Leksiyon 71: Doktrina ug mga Pakigsaad 58–59

Doktrina ug mga Pakigsaad 58:26–29

“Matinguhaon nga Moapil diha sa Usa ka Maayo nga Katuyoan”

Daghang mga Santos, lakip ang usa ka grupo gikan sa Colesville, New York, bag-o lang miabot sa Jackson County, Missouri. Nagtinguha sila sa pagtabang sa Manluluwas sa pagtukod sa Zion, apan wala sila masayod kon unsay buhaton. Ang Ginoo mipasabot nga sila gilaoman nga mogamit sa ilang kabubut-on sa pagpangita og mga paagi sa pagtabang ug sa pagserbisyo. Kini nga leksiyon makatabang sa mga estudyante nga makasabot kon unsaon sa pagsunod ang ehemplo sa Manluluwas sa pagbuhat og maayo.

Mga Posibleng Kalihokan sa Pagkat-on

Usa ka adlaw sa kinabuhi ni Kristo

Sa dili pa magklase, ikonsiderar ang pagsulat sa Sila miadto sa pagbuhat og maayo diha sa pisara. Dapita ang matag estudyante sa pagpakigbahin og ngalan sa usa ka tawo nga ilang nailhan kansang kinabuhi nahiangay niana nga paghulagway. Ang pipila ka boluntaryo mahimong mopakigbahin kon nganong kana nga hugpong sa mga pulong nagpahinumdom kanila sa tawo nga ilang gipili.

Sultihi ang mga estudyante nga ang Mga Buhat 10 usa ka rekord sa mga pagtulun-an ni Pedro didto sa Cesarea. Dapita sila sa pagpakli ngadto sa Mga Buhat 10:38 aron makita kong kinsang ngalan unta ang isulat ni Pedro sa pisara.

Handurawa kon unsa kaha kon si Jesus natawo sa atong panahon, nagpuyo sa inyong kasilinganan, o mitambong sa inyong eskwelahan.

• Unsa sa imong hunahuna ang Iyang gibuhat nga mahimong gihulagway nga “[miadto] sa pagbuhat og maayo”?

Aron matabangan ang mga estudyante nga magtinguha sa pagsunod sa ehemplo sa Manluluwas, ikonsiderar ang paghatag nila og panahon sa pagrekord sa ilang mga hunahuna mahitungod sa mosunod nga pag-aghat diha sa ilang mga journal sa pagtuon.

Sulayi sa paghunahuna kon sa unsang paagi kini makapabati kanimo kon ikaw migahin og Sabado uban ni Jesus “[moadto] sa pagbuhat og maayo” sa tibuok adlaw. Sa unsang paagi kaha kini nga kasinatian makaimpluwensiya kon unsaon nimo sa pagpili sa paggahin sa imong panahon bisan sa mga adlaw nga wala ka nag-uban Kaniya?

Nagpili sa pagbuhat og maayo

Sa dihang nadawat ang Doktrina ug mga Pakigsaad 58 si Joseph Smith ug ang pipila ka mga elder sa Simbahan bag-o lang miabot sa Missouri. Nagtinguha sila og mga instruksiyon kon unsaon pagtukod sa Simbahan ug pagtukod sa Zion diha nga dapit. Ang Manluluwas mitudlo kanila kon unsaon nila paggamit ang ilang kabubut-on sa paghimo sa Iyang buhat.

Basaha ang Doktrina ug mga Pakigsaad 58:26–29 aron mahibaloan kon unsay gitudlo sa Manluluwas sa mga Santos mahitungod sa paggamit sa ilang kabubut-on. Isulat ang mga pulong ug ang mga hugpong sa mga pulong nga imong nakit-an diha sa tukma nga mga seksiyon sa mosunod nga tsart.

Ikonsiderar ang pagpakita sa mosunod nga tsart diha sa pisara o paghatag sa mga estudyante sa ilang kaugalingong kopya. Mahimong makatabang kini sa pipila ka mga estudyante nga mas moapil niini nga kalihokan kon dapiton sila sa pagkompleto niini uban sa usa ka pares.

Naggamit sa atong kabubut-on aron mahimong …

Mas mahisama ni Jesus	Dili kaayo sama ni Jesus

Kon nahuman na ang mga estudyante, ikonsiderar ang pagpangutana nga makatabang kanila sa paghunahuna ug sa pagsabot sa kahulogan sa mga hugpong sa mga pulong nga ilang nakaplagan. Sama pananglitan:

• Unsa kaha sa imong hunahuna ang gipasabot sa “matinguhaon nga moapil,” o aktibong nagtinguha, sa pagbuhat og maayo?

• Ngano sa imong hunahuna nga kinahanglan natong likayan nga “[mapugos],” o pugson, sa pagbuhat og maayo?

• Ngano sa imong hunahuna nga ang atong mga motibo sa pagbuhat og maayo importante?

Sa imong journal sa pagtuon o sa imong mga kasulatan, diha sa imong kaugalingong mga pulong, irekord ang usa o duha ka mga kamatuoran nga imong masulti nga importante sa Manluluwas gikan niini nga mga bersikulo.

Dapita ang mga estudyante sa pagpakigbahin sa mga kamatuoran nga ilang girekord o sa pagsulat niini diha sa pisara. Usa ka kamatuoran nga lagmit nilang ipahayag mao nga ang Dios moganti niadtong aktibong nagtinguha sa pagpahinabo sa pagkamatarong.

Mahimo nimong dapiton ang mga estudyante sa pagpamalandong o sa pagrekord kon unsa ka sagad sila nga aktibo nga nangita og mga paagi sa pagserbisyo sa Dios ug sa uban nga dili maghulat nga sultihan kon unsay buhaton. Dapita sila sa paghatag og atensyon sa mga paagi nga sila makapaningkamot nga mahimong mas matinguhaon nga moapil sa usa ka maayo nga katuyoan samtang nagpadayon sila sa pagtuon.

• Unsa nga mga ehemplo ang inyong mahunahunaan gikan sa mga kasulatan diin ang usa ka tawo mipuyo sa mga pagtulon-an sa Manluluwas niini nga mga bersikulo?

• Unsa ang mga ehemplo sa Manluluwas nga nakamatikod sa mga oportunidad sa pagbuhat og maayo ug sa paggamit sa Iyang kabubut-on sa paglihok?

Mahimo nimong ikonsiderar ang pagpasalida sa mga estudyante sa bidyo nga “Si Jesukristo Adunay Kaluoy ug Miayo sa Katawhan” (6:32), nga anaa sa​ChurchofJesusChrist.org. Kini naghulagway sa nabanhaw nga Manluluwas nga mipili nga magpabilin og dugang nga panahon taliwala sa mga Nephite aron sa pagserbisyo ug sa pag-ayo kanila.

O mahimo nimong ipakita ang bidyo nga “Widow of Nain” (2:22), nga anaa sa ChurchofJesusChrist.org. Kini naghulagway sa Manluluwas nga nakamatikod sa nagbangutan nga inahan ug mipili sa paghunong, paghupay, ug pag-ayo sa iyang anak.

Ang mga pagtulun-an sa Manluluwas diha sa atong mga kinabuhi

Ikonsiderar ang pagtabang sa mga estudyante nga madiskobrehan kon sa unsang paagi nga ang mga pagtulon-an sa Manluluwas diha sa mga bersikulo 26–29 mahimong makita sa tinuod nga mga sitwasyon sa kinabuhi. Mahimo nimong gamiton ang pipila sa mosunod nga mga sitwasyon o ang uban nga mas may kalabotan sa imong mga estudyante.

Bahina ang mga estudyante ngadto sa gagmay nga mga grupo aron hisgotan kon hain nga mga bersikulo o mga hugpong sa mga pulong ang labing maayo nga magamit sa matag sitwasyon. Awhaga ang mga grupo sa paghunahuna og daghang mga paagi nga ang matag tawo makagamit sa ilang kabubut-on sa pag-apil sa usa ka maayo nga katuyoan.

Dayon ikonsiderar ang pagdapit sa matag grupo sa pagsubli sa kalihokan pinaagi sa paghimo sa ilang kaugalingong senaryo diin ang usa ka tin-edyer mahimong mogamit sa mga pagtulon-an sa Manluluwas diha sa seksiyon 58.

1. Si Juliet bag-o lang gi-assign sa pagpangalagad sa usa ka pamilya nga wala pa niya mahimamat. Dili gani siya segurado unsaon sa pagsugod.

2. Ang magtutudlo sa Sunday School ni Ann usa ka maayong tawo apan dili usa ka eksperyensiyadong magtutudlo. Daghan sa iyang mga klasmeyt daw nawad-an og interes ug dili na mosulay sa pag-apil sa mga leksiyon.

3. Si Jasmine nakamatikod nga ang iyang inahan daw mas gikapoy kay sa naandan karong bag-o lang.

4. Si Xavier nakakita og pipila ka mapintas nga mga post bahin sa usa pa ka estudyante sa social media.

5. Si Jared adunay usa ka libre nga hapon nga walay gilaoman nga iyang buhaton ug walay bisan asa nga kinahanglan nga adtoan niya.

Sa pagtapos, ikonsiderar ang pagdapit sa mga estudyante sa pag-awit o sa pagpaminaw sa usa ka himno nga nagpalig-on sa mga baroganan nga nakat-onan niini nga leksiyon. Usa ka kapilian mao ang “Nakabuhat Ba Ako og Maayo Karon?” (Mga Himno, nu. 135). Hangyoa sila sa pagpamalandong kon sa unsang paagi ang mga liriko magamit sa mga baroganan nga gitudlo sa Manluluwas diha sa seksiyon 58. Dapita ang usa o duha ka mga estudyante sa pagpakigbahin sa klase kon unsay ilang gibati nga gusto sa Manluluwas nga ilang mahinumduman gikan sa ilang pagtuon karon. Lagmit makatabang ang pagtugot sa mga estudyante sa pagsulat sa ilang mga hunahuna sa dili pa dapiton ang pipila nga mopakigbahin og kusog.

Mahimo nimong dapiton ang mga estudyante sa pagpangita og kahigayonan sa paglihok sa ilang nakat-onan sa wala pa ang sunod nga leksiyon sa seminary. Mahimo kang mag-follow-up pinaagi sa pagdapit og mga estudyante nga buot mopakigbahin sa ilang kasinatian diha sa klase.

Dugang nga mga Kapanguhaan

Unsa ang pipila ka mga pananglitan sa mga paagi nga atong magamit ang Doktrina ug mga Pakigsaad 58:26–29 sa atong mga kinabuhi?

Si Elder Jeffrey R. Holland sa Korum sa Napulog Duha ka Apostoles miingon sa mosunod sa wala madugay human ang mga lider sa Simbahan mipaila sa programa sa pagpangalagad. Daghang mga miyembro ang adunay mga pangutana kon unsaon ang epektibong pagpangalagad sa uban.

Kami … mosugyot nga dili kamo maghulat pa og dugang pang mga panudlo. Sugdi lang gyud dayon ang pag-apil. Ngadto niadtong nagkinahanglan. Ayaw pagsige og hinuktok kon unsang matang sa pag-alagad ang inyong ikahatag. Kon atong sundon ang sukaranang baroganan nga natudlo, mopahiuyon sa mga yawe sa priesthood, ug magtinguha sa Espiritu Santo sa paggiya nato, dili gyod kita mapakyas. (Jeffrey R. Holland, “Ang Pangalagad sa Pagpasig-uli (Reconciliation),” Liahona, Nob. 2018, 77)

Si Presidente Dallin H. Oaks sa Unang Kapangulohan mipasabot kon sa unsang paagi kini nga mga baroganan magamit sa atong pagtinguha og pagpadayag ug paggiya gikan sa Dios:

Ang sukaranan sa bisan unsa nga paningkamot aron makadawat og pagpadayag mao ang pasalig sa pagbuhat kutob sa atong mahimo ug paghukom. Kini nagpasabot nga kita kinahanglan nga moserbisyo ug mobuhat.

Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat. Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabut kon sila naglihok, dili kay naglingkod lang diha sa ilang nahimutangan nga nagpaabot sa Ginoo sa pagsulti kanila sa unsay unang buhaton. (Dallin H. Oaks, “In His Own Time, in His Own Way,” Ensign, Ago. 2013, 22)

Sister Rebecca L. Craven sa kinatibuk-ang Kapangulohan sa Young Women mipakigbahin og paagi nga kini nga mga baroganan magamit sa pagbaton og pagpamatuod:

Ako adunay nindot nga kasinatian uban sa usa ka pinalangga nga batan-ong babaye nga sinsero kaayo og pangutana: “Sister Craven, giunsa nimo pagkahibalo nga ang bisan unsa mahitungod sa Simbahan tinuod? Tungod kay ako walay gibati.”

Sa wala pa motubag, ako nangutana una niya og pipila ka pangutana. “Sultihi ko mahitungod sa imong personal nga pagtuon sa kasulatan.”

Siya mitubag, “Wala ko magbasa sa mga kasulatan.”

Ako nangutana, “Kumusta man ang imong pamilya? Nagdungan ba mo sa pagtuon sa Dali, Sunod Kanako?”

Miingon siya, “Wala.”

Ako nangutana mahitungod sa iyang mga pag-ampo: “Unsa man ang imong bation kon mag-ampo ka?”

Ang iyang tubag: “Wala ko mag-ampo.”

Ang akong tubag niya yano ra: “Kon ikaw gusto nga masayod sa bisan unsa, ikaw kinahanglang adunay buhaton.”

Dili ba kana tinuod kon kita adunay gustong makat-onan o masayran? Ako midapit sa akong bag-ong higala sa pagsugod sa pagbuhat sa ebanghelyo ni Jesukristo: pag-ampo, pagtuon, pagserbisyo sa uban, ug pagsalig sa Ginoo. Ang pagkakabig dili moabot kon walay gihimo. Kini moabot pinaagi sa gahom sa Espiritu Santo kon kita mohimo og tinuyo nga paningkamot aron masayod pinaagi sa pagpangutana, pagpangita, ug pagpanuktok. Kini moabot pinaagi sa pagbuhat. (Rebecca L. Craven, “Buhata Unsay Labing Mahinungdanon,” Liahona, Mayo 2022, 62-63)

Dugang nga mga Kalihokan sa Pagkat-on

Alternatibo nga pagsugod

Mahimo nimong sugdan ang leksiyon pinaagi sa usa ka senaryo sama sa mosunod diin ang usa ka tawo mahimong mogamit sa ilang kabubut-on sa pagbuhat og usa ka butang nga maayo o mopili sa dili paglihok gawas kon sila napugos.

Hunahunaa nga samtang ikaw naglakaw sa dalan, nakita nimo ang usa ka tigulang nga tawo nga nadagma. Hain sa mosunod ang kinahanglan nimong buhaton?

1. Hunong sa pagpamati kon ang Langitnong Amahan nag-aghat kanimo sa pagtabang.

2. Hulata kon ang tigulang nga tawo direkta nga mangayo kanimo alang sa panabang.

3. Molaom nga unta dunay mosulti nimo kon unsay buhaton.

4. Diha-diha dayon tan-awa kon unsaon nimo pagtabang ang tawo kinsa nadagma.

Human motubag ang mga estudyante, hangyoa sila sa pagpakigbahin sa mga rason nga mahimong aduna ang usa ka tawo sa pagpili sa matag usa sa lain-laing mga kapilian. Dayon dapita sila sa pagbasa sa Doktrina ug mga Pakigsaad 58:26–29 ug sa pagpamalandong kon sa unsang paagi ang atong mga pagpili makaimpluwensiya kon kinsa kita mamahimo sa kataposan.

“Matinud-anon bisan sa kalisdanan”

Dapita ang mga estudyante sa pagpamalandong og usa ka kompetisyon diin ang mga maghuhukom nagkonsidera sa matang sa kalisod kon motino sa iskor nga ang usa ka tawo angayan. Ang mga ehemplo mahimong maglakip sa gymnastics, ice skating, o snowboarding. Tabangi ang mga estudyante sa pagkonektar niini ngadto sa atong hingpit nga Maghuhukom, si Jesukristo, kinsa hingpit nga nakasabot sa mga kalisdanan nga giatubang sa matag tawo dinhi sa yuta. Dayon dapita ang mga estudyante sa pagbasa sa Doktrina ug mga Pakigsaad 58:1–4, mangita kon unsay ilang makat-onan mahitungod sa paghukom sa atong Manluluwas.

Modernong paggamit sa mga bersikulo 26–29

Usa ka paagi aron matabangan ang mga estudyante nga makakita og modernong kalabotan sa mga pagtulon-an sa Manluluwas mao ang paghatag sa mga grupo og mga kopya sa mga pamahayag diha sa seksiyon nga “Dugang nga mga Kapanguhaan”. Ang matag grupo mahimong mobasa sa mga pamahayag ug motino kon hain nga mga hugpong sa mga pulong gikan sa Doktrina ug mga Pakigsaad 58:26–29 ang labing maayo nga magamit. Dayon dapita ang mga estudyante sa pagpakigbahin og lain-laing mga sitwasyon diin ang usa ka tin-edyer mahimong mogamit kon unsay gitudlo niadtong mga hugpong sa mga pulong ug mga pamahayag.

May kalabotan nga kalihokan

Sa usa ka gamay nga piraso sa papel, ang matag estudyante mahimong mosulat og usa ka dapit nga ilang adtoan sa sunod semana (panimalay, eskwelahan, simbahan, trabaho, soccer field, ug uban pa) ug ibutang kini sa usa ka sudlanan. Sa sinulagma nga paagi pagkuha og mga papel gikan sa sudlanan, ug dapita ang klase sa pagpakigbahin sa mamugnaong mga paagi nga ang usa ka tawo mahimong mopili nga aktibo nga mohimo og maayo niana nga sitwasyon o dapit.

Aktibo nga pag-apil sa pagkat-on

Aron matabangan ang mga estudyante sa paghisgot kon sa unsang paagi ang mga kamatuoran sa seksiyon 58 mahimong magamit sa ilang kasinatian sa seminary, ikonsiderar ang pagpakita niini nga pamahayag ni Elder David A. Bednar sa Korum sa Napulog Duha ka Apostoles.

“Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baroganan nagbukas sa iyang kasingkasing ngadto sa Espiritu Santo ug nagdapit sa Iyang pagtudlo, gahom sa pagpamatuod, ug panghimatuod nga saksi. Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. …

“… Ang usa ka estudyante kinahanglang mopakita og [hugot nga pagtuo] ug molihok aron makaangkon og kahibalo alang sa iyang kaugalingon” (David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 20).

Dapita ang mga estudyante sa paghulagway sa mga pagpili nga mahimong himoon sa usa ka estudyante sa wala pa ang klase, sa panahon sa klase, ug pagkahuman sa klase nga mahimong madugangan o maminosan ang ilang nakat-onan ug mabati sa seminary.

Kon makatabang, mahimong maghisgot ang mga estudyante kon sa unsang paagi ang mga baroganan sa seksiyon 58 ug ang pamahayag ni Elder Bednar makapauswag usab sa ilang kasinatian sa pagkat-on sa mga kahimtang sa eskwelahan.