Leksiyon 68: Doktrina ug mga Pakigsaad 51–57

Doktrina ug mga Pakigsaad 51

“Matinud-anon, Makiangayon, ug usa ka Maalamon nga Tinugyanan”

Sa tingpamulak sa 1831, si Joseph Smith nakadawat og pagpadayag. Ang Ginoo misugo sa mga sakop sa Colesville, New York, nga branch sa pagpuyo sa Thompson, Ohio, nga dapit ug sa pagtuman sa ilang pagkatinugyanan pinaagi sa pagsunod sa balaod sa pagpahinungod. Kini nga leksiyon makatabang sa mga estudyante nga makasabot kon sa unsang paagi sila makasunod sa tambag sa Ginoo aron mahimong matinud-anon, makiangayon, ug maalamon nga mga tinugyanan.

Mga Posibleng Kalihokan sa Pagkat-on

Usa ka Asoy sa Pagkatinugyanan

Aron matabangan nga maandam ang mga estudyante sa pagkat-on mahitungod sa pagkatinugyanan, ikonsiderar ang pagbuhat og kalihokan sama sa mosunod.

Handurawa nga gihangyo sa usa ka ginikanan ang iyang anak nga lalaki o anak nga babaye nga bantayan ang mas manghod nga igsoon sulod sa pipila ka oras samtang wala ang ginikanan.

• Ngano kaha nga ang usa ka mahigugmaong ginikanan gusto nga ang mas magulang nga anak makasinati niini nga responsibilidad?

• Unsa kaha ang gilaoman sa ginikanan niini nga sitwasyon?

Ipasabot nga ang Langitnong Amahan ug si Jesukristo mitugyan usab kanato og daghang mga responsibilidad sa tibuok natong kinabuhi. Kini nga mga responsibilidad mahimong tawagon nga pagkatinugyanan.

Si Bishop Gérald Caussé sa Presiding Bishopric mipakigbahin sa mosunod nga kahulogan sa pulong nga pagkatinugyanan.

Diha sa mga pinulongan sa ebanghelyo, ang pulong nga pagkatinugyanan naghatag og sagradong espirituwal ug temporal nga responsibilidad sa pag-amuma sa usa ka butang nga gipanag-iya sa Dios diin kita adunay tulubagon. (Gérald Caussé, “Atong Pagkatinugyanan sa Yuta,” Liahona, Nob. 2022, 57)

• Unsa ang pipila ka mga ehemplo sa pagkatinugyanan nga gihatag sa Dios kanato sa atong mga kinabuhi?

Isulat sa pisara ang mga tubag sa mga estudyante sa miaging pangutana, o mahimo kang modapit kanila sa pagduol sa pisara ug sa pagsulat sa ilang mga tubag.

Kon gikinahanglan, mahimo nimong gamiton ang mosunod isip mga pananglitan: ang bahin sa planeta diin kita nagpuyo, atong mga pamilya, mga calling o mga buluhaton sa Simbahan, atong katigayonan ug kabtangan, atong lawas, atong panahon.

Human sa pag-ila niini nga mga ehemplo, dapita ang mga estudyante sa pagpamalandong mahitungod sa pagkatinugyanan nga anaa kanila sa ilang mga kinabuhi pinaagi sa pagpakigbahin sa mosunod:

Sa imong journal sa pagtuon, isulat ang pipila ka pagkatinugyanan nga anaa kanimo o unsay gitugyan sa Ginoo kanimo. Sa imong pagtuon karon, pangita sa mga kamatuoran nga makatabang kanimo nga mahimong mas maayo nga piniyalan sa mga butang nga imong gisulat sa imong lista.

Ang pagkatinugyanan sa nag-unang mga Santos

Aron matabangan ang mga estudyante sa pagsabot sa kinatibuk-ang kahulugan sa Doktrina ug mga Pakigsaad 51, basaha o ipamubo ang mosunod nga parapo. Mahimo ka usab magdapit og usa ka estudyante sa pagbasa niini ngadto sa klase.

Sa tingpamulak sa 1831, daghang mga Santos ang nagsugod sa pag-abot sa Ohio human sa paglalin gikan sa sidlakang Estados Unidos. Usa ka grupo miabot gikan sa Colesville, New York, sa hilabihan nga pagsakripisyo. Kini nga grupo gimandoan nga mopuyo didto sa Thompson, Ohio, ug magsunod sa balaod sa pagpahinungod. Ang pagpadayag nga narekord diha sa Doktrina ug mga Pakigsaad 51 naglangkob sa mga panudlo sa Ginoo ngadto sa mga Santos.

Dapita ang mga estudyante sa pagkopya sa mosunod nga tsart diha sa ilang mga journal sa pagtuon ug sa pagtubag niini samtang magtuon sila sa Doktrina ug mga Pakigsaad 51.

Mga Responsibilidad ni Bishop Partridge	Mga Responsibilidad sa mga Santos

Basaha ang Doktrina ug mga Pakigsaad 51:1–4, mangita sa unsay gitudlo sa Ginoo ni Bishop Edward Partridge mahitungod sa iyang mga responsibilidad.

• Unsa nga mga responsibilidad ang gihatag sa Ginoo ngadto ni Bishop Partridge?

Sa pagtubag sa mga estudyante, mahimong makatabang ang paghisgot nga ang “[pagtudlo] ngadto niini nga mga katawhan sa ilang mga bahin” (Doktrina ug mga Pakigsaad 51:3) nagpasabot sa kabtangan ug mga butang nga madawat sa mga Santos isip kabahin sa balaod sa pagpahinungod. Sa dili pa mopadayon, mahimong mapuslanon ang pagdapit sa mga estudyante sa pagpakigbahin sa ilang nahibaloan o nahinumdoman mahitungod sa balaod sa pagpahinungod.

Kon gikinahanglan, ipasabot nga isip kabahin sa balaod sa pagpahinungod, ang mga Santos mopahinungod sa ilang mga kabtangan ug mga pagkaon ngadto sa Ginoo. Dayon pinaagi sa bishop, makadawat sila og kabtangan ug mga pagkaon isip tinugyanan aron sa pag-atiman ug sa paggamit. Ang mga Santos mohatag usab sa bisan unsa nga sobra sa unsay ilang gitanom, gipadako, o nadawat ngadto sa bishop aron ihatag ngadto sa mga kabos.

Basaha ang Doktrina ug mga Pakigsaad 51:9, 12–15, 19, ug kompletoha ang tsart base sa unsay imong nakaplagan.

Mahimong mapuslanon alang sa mga estudyante nga masayod nga ang balay tipiganan nga gihisgotan sa bersikulo 13 mao ang dapit diin ang bishop magtipig og pagkaon ug mga suplay aron sa pag-atiman sa mga kabos ug timawa.

• Unsa nga tambag gikan niini nga mga bersikulo ang mahimong nakatabang sa mga Santos sa pagbuntog sa mga kalisdanan nga ilang giatubang sa pagsunod sa balaod sa pagpahinungod?

• Unsa nga panalangin ang gisaad sa Ginoo diha sa bersikulo 19 niadtong matinud-anon, makiangayon, ug maalamon nga mga tinugyanan?

  Dapita ang mga estudyante sa pag-ila og kamatuoran nga magamit sa ilang pagkatinugyanan base sa mga pagtulon-an sa Ginoo sa bersikulo 19. Mahimo nilang mahibaloan ang usa ka butang sama sa mosunod: Samtang kita mahimong matinud-anon, makiangayon, ug maalamon nga mga tinugyanan, atong masinati ang hingpit nga kalipay sa Ginoo ug makadawat sa gasa sa kinabuhing dayon.

  Kon mapuslanon, ikonsiderar ang pagdapit sa mga estudyante sa paggahin og panahon sa paghatag og kahulogan sa usa sa mosunod nga mga pulong: matinud-anon, makiangayon, o maalamon. Ang mga estudyante mahimong mopakigbahin sa ilang pagsabot, mogamit sa Giya ngadto sa mga Kasulatan, o mogamit og diksyonaryo.

• Unsa kaha ang pipila ka mga pananglitan sa kalipay nga atong bation o mga panalangin nga tingali atong madawat samtang kita magmatinud-anon sa atong pagkatinugyanan?

Mga ehemplo sa matinud-anon, makiangayon, ug maalamon nga mga tinugyanan

Ang mosunod nga mga kalihokan makatabang sa mga estudyante nga mas makasabot kon unsa ang buot ipasabot sa matinud-anon, makiangayon, ug maalamon nga mga tinugyanan. Ikonsiderar ang pagpakita sa mga kalihokan ug ang pagbahin sa mga estudyante ngadto sa ginagmay nga mga grupo aron kompletohon kini og dungan. Kon kini nga kalihokan gihimo diha sa mga grupo, seguroha ang pagtudlo og usa ka lider sa panaghisgotan alang sa matag grupo.

Kalihokan A: Ang ehemplo sa Manluluwas

Ang Manluluwas mao ang hingpit nga ehemplo sa pagkamatinud-anon, makiangayon, ug maalamon nga tinugyanan.

Pangita og usa ka ehemplo diha sa mga kasulatan ni Jesukristo nga nagtuman sa usa sa Iyang mga responsibilidad sa pag-atiman ug pagtabang kanato. Ang mga pananglitan sa mga kasulatan nga mahimo nimong tun-an naglakip sa Ezequiel 34:11–16; Juan 6:38–39; 17:1–4; 3 Nephi 17:6–9; ug Doktrina ug mga Pakigsaad 19:16–19.

Pamalandongi kon sa unsang paagi ang Manluluwas nahimong matinud-anon, makiangayon, ug usa ka maalamon nga tinugyanan ibabaw kanimo.

• Sa unsang paagi nga ang mga paningkamot sa Manluluwas nakahatag kanimo og kalipay ug mga panalangin?

• Sa unsang paagi nga ang ehemplo sa Manluluwas makapadasig kanimo nga mahimong matinud-anon, maalamon, ug makiangayon nga tinugyanan?

Kalihokan B. Mga pagkatinugyanan karon

Kita usab gidapit sa pagsunod ni Jesukristo pinaagi sa pagkamatinud-anon, makiangayon, ug maalamon nga mga tinugyanan.

Pagpili og pipila ka mga ehemplo sa pagkatinugyanan nga gihatag sa Ginoo kanato nga nalista diha sa pisara (o laing ehemplo nga imong gihunahuna).

Ihulagway kon unsay mahimo sa usa ka tawo nga mahimong matinud-anon, makiangayon, ug maalamon nga tinugyanan niini nga mga butang. Mahimo nimong ilakip ang mga ehemplo nga imong nakita o mga pamaagi nga imong gipaningkamotan nga mahimong usa ka maayong tinugyanan.

• Ngano kaha nga ang Ginoo gusto nga ang usa ka tawo karon maningkamot nga mahimong matinud-anon, makiangayon, ug maalamon nga tinugyanan niini nga paagi?

• Sa unsang paagi ang iyang mga paningkamot makahatag og kalipay ug mga panalangin?

Pagdapit og nagkalain-laing mga estudyante sa pagpakigbahin sa unsay ilang mga panabot gikan sa mga panaghisgotan. Pagdapit og pipila ka estudyante sa pagpakigbahin sa mga kasulatan nga ilang nailhan diha sa Kalihokan A nga ilang nakita nga labi ka bililhon o makahuluganon. Mahimo usab nimong hangyoon ang mga estudyante sa pagpakigbahin unsay ilang nakat-onan gikan sa usa ka klasmeyt nga ilang gikauban.

Ang imong nakat-onan

Aron matabangan ang mga estudyante sa pagproseso kon unsa ang ilang nakat-onan niini nga leksiyon, ikonsiderar ang pagdapit kanila sa pagtubag sa mosunod nga mga pangutana diha sa ilang mga journal sa pagtuon.

• Unsa ang imong nakat-onan karon mahitungod sa pagkatinugyanan nga gusto nimong mahinumdoman?

• Unsa ang imong mabuhat aron mahimong mas matinud-anon, makiangayon, ug maalamon nga tinugyanan sa usa ka bahin sa imong kinabuhi?

Alang sa duha ka miaging mga pangutana, pagdapit og pipila ka estudyante nga buot mopakigbahin sa unsay ilang gisulat. Pagpamatuod sa kalipay nga miabot kanimo diha sa imong pagpaningkamot sa pagtuman sa imong pagkatinugyanan gikan sa Ginoo.

Dugang nga mga Kapanguhaan

Sa unsa nga paagi kita manubag sa atong pagkatinugyanan?

Si Elder Joseph B. Wirthlin (1917–2008) sa Korum sa Napulog Duha ka Apostoles mitudlo:

Sa umaabot nga pipila ka adlaw, kamo ug ako kada usa makadungog sa tingog sa Ginoo nga nagtawag kanato sa pagduol aron sa paghatag og asoy sa atong mortal nga pagkatinugyanan. Kini nga asoy mahitabo kon kita tawgon nga “makabarog sa atubangan [sa Ginoo] sa adlaw sa dako nga paghukom” [2 Nephi 9:22] …

… Ang Manluluwas mismo nasayod, ingon nga kita usab kinahanglan nga masayod, nga Siya may tulubagon ngadto sa Iyang Amahan. Siya mitudlo nga ang Iyang sagradong pagkatinugyanan mao ang “pagbuhat sa kabubut-on sa [nagpadala] kanako” [Juan 4:34]. Sa Iyang dako nga pag-ampo sa pagpangamuyo, ang Ginoo mitaho ngadto sa Amahan, “Natapos ko na ang buhat nga imong gihatag kanako nga akong buhaton” [Juan 17:4].

Kon kita magkinabuhi nga matarong, kita malipay nga kita maka-report og positibo sa atong kaangayan ug sa atong pagpangandam alang sa padayon nga mga panalangin, bisan kini … ang mga panalangin sa pagtambong sa templo… o ang mga panalangin sa pag-alagad sa bisan unsa nga atong calling.

Ang maong mortal nga mga kasinatian mohatag kanato og kahigayonan sa pagsusi kon unsa ang atong gibuhat sa atong kinabuhi. Ang tanan nagtabang kanato sa pagtudlo sa atong mga kalag ug sa paglig-on sa atong mga kinaiya sa pagpangandam alang niana nga kataposang interbyo. (Joseph B. Wirthlin, “True to the Truth,” Ensign, Mayo 1997, 16, 17)

Nganong ang Ginoo may pagtagad sa temporal nga mga butang?

Si Presidente Ezra Taft Benson (1899–1994) mitudlo:

Kanunay natong hinumduman nga ang tanang materyal nga butang mga gamit aron pagkab-ot sa mas taas nga katuyoan, kana nga taas nga katuyoan mao ang espiritwal, ang Ginoo matinguhaon ug andam sa pagpanalangin sa iyang katawhan sa temporal nga paagi. Iya kining gipaila sa daghan nga mga pagpadayag. Balik-balik Niya kining gihatagan og gibug-aton, nga kita kinahanglang mag-ampo alang sa atong mga tanom, mga kahayopan, sa atong panimalay, atong balay, ug mangamuyo sa mga panalangin sa Ginoo sa atong materyal nga mga panginahanglan. Ug Siya nagsaad nga maanaa siya ug dali ug andam sa pagpanalangin kanato. …

… Ang Ginoo dili mobuhat alang kanato sa butang nga ato rang mahimo ug angayng buhaton alang sa atong kaugalingon. Apan iyang tuyo ang pag-amuma sa Iyang mga Santos. Ang tanan nga kalabot sa ekonomiya, sosyal, ug espiritwal nga kaayohan sa tawhanong pamilya sa karon ug sa kahangtoran hatagan og gibug-aton sa Simbahan ni Jesukristo sa mga Santos sa Ulahing mga Adlaw. (Mga Pagtulun-an sa mga Presidente sa Simbahan: Ezra Taft Benson [2014], 318)

Dugang nga mga Kalihokan sa Pagkat-on

Ang atong yutan-ong pagkatinugyanan ug ang pagkahimong sama sa Langitnong Amahan

Dapita ang mga estudyante sa pagpakigbahin kon unsay labing nakapadani kanila sa paglalang ni Jesukristo sa yuta. Unsa nga mga linalang ang labi nilang mapasalamaton ug ngano?

Dapita ang mga estudyante sa paghinumdom nga ang Ginoo mihatag sa katawhan sa responsibilidad sa pag-atiman niini nga mga linalang (tan-awa sa Genesis 1:28; 2:15).

Mahimong tun-an sa mga estudyante ang mga bersikulo sa Doktrina ug mga Pakigsaad 51 nga aduna niini nga mga ideya diha sa hunahuna. Mahimo usab nimong tan-awon ang “Atong Pagkatinugyanan sa Yuta” gikan sa time code 2:17 hangtod sa 11:59.

Ang sambingay sa mga talento

Sa paghulagway sa mga panalangin sa pagkatinugyanan, pagkupot og pipila ka salapi ug pangutan-a ang mga estudyante kon nganong ang usa ka tawo mahimong mosalig sa laing tawo sa iyang salapi.

Ipasabot nga ang talento usa ka matang sa salapi diha sa Bag-ong Tugon. Dapita ang mga estudyante sa pagbasa sa sambingay sa Manluluwas mahitungod sa mga talento diha sa Mateo 25:14–30. Mahimong makapaikag ang pagtawag og mga estudyante nga moduol sa atubangan sa lawak klasehanan ug moarte niini samtang gibasa ang sambingay. Mahimo nga mag-andam ka og usa ka butang nga magsimbolo sa nagkalainlaing kantidad sa salapi diha sa sambingay.

Hangyoa ang mga estudyante sa pagpakigbahin unsay ilang nakat-onan mahitungod sa pagkatinugyanan gikan niini nga sambingay.

Pagkaplag og balanse sa atong mga responsibilidad

Mahimong nag-atubang ang mga estudyante og hagit sa pagbalanse sa daghang nagkalain-laing temporal ug espirituhanong pagkatinugyanan. Ikonsiderar ang pagdapit kanila sa pagbasa sa Mosiah 4:27 ug sa pagtan-aw sa “Balance in All Things” (5:30). Dapita sila sa pagpakigbahin sa mga kamatuoran nga ilang nakita nga makatabang kanila sa pagpadayon sa pagbalanse sa ilang mga paningkamot sa pagtuman sa ilang mga responsibilidad. Dapita sila sa pagpakigbahin kon nganong importante kini nga pagbalanse ug sa unsang paagi ang pagbalanse makatabang usab kanila nga mas mahisama sa Manluluwas (tan-awa sa Lucas 2:52).