Leksiyon 72: Doktrina ug mga Pakigsaad 58–59

Doktrina ug mga Pakigsaad 58:38–60

“Siya Kinsa Naghinulsol … Gipasaylo”

Bisan ang labing matinud-anon nga mga disipulo ni Jesukristo nagkinahanglan og paghinulsol ug pagpasaylo. Diha sa Doktrina ug mga Pakigsaad 58, gidapit ni Jesukristo ang pipila ka mga lider sa Iyang Simbahan sa paghinulsol ug misaad nga mopasaylo sa ilang mga sala kon sila mosunod. Ang katuyoan niini nga leksiyon mao ang pagtabang sa mga estudyante nga mobati og paglaom nga ang Manluluwas mopasaylo niadto kinsa maghinulsol sa ilang mga sala.

Mga Posibleng Kalihokan sa Pagkat-on

Nasamdan

Ikonsiderar ang pagsugod sa klase pinaagi sa paghimo og panaghisgot mahitungod sa atong panginahanglan kang Jesukristo sa pagpasaylo sa atong mga sala.

Ang usa ka paagi sa pagbuhat niini mao ang pagpakita sa mosunod nga hulagway o pagdrowing og yano nga hulagway sa usa ka tin-edyer diha sa pisara. Aron makamugna og interes, mahimo nimong dapiton ang klase sa paghingalan kaniya ug sa paghimo og pipila ka mga detalye mahitungod sa iyang kinabuhi sa dili pa ipakigbahin ang mosunod nga sitwasyon.

Hunahunaa nga gisultihan ka sa imong higala nga nahulog siya gikan sa usa ka taluktok kagabii. Gibati niya ang grabeng kasakit sa higayon nga siya moginhawa ug naghunahuna nga nabali ang iyang bukton. Nakahukom siya nga dili magpatan-aw sa usa ka doktor tungod kay nabalaka siya nga ang doktor ug ang uban masagmuyo kung mahibaloan nila nga gipili niya nga moadto duol sa kadtong peligro nga taluktok. Busa siya nagplano sa pagtago sa iyang kasakit, naglaom nga ang tanan mamaayo sa husto nga panahon.

• Unsa ang imong gibati mahitungod sa plano sa imong higala? Ngano man?

Paghunahuna karon og susama nga sitwasyon, apan niining higayona ang imong higala misulti kanimo nga siya nakahimo og seryoso nga sala. Imbis mosunod sa mga pagtulun-an sa Manluluwas mahitungod sa paghinulsol, nakahukom siya sa pagtago sa iyang sala ug nanghinaot nga moarang-arang ang mga butang sa paglabay sa panahon.

Dapita ang mga estudyante sa pagpakigbahin og pipila ka lain-laing mga pangutana o mga kabalaka nga mahimong makaimpluwensiya sa usa ka tin-edyer nga dili maghinulsol.

• Unsa nga tambag ang imong ikahatag sa imong higala?

Ang Manluluwas nagtudlo mahitungod sa paghinulsol

Ipasabot nga niadtong 1831 si Joseph Smith ug ang ubang mga elder mibiyahe ngadto sa Missouri, diin ang Ginoo misugo sa pipila sa pagpabilin ug sa pagtukod sa siyudad sa Zion. Isip kabahin sa instruksiyon sa Ginoo, gitambagan Niya ang pipila kanila sa paghinulsol sa ilang mga sayop nga binuhatan (tan-awa sa Doktrina ug mga Pakigsaad 58:14–15, 38–41, 60).

Basaha ang Doktrina ug mga Pakigsaad 58:60 aron makita ang tambag sa Ginoo ngadto sa usa ka tawo nga ginganlan og Ziba Peterson.

• Unsa sa imong hunahuna ang sayop nga pagsabot ni Ziba mahitungod sa Dios o mahitungod sa paghinulsol nga maoy hinungdan sa iyang pagtago sa iyang mga sala? (Mahimo nimong basahon ang tambag ni Alma ngadto sa iyang anak nga lalaki mahitungod sa mga resulta sa pagsulay sa pagtago sa atong mga sala. Tan-awa sa Alma 39:7–9.)

• Hain niini nga mga sayop nga pagsabot sa imong hunahuna nga ang mga tawo nakigbisog gihapon karon?

Ikonsiderar ang pagpakita sa mosunod nga pag-aghat ug sa paghatag og panahon sa mga estudyante sa personal nga pagpamalandong o sa pagsulat sa ilang mga hunahuna.

Dayon dapita sila sa pagpangita og mga pagtulun-an atol sa leksiyon nga makatabang kanila sa ilang mga paningkamot sa paghinulsol sa tibuok nilang kinabuhi.

Pamalandongi kon adunay bisan unsang mga sala nga ikaw nagduha-duha sa paghinulsol. Kon mao, hunahunaa ang imong mga rason sa wala paghinulsol niini.

Mga pangutana ug mga tubag

Samtang magtuon ang mga estudyante sa mosunod nga tudling, mahimo nimong pahinumdoman sila sa piho nga mga pangutana o mga kabalaka mahitungod sa paghinulsol nga ilang gipakigbahin sa sayo nga bahin sa leksiyon.

Basaha ang Doktrina ug mga Pakigsaad 58:42–43, mangita sa mga pagtulon-an sa Manluluwas nga makatabang sa pagtubag sa mga pangutana ug sa mga kabalaka nga mahimong aduna ang pipila ka mga tawo mahitungod sa paghinulsol.

Ang Doktrina ug mga Pakigsaad 58:42–43 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Ibutang ang mga estudyante ngadto sa gagmay nga mga grupo. Dapita sila sa pagpakigbahin og mga hugpong sa mga pulong gikan sa mga bersikulo 42–43 nga makatabang kanila sa pagtubag sa piho nga mga pangutana o mga kabalaka o nga makahuluganon ngadto kanila. Dayon dapita ang mga grupo nga ipakigbahin kon unsay ilang nakat-onan ngadto sa klase. Samtang mopakigbahin ang mga estudyante, seguroha nga makasabot sila nga kon kita maghinulsol sa atong mga sala, ang Ginoo mopasaylo kanato ug nga aron maghinulsol, ang Ginoo nagkinahanglan kanato sa pagkompisal ug sa pagbiya sa atong mga sala.

• Sa unsang paagi kini nga mga kamatuoran makatabang sa mga kabalaka sa mga tawo mahitungod sa paghinulsol?

Kon ang mga estudyante adunay mga pangutana mahitungod sa paghinulsol nga dili matubag niini nga mga bersikulo, tinoa kon labing maayo nga tabangan sila sa pagpangita og mga tubag isip kabahin niini nga leksiyon, atol sa umaabot nga leksiyon, o pinaagi sa pagsugyot og balaanong gitudlo nga mga tinubdan diin sila makapangita og mga tubag nga sila ra.

(Pahinumdom: Adunay mga pamahayag diha sa “Dugang nga mga Kapanguhaan” nga bahin nga makatabang kon ang mga estudyante adunay mga pangutana mahitungod sa piho nga mga konsepto niini nga tudling sa doktrinal nga kahanas, sama sa pagkompisal o pagbiya sa mga sala.)

Ang Ginoo mopasaylo

Kini nga seksiyon gituyo aron sa pagtabang sa mga estudyante nga mobati og paglaom nga ang Manluluwas mopasaylo niadto kinsa maghinulsol. Mainampoong magtino kon hain sa mga kapanguhaan ug mga sugyot ang labing makatabang sa imong mga estudyante nga magmalamposon nga makaandam sa ilang mga tubag sa mosunod nga kalihokan.

Sa imong journal sa pagtuon, pag-andam og tubag nga mahimo nimong ipakigbahin ngadto sa usa ka tawo kinsa nabalaka nga siya dili mapasaylo. Unsa ang imong ikapakigbahin mahitungod sa kinaiya ug mga saad sa Manluluwas nga makatabang niini nga tawo sa pagbuntog sa bisan unsang mga kabalaka? Pagpili og pipila sa mosunod nga mga opsiyon aron sa pagtabang kanimo sa pag-andam sa imong tubag:

1. Mga kasulatan: Siksika ang mga kasulatan alang sa mga tudling nga naglangkob sa mga saad sa Ginoo alang niadtong kinsa maghinulsol o sa mga asoy nga nagpakita sa Iyang pagkaandam sa pagpasaylo. Ang lista sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas (2023) mahimong makatabang. Mahimo nimong ikonsiderar ang pagtandi sa mga pakisayran (cross-referencing) o pagkonektar sa pipila niini nga mga kasulatan ngadto sa Doktrina ug mga Pakigsaad 58:42–43.

2. Personal nga ebidensiya: Paghunahuna og mga ehemplo diin imong nasaksihan ang kaandam sa Manluluwas sa pagpasaylo ug sa pagtabang sa usa ka tawo nga mausab. (Ayaw ipakigbahin ang mga ngalan o mga detalye sa mga sala.)

3. Ang “Si Jesukristo motabang kaninyo” nga bahin sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ([2022], 6–9): Pangitaa ang mga kamatuoran mahitungod sa Langitnong Amahan ug ni Jesukristo nga naghatag kanato og paglaom.

4. Modernong mga propeta: Pangitaa ang mga pamahayag gikan sa modernong mga lider sa Simbahan nga nagtabang kanato nga makasabot sa mapasayloon nga kinaiya ni Jesukristo.

Ang mosunod usa ka ehemplo gikan ni Elder Dieter F. Uchtdorf sa Korum sa Napulog Duha ka Apostoles nga mahimo nimong pilion nga ipakigbahin ngadto sa imong mga estudyante:

Si Jesukristo Mao ang Kalig-on sa Kabatan-onan

Si Elder Uchtdorf nagtudlo nga si Jesukristo mao ang labing maayong giya sa paghimo og mga pagpili. Siya usab mipaila sa bag-o nga giya sa Alang sa Kalig-on sa mga Kabatan-onan.

Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo? …

… Kamo tingali makahinumdom og mga sayop nga inyong nahimo, mga panahon nga kamo nagpadala sa tintasyon, mga butang nga kamo nanghinaot nga wala unta ninyo buhata—o nanghinaot nga kamo nakahimo unta og mas maayo.

Ang Manluluwas makahibalo niana, ug ako nagtuo nga Siya mosiguro kaninyo uban sa mga pulong nga Iyang gisulti diha sa mga kasulatan:

“Ayaw kahadlok” [Lucas 5:10].

“Ayaw pagduha-duha” [Doktrina ug mga Pakigsaad 6:36].

“Pagmaya” [Mateo 14:27].

“Ayaw kamog kaguol” [Juan 14:1, 27].

Ako wala magtuo nga Siya mohimo og mga pamalibad alang sa inyong mga sayop. Siya dili moingon nga ang sayop dili importante. Dili, Siya mosugo ninyo sa paghinulsol—sa pagbiya sa inyong mga sala, sa pag-usab, aron Siya makapasaylo kaninyo. Siya mopahinumdom kaninyo nga 2,000 ka tuig ang milabay Siya mipas-an niadtong mga sala sa Iyang kaugalingon aron nga kamo maka hinulsol. Kana kabahin sa plano sa kalipay nga giregalo kanato gikan sa atong mahigugmaong Langitnong Amahan. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9)

Human ang igong panahon sa pag-andam sa ilang mga tubag, dapita ang mga estudyante sa pagpakigbahin diha sa gagmay nga mga grupo kon unsay ilang nakat-onan aron ang tanan kinsa nagtinguha sa pagpakigbahin makabaton og kahigayonan.

Mahimo usab nimong ikonsiderar ang pagpasalida sa bidyo nga “Ang Manluluwas Gusto nga Mopasaylo” (5:50), anaa sa ChurchofJesusChrist.org, isip usa ka ehemplo sa kanunay nga tinguha sa Manluluwas nga mopasaylo.

Ikonsiderar ang pagtapos sa klase uban sa imong pagpamatuod sa mapasayloon nga kinaiya sa Manluluwas, ug awhaga ang mga estudyante sa paghinulsol nga adunay hugot nga pagtuo sa Iyang mga saad.

The Savior Wants to Forgive

A former addict and repeat convict shares his experiences with the Savior’s ability and willingness to forgive him again and again, even when he felt undeserving.

Isag-ulo

Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Siya kinsa naghinulsol sa iyang mga sala, ang mao gipasaylo.” Ang mga ideya alang sa mga kalihokan sa pagsag-ulo anaa sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Ngano nga makahinumdom pa man gihapon ko sa akong mga sala? Nagpasabot ba kana nga wala ko mapasaylo?

Si Elder Dieter F. Uchtdorf sa Korum sa Napulog Duha ka Apostoles miingon:

Point of Safe Return

The gift of the Atonement of Jesus Christ provides us at all times and at all places with the blessings of repentance and forgiveness.

Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumdoman. Si Satanas bakakon; mosulay siya sa pagpahanap sa atong panan-aw ug mogiya kanato palayo sa dalan sa paghinulsol ug pagpasaylo. Ang Dios wala mosaad nga dili nato mahinumdoman ang atong mga sala. Ang paghinumdom motabang kanato nga malikayan ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang panumdoman sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo. (Dieter F. Uchtdorf, “Punto sa Luwas nga Pagbalik,” Liahona, Mayo 2007, 101)

Ang Ginoo makalimot ba gayod nga kita nakasala human kita maghinulsol?

Si Elder Gerrit W. Gong sa Korum sa Napulog Duha ka Apostoles mipasabot:

Kon kita maghinulsol, kon kita mokumpisal ug mobiya sa atong mga sala, ang Ginoo nag-ingon nga Siya dili na mahinumdom niini. Dili ingon nga Siya makalimot; hinoon, sa talagsaong paagi, kini ingon og nagpili Siya sa dili paghinumdom niini, ni kita kinahanglan. (Gerrit W. Gong, “Salig Pag-usab,” Liahona, Nob. 2021, 98)

Unsaon nako sa pagkahibalo nga napasaylo na ako human sa kinasingkasing nga paghinulsol?

Tan-awa ang bidyo nga “How Do We Know the Lord Has Forgiven Us?” (3:18).

Unsaon Nato Pagkahilabo nga Gipasaylo Kita sa Ginoo?

(The Divine Gift of Forgiveness, Kapitulo 23) Si Elder Neil L. Andersen miistorya bahin sa tawo nga mibati nga sad-an sa aksidente sa eroplano nga miangin sa iyang asawa ug duha ka higala.

Kanus-a ako nagkinahanglan og tabang sa bishop aron sa paghinulsol?

Si Elder Neil L. Andersen sa Korum sa Napulog Duha ka Apostoles miingon:

Ang mga bishop ug mga presidente sa stake giordinahan ug gi-set apart isip mga maghuhukom sa Israel. Siyempre, ang Ginoo lamang ang makapasaylo sa mga sala, apan ang mga lider sa pagkapari adunay importante nga tahas sa proseso sa paghinulsol sa seryoso nga mga sala. (Neil L. Andersen, Ang Balaanong Gasa sa Pagpasaylo [2019], 205)

Diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), atong mabasa:

Ang imong bishop naghupot sa mga yawe sa pagkapari ug espirituhanong mga gasa sa pagtabang nimo sa paghinulsol. Makapangayo ka sa iyang tabang ug tambag sa bisan unsang panahona. Kon ikaw nakahimo og bug-at nga kasaypanan, sama sa paglapas sa balaod sa kaputli, pakigkita sa imong bishop. Siya dili mohimaraot nimo. Siya mao ang representante ni Jesukristo ug motabang nimo nga masayod unsaon aron hingpit nga makahinulsol ug madawat ang makaalim ug makapalig-on nga gahom sa Manluluwas. (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 8)

Unsa kaha kon ako nanlimbasog sa pagbiya sa usa ka sala?

Si Elder Neil L. Andersen sa Korum sa Napulog Duha ka Apostoles mipasabot:

Usahay diha sa atong paghinulsol, diha sa atong matag adlaw nga paningkamot nga mahimong mas mahisama ni Kristo, atong makita ang atong mga kaugalingon nga pabalik-balik nga nanlimbasog sa sama nga mga kalisdanan. Daw nagtungas kita og usa ka bukid nga natabunan og mga kahoy, usahay dili nato makita ang atong pag-uswag hangtud nga mas maduol na kita sa tumoy ug motan-aw og balik gikan sa taas nga mga bukid. Ayaw pagpakawala sa paglaom. Kon kamo nanglimbasog ug naningkamot sa paghinulsol, kamo anaa sa proseso sa paghinulsol. …

Ang pagsalikway nagkinahanglan og panahon. Aron sa pagtabang kanato, ang Ginoo usahay motugot sa salin sa atong mga sayop sa pagpabilin sa atong hunahuna. Kini usa ka importante nga bahin sa atong mortal nga pagkat-on.

Samtang kita matinuoron nga mokompisal sa atong mga sala, mopahiuli kutob sa atong mahimo ngadto sa nasakitan, ug mosalikway sa atong mga sala pinaagi sa pagsunod sa mga sugo, kita anaa sa proseso sa pagdawat sa kapasayloan. (Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 42)

Dugang nga mga Kalihokan sa Pagkat-on

Alternatibo nga pagsugod

Daniha ang atensiyon sa mga estudyante ngadto sa usa ka butang, sama sa lamesa, nga dako ra kaayo aron malamposong ikatago sa lawak. Hangyoa ang mga estudyante sa pagpiyong sa ilang mga mata sulod sa 30 ka segundos samtang imong tagoon ang dako nga butang pinaagi sa pagbutang og gamay nga butang, sama sa usa ka libro o jacket, sa atubangan niini o sa ibabaw niini. Dapita ang mga estudyante sa pagbuka sa ilang mga mata ug sa pagtan-aw kon unsa ka dali nila makit-an ang dako nga butang.

Hangyoa ang mga estudyante sa pagpakigbahin kon sa unsang paagi kini mahimong may kalabotan sa unsay gisulayan ni Ziba Peterson sa pagtago gikan sa Dios sa Doktrina ug mga Pakigsaad 58:60.

Nganong ang mga tawo karon naningkamot gihapon sa pagtago sa ilang mga sala? Unsa ang mga paagi nga sila naningkamot sa pagtago niini? Unsa sa kataposan ang moresulta sa pagtago sa mga sala kay sa paghinulsol niini?

Kitang tanan nagkinahanglang og paghinulsol

Ang mosunod nga mga tudling makatabang sa mga estudyante nga makaamgo nga dili sila lahi sa uban o walay pagtuo tungod kay kinahanglan silang maghinulsol. Tabangi sila nga makasabot nga “ang paghinulsol nagpasabot sa pagbag-o, … sa pagpalambo ug pagdawat sa kapasayloan” (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 7). Bisan ang labing matinud-anon kinahanglan nga mausab kon sila nagtinguha nga mahimong mas mahisama kang Jesukristo. Dapita ang mga estudyante sa pagbasa sa mosunod nga mga tudling sa Doktrina ug mga Pakigsaad, mangita sa komon nga mensahe sa Manluluwas alang niining tulo ka matinud-anong mga disipulo.

• 58:14–15: Edward Partridge, ang unang bishop sa Simbahan

• 58:38–39: Martin Harris, usa sa Tulo ka mga Saksi sa Basahon ni Mormon

• 58:40–41: William W. Phelps, usa ka lider sa Simbahan ug tig-imprinta sa Missouri

• Unsa ang komon nga pagdapit ang gibuhat sa Manluluwas alang kanila?

• Ngano kaha sa imong hunahuna nga gidapit man ni Jesus bisan ang matinud-anong mga lider sa Iyang Simbahan sa paghinulsol?