Leksiyon 69: Doktrina ug mga Pakigsaad 51–57

Doktrina ug mga Pakigsaad 57

Giunsa Pagtukod sa Ginoo ang Zion

Samtang ang Ginoo mipadayag og dugang mahitungod sa Zion ngadto ni Propeta Joseph Smith, ang mga Santos mibati og pagkamatinguhaon ug paghinamhinam nga mahimong kabahin sa maong komunidad. Sa higayon nga kini gipadayag diin ang Zion pagatukoron, ang Ginoo mimando sa pipila ka piho mga indibidwal sa pagsugod sa pagtukod sa komunidad. Kini nga leksiyon gituyo aron matabangan ang mga estudyante nga mobati og mas dakong tinguha nga mahimong katawhan sa Ginoo pinaagi sa pagtukod sa Zion.

Mga Posibleng Kalihokan sa Pagkat-on

Zion

Ikonsiderar ang pagpakita og usa ka hulagway sa Manluluwas.

Paghanduraw nga ikaw adunay kahigayonan sa pagpuyo duol kang Jesukristo.

• Unsa nga mga kinaiya ang anaa Kaniya nga mohimo niini nga malipayon ang pagpuyo duol Kaniya?

Karon hunahunaa kon unsa kaha ang bation sa pagpuyo diha sa usa ka komunidad nga puno sa mga tawo kinsa naningkamot sa pagsunod sa mga pagtulon-an ug ehemplo ni Jesukristo. Usa ka panig-ingnan sa maong komunidad nahitabo sa panahon sa Daang Tugon uban sa mga katawhan ni Enoch.

Ikonsiderar ang pagpakita og hulagway ni Enoch ug sa iyang mga katawhan ug pangutan-a ang mga estudyante kon unsay ilang nahibaloan mahitungod niini nga asoy diha sa mga kasulatan.

Basaha ang​Moises 7:18, mangita sa mga kinaiya niini nga mga tawo.

• Unsa nga mga problema ang atong giatubang karon nga masulbad o maminosan sa ingon niana nga komunidad?

• Unsa sa imong hunahuna ang gibuhat niining mga tawhana aron makaabot niini nga punto?

Paggahin og panahon sa paghunahuna kon sa unsang paagi nga ang pagpuyo sa mas Kristohanong paagi sama sa mga katawhan sa Zion makapanalangin sa imong kinabuhi. Sa imong pagtuon karon, pangita og mga pagtulon-an nga makatabang kanimo nga mas makasabot kon unsay imong mahimo aron makatabang sa pagtukod sa Zion sa imong palibot.

Ang siyudad sa Zion

Aron matabangan ang mga estudyante sa pagsabot sa kinatibuk-ang kahulugan sa mga bersikulo nga ilang tun-an karon, basaha o ipamubo ang mosunod nga impormasyon. Mahimo usab nimo nga basahon ang Mga Santos, 1:134–36.

Wala madugay human sa pagtukod sa Simbahan, daghan sa mga Santos naghinamhinam mahitungod sa pagtukod og usa ka komunidad sa Zion sama sa mga katawhan ni Enoch. Ang Ginoo misaad nga adunay usa ka dakbayan sa Zion nga matukod sa kataposan nga mga adlaw (tan-awa sa Doktrina ug mga Pakigsaad 45:65–71; Moises 7:62).

Niadtong Hunyo 1831, ang Ginoo misugo ni Joseph Smith ug sa usa ka grupo sa mga elder nga mobiyahe og mga 800 ka milya (1,287 km) gikan sa Ohio ngadto sa Missouri, diin sila mopahigayon og komperensiya ug magkat-on mahitungod sa yuta sa ilang kabilin (tan-awa sa Doktrina ug mga Pakigsaad 52:1–2, 5). Ang pagpadayag nga narekord diha sa Doktrina ug mga Pakigsaad 57​nadawat sa pag-abot ni Joseph Smith ug sa mga elders sa Missouri niadtong Hulyo 1831.

Basaha ang Doktrina ug mga Pakigsaad 57:1–3 aron makita unsa ang nakat-onan sa mga Santos.

• Asa ang gipakita sa Ginoo nga ang siyudad sa Zion pagatukoron?

• Unsa ang natabang sa bersikulo 3 kanimo sa pagsabot mahitungod sa kamahinungdanon sa templo ngadto sa Ginoo?

Ang mga estudyante mahimong adunay mga pangutana mahitungod sa mga pagtulun-an sa Manluluwas diha sa mga bersikulo 1–3. Mahimong makatabang ang pagpasabot nga ang mga paningkamot sa mga Santos niadtong mga 1830 sa pagtukod og usa ka dakbayan sa Zion sa Independence, Missouri, wala molampos tungod sa pagbiay-biay. Niadtong 1838, ang mga Santos giabog gikan sa Missouri sa ilang mga kaaway.

Bisan og ang Ginoo misaad nga adunay umaabot nga siyudad sa Zion nga matukod diha sa kontinente sa Amerika (tan-awa sa Mga Artikulo sa Hugot nga Pagtuo 1:10), karon kita gitambagan sa pagtukod sa Zion bisan asa kita nagpuyo pinaagi sa pagpaningkamot sa pagpuyo nga matarong ug sa pagtukod sa Simbahan sa tibuok kalibotan (tan-awa sa “Zion,” Topics and Questions, topics.ChurchofJesusChrist.org).

Ang pagtukod sa siyudad sa Zion

Diha sa pagpadayag nga narekord sa Doktrina ug mga Pakigsaad 57, ang Ginoo mihatag og mga direksiyon ngadto sa pipila ka mga indibidwal sa pagsugod sa pagtukod sa Zion.

Usa ka paagi nga mahimo nimong matabangan ang mga estudyante nga makakat-on gikan sa mosunod nga mga bersikulo mao ang pagbutang kanila ngadto sa mga grupo nga tag-upat ug sa pagbahin sa mga bersikulo tali sa mga sakop sa grupo (mga bersikulo 6–7, 8–10, 11–12, 13–14). Ang matag miyembro sa grupo mahimong moila sa indibidwal o mga indibidwal nga gitumong ug unsay gihangyo kanila nga buhaton. Mahimo dayon nga ipakigbahin sa mga estudyante ang ilang mga nadiskobrehan sa ilang mga miyembro sa grupo.

Basaha ang Doktrina ug mga Pakigsaad 57:6–14, mangita sa unsay gisugo sa Ginoo nga buhaton sa matag usa kanila.

• Sa imong hunahuna ngano kaha ang Ginoo mihangyo sa nagkalain-laing mga tawo sa pagbuhat og lain-laing mga buluhaton?

• Unsa ang gitudlo niini kanato mahitungod sa paagi nga ang Ginoo nagtukod sa Zion, sa Iyang gingharian, dinhi sa yuta?

  Tabangi ang mga estudyante nga mahibalo niini nga baroganan: Ang Manluluwas nagtukod sa Zion pinaagi sa paggamit sa atong indibidwal nga mga abilidad.

  Ipasabot nga kini nga mga tawo mitrabaho ug mituman sa unsay gisugo sa Ginoo nga ipabuhat kanila. Nagsakripisyo pag-ayo, ilang “[gipahiluna]” (tan-awa sa Doktrina ug mga Pakigsaad 57:8, 11, 14, 15) ang ilang mga kaugalingon sa Missouri, usa ka dapit nga walay daghang mga kahupayan sa unsa kaniadto ang kasadpang utlanan sa Estados Unidos sa Amerika.

• Sa unsang paagi kini makatabang kanato nga makasabot nga ang Manluluwas nagtukod sa Iyang gingharian niini nga paagi?

Ang Ginoo lagmit dili mohatag kanimo sa sama nga mga buluhaton sa pagtukod sa Zion sama sa mga indibidwal nga gihisgotan niini nga mga bersikulo. Apan, mihangyo Siya kanato nga motukod sa Zion karon. Pinaagi sa Iyang mga propeta, Iya kitang gidasig sa pagtukod sa Zion bisan asa kita nagpuyo (tan-awa sa D. Todd Christofferson, “Dali na diri sa Zion,” Liahona, Nob. 2008, 37).

• Unsa ang pipila ka mga paagi nga imong maestablisar ang Zion sa imong palibot karon?

Mahimo nimong dapiton ang mga estudyante sa paghunahuna og piho nga mga aspeto sa ilang mga kinabuhi diin sila makatukod og Zion, sama sa panimalay, sa ilang ward o branch, sa eskwelahan, o sa ilang ubang mga interaksiyon.

Isip kabahin niini nga panaghisgot, ikonsiderar ang paggamit sa usa o sa duha sa mosunod nga mga ehemplo. Dapita ang mga estudyante sa paghunahuna mahitungod sa unsa nga paagi kini nga mga ehemplo makatabang kanila nga mas makasabot kon unsaon nila sa pagtukod ang Zion sa ilang palibot.

Tan-awa ang “Mata aron sa Pagtan-aw” gikan sa time code 4:54 hangtod sa 6:54 ug “Ang mga Panginahanglan nga atong Giatubang” gikan sa time code 6:03 hangtod sa 8:10. Ang duha niini nga mga bidyo anaa sa ChurchofJesusChrist.org.

Mata aron sa Pagtan-aw

Si Sister Craig nagtudlo nga uban sa tabang sa Espiritu Santo kita makakat-on sa pagtan-aw sa uban ug sa pagtan-aw sa atong kaugalingon sama sa pagtan-aw sa Manluluwas.

Ang mga Panginahanglan nga atong Giatubang

Si Sister Oscarson nagtudlo kanato sa pagserbisyo niadtong duol kanato: ang atong mga pamilya, mga higala, mga miyembro sa ward ug komunidad. Ang lintunganay sa pagpuyo sa ebanghelyo mao ang pagserbisyo.

Pagtukod sa Zion sa imong palibot

Ikonsiderar ang pagdapit sa mga estudyante sa pagpakigbahin sa mga kasinatian nga ilang nasinati o nahibaloan diin sila o ang uban mitabang sa pagtukod sa Zion. Dapita sila sa pagpakigbahin sa mga panalangin nga ilang nasinati tungod niini nga mga paningkamot.

Tabangi ang mga tigkat-on nga tuyoong maningkamot nga mahimong mas mahisama ni Jesukristo: Samtang ang mga estudyante mopakigbahin niini nga mga kasinatian, mahimo silang makabantay og mga paagi nga sila o ang uban mas mahisama ni Kristo. Alang sa dugang nga pagpraktis kon unsaon nimo sa paghisgot ang mga paagi nga sila nagkahimong mas sama kang Kristo, tan-awa ang pagbansay nga “Pag-obserbar sa mga hiyas nga sama ni Kristo diha sa mga estudyante ug pagpakigbahin sa unsay imong namatikdan sa mga paagi nga nagdasig kanila nga magpadayon nga mahisama Kaniya,” makita sa Pagpalambo sa mga Kahanas sa Magtutudlo: Magpunting kang Jesukristo nga pagbansay.

Dayon dapita ang mga estudyante sa pagtubag sa usa o sa duha sa mosunod nga mga pangutana diha sa ilang mga journal sa pagtuon.

• Unsa ang imong nakat-onan o gibati mahitungod sa Langitnong Amahan ug ni Jesukristo pinaagi sa imong mga pagtuon karon?

• Unsa ang imong gibati nga naaghat nga buhaton tungod sa imong natun-an?

Kon dili kaayo personal, dapita ang pipila ka estudyante sa pagpakigbahin sa ilang mga hunahuna. Pagpamatuod sa mga kamatuoran nga imong nahisgotan, ug dapita ang mga estudyante sa pagbuhat sa bisan unsa nga mga pag-aghat nga ilang nabatonan pinaagi sa Espiritu Santo sa pagtukod sa Zion.

Dugang nga mga Kapanguhaan

Unsa ka importante ang pagtukod sa Zion?

Si Propeta Joseph Smith (1805–44) mitudlo:

Maoy atong tinguha nga matukod ang Zion isip atong pinakamahinungdanon nga katuyoan (Mga Pagtulun-an sa mga Presidente sa Simbahan: Joseph Smith [2007], 221).

Unsay ipasabot niini nga ang Independence, Missouri, mao ang sentro nga dapit?

Sa dihang gitudlo sa Ginoo ang Jackson County, Missouri isip ang dapit diin ang siyudad sa Zion pagatukuron, Iyang gipaila nga ang siyudad sa Independence mao “ang tunga-tunga nga dapit” (Doktrina ug mga Pakigsaad 57:3). Ang pagkahimong sentro nga dapit nagpasabot sa tahas nga ang Zion, o ang Bag-ong Jerusalem, mahimong usa sa duha ka mga kapital (ang lain mao ang Jerusalem) sa gingharian sa Ginoo sa panahon sa Milenyum (tan-awa sa Joseph Fielding Smith, Doctrines of Salvation, comp. Bruce R. McConkie [1955], 3:71). Gikan niini nga lokasyon ang Ginoo Mismo modumala sa kalihokan ug mga proseso sa Iyang gingharian.

Sa unsang pamaagi nato mahibaloan unsaon pagtabang sa uban ug pagtukod sa Zion?

Si Sister Michelle D. Craig, kanhi sa Kinatibuk-ang Kapangulohan sa Young Women, mitudlo:

Ako mosaksi nga si Jesukristo nahigugma kanato ug makahatag nato og mga mata nga makakita—bisan​kon kini lisod, bisan​kon kita gikapoy, bisan​kon kita nagmasulub-on, ug bisan kon ang mga sangpotanan dili mao ang atong gilaoman. Pinaagi sa Iyang grasya, Siya mopanalangin kanato ug modugang sa atong kapasidad. Pinaagi sa gahom sa Espiritu Santo, si Kristo makapahimo nato nga makatan-aw​sa atong kaugalingon ug makatan-aw sa uban sama sa Iyang pagtan-aw. Uban sa Iyang tabang, kita makahibalo unsay labing gikinahanglan. Kita makasugod nga makakita sa impluwensiya sa Ginoo nga naglihok ug pinaagi sa ordinaryo nga mga detalye sa atong kinabuhi—kita makakita sa kinasingkasing. (Michelle D. Craig, “Mata aron sa Pagtan-aw,” Liahona, Nob. 2020, 17)

Ang mosunod nga bidyo nagpasiugda og ehemplo nga gipakigbahin ni Sister Craig mahitungod sa pagbaton og mga mata aron makita ang mga panginahanglan sa uban.

Pray for Eyes to See as He Sees

Michelle D. Craig of the Young Women General Presidency shares how to see things more deeply, as Jesus Christ does. “Pray for eyes to see,” she counsels. “His grace will increase our capacity.”

Dugang nga mga Kalihokan sa Pagkat-on

Ipahimutang [planted]

Kon adunay panahon nga nahibilin sa klase, mahimo nimong hisgotan ngadto sa mga estudyante ang laing pagtulun-an nga gihatag ngadto sa moadto sa Zion. Mahimo nimong ipakita ang usa ka hulagway sa usa ka tanom o pagdala og usa ug dapita ang mga estudyante sa pagpangita sa hugpong sa mga pulong nga nahiuyon sa hulagway diha sa Doktrina ug mga Pakigsaad 57:8, 11, 14, 15. Mahimo nimong dapiton ang mga estudyante sa pagpakigbahin kon unsa sa ilang hunahuna ang gipasabot sa pagtanom sumala sa paghulagway niini nga mga bersikulo. Ikonsiderar ang pagtan-aw sa mga estudyante diha sa Doktrina ug mga Pakigsaad 51:17​alang sa usa ka kahulugan sa pagtanom. Mahimo nimong ipangutana ang mga mosunod:

• Sa unsang paagi nga ang “pagtanom [pagpahimutang]” magamit ngadto sa usa ka batan-on karon? Sa unsang mga paagi nga ang usa ka batan-on “molihok [ingon og sulod] sa katuigan”?

• Sa imong hunahuna sa unsang paagi ang pagtanom sa imong kaugalingon makatabang kanimo nga mahimong mas maayo nga disipulo ni Jesukristo?

• Ngano kaha nga ang usa ka tawo mobati nga natintal nga dili mopahimutang sa iyang kaugalingon sa usa ka ward o sa usa ka grupo sa kabatan-onan?

Pagtukod sa Zion bisan asa ka nagpuyo

Ikonsiderar ang pagpakita sa mosunod nga bidyo ni Elder D. Todd Christofferson sa Korum sa Napulog Duha ka Apostoles ug dapita ang mga estudyante sa pagpangita sa tulo ka paagi nga siya miingon nga mahimo natong maestablisar ang Zion sa atong lokal nga mga kongregasyon.

Establishing Zion

We need to adopt the character, attributes, and faithfulness of those who lived in Zion if we are to establish Zion in our homes, branches, wards, and stakes.

Human sa bidyo, mahimo nimong dapiton ang mga estudyante sa paglista sa unsay ilang nakaplagan ug maghimo og praktikal nga mga paagi nga ang matag usa sa tulo ka mga punto mahimong matuman sa usa ka ward, branch, o grupo sa kabatan-onan. Mahimo nimong pangutan-on ang mga estudyante kon nganong dili kita makahulat nga moanhi kanato ang Zion.

Ang ehemplo sa mga Santos sa Colesville

Mahimo nimong hisgotan kon sa unsang paagi giuna sa mga Santos sa Colesville ang pagtukod sa Zion nga labaw sa ilang kaugalingong mga kahupayan. Ikonsiderar ang paggamit sa mga pagpili gikan sa kapitulo 12 sa Mga Santos, vol. 1 o paggamit sa mosunod nga pagpamubo.

Ang mga miyembro sa Colesville nga branch mibiya sa ilang mga balay sa New York aron magpundok ngadto sa Ohio. Sila nagpuyo lamang didto sa mubo nga panahon sa wala pa si Leman Copley mibalik sa iyang kasabotan sa pagtugot sa mga Santos sa pagpuyo sa iyang yuta. Gisugo dayon ang mga Santos sa Colesville sa paghimo sa 800 ka milya nga panaw sa pagpundok ngadto sa Zion didto sa Missouri.

Ikonsiderar ang pagpakigbahin sa mosunod nga asoy ni Newel Knight, usa sa mga Santos sa Colesville:

“Misakay [kami] sa [usa ka bapor] … padulong sa Independence. Lisod kaayo ang panglawas sa akong inahan ug ingon na kini niini sulod sa dugay-dugay na nga panahon. Apan dili siya mosugot nga mohunong sa pagbiyahe; ang iyang bugtong o labing dakong tinguha mao ang makatunob sa yuta sa Zion ug malubong ang iyang lawas niana nga yuta. Miadto ko sa baybayon ug mipalit og mga kahoy aron himoong lungon sa higayon nga siya mamatay sa dili pa kami moabut sa among destinasyon, paspas kaayo siya nga naluya” (Newel Knight, Newel Knight autobiography and journal, circa 1846–1847, Church History Library, Salt Lake City).

• Ngano kaha nga kining mga Santos andam nga mohatag og dako aron mahimong kabahin sa Zion?