« មេរៀនទី ៦៨—គោលលទ្ធិ និងសេចក្តីសញ្ញា ៥១ ៖ ‹ អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ › » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ៥១ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
មេរៀនទី ៦៨ ៖ គោលលទ្ធិ និងសេចក្តីសញ្ញា ៥១–៥៧
គោលលទ្ធិ និងសេចក្តីសញ្ញា ៥១
« អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ »
នៅនិទាឃរដូវនាឆ្នាំ ១៨៣១ យ៉ូសែប ស៊្មីធ បានទទួលវិវរណៈមួយ ។ ព្រះអម្ចាស់បានណែនាំសមាជិកនៃសាខាខូលស្វិល រដ្ឋញូវយ៉ក ឲ្យតាំងទីលំនៅតំបន់ថមសុន រដ្ឋអូហៃអូ និងដើម្បីបំពេញកាន់កាប់ត្រួតត្រារបស់ពួកគេដោយការរស់នៅតាមក្រឹត្យវិន័យនៃការឧទ្ទិសថ្វាយ ។ មេរៀននេះអាចជួយសិស្សឲ្យយល់អំពីរបៀបដែលពួកគេអាចធ្វើតាមការទូន្មានរបស់ព្រះអម្ចាស់ ដើម្បីធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ។
សកម្មភាពរៀនសូត្រដែលអាចមាន
ការទទួលខុសត្រូវនៃការកាន់កាប់ត្រួតត្រា
ដើម្បីជួយរៀបចំសិស្សឲ្យរៀនអំពីការកាន់កាប់ត្រួតត្រា សូមពិចារណាធ្វើសកម្មភាពមួយចំនួនដូចខាងក្រោម ។
សូមស្រមៃថា ឪពុក ឬម្តាយម្នាក់បានសុំកូនប្រុស ឬកូនស្រីរបស់គាត់ឲ្យមើលប្អូនប៉ុន្មានម៉ោង ខណៈឪពុក ឬម្តាយមិននៅ ។
-
ហេតុអ្វីបានជាឪពុក ឬម្ដាយដែលពេញដោយក្ដីស្រឡាញ់ចង់ឲ្យកូនច្បងទទួលទំនួលខុសត្រូវនេះ ?
-
តើអ្នកគិតថាឪពុក ឬម្ដាយរំពឹងអ្វីខ្លះក្នុងស្ថានភាពនេះ ?
សូមពន្យល់ថា ព្រះវរបិតាសួគ៌ និងព្រះយេស៊ូវគ្រីស្ទក៏បានប្រគល់ការទទួលខុសត្រូវជាច្រើនដល់យើងក្នុងជីវិតរបស់យើងផងដែរ ។ ការទទួលខុសត្រូវទាំងនេះក៏អាចហៅថា ការកាន់កាប់ត្រួតត្រាផងដែរ ។
ប៊ីស្សព ហ្គែរ៉ល កូសសេ នៃគណៈប៊ីស្សពជាអធិបតី បានចែកចាយអត្ថន័យនៃពាក្យ ការកាន់កាប់ត្រួតត្រា ។
នៅក្នុងវាក្យសព្ទនៃដំណឹងល្អ ពាក្យ ការកាន់កាប់ត្រួតត្រា បានកំណត់នូវការទទួលខុសត្រូវខាងវិញ្ញាណ ឬខាងសាច់ឈាមដ៏ពិសិដ្ឋ ដើម្បីថែរក្សាអ្វីមួយដែលជាកម្មសិទ្ធិរបស់ព្រះ ដែលយើងមានទំនួលខុសត្រូវ ។ ( ហ្គែរ៉ល កូសសេ « ការកាន់កាប់ត្រួតត្រានៅលើផែនដីរបស់យើង » លីអាហូណា ខែ វិច្ឆិកា ឆ្នាំ ២០២២ ទំព័រ ៥៧ )
-
តើគំរូអ្វីខ្លះនៃការកាន់កាប់ត្រួតត្រាដែលព្រះប្រទានដល់យើងក្នុងជីវិតរបស់យើង ?
សូមសរសេរចម្លើយរបស់សិស្សចំពោះសំណួរមុននៅលើក្ដារខៀន ឬអ្នកអាចអញ្ជើញពួកគេឲ្យឡើងមកមុខក្ដារខៀន ហើយសរសេរចម្លើយរបស់ពួកគេ ។
ប្រសិនបើចាំបាច់ អ្នកអាចប្រើអ្វីដែលមានខាងក្រោមជាឧទាហរណ៍ ៖ ផ្នែកនៃភពផែនដីដែលយើងរស់នៅ ក្រុមគ្រួសាររបស់យើង ការហៅបម្រើ ឬការចាត់តាំងនៅក្នុងសាសនាចក្រ ទ្រព្យសម្បត្តិ និងការកាន់កាប់របស់យើង រូបកាយរបស់យើង ពេលវេលារបស់យើង ។
បន្ទាប់ពីបានរកឃើញគំរូទាំងនេះហើយ សូមអញ្ជើញសិស្សឲ្យពិចារណាអំពីការកាន់កាប់ត្រួតត្រាដែលពួកគេមានក្នុងជីវិតរបស់ពួកគេ ដោយការចែកចាយដូចខាងក្រោម ៖
នៅក្នុងសៀវភៅកំណត់ហេតុការសិក្សារបស់អ្នក សូមសរសេរនូវការកាន់កាប់ត្រួតត្រាមួយចំនួនដែលអ្នកមាន ឬអ្វីដែលព្រះអម្ចាស់បានប្រគល់ឲ្យអ្នក ។ នៅពេលអ្នកសិក្សាថ្ងៃនេះ សូមរកមើលសេចក្តីពិតដែលអាចជួយអ្នកឲ្យក្លាយជាអ្នកត្រួតត្រាដ៏ប្រសើរលើអ្វីៗដែលអ្នកបានសរសេរក្នុងបញ្ជីរបស់អ្នក ។
ការកាន់កាប់ត្រួតត្រានៃពួកបរិសុទ្ធសម័យដើម
ដើម្បីជួយសិស្សឲ្យយល់អំពីបរិបទនៃ គោលលទ្ធិ និងសេចក្តីសញ្ញា ៥១ សូមអាន ឬសង្ខេបកថាខណ្ឌដូចខាងក្រោម ។ អ្នកក៏អាចអញ្ជើញសិស្សម្នាក់ឲ្យអានវាដល់ថ្នាក់ផងដែរ ។
នៅនិទាឃរដូវឆ្នាំ ១៨៣១ ពួកបរិសុទ្ធជាច្រើនបានចាប់ផ្តើមមកដល់រដ្ឋអូហៃអូ បន្ទាប់ពីបានធ្វើចំណាកស្រុកពីភាគខាងកើតសហរដ្ឋអាមេរិក ។ ក្រុមមួយបានចេញមកពី ខូលស្វិល រដ្ឋញូវយ៉ក ដោយមានការលះបង់យ៉ាងខ្លាំង ។ ក្រុមនេះត្រូវបានណែនាំឲ្យបោះទីតាំងនៅ ថមសុន រដ្ឋអូហៃអូ ហើយរស់នៅតាមក្រឹត្យវិន័យនៃការថ្វាយ ។ វិវរណៈដែលបានកត់ត្រានៅក្នុង គោលលទ្ធិ និងសេចក្តីសញ្ញា ៥១ មាននូវសេចក្តីណែនាំរបស់ព្រះអម្ចាស់ទៅកាន់ពួកបរិសុទ្ធ ។
សូមអញ្ជើញសិស្សឲ្យចម្លងតារាងដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ និងដើម្បីបំពេញវានៅពេលពួកគេសិក្សា គោលលទ្ធិ និងសេចក្តីសញ្ញា ៥១ ។
|
ការទទួលខុសត្រូវរបស់ប៊ីស្សព ប៉ាទ្រិច |
ការទទួលខុសត្រូវរបស់ពួកបរិសុទ្ធ |
|---|---|
សូមអាន គោលលទ្ធិ និងសេចក្តីសញ្ញា ៥១:១–៤ ដោយរកមើលអ្វីដែលព្រះអម្ចាស់បានបង្រៀនដល់ប៊ីស្សព អែតវឺត ប៉ាទ្រិច អំពីទំនួលខុសត្រូវរបស់លោក ។
-
តើទំនួលខុសត្រូវអ្វីខ្លះដែលព្រះអម្ចាស់បានប្រគល់ទៅឲ្យប៊ីស្សព ប៉ាទ្រិច ?
នៅពេលសិស្សឆ្លើយ វាអាចមានអត្ថប្រយោជន៍ដើម្បីលើកឡើងថា « [ ការ ] ប្រគល់ចំណែកដល់ប្រជារាស្ត្រនេះរៀងៗខ្លួន » ( គោលលទ្ធិ និងសេចក្តីសញ្ញា ៥១:៣ ) សំដៅទៅលើទ្រព្យសម្បត្តិ និងទំនិញដែលពួកបរិសុទ្ធនឹងទទួលជាផ្នែកនៃច្បាប់នៃការឧទ្ទិសថ្វាយ។ មុននឹងបន្ត វាអាចមានប្រយោជន៍ក្នុងការអញ្ជើញសិស្សឲ្យចែកចាយនូវអ្វីដែលពួកគេដឹង ឬចងចាំអំពីក្រឹត្យវិន័យនៃការឧទ្ទិសថ្វាយ ។
ប្រសិនបើចាំបាច់ សូមពន្យល់ថា ដោយជាផ្នែកនៃក្រឹត្យវិន័យនៃការឧទ្ទិសថ្វាយ នោះពួកបរិសុទ្ធនឹងលះបង់ទ្រព្យសម្បត្ដិ និងរបស់របសពួកគេថ្វាយដល់ព្រះអម្ចាស់ ។ បន្ទាប់មកតាមរយៈប៊ីស្សព ពួកគេនឹងទទួលបានទ្រព្យសម្បត្តិ និងទំនិញជាការកាន់កាប់ត្រួតត្រាដើម្បីមើលថែ និងប្រើប្រាស់ ។ ពួកបរិសុទ្ធក៏នឹងបរិច្ចាគចំនួនលើសនៃអ្វីដែលពួកគេបានដាំ ចិញ្ចឹម ឬបានទទួលទៅកាន់ប៊ីស្សពដើម្បីផ្តល់ដល់ជនក្រីក្រ ។
សូមអាន គោលលទ្ធិ និងសេចក្តីសញ្ញា ៥១:៩, ១២–១៥, ១៩ ហើយបំពេញតារាងផ្នែកលើអ្វីដែលអ្នករកឃើញ ។
វាអាចមានអត្ថប្រយោជន៍សម្រាប់សិស្សដើម្បីដឹងថាឃ្លាំងដែលបានលើកឡើងនៅក្នុង ខទី ១៣ គឺជាកន្លែងដែលប៊ីស្សពនឹងទុកស្បៀងអាហារ និងគ្រឿងផ្គត់ផ្គង់សម្រាប់មើលថែជនក្រីក្រ និងអ្នកខ្វះខាត ។
-
តើដំបូន្មានអ្វីខ្លះចេញមកពីខគម្ពីរទាំងនេះដែលអាចជួយពួកបរិសុទ្ធឲ្យយកឈ្នះលើការលំបាក ដែលពួកគេជួបប្រទះក្នុងការរស់នៅតាមក្រឹត្យវិន័យនៃការឧទ្ទិសថ្វាយ ?
-
តើព្រះពរជ័យអ្វីដែលព្រះអម្ចាស់បានសន្យានៅក្នុង ខទី ១៩ ដល់អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ?
សូមអញ្ជើញសិស្សឲ្យស្វែងរកការពិតមួយដែលអនុវត្តចំពោះការកាន់កាប់ត្រួតត្រារបស់ពួកគេ ដោយផ្អែកលើការបង្រៀនរបស់ព្រះអម្ចាស់នៅក្នុង ខទី ១៩ ។ ពួកគេអាចស្វែងរកអ្វីមួយដូចជាតទៅនេះ ៖ នៅពេលយើងធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ នោះយើងអាចដកពិសោធន៍នៃអំណររបស់ព្រះអម្ចាស់ ហើយទទួលបានអំណោយទាននៃជីវិតដ៏នៅអស់កល្បជានិច្ច ។
ប្រសិនបើមានប្រយោជន៍ សូមពិចារណាអញ្ជើញសិស្សឲ្យចំណាយពេលបន្តិចដើម្បីឲ្យនិយមន័យពាក្យដូចតទៅនេះ ៖ ស្មោះត្រង់, យុត្តិធម៌ ឬ ឈ្លាសវៃ ។ សិស្សអាចចែកចាយការយល់ដឹងរបស់ពួកគេ ដោយប្រើសេចក្តីណែនាំដល់បទគម្ពីរទាំងឡាយ ឬប្រើវចនានុក្រម ។
-
តើអ្វីខ្លះអាចជាគំរូនៃអំណរដែលយើងអាចនឹងទទួលអារម្មណ៍ ឬពរជ័យដែលយើងអាចនឹងទទួលបាន នៅពេលយើងមានភាពស្មោះត្រង់ក្នុងការកាន់កាប់ត្រួតត្រារបស់យើង ?
ឧទាហរណ៍នៃអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ
សកម្មភាពខាងក្រោមអាចជួយសិស្សឲ្យយល់កាន់តែច្បាស់អំពីអត្ថន័យនៃការធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ។ សូមពិចារណាពីការបង្ហាញសកម្មភាព និងការបែងចែកសិស្សជាក្រុមតូចៗ ដើម្បីបំពេញវាជាមួយគ្នា ។ ប្រសិនបើសកម្មភាពនេះត្រូវបានធ្វើជាក្រុម សូមប្រាកដថាបានចាត់តាំងឲ្យមានអ្នកដឹកនាំការពិភាក្សាសម្រាប់ក្រុមនីមួយៗ ។
សកម្មភាព ក ៖ គំរូរបស់ព្រះអង្គសង្គ្រោះ
ព្រះអង្គសង្គ្រោះគឺជាគំរូដ៏ល្អឥតខ្ចោះនៃការធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ។
សូមស្វែងរកគំរូមួយនៅក្នុងព្រះគម្ពីរអំពីព្រះយេស៊ូវគ្រីស្ទ បំពេញទំនួលខុសត្រូវមួយរបស់ទ្រង់ក្នុងការមើលថែ និងជួយយើង ។ ឧទាហរណ៍នៃបទគម្ពីរទាំងឡាយដែលអ្នកអាចសិក្សា រួមមាន អេសេគាល ៣៤:១១–១៦; យ៉ូហាន ៦:៣៨–៣៩; ១៧:១–៤; នីហ្វៃទី៣ ១៧:៦–៩ និង គោលលទ្ធិ និងសេចក្តីសញ្ញា ១៩:១៦–១៩ ។
សូមជញ្ជឹងគិតអំពីរបៀបដែលព្រះអង្គសង្គ្រោះជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃលើអ្នក ។
-
តើការខិតខំរបស់ព្រះអង្គសង្គ្រោះបាននាំមកនូវអំណរ និងពរជ័យដល់អ្នកយ៉ាងដូចម្ដេច ?
-
តើគំរូរបស់ព្រះអង្គសង្គ្រោះអាចជំរុញអ្នកឲ្យក្លាយជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃដោយរបៀបណា ?
សកម្មភាព ខ ៖ ការកាន់កាប់ត្រួតត្រានៅសព្វថ្ងៃនេះ
យើងក៏ត្រូវបានអញ្ជើញឲ្យដើរតាមព្រះយេស៊ូវគ្រីស្ទ ដោយអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃផងដែរ ។
សូមជ្រើសរើសគំរូមួយចំនួននៃការកាន់កាប់ត្រួតត្រាដែលព្រះអម្ចាស់បានប្រទានដល់យើង ដែលរាយបញ្ជីនៅលើក្ដារខៀន ( ឬឧទាហរណ៍ផ្សេងទៀតដែលអ្នកនឹកឃើញ ) ។
សូមពិពណ៌នាអំពីអ្វីដែលនរណាម្នាក់អាចធ្វើបាន ដើម្បីធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃនៃកិច្ចការទាំងនេះ ។ អ្នកអាចដាក់បញ្ចូលឧទាហរណ៍ដែលអ្នកបានឃើញ ឬរបៀបដែលអ្នកបានព្យាយាមធ្វើជាអ្នកកាន់កាប់ត្រួតត្រាដ៏ល្អម្នាក់ ។
-
ហេតុអ្វីបានជាព្រះអម្ចាស់សព្វព្រះហឫទ័យចង់ឲ្យនរណាម្នាក់នៅសព្វថ្ងៃនេះ ខិតខំធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ?
-
តើការខិតខំរបស់ពួកគេអាចនាំមកនូវអំណរ និងពរជ័យយ៉ាងដូចម្ដេច ?
សូមអញ្ជើញសិស្សផ្សេងៗឲ្យចែកចាយនូវការយល់ដឹងដែលពួកគេមានមកពីការពិភាក្សានេះ ។ សូមអញ្ជើញសិស្សពីរបីនាក់ឲ្យចែកចាយបទគម្ពីរដែលពួកគេបានរកឃើញនៅក្នុងសកម្មភាព ក ដែលពួកគេបានរកឃើញថាមានតម្លៃ ឬមានអត្ថន័យជាពិសេស ។ អ្នកក៏អាចសុំឲ្យសិស្សចែកចាយនូវអ្វីដែលពួកគេបានរៀនពីមិត្តរួមថ្នាក់ដែលពួកគេបានធ្វើការជាមួយផងដែរ ។
អ្វីដែលអ្នកបានរៀន
ដើម្បីជួយសិស្សដំណើរការអ្វីដែលពួកគេបានរៀននៅក្នុងមេរៀននេះ សូមពិចារណាអញ្ជើញពួកគេឲ្យឆ្លើយសំណួរដូចតទៅនេះនៅក្នុងសៀវភៅកំណត់ហេតុការសិក្សារបស់ពួកគេ ។
-
អ្វីដែលអ្នកបានរៀននៅថ្ងៃនេះអំពីការកាន់កាប់ត្រួតត្រាដែលអ្នកចង់ចងចាំ ?
-
តើអ្នកអាចធ្វើអ្វីខ្លះដើម្បីធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃនៅចំណុចមួយនៃជីវិតរបស់អ្នក ?
សម្រាប់សំណួរទាំងពីរមុននេះ សូមអញ្ជើញសិស្សដែលស្ម័គ្រចិត្តពីរបីនាក់ឲ្យចែកចាយនូវអ្វីដែលពួកគេបានសរសេរ ។ សូមថ្លែងទីបន្ទាល់អំពីអំណរដែលបានមកដល់អ្នក នៅពេលអ្នកខិតខំបំពេញការកាន់កាប់ត្រួតត្រារបស់អ្នកពីព្រះអម្ចាស់ ។