Leksiyon 70: Doktrina ug mga Pakigsaad 51–57

Pagbansay 4 sa Doktrinal nga Kahanas

Gamita ang mga Baroganan sa Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makahatag sa mga estudyante og mga kahigayonan sa pagbansay sa pagkahanas sa mga tudling ug sa doktrina nga gitudlo niini nga mga tudling. Makakat-on usab ang mga estudyante ug mogamit sa balaanong mga baroganan alang sa pag-angkon og espirituhanong kahibalo.

Mga Posibleng Kalihokan sa Pagkat-on

Pagrebyo sa doktrinal nga kahanas: Gamita

Ang mosunod nga mga pangutana mahimong gamiton aron matabangan ang mga estudyante nga mabansay kon unsaon paggamit sa mga pagtulun-an sa mga tudling sa doktrinal nga kahanas ngadto sa tinuod nga mga sitwasyon sa kinabuhi. Kon gikinahanglan, mahimo kang maghimo og mga pangutana nga may kalabotan sa mga tudling sa doktrinal nga kahanas nga nakat-onan sa imong mga estudyante sa pagkakaron.

Dapita ang mga estudyante sa pagpili og usa ka pangutana nga gusto nilang pagatutokan.

• Kon maayo ko nga tawo, importante ba kon unsa nga simbahan ang akong apilan?

• Unsaon nako sa pagkahibalo kon nakadawat ba ako og personal nga pagpadayag?

• Ngano nga kinahanglan nakong ipakigbahin ang ebanghelyo ngadto sa akong mga higala ug pamilya?

• Ngano nga kinahanglan ako nga moapil sa kinatibuk-ang komperensiya?

• Unsaon nako pagpalig-on ang akong koneksiyon kang Jesukristo?

Ang mga estudyante mahimong mobuhat sa mosunod nga kalihokan diha sa gagmay nga mga grupo o isip usa ka klase.

Usa sa mga kahanas nga atong makat-onan mao ang paggamit sa mga tudling sa kasulatan ngadto sa tinuod nga mga sitwasyon sa kinabuhi. Alang sa matag pangutana sa ibabaw, pagpili og tudling sa doktrinal nga kahanas nga makatabang sa usa ka tawo sa iyang kabalaka. Alang sa lista sa mga tudling sa doktrinal nga kahanas ug sa mahinungdanon nga hugpong sa mga pulong sa kasulatan, tan-awa sa Mahinungdanon nga Dokumento sa Doktrinal nga Kahanas (2023).

Seguroha nga nasabtan sa mga estudyante nga labaw sa usa ka tudling sa doktrinal nga kahanas ang gigamit sa pagtubag sa matag pangutana.

Human ang mga estudyante adunay igong panahon sa pag-ila sa mga tudling sa doktrinal nga kahanas nga magamit sa ilang gipili nga mga senaryo, hisgoti ang ilang mga napalgan pinaagi sa pagpangutana og sama sa mosunod:

• Hain nga mga tudling sa doktrinal nga kahanas ang gibati nimo nga magamit sa senaryo nga imong gitutokan?

• Sa unsang paagi kini nga mga tudling sa doktrinal nga kahanas makatabang niana nga senaryo?

Ikonsiderar ang paghangyo sa pipila ka estudyante sa pagpakigbahin sa tudling nga ilang gipili ug sa unsang paagi nila gibati nga makatabang kini sa usa ka tawo niana nga pangutana.

Pagplano nga mogahin og dili molapas sa 10–15 ka minuto niini nga kalihokan aron sa paghatag og igong panahon alang sa pagbansay sa paggamit sa doktrinal nga kahanas unya sa leksiyon.

Dugang nga mga ideya kon unsaon pagtabang sa mga estudyante sa paggamit sa mga tudling sa doktrinal nga kahanas makita diha sa mga materyal ubos sa “Mga Kalihokan sa Pagrebyo sa Doktrinal nga Kahanas” diha sa apendiks.

Pagkat-on ug paggamit sa mga baroganan sa pag-angkon og espirituhanong kahibalo

Alang sa nahabilin sa leksiyon, pagatutoki ang pagtabang sa mga estudyante sa paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi. Sa dili pa himoon ang senaryo sa ubos, mahimong makatabang ang pagdapit sa mga estudyante sa pagrebyo sa mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip diha sa apendiks ubos sa “Mga Kalihokan sa Pagrebyo sa Doktrinal nga Kahanas.” Ang mga paghulagway sa mga baroganan makita diha sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Paghimo og senaryo

Sa pagtabang sa mga estudyante sa paggamit sa mga baroganan sa pag-angkon og espirituhanong kahibalo, ikonsiderar ang paghimo og senaryo isip usa ka klase mahitungod sa usa ka tawo kinsa adunay mga kabalaka mahitungod sa kaminyoon o pagsugod sa usa ka pamilya.

Mahimo nimong dapiton ang mga estudyante sa paglista sa mga pagtuo nga ilang nadungog mahitungod sa kaminyoon ug pamilya diha sa pisara. Dapita ang mga estudyante sa pagpili og butang gikan niini nga lista nga ilang gibati nga may kalabotan sa pagtabang sa paghimo sa senaryo. Hangyoa ang mga estudyante sa pagpili og ngalan alang sa tawo nga anaa sa senaryo kinsa aduna niini nga kabalaka ug pagdugang og mga detalye hangtod nga kini mabati nga sama sa tinuod nga kinabuhi, may kalabotan nga sitwasyon nga ilang giatubang o sa usa ka tawo nga ilang nailhan.

Ang mosunod mao ang usa ka pananglitan sa senaryo:

Ang mga ginikanan ni Troy nagdiborsyo niadtong bata pa siya. Siya adunay usa ka maayo nga relasyon ngadto sa iyang duha ka mga ginikanan, apan paminaw niya ingon og ang iyang mga ginikanan nangandoy nga wala na lang unta sila nagkaminyo. Nasaksihan usab niya ang daghang dili pagsinabtanay ug daghang tensiyon. Naghunahuna siya kon may bili ba ang kaminyoon. Dili siya segurado kon gusto ba niyang maminyo.

Estasyon sa panaghisgotan

Usa ka paagi alang sa mga estudyante sa paggamit sa senaryo aron sa pagbansay sa mga baroganan sa pag-angkon og espirituhanong kahibalo mao ang pag-ila sa mga hagit ug pagbinayloay og mga ideya alang sa mga solusyon. Ang mosunod nga mga pag-aghat sa panaghisgot mahimong ibutang sa palibot sa lawak klasehanan. Mahimo nimong pundokon ang mga estudyante ngadto sa mas gagmay nga mga grupo aron matubag ang mga pangutana sa matag estasyon.

Human sa igong panahon sa usa ka estasyon, mahimo nimong patuyokon ang mga grupo aron ang matag estudyante magbansay sa paggamit sa tulo ka baroganan sa pag-angkon og espirituhanong kahibalo. Base sa senaryo nga gihimo sa klase, mahimong makatabang ang pag-adjust sa gihatag nga mga pangutana sa panaghisgot.

Estasyon 1

Ang mga hagit: Unsa nga mga panglantaw ang mahimong makaimpluwensiya sa mga pagbati niini nga tawo mahitungod sa kaminyoon ug pamilya? Ngano kaha nga lisod man ang pagtan-aw og mahangtorong panglantaw niini nga sitwasyon?

Posible nga mga paagi sa pagtabang: Unsa ang gusto nimong masabtan niining tawhana mahitungod sa plano sa Langitnong Amahan alang sa kaluwasan? Sa unsa nga paagi nga ang mahangtorong panglantaw makasulbad sa mga hagit nga imong giila?

Ribyoha ang mga parapo 8–10 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal ngakahanas, ug pag-ila og dugang nga mga pamahayag sa kamatuoran nga mahimong makatabang.

Estasyon 2

Ang mga hagit: Asa kaha kining tawhana nakasugat niini nga mga ideya? Ngano kaha nga kini nga mga pilosopiya makapakombinsir?

Posible nga mga paagi sa pagtabang: Nganong importante man nga mosalig sa balaanong gitudlo nga mga tinubdan kon mangita og impormasyon mahitungod sa kaminyoon ug pamilya? Pangita og usa o duha ka mga kasulatan o propetikanhong mga pamahayag nga makatabang niini nga senaryo.

Ribyoha ang mga parapo 11–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinalngakahanas, ug pag-ila og dugang nga mga pamahayag sa kamatuoran nga mahimong makatabang.

Alang sa estasyon 2, ikonsiderar ang paghatag sa mga estudyante og kard o sulatanan nga mopilit aron isulat ang kasulatan o propetikanhong kinutlo nga ilang nakaplagan ug ibutang kini diha sa pisara. Kon ang mga estudyante nakatuyok na sa tanang tulo ka estasyon, mahimo kang mohangyo og pipila ka mga estudyante sa pagpakigbahin kon nganong ang kasulatan o propetikanhong pamahayag nga ilang gipili makatabang sa tawo nga anaa sa senaryo.

Kon nagkinahanglan ang mga estudyante og tabang sa pagpangita og pakisayran sa kasulatan, mahimo nimong ilista ang mga tudling sama sa Genesis 1:28; 2:24; 1 Mga Taga-Corinto 11:11; Doktrina ug mga Pakigsaad 42:22–25; 49:15–17; 131:1–4 diha sa pisara.

Estasyon 3

Ang mga hagit: Unsa kahay nakapalisod niini nga tawo sa paglihok diha sa hugot nga pagtuo?

Posible nga mga paagi sa pagtabang: Unsa ang imong gusto nga idapit nga buhaton niini nga tawo aron molihok diha sa hugot nga pagtuo? Sa unsang paagi kini nga mga buhat makadugang sa pagsalig niini nga tawo diha ni Jesukristo samtang siya naningkamot sa pagbuntog niini nga mga hagit?

Rebyoha ang mga parapo 5–7 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas, ug pag-ila og dugang nga mga pamahayag sa kamatuoran nga mahimong makatabang.

Ang imong nakat-onan

Ang mosunod nga mga pangutana mahimong magamit sa usa ka panaghisgotan o sa kalihokan sa journal:

• Gikan sa unsay imong nakat-onan karon, unsay imong ipakigbahin ngadto sa usa ka tawo kinsa adunay mga pangutana mahitungod sa doktrina sa Langitnong Amahan kabahin sa kaminyoon ug pamilya?

• Unsa ang imong nakat-onan mahitungod sa pag-angkon og espirituhanong kahibalo nga makatabang sa usa ka tawo sa pagsulbad sa usa ka pangutana nga may kalabotan sa ebanghelyo?

Mahimo nimong pahinumdoman ang mga estudyante nga normal lang nga adunay mga pangutana mahitungod sa ebanghelyo. Mahimo nimong ipakigbahin ang imong mga pagbati mahitungod sa gahom sa paggamit sa mga baroganan sa pag-angkon og espirituhanong kahibalo aron matubag ang bisan unsang personal nga mga pangutana o mga kabalaka.

Dugang nga Kalihokan sa Pagkat-on

Usa ka alternatibo nga senaryo nga magamit isip pagbansay sa paggamit

Ang mosunod mao ang usa ka alternatibo nga senaryo:

• Nabalaka si Rob sa mga balita bahin sa gubat, kabangis, ug katalagman. Iyang gibati nga kini nga kalibotan dili usa ka dapit diin siya gusto nga magpadako og usa ka pamilya.

Dapita ang mga estudyante sa paggamit sa mga baroganan sa pag-angkon og espirituhanong kahibalo aron makatabang ni Rob. Awhaga sila sa paggamit sa unsay ilang nakat-onan mahitungod sa doktrina sa kaminyoon ug pamilya sa plano sa Langitnong Amahan sa kaluwasan.