Դաս 70. Վարդապետություն և Ուխտեր 51–57

Վարդապետության սերտման գործնական պարապմունք 4

Կիրառել հոգևոր գիտելիքներ ձեռք բերելու սկզբունքները

Վարդապետության սերտումը կօգնի ուսանողներին կառուցել իրենց կյանքի հիմքը Հիսուս Քրիստոսի և Նրա ավետարանի վրա: Այս դասն ուսանողներին հնարավորություն կտա զարգացնել վարդապետության սերտման հատվածների և դրանցում ուսուցանվող վարդապետության սերտման հմտությունը։ Ուսանողները նաև կսովորեն և կկիրառեն հոգևոր գիտելիքներ ձեռք բերելու աստվածային սկզբունքները:

Հնարավոր ուսումնական վարժություններ

Վարդապետության սերտման կրկնություն․ Կիրառել

Կարող եք օգտագործել հետևյալ հարցերը, որպեսզի օգնեք ուսանողներին սովորել, թե ինչպես կիրառել վարդապետության սերտման հատվածների ուսմունքները կյանքի իրական իրավիճակներում: Անհրաժեշտության դեպքում կարող եք կազմել հարցեր, որոնք վերաբերում են վարդապետության սերտման այն հատվածներին, որոնք ձեր ուսանողներն արդեն սովորել են:

Ուսանողներին առաջարկեք ընտրել մեկ հարց, որի վրա կցանկանային կենտրոնանալ:

• Եթե ես լավ մարդ եմ, կապ ունի՞, թե որ եկեղեցուն եմ միանում:

• Ինչպե՞ս կարող եմ իմանալ՝ արդյոք անձնական հայտնություն եմ ստանում։

• Ինչո՞ւ պետք է ավետարանով կիսվեմ իմ ընկերների և ընտանիքիս հետ:

• Ինչո՞ւ պետք է մասնակցեմ գերագույն համաժողովին:

• Ինչպե՞ս կարող եմ ամրապնդել իմ կապը Հիսուս Քրիստոսի հետ:

Ուսանողները կարող են ստորև ներկայացվող վարժությունները կատարել փոքր խմբերով կամ ամբողջ դասարանով:

Հմտություններից մեկը, որ մենք կարող ենք սովորել, այն է, թե ինչպես կիրառել սուրբ գրությունների հատվածները կյանքի իրական իրավիճակներում: Վերը նշված յուրաքանչյուր հարցի համար ընտրեք վարդապետության սերտման հատված, որը կարող է օգնել մարդուն լուծել իր խնդիրը։ Վարդապետության սերտման հատվածների և սուրբ գրությունների հիմնական արտահայտությունների ցանկը կարող եք տեսնել Վարդապետության սերտման հիմնարար փաստաթղթում (2023)։

Համոզվեք, որ ուսանողները հասկացել են, որ յուրաքանչյուր հարցին պատասխանելու համար օգտագործվում է վարդապետական սերտման մեկից ավելի հատվածներ:

Իրենց ընտրած սցենարներին վերաբերող վարդապետության սերտման հատվածներ գտնելու համար ուսանողներին բավարար ժամանակ տրամադրելուց հետո քննարկեք նրանց գտածը՝ տալով հետևյալ հարցերը.

• Ձեր կարծիքով, վարդապետության սերտման ո՞ր հատվածներն են վերաբերում այն սցենարին, որի վրա կենտրոնացել եք:

• Ինչպե՞ս կարող են վարդապետության սերտման այդ հատվածներն օգտակար լինել տվյալ սցենարի համար:

Խնդրեք մի քանի ուսանողի կիսվել իրենց ընտրած հատվածով և ասել, թե իրենց կարծիքով, այն ինչպես կարող է օգնել մարդուն տվյալ հարցում:

Պլանավորեք այս վարժության կատարման համար ծախսել ընդամենը 10–15 րոպե, որպեսզի դասի ընթացքում բավարար ժամանակ լինի վարդապետության սերտման գործնական պարապմունքի համար:

Այս ձեռնարկի հավելվածի նյութերում՝ «Վարդապետության սերտման կրկնության վարժություններ» բաժնում ներկայացված են լրացուցիչ գաղափարներ այն մասին, թե ինչպես օգնել ուսանողներին կիրառել վարդապետության սերտման հատվածները։

Սովորեք և կիրառեք հոգևոր գիտելիքներ ձեռք բերելու սկզբունքները

Դասի մնացած մասը կենտրոնացրեք այն նպատակի վրա, որ օգնեք ուսանողներին կիրառել հոգևոր գիտելիքներ ձեռք բերելու սկզբունքները կյանքի իրական իրավիճակներում: Նախքան ստորև ներկայացված սցենարը ստեղծելը օգտակար կլինի առաջարկել ուսանողներին կրկնել հոգևոր գիտելիքներ ձեռք բերելու սկզբունքները: Կրկնելու համար առաջարկվող վարժությունները ներառված են հավելվածի «Վարդապետության սերտման կրկնության վարժություններ» բաժնում: Սկզբունքների նկարագրությունները ներկայացված են «Ձեռք բերել հոգևոր գիտելիքներ» բաժնի 5–12-րդ պարբերություններում՝ Վարդապետության սերտման հիմնարար փաստաթղթում։

Ստեղծեք սցենար

Որպեսզի օգնեք ուսանողներին կիրառել հոգևոր գիտելիքներ ձեռք բերելու սկզբունքները, կարող եք դասի ժամանակ ստեղծել սցենար մի մարդու մասին, որը մտահոգություններ ունի ամուսնության կամ ընտանիք կազմելու վերաբերյալ:

Կարող եք ուսանողներին առաջարկել գրատախտակին թվարկել ամուսնության և ընտանիքի մասին իրենց լսած համոզմունքները: Ուսանողներին առաջարկեք այս ցանկից ընտրել որևէ կետ, որն ըստ իրենց կօգնի ստեղծել սցենարը: Ուսանողներին խնդրեք ընտրել անուն՝ սցենարում ներկայացված այն մարդու համար, որն ունի այս մտահոգությունը, և ավելացնել այնպիսի մանրամասներ, որ սցենարը համապատասխանի իրական կյանքի մի իրավիճակի, որին իրենք կամ որևէ մեկը կարող է հանդիպել:

Ստորև բերված է սցենարի օրինակ.

Տրոյի ծնողներն ամուսնալուծվել են, երբ նա երիտասարդ էր: Նա լավ հարաբերություններ ունի երկու ծնողների հետ, սակայն նրան թվում է, թե իր ծնողները կնախընտրեին, որ երբեք ամուսնցած չլինեին: Նա նաև բազմաթիվ տարաձայնությունների և մեծ սթրեսի ականատես է եղել։ Նա մտածում է՝ արժե՞ արդյոք ամուսնանալ։ Նա վստահ չէ, որ երբևէ կցանկանա ամուսնանալ:

Քննարկման կայաններ

Խնդիրների բացահայտումը և մտքերի փոխանակումը ուսանողների համար այն եղանակներից մեկն է, որով նրանք կարող են օգտագործել հոգևոր գիտելիքներ ձեռք բերելու սկզբունքները կիրառելու համար նախատեսված սցենարը։ Քննարկման հետևյալ հարցերը կարող են տեղադրվել դասասենյակում՝ քննարկման կայանների տեսքով: Կարող եք ուսանողներին բաժանել ավելի փոքր խմբերի՝ յուրաքանչյուր կայանի հարցերին անդրադառնալու համար:

Կայանում բավարար ժամանակ անցկացնելուց հետո կարող եք փոփոխել խմբերը, որպեսզի յուրաքանչյուր ուսանող փորձի կիրառել հոգևոր գիտելիքներ ձեռք բերելու երեք սկզբունքները: Օգտակար կլինի հարմարեցնել տրված քննարկման հարցերը՝ ըստ դասարանի ստեղծած սցենարի։

Կայան 1

Խնդիրներ․ Ո՞ր հեռանկարը կարող է փոխել ամուսնության և ընտանիքի վերաբերյալ այդ մարդու կարծիքը: Ձեր կարծիքով, այս իրավիճակում ինչո՞ւ է դժվար ունենալ հավերժության հեռանկար:

Օգնելու հնարավոր եղանակներ. Ի՞նչ կցանկանայիք, որ այդ մարդը հասկանար Երկնային Հոր փրկության ծրագրի մասին: Ինչպե՞ս կարող է հավերժության հեռանկարը լուծում տալ ձեր նշած խնդիրներին:

Կրկնեք պարբերություններ 8–10-ը Վարդապետության սերտման հիմնարար փաստաթղթի «Ձեռք բերել հոգևոր գիտելիքներ» բաժնում և գտեք ճշմարտության վերաբերյալ լրացուցիչ պնդումներ, որոնք կարող են օգտակար լինել:

Կայան 2

Խնդիրներ․ Որտե՞ղ կարող էր այդ մարդը հանդիպել այդ գաղափարներին: Այդ փիլիսոփայություններն ինչո՞ւ կարող են համոզիչ լինել:

Օգնելու հնարավոր եղանակներ. Ինչո՞ւ է կարևոր ամուսնության և ընտանիքի մասին տեղեկություններ փնտրելիս ապավինել աստվածայնորեն սահմանված աղբյուրներին: Գտեք մեկ կամ երկու սուրբ գրություն կամ մարգարեական խոսք, որոնք կարող են օգտակար լինել այս սցենարում:

Կրկնեք պարբերություններ 11–12-ը Վարդապետության սերտման հիմնական փաստաթղթի «Ձեռք բերել հոգևոր գիտելիքներ» բաժնում և գտեք ճշմարտության վերաբերյալ լրացուցիչ պնդումներ, որոնք կարող են օգտակար լինել:

Կայան 2-ի համար կարող եք ուսանողներին տրամադրել բացիկ կամ կպչուն թուղթ, որպեսզի դրա վրա գրեն իրենց գտած սուրբ գրությունը կամ մարգարեական մեջբերումը և տեղադրեն այն գրատախտակին: Երբ ուսանողներն անցնեն բոլոր երեք կայանները, կարող եք խնդրել մի քանի ուսանողի կիսվել, թե իրենց ընտրած սուրբ գրությունը կամ մարգարեական խոսքն ինչու կարող է օգնել տվյալ սցենարում ներկայացված մարդուն:

Եթե ուսանողները սուրբ գրության հղում գտնելու համար օգնության կարիք ունենան, կարող եք գրատախտակին գրել հետևյալ հատվածները՝ Ծննդոց 1.28, 2․24, Ա Կորնթացիս 11․11, Վարդապետություն և Ուխտեր 42.22–25, 49․15–17, 131․1–4։

Կայան 3

Խնդիրներ․ Ի՞նչը կարող է այդ մարդուն խոչընդոտել գործել հավատքով:

Օգնելու հնարավոր եղանակներ. Ի՞նչ կառաջարկեք այդ մարդուն անել՝ հավատքով գործելու համար: Ինչպե՞ս կարող են այդ գործողությունները մեծացնել այդ մարդու վստահությունը Հիսուս Քրիստոսի հանդեպ՝ այդ դժվարությունները հաղթահարելու համար։

Կրկնեք պարբերություններ 5–7-ը Վարդապետության սերտման հիմնական փաստաթղթի «Ձեռք բերել հոգևոր գիտելիքներ» բաժնում և գտեք ճշմարտության վերաբերյալ լրացուցիչ պնդումներ, որոնք կարող են օգտակար լինել:

Ինչ սովորեցիք

Հետևյալ հարցերը կարող են օգտագործվել քննարկում ծավալելու կամ օրագրում վարժություն կատարելու համար։

• Այսօրվա ձեր սովորածից ինչով կկիսվեիք այն մարդու հետ, որը հարցեր ունի ամուսնության և ընտանիքի մասին Երկնային Հոր վարդապետության վերաբերյալ:

• Ի՞նչ սովորեցիք հոգևոր գիտելիքներ ձեռք բերելու մասին, որը կարող է օգնել մարդուն պատասխանել ավետարանի հետ կապված հարցերին:

Դուք կարող եք հիշեցնել ուսանողներին, որ նորմալ է, երբ մարդն ավետարանի վերաբերյալ հարցեր ունի: Կարող եք կիսվել մտքերով՝ ցանկացած անձնական հարցի կամ մտահոգության համար հոգևոր գիտելիքներ ձեռք բերելու սկզբունքներն օգտագործելու զորության մասին:

Օժանդակ ուսումնական վարժություն

Այլընտրանքային սցենար՝ գործնական կիրառման համար

Ստորև բերված է այլընտրանքային սցենարի օրինակ.

• Ռոբն անհանգստացած է պատերազմի, բռնության և աղետի մասին լուրերով: Նա սկսել է կարծել, որ այս աշխարհն այն վայրը չէ, որտեղ ինքը կցանկանար ընտանիք կազմել։

Ուսանողներին առաջարկեք օգտագործել հոգևոր գիտելիքներ ձեռք բերելու սկզբունքները՝ Ռոբին օգնելու համար։ Հորդորեք նրանց օգտագործել այն, ինչ իրենք սովորում են Երկնային Հոր փրկության ծրագրում ամուսնության և ընտանիքի վարդապետության մասին: