчдад эдгээр үнэний талаар нэмэлт асуулт гарч ирж болох юм. Асуултуудыг нь авч хэлэлцэхэд цаг гарга. Ангийнхан таны хуваалцах зүйлээс өөр чухал ойлголтуудыг өгч ч магад.

Суралцагчдад суралцах үүргээ ухамсарлахад нь туслахын тулд Сэтгэгдэл, асуулт бүрд хариулах хандлагаасаа зайлсхийж, ангийнхныг хариулахад урь гэсэн сургалтын гарчгийг хар. Энэ нь Багшийн хөгжүүлбэл зохих ур чадвар: Хичээнгүйлэн суралцахад урих гэсэн хэсэгт бий.

• Энэ сургаал ямар утгатай вэ?

• Энэ сургаал Сатаны хууран мэхлэлтээс зайлсхийхийн тулд Их Эзэний тусламжийг хүлээн авахад танд хэрхэн тусалж болох вэ?

Та өмнөх асуултыг авч үзэхдээ, Сатаны өсвөр үеийнхнийг хуурч мэхлэх гэж оролддог арга замуудын самбар дээрх жагсаалт руу суралцагчдын анхаарлыг хандуулах нь тустай байж болох юм. Суралцагчид самбарт жагсаасан нэг юм уу хэд хэдэн хууран мэхлэлтэд хариу арга хэмжээ авахад нь сонгосон Аврагчийн сургаал хэрхэн тусалж болохыг олж харж болно.

Хууран мэхлэлтээс зайлсхийх тодорхой арга зам

Их Эзэн байгаа болохоор бидэнд айх шаардлага байхгүй гэсэн баталгааг Тэр төгсгөлд нь хайраар хэлсэн юм. Сургаал ба Гэрээ 50:40–44-ийг уншаад, та Аврагчийн талаар мэдэж авах зүйлээ олж хар.

• Аврагчийн тухай эдгээр шүлгийн юу нь танд онцгой санагдаж байна вэ?

• Түүний талаар энэ бүхнийг мэдэх нь хууран мэхлэлтээр дүүрэн дэлхийд бидэнд хэрхэн тусалж болох вэ?

• Та Есүс Христийн талаарх эдгээр үнэнийг хэрхэн мэдэж авч, итгэх болсон бэ?

Ерөнхийлөгч Рассэлл М.Нэлсон бид хэрхэн хууран мэхлэгдэхээс зайлсхийхийн тулд Их Эзэний тусламжийг урьж болох талаар дараах зүйлийг заажээ.

Дэлхийн нөлөө, дарамт шахалт тоймгүй их бас сэтгэл татам байдаг ч дэндүү олон янзын нөлөө нь биднийг төөрөлдүүлж, толгойг маань эргүүлэн, гэрээний замаас биднийг холдуулж чадна. Үүнээс болж зайлшгүй тохиох цөхрөл гунигаас зайлсхийхийн тулд би өнөөдөр та бүхнээс амьдралдаа өдөр бүр Их Эзэнд зориулан цаг гаргаж, дэлхийн уруу таталтыг сөрөн зогсохыг хүсэж байна.

Хэрэв та нар олон нийтийн болон бусад сүлжээгээр ихэнх мэдээллээ олж авдаг бол Сүнсний шивнээг сонсох чадвар тань буурах болно. Түүнчлэн та нар өдөр бүр залбирч, сайн мэдээнээс суралцах замаар Их Эзэнийг эрэлхийлэхгүй байгаа бол сонирхол төрүүлэх боловч үнэн биш гүн ухаанд өөрийгөө өртөхөөр болгож буй хэрэг юм. Итгэлтэй гэгээнтэн ч Вавилоны хамтлагийн бөмбөрийн хэмнэлд сүйрэн унаж болно.

Ах, эгч нар аа, Их Эзэнд зориулан цаг гаргахыг би та нараас гуйж байна! Та нар Ариун Сүнстэй үргэлж хамт байлгах зүйлсийг хийснээр сүнслэг сууриа цаг хугацааны шалгуурт бат бөх байхаар тавь. (Рассэлл М.Нэлсон, “Их Эзэнд зориулан цаг гарга,” Лиахона, 2021 оны 11-р сар, 120)

• Хууран мэхлэгдэхээс зайлсхийхэд тань тусалж болох өөр ямар нэмэлт ойлголтыг та олж авсан бэ?

Суралцагчдад хууран мэхлэгдэхээс зайлсхийх талаар сурсан эсвэл зайлсхийхийн тулд хийх хэрэгтэй гэж сүнслэгээр өдөөгдсөн зүйлээ хуваалцах хугацаа гаргаж өгөхийг бод. Тэднийг бурханлаг үнэнийг таньж мэдэн, хууран мэхлэгдэхээс зайлсхийх арга замыг үргэлжлүүлэн хайж олоход урь. Суралцагчдад үүнийг хийхэд туслах Их Эзэний хүсэл, чадварт итгэж байгаагаа та хуваалцаж болно.

Нэмэлт эх сурвалж

Бид яагаад Сатаны хууран мэхлэлтээс сэрэмжлэх хэрэгтэй вэ?

Арван хоёр төлөөлөгчийн чуулгын ахлагч Гари И.Стивэнсон ийн заасан.

Худал бүгдийн эцэг болох агуу хууран мэхлэгч Сатан биднийг аливаа зүйлийн бодит байдалд эргэлзэн эсвэл мөнхийн үнэнийг үл тоомсорлон эсвэл тэдгээр үнэнийг илүү тааламжтай гэж үзсэн зүйлээрээ орлуулах гэж үздэг. “Тэрээр Бурханы гэгээнтнүүдтэй дайтдаг” [Сургаал ба Гэрээ 76:29] ба Бурханы хүүхдүүдийг сайныг муу мөн мууг сайн гэдэгт итгүүлэх чадвараа сайжруулах гэж олон мянган жилийг зарцуулж, төлөвлөсөөр ирсэн. (Гари И.Стивэнсон, “Намайг бүү мэхэл,” 2019 оны 10-р сарын Ерөнхий чуулган, 103–107)

Арван хоёр төлөөлөгчийн чуулгын ахлагч Дэвид А.Бэднар ийн хэлсэн.

Сүнслэг байдалд аюул учруулагч санаа, үйлдлүүд ихэвчлэн сэтгэл татам, хүсүүштэй эсвэл тааламжтай санагддаг. Иймээс орчин цагийн дэлхийд хүн бүр сайн дүр эсгэж буй муу муухай зүйлсийг мэддэг байх хэрэгтэй. …

Сатан “зөв шударгын болон Бурханы хүслийг үйлдэхийг эрэлхийлдэг тэдгээрийн дайсан юм” [Судруудын удирдамж, “Чөтгөр,” scriptures.ChurchofJesusChrist.org]. Бүх л өдөржин мөн өдөр бүрийн түүний цорын ганц зорилго бол Бурханы охид, хөвгүүдийг өөр шигээ зовлонт байлгах явдал.

Эцэгийн аз жаргалын төлөвлөгөө нь Өөрийн хүүхдүүдийг үргэлж аз жаргалтай байлгахад тусалж, тэднийг амилсан, өргөмжлөгдсөн биетэйгээр гэртээ аюулгүй авчрах удирдамжаар хангахад зориулагдсан. Чөтгөр Бурханы охид хөвгүүдийг будилуулан самууруулж, аз жаргалгүй болгон, тэдний мөнхийн хөгжлийг саатуулахын тулд ажилладаг. Дайсан нь Эцэгийн төлөвлөгөөний өөрийнхөө хамгийн их үзэн яддаг хэсгүүд рүү довтлохоор хичээнгүйлэн ажилладаг. (Дэвид А.Бэднар, “Үргэлж залбирахаа анхаар,” 2019 оны 10-р сарын Ерөнхий чуулган, 33–34)

Бид өөрсдийгөө хууран мэхлэгдэхээс хамгаалахын тулд юу хийх ёстой вэ?

Арван хоёр төлөөлөгчийн чуулгын ахлагч Гари Э.Стивэнсон ийн заасан.

Бошиглогчид маань өгөгдсөн зарлигуудыг дуулгавартай дагах нь зөвхөн мэхлэгчийн нөлөөнөөс зайлсхийх төдийгүй удаан үргэлжлэх баяр баясгалан, аз жаргалыг мэдрэх түлхүүр болдог. Энэ тэнгэрлэг томьёо бол энгийн. Зөв шударга байдал буюу зарлигуудыг дуулгавартай дагах нь адислалуудыг авчирдаг ба адислалууд нь бидний амьдралд аз жаргал буюу баяр баяслыг авчирдаг. (Гари Э.Стивэнсон, “Намайг бүү мэхэл,” 2019 оны 11-р сарын Ерөнхий чуулган, 103–107)

Ерөнхийлөгч Рассэлл М.Нэлсон ийн хэлсэн.

Хувийн илчлэл хүлээн авах сүнслэг чадвараа нэмэгдүүлэхийн тулд чадах бүхнээ хийгээрэй хэмээн би та бүхнээс дахин гуйж байна.

Ийн үйлдэх нь цаашид амьдралаа хэрхэн авч явах, хямралын үед юу хийх мөн дайсны уруу таталт, хууран мэхлэлтээс хэрхэн зайлсхийх вэ гэдгийг олж мэдэхэд танд туслах болно. (Рассэлл М.Нэлсон, “Түүнийг сонс,” 2020 оны 4-р сарын Ерөнхий чуулган, 111)

Ерөнхийлөгч Хэнри Б.Айринг ийн заасан.

Ариун Сүнстэй нөхөрлөх нь сайн сайхан зүйлсийг илүү сэтгэл татам болгон, уруу таталтын хүчийг сулруулдаг. Зөвхөн энэ нь бидэнд Сүнсийг өөрсөдтэйгөө хамт байлгахаар зохистой байх шийдвэрийг гаргахад хангалттай үндэслэл болох юм.

Ариун Сүнс биднийг нүгэл хилэнцийн эсрэг хүчирхэгжүүлдгийн адил бидэнд үнэн, худлыг ялгах хүчийг мөн өгдөг. Хамгийн чухал үнэнийг зөвхөн Бурханаас ирэх илчлэлээр бататгах боломжтой. Үүнд хүмүүн бидний ямар ч тайлбар эсвэл биеийн мэдрэхүйг ашиглах нь хангалтгүй. Бид хамгийн мэргэн ухаантай нь ч гэсэн ухаалгаар далдлан нууцалсан худал хуурмагаас үнэнийг ялгахад бэрх болсон цаг үед амьдарч байна. (Хэнри Б.Айринг, “Таны хамтрагч Ариун Сүнс,” 2015 оны 10-р сарын Ерөнхий чуулган, 97)

Көртландын зарим гэгээнтэн яагаад тэр үед ийм амархан хууран мэхлэгдсэн бэ?

Шинэ гэгээнтнүүд Көртланд дахь Сүмд нэгдэхдээ Шинэ Гэрээнд дүрсэлсний дагуу Сүнсний бэлгүүдийг хүлээн авна гэж догдолж байсан ба зарим нь хачин, чанга, ойлгомжгүй үйлдлүүдийг шүтлэг бишрэлдээ оруулдаг болсон байв. Эдгээр үйл ажиллагаа хүмүүсийн сэтгэлийг хөдөлгөж байсан ч сэнхрүүлээгүй юм. Гэгээнтнүүдийн Сүнсний илэрхийллийн талаарх ойлголт төлөвшөөгүй байв. Бошиглогч Иосеф Смит хуурамч сүнснүүдийн талаар “Би сэрэмжлүүлж мөн ухаалаг хандсанаар удалгүй ах, эгч нартаа тэдгээрийг даван туулахад нь тусалсан. … Хуурамч сүнснүүдийг илчлэлийн гэрлээр амархан таньж мэдэн, хөөн гаргасан” хэмээн ярьжээ (in History, 1838–1856 [Manuscript History of the Church], vol. A-1, 93, josephsmithpapers.org).

Нэмэлт суралцах үйл ажиллагаа

Хичээлийг эхлүүлэх өөр арга

Та ангидаа нэг нь болсон, нөгөө нь түүхий хоёр өндөг авчирч болно. Түүхий өндөг нь үнэнийг, болсон өндөг нь хууран мэхлэлтийг төлөөлж байгааг суралцагчдад тайлбарла. Зөвхөн гаднаас нь хараад аль нь аль вэ гэдгийг таних эсэхийг суралцагчдаас асуу. Энэ нь заримдаа үнэнийг буруугаас ялгахад ямар хэцүү байдгийг илэрхийлдэг. Суралцагчдад аль нь болсон, аль нь түүхий өндөг болохыг ялгаж харах арга байдгийг үзүүл. Өндөгнүүдийг дор нь эргэлдүүлэхэд түүхий өндөг ганц хоёрхон секунд л эргэлдэнэ. Харин болсон өндөг нэлээн хэдэн секунд эргэлддэг. Үүнтэй адил бид юу үнэн, юу худал болохыг мэдэх ойлголтоор адислагдсан. (David Dickson, “Hard-Boiled Deception,” For the Strength of Youth, Oct. 2022, 24–25-ыг үзнэ үү.)

Сургаал ба Гэрээ 50:22–23. “Мөн сэнхэрдэггүй тэр нь Бурханаас бус болой”

Сэнхэрнэ гэдэг нь юу гэсэн үг болохыг ойлгоход суралцагчдад туслахын тулд тэднийг сэнхрүүлэх эсвэл барьж байгуулах гэдэг үгийн үндсийг бодоход урь. Суралцагчдад сэнхрүүлэх гэдэг нь өргөх эсвэл босгох гэсэн утгатайг ойлгоход тусал. Түүнчлэн энэ нь ямар утгыг агуулдаггүйг мэдсэнээр тухайн үгийг ойлгоход тусална. Жишээлбэл: Та өргөх, босгох, сайжруулах гэсэн үгсийг сэтгэгдэл төрүүлэх, цочирдуулах, аргандаа оруулах гэх мэт хүмүүст нөлөөлөхийг оролддог өөр арга замуудтай холин самбарт жагсаан бичиж болох юм. Та тэднийг сэнхрүүлэх гэдэг үгийг илтгэж буй үгийг сонгоход урьж болно. Сатаны харилцаа сэнхрүүлдэггүй, харин Аврагчийн сургаал сэнхрүүлдгийг ойлгоход суралцагчдад тусал.

Сургаал ба Гэрээ 50:24. “Бурханаас буй тэр нь гэрэл болой”

Сургаал ба Гэрээ 50:24 дээр ашигласан гэрэл гэдэг үгийг илүү сайн ойлгоход нь суралцагчдад туслахын тулд та тэднээр Моронай 7:12–15 эсвэл 1 Иохан 1:5-ыг уншуул. Суралцагчдыг цаасны голд шугам татахад урь. Тэднээр нэг талыг нь “Гэрэл авчирдаг зүйлс,” нөгөө талыг нь “Гэрлийг холдуулдаг зүйлс” гэж гарчиглуул. Суралцагчид цаг гарган, жагсаалт бүрд хэдэн юм нэмж болно.