Doktrina ug mga Pakigsaad 58–59

Doktrina ug mga Pakigsaad 58–59

Kinatibuk-ang Pagpasabot

Niadtong Agosto 1831, usa ka grupo sa mga Santos bag-o lang miabot sa Jackson County, Missouri. Daghan ang nagtinguha sa pagtabang sa Manluluwas sa pagtukod sa Zion apan dili segurado kon unsay buhaton. Ang Ginoo mipasabot nga Siya milaom nga sila mogamit sa ilang kabubut-on sa pagpangita og mga paagi sa pagserbisyo. Siya usab midapit kanila sa paghinulsol sa ilang mga sala ug misugo kanila sa pagbalaan sa adlaw nga Igpapahulay.

Pagpadayon sa kasinatian sa pagkat-on: Kon imong dapiton ang imong mga gitudloan sa paglihok pinasikad sa tinuod nga doktrina, imong gidapit sila sa pagpadayon sa kasinatian sa pagkat-on ngadto sa ilang mga panimalay ug sa inadlaw nga kinabuhi. Tabangi ang imong mga estudyante nga makasabot sa espirituhanong pagkat-on isip inadlaw-adlaw nga kasinatian kay sa usa ka butang nga mahitabo lamang sa klase. Kini makatabang sa mga estudyante nga mahimong mas madasig sa pagkat-on ug sa paggamit sa mga pagtulun-an sa ebanghelyo. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Gidapit sa Manluluwas ang Uban sa Pagpuyo sa Unsay Iyang Gitudlo” diha sa Pagtudlo Sumala sa Pamaagi sa Manluluwas. Makita usab nimo ang usa ka ehemplo kon unsaon kini sa pagbuhat diha sa leksiyon niining semanaha nga giulohan og “Doktrina ug mga Pakigsaad 58:26–29.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 58:26–29

Katuyoan sa leksiyon: Aron matabangan ang mga estudyante nga makasabot kon unsaon sa pagsunod ang ehemplo sa Manluluwas sa pagbuhat og maayo.

• Pagpangandam sa estudyante: Dapita ang mga estudyante nga maghunahuna og usa ka tawo nga ilang nailhan kinsa nangita og mga paagi sa pag-alagad sa Kristohanong mga paagi. Ipahunahuna kanila kon unsay ilang makat-onan mahitungod sa kinaiya sa Manluluwas gikan sa ehemplo niini nga tawo.

• Sulod nga ipakita: Tsart aron matabangan ang mga estudyante nga magtuon sa Doktrina ug mga Pakigsaad 58:26–29

• Mga bidyo: “Si Jesukristo Adunay Kaluoy ug Miayo sa Katawhan” (6:32); “Biyuda sa Nain” (2:22)

Doktrina ug mga Pakigsaad 58:38–60

Katuyoan sa leksiyon: Aron matabangan ang mga estudyante nga mobati og paglaom nga ang Manluluwas mopasaylo niadto kinsa maghinulsol sa ilang mga sala.

• Pagpangandam sa estudyante: Dapita ang mga estudyante nga maghunahuna og mga pangutana o mga kabalaka nga makapawala sa kadasig sa pipila ka mga tin-edyer sa paghinulsol human sila masayop. Dapita sila sa pagpamalandong kon unsay ilang nahibaloan mahitungod kang Jesukristo nga makatabang sa pagsulbad niadtong mga pangutana o mga kabalaka.

• Hulagway nga ipakita: Hulagway sa usa ka tin-edyer

• Mga materyal: Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022)

• Mga bidyo: “Si Jesukristo Mao ang Kalig-on sa Kabatan-onan” (14:12; tan-awa gikan sa time code 0:34 hangtod sa 2:12); “Ang Manluluwas Gusto nga Mopasaylo” (5:50)

Doktrina ug mga Pakigsaad 59

Katuyoan sa leksiyon: Aron matabangan ang mga estudyante sa pagpasidungog sa Ginoo pinaagi sa pagpili sa pagbalaan sa adlaw nga Igpapahulay.

• Pagpangandam sa estudyante: Dapita ang mga estudyante sa pagpamalandong unsa ang ilang pagbati mahitungod sa Igpapahulay. Dapita sila sa paghunahuna kon nganong ang Manluluwas nagsugo kanato sa paggahin og usa ka adlaw matag semana aron sa pagtutok ngadto Kaniya ug sa Iyang ebanghelyo.

• Mga materyal: Alang sa Kalig-on sa mga Kabatan-onan: Usa ka Giya sa Paghimo og mga Pagpili

• Mga bidyo: “Gawas Lamang diha sa mga Baroganan sa Pagkamatarong” (10:11; tan-awa gikan sa mga time code 4:59 hangtod sa 5:24 ug sa 5:24 hangtod sa 6:26); “Upon My Holy Day—Honoring the Sabbath” (1:30)