Leksiyon 73: Doktrina ug mga Pakigsaad 58–59

Doktrina ug mga Pakigsaad 59

Ang Adlaw sa Ginoo

Niadtong 1831 ang Ginoo mitawag sa pipila ka mga Santos sa pagbalhin ngadto sa Jackson County, Missouri, aron sa pagtukod sa Zion. Samtang si Propeta Joseph Smith uban niini nga mga Santos, nakadawat siya og mga instruksiyon gikan sa Ginoo mahitungod sa pagbalaan sa adlaw nga Igpapahulay. Kini nga leksiyon makatabang sa mga estudyante sa pagpasidungog sa Ginoo pinaagi sa pagpili sa pagbalaan sa adlaw nga Igpapahulay.

Mga Posibleng Kalihokan sa Pagkat-on

Mga desisyon mahitungod sa adlaw nga Igpapahuway

Tabangi ang mga estudyante sa paghunahuna mahitungod sa pipila ka mga panalangin ug mga hagit sa pagsunod sa sugo sa pagbalaan sa adlawng Igpapahulay. Mahimo nimong gamiton ang mosunod nga kasinatian nga gipakigbahin sa kinatibuk-ang komperensiya. Ang paghunahuna mahitungod sa sitwasyon sa laing tawo makatabang sa pag-andam sa mga estudyante sa paghunahuna sa ilang kaugalingong mga hunahuna, mga pagbati, ug mga lihok.

Si Elder Larry Y. Wilson sa Seventy mipakigbahin sa mosunod nga kasinatian:

Ang among anak nga si Mary sikat nga tigdula og soccer sa iyang pagdako. Usa ka tuig niana miabot ang ilang team sa championship ug, kahibalo mo, kana nga dula himoon sa Dominggo. Samtang bata pa, si Mary natudloan na nga ang Dominggo mao ang adlaw sa pagpahulay ug espiritwal nga pagpalagsik, dili paglingaw-lingaw. Apan napugos siya sa iyang mga coach ug kaubanan sa team sa pagdula ug sa tinguha nga dili sila pakyason. (Larry Y. Wilson, “Gawas Lamang diha sa mga Baroganan sa Pagkamatarong,” Liahona, Mayo 2012, 104–5)

• Ngano kaha nga ang ubang mga tawo nag-isip niini nga usa ka importante nga desisyon sa kinabuhi ni Mary samtang ang uban wala?

• Kon ikaw si Mary, unsa sa imong hunahuna ang importante nga ikonsiderar sa dili pa mohimo niini nga desisyon?

Hunahunaa sa makadiyot ang mahitungod sa mga desisyon nga imong gihimo bahin sa adlaw nga Igpapahulay. Unsa ang kasagaran nimong buhaton aron sa paggiya sa imong mga pagpili? Sa imong pagtuon karon, tinguhaa ang inspirasyon gikan sa Espiritu Santo aron matabangan ka nga mahibalo kon nganong himoon nga balaan ang Igpapahulay ug kon unsaon nimo kana sa paghimo.

Ang mga sugo ug mga panalangin sa Ginoo

Ang mosunod nga parapo makahatag og konteksto alang sa Doktrina ug mga Pakigsaad 59.

Bisan og dili maayo ang panglawas sa edad nga 55, si Polly Knight mibiya sa iyang panimalay sa Colesville, New York, determinado sa pagsunod sa Ginoo ug sa pag-adto sa Zion. Si Polly nakabot sa Zion (Jackson County, Missouri) ug namatay pipila ka adlaw human niana. Sa adlaw sa iyang lubong, usa ka Dominggo, nadawat ni Propeta Joseph Smith ang pagpadayag nga narekord diha sa Doktrina ug mga Pakigsaad 59. Niini nga pagpadayag, ang Ginoo mitudlo og mga kamatuoran nga makahupay sa pamilya ni Polly (tan-awa sa mga bersikulo 1–2). Siya usab mihisgot sa Iyang mga sugo, naghatag og importansiya sa Igpapahulay. Ang Ginoo misaad og dagkong mga panalangin niadtong nagbalaan sa adlawng Igpapahulay.

Ikonsiderar ang paghimo og duha ka mga kolum diha sa pisara nga adunay mga ulohan nga Mga Panudlo ug Mga Panalangin. Dapita ang mga estudyante sa pagtuon sa mosunod nga mga bersikulo diha sa gagmay nga mga grupo ug sa paglista diha sa mga kolum nga anaa sa pisara kon unsay ilang nakaplagan. Mahimo usab silang maghimo og susama nga mga lista sa ilang mga journal sa pagtuon.

Basaha ang Doktrina ug mga Pakigsaad 59:9–20, ug paghimo og duha ka lista, usa sa mga panudlo nga gihatag sa Ginoo alang sa atong mga lihok ug mga kinaiya sa Igpapahulay ug usa sa mga panalangin nga Iyang gitanyag kanato.

Dapita ang mga estudyante sa pagpakigbahin kon unsay ilang nakat-onan. Hatagi usab sila og oportunidad sa pagpangutana sa mga pangutana nga lagmit aduna sila, ug dungan nga hisgoti ang mga pangutana sa mga estudyante. Mahimong makatabang alang sa mga estudyante ang pagpangita sa mga kahulogan sa malisod nga mga pulong kon gikinahanglan. Mahimong hisgotan ug diskobrehon sa mga estudyante kon unsay kahulogan sa “mohatag og mga paghalad sa inyong mga pag-ampo ngadto sa Labing Halangdon” (bersikulo 10) ug “mohalad sa inyong mga halad ug sa inyong mga sakramento ngadto sa Labing Halangdon” (bersikulo 12). Mahimo kang motabang sa paggiya sa diskusyon sa estudyante pinaagi sa mga pangutana sama sa mosunod:

• Unsa nga mga kamatuoran ang atong mahibaloan gikan niini nga mga bersikulo mahitungod sa katuyoan sa Igpapahulay?

  Dapita ang mga estudyante sa pagpakigbahin sa bisan unsang mga kamatuoran nga ilang nadiskobrehan. Mahimo nimong dapiton ang mga estudyante sa paghisgot kon nganong naghunahuna sila nga importante ang mga kamatuoran nga ilang nahibaloan. Kauban sa ubang mga kamatuoran nga gipakigbahin sa mga estudyante, tabangi ang mga sakop sa klase sa pag-ila ug paghisgot nga ang Igpapahulay usa ka adlaw alang kanato sa pagpakita sa atong debosyon sa Dios (tan-awa sa bersikulo 10).

• Sa unsang paagi nga ang pagbaton og usa ka adlaw sa pagpunting sa imong gugma ug debosyon ngadto sa Dios makatabang sa imong kinabuhi?

Pagpasidungog sa Ginoo atol sa Igpapahulay

Ang mosunod nga kalihokan makatabang sa mga estudyante nga makasabot kon sa unsang paagi sila makahatag og pasidungog sa Ginoo pinaagi sa ilang mga pagpili sa adlaw nga Igpapahulay. Mahimo nimong isulat sa pisara ang mga pangutana alang sa rekomend sa templo nga anaa sa ubos.

Atol sa mga interbyo alang sa rekomend sa templo, ikaw pangutan-on:

“Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakrament; ug sa pagpakabuhi subay sa mga balaod ug kasugoan sa ebanghelyo?”

Aron matabangan ka sa paghunahuna kon unsaon nimo pagtuman ang sugo sa pagbalaan sa adlaw nga Igpapahulay, pagsulat og mga ideya diha sa imong journal sa pagtuon kon unsaon nimo pagpasidungog ang Ginoo pinaagi sa pagbalaan sa adlaw nga Igpapahulay.

Ang mosunod nga mga kapanguhaan makatabang sa mga estudyante sa pag-ila og dugang nga mga paagi sa pagbalaan sa Igpapahulay diha sa panimalay ug sa simbahan. Ikonsiderar ang pagpakita niini ug ang paghatag og panahon sa mga estudyante sa pagtuon ug sa pagdugang ngadto sa ilang listahan sa mga ideya.

Basaha ang mosunod nga mga kasulatan aron mahibaloan kon unsay gibuhat ni Jesukristo sa Igpapahulay:

• Mateo 12:9–13

• Lucas 4:16

Tun-i ang pipila sa mosunod nga mga kapanguhaan alang sa dugang nga mga ideya sa pagbalaan sa adlaw nga Igpapahulay:

• “Higugmaa ang Dios, higugmaa ang inyong silingan” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ([2022], 10–14)

• Topics and Questions, “Sabbath Day” ug “Sacrament,” topics.ChurchofJesusChrist.org

  Mahimo usab nimong ikonsiderar ang pagpakita sa “Upon My Holy Day—Honoring the Sabbath” (1:30) sa pagpangita og dugang nga tambag gikan ni Elder Jeffrey R Holland.

  Ang mosunod nga mga artikulo gikan sa ChurchofJesusChrist.org mahimo usab nga makatabang nga mga kapanguhaan nga ipakigbahin: “Goal: Honor and Enjoy the Sabbath Day” ug “Prepare for the Sacrament All Week Long.”

  Human ang mga estudyante dunay igong panahon sa pagtuon, ikonsiderar sa pagdapit kanila sa pagpakigbahin sa unsay ilang nakat-onan. Mahimo nimong ipasulat kanila ang pipila sa ilang mga nakaplagan diha sa pisara. Ikonsiderar usab ang pagpangutana sa mosunod aron matabangan ang mga estudyante nga mopakigbahin sa ilang kaugalingong mga kasinatian.

• Unsa ang nakatabang kanimo nga magpakita og debosyon ngadto sa Dios sa Igpapahulay? Unsa ang kalainan nga nahimo niining mga pamatasan alang kanimo?

Mahimong mainteresado tingale ang mga estudyante nga makahibalo pa og dugang gikan sa kasinatian ni Mary nga gipaila sa sinugdanan sa leksiyon. Mahimo nimong ihatag sa mga estudyante ang nahibilin sa istorya pinaagi sa pagpakita sa bidyo nga “Gawas Lamang diha sa mga Baroganan sa Pagkamatarong” gikan sa time code 5:24 hangtod sa 6:26, anaa sa ChurchofJesusChrist.org.

Paghimo og plano

Ikonsiderar ang pagpakita sa mosunod nga pagdapit. Mahimo nimong dapiton ang pipila ka andam nga mga estudyante sa pagpakigbahin sa ilang mga plano human sila makahimo niini.

Paghimo og plano diha sa imong journal sa pagtuon kon unsaon nimo sa pagpaningkamot sa pagpasidungog sa Manluluwas sa adlaw nga Igpapahulay. Mahimo nimong ilhon ang mga ideya kon unsay imong sugdan sa pagbuhat, padayonon sa pagbuhat, o hunongon sa pagbuhat, diha sa panimalay o sa simbahan.

Dugang nga mga Kapanguhaan

Nganong gisaulog sa mga Kristiyano ang Igpapahulay sa Dominggo?

“Sa panahon sa Daang Tugon, ang mga tawo sa pakigsaad sa Dios nagsaulog sa Igpapahulay sa ikapitong adlaw sa semana tungod kay ang Dios mipahulay sa ikapitong adlaw sa dihang Iyang gilalang ang yuta (tan-awa sa Genesis 2:2). Human sa Pagkabanhaw ni Jesukristo, nga nahitabo sa unang adlaw sa semana (tan-awa sa Marcos 16:2), ang mga disipulo sa Ginoo misugod sa pagsaulog sa Igpapahulay sa unang adlaw sa semana, Dominggo (tan-awa sa Mga Buhat 20:7)” (Topics and Questions, “Sabbath Day,” topics.ChurchofJesusChrist.org).

Sa unsang paagi nga ang pagtahod sa Igpapahulay makatabang kanako sa pagpahayag sa akong debosyon ngadto sa Dios?

Si Elder David A. Bednar sa Korum sa Napulog Duha ka Apostoles mitudlo:

Sa adlaw nga Igpapahulay mosimba kita sa Amahan diha sa ngalan sa Anak pinaagi sa pag-apil sa mga ordinansa ug pagkat-on, pagdawat, paghinumdom, ug pagbag-o sa mga pakigsaad. Sa Iyang balaang adlaw, ang atong mga hunahuna, mga binuhatan, ug kinaiya maoy mga timailhan nga atong gihatag sa Dios ug usa ka timailhan sa atong gugma alang Kaniya. (David A. Bednar, “Bililhon ug Dagko Uyamot nga mga Saad,” Liahona, Nob. 2017, 92)

Unsa ang gusto sa Manluluwas nga atong masabtan mahitungod sa Igpapahulay?

Si Presidente Russell M. Nelson mipasabot:

Nagtuo ko nga [gusto ni Jesukristo] atong masabtan nga ang Igpapahulay maoy Iyang gasa kanato, naghatag og tinuod nga pahulay gikan sa kalisod sa matag adlaw nga kinabuhi ug oportunidad alang sa espiritwal ug pisikal nga pagbag-o. Ang Dios mihatag kanato niining espisyal nga adlaw, dili para malingaw o maghago apan aron mopahulay gikan sa katungdanan, uban sa pisikal ug espiritwal nga pagpahulay. (Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129)

Sa unsang paagi ang Igpapahulay mahimong usa ka adlaw sa pagpahulay?

Si Presidente Russell M. Nelson mipakigbahin og usa ka kasinatian ug mitudlo:

Una akong nahimuot sa Igpapahulay daghang tuig na ang milabay sa dihang, isip busy nga surgeon, ako nasayod nga ang Igpapahulay nahimong adlaw alang sa pag-ayo sa kaugalingon. Sa pagtapos sa matag semana, ang akong mga kamot manakit sa pabalik-balik nga pagnusnus niini og sabon, tubig, ug gahi nga brush. Nagkinahanglan usab ko og pahulay gikan sa kabug-at sa lisod nga propesyon. Ang Dominggo naghatag sa gikinahanglan kaayo nga pahulay. …

Sa Hebreohanon, ang pulong nga Igpapahulay nagpasabot og “kapahulayan.” Ang tumong sa Igpapahulay nagsugod niadtong Paglalang sa kalibotan, dihang human sa unom ka adlaw nga pagtrabaho ang Ginoo mipahulay gikan sa buhat sa paglalang. (Russell M. Nelson, “Ang Igpapahulay Usa ka Kahimut-an,” Liahona, Mayo 2015, 129)

Unsa kaha ang gipasabot sa malipayong pagtuman sa Igpapahulay apan “dili uban sa naghingapin nga katawa”? (Doktrina ug mga Pakigsaad 59:15)

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Pagbantay sa pagpakatawa. Ang kusog, dili angay nga katawa makapasilo sa Espiritu. Ang hustong pagpakatawa motabang sa pagpadayag; apan ang kusog nga katawa dili. Ang pagpakatawa usa ka paagi sa paglikay sa mga pressure sa kinabuhi. (Richard G. Scott, “Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 46)

Dugang nga mga Kalihokan sa Pagkat-on

Pagkat-on sa pagbalaan sa adlawng Igpapahulay

Kon imong gipaila si Mary ug ang iyang desisyon kon magdula ba og soccer sa Dominggo, diha sa kataposan sa leksiyon ikonsiderar ang paghangyo sa mga estudyante sa paghanduraw nga naghatag ni Mary og tambag. Mahimong ipakigbahin sa mga estudyante ang ilang nakat-onan mahitungod sa adlaw nga Igpapahulay ug sa unsang paagi kana mahimong makaimpluwensiya sa ilang mga pagpili. Mahimo silang magdrama-drama o hisgotan ang ilang nakat-onan diha sa gagmay nga mga grupo.

“Uban sa bug-os nga tumong ngadto sa akong himaya” (Doktrina ug mga Pakigsaad 59:1)

Kini nga kalihokan makatabang sa mga estudyante sa pagpamalandong kon unsa ang gipasabot sa pagbaton og bug-os nga tinguha ngadto sa himaya sa Dios.

Ipakita ang usa ka hulagway sa Manluluwas. Dapita ang mga estudyante sa paghimo og luag nga kumo gamit ang usa ka kamot, ipiyong ang usa ka mata, ug tan-awa ang hulagway pinaagi sa gamay nga pag-abli nga gimugna sa ilang kamot. Hangyoa ang mga estudyante sa paghulagway unsay ilang nakita. Dayon dapita ang mga estudyante sa pag-abli sa laing mata ug paghingalan sa tanan nga mga butang nga ilang makita karon nga mahimong makabalda kanila gikan sa pagpunting ngadto sa Manluluwas.

Dapita ang mga estudyante sa pagpasabot kon sa unsang paagi kini nga kalihokan mahimong may kalabotan sa espirituhanong pagbaton og bug-os nga tinguha ngadto sa himaya sa Dios. Dapita ang mga estudyante sa pagpakigbahin og mga paagi nga ilang mapawagtang ang mga makabalda nga mahimong makapahilayo sa ilang pagtutok gikan sa Manluluwas, hilabi na sa Iyang balaang adlaw.

“Dili kamo … magbuhat og bisan unsa nga butang nga sama niini” (Doktrina ug mga Pakigsaad 59:6)

Human sa pagsugo sa mga Santos sa dili pagpangawat, pagpanapaw, o pagpatay, ang Ginoo midugang “ni magbuhat sa bisan unsa nga sama niini” (Doktrina ug mga Pakigsaad 59:6). Tabangi ang mga estudyante sa pagkonsiderar sa kahulogan niini nga hugpong sa mga pulong ug sa epekto niini sa atong mga pagpili. Mahimo kang mohangyo sa mga estudyante sa paghisgot kon unsay buot ipasabot sa pagpangawat. Dayon hangyoa sila sa paghunahuna og mga buhat nga tingali dili pagpangawat apan “sama niini.” Mahimo nimong buhaton ang sama niana alang sa pagpanapaw ug pagpatay. Tabangi ang mga estudyante sa pagdiskobre sa proteksiyon nga gitanyag sa Dios kanato pinaagi sa paghatag kanato niini nga mga sugo.

Pagpasalamat sa Dios ug pag-ila sa Iyang kamot “sa tanan nga mga butang” (Doktrina ug mga Pakigsaad 59:7, 21)

Ikonsiderar ang pagbasa sa Doktrina ug mga Pakigsaad 59:7, 21 isip usa ka klase, nga mangita sa sugo sa Ginoo. Dapita ang mga estudyante sa pagkonsiderar kon sa unsang paagi kita maapektohan pinaagi sa kanunay nga pag-ila sa giya ug mga panalangin sa Dios diha sa atong mga kinabuhi. Hatagi ang mga estudyante og panahon sa pagpamalandong sa mga panalangin sa Dios diha sa ilang mga kinabuhi, ug dasiga sila sa pagpili og piho nga mga paagi nga sila makapakita sa ilang pasalamat ngadto sa Dios.