Lesson 70: Doktrina at mga Tipan 51–57

Pagsasanay sa Doctrinal Mastery 4

Ipamuhay ang mga Alituntunin ng Pagtatamo ng Espirituwal na Kaalaman

Ang doctrinal mastery ay makatutulong sa mga estudyante na maitayo ang pundasyon ng kanilang buhay kay Jesucristo at sa Kanyang ebanghelyo. Ang lesson na ito ay magbibigay sa mga estudyante ng mga pagkakataong maunawaan at maisaulo ang mga passage at ang doktrinang itinuturo ng mga passage na ito. Matututuhan at maipamumuhay rin ng mga estudyante ang mga banal na alituntunin para sa pagtatamo ng espirituwal na kaalaman.

Mga Posibleng Aktibidad sa Pag-aaral

Pagrerebyu ng doctrinal mastery: Ipamuhay

Ang mga sumusunod na tanong ay magagamit upang matulungan ang mga estudyante na matutuhan kung paano ipamumuhay ang mga turo ng mga doctrinal mastery passage sa mga tunay na sitwasyon sa buhay. Kung kinakailangan, maaari kang gumawa ng mga tanong na nauugnay sa mga doctrinal mastery passage na natutuhan na ng iyong mga estudyante.

Sabihin sa mga estudyante na pumili ng isang tanong na gusto nilang pagtuunan.

• Kung mabuti akong tao, mahalaga ba kung anong simbahan ang sasapian ko?

• Paano ko malalaman kung tumatanggap na ako ng personal na paghahayag?

• Bakit ko dapat ibahagi ang ebanghelyo sa aking mga kaibigan at pamilya?

• Bakit ako dapat makibahagi sa pangkalahatang kumperensya?

• Paano ko mapapatibay ang aking ugnayan kay Jesucristo?

Maaaring gawin ng mga estudyante ang sumusunod na aktibidad sa maliliit na grupo o bilang isang klase.

Isa sa mga kasanayang matututuhan natin ay kung paano gamitin ang mga scripture passage sa mga sitwasyon sa tunay na buhay. Para sa bawat tanong sa itaas, pumili ng isang doctrinal mastery passage na maaaring makatulong sa isang tao sa kanyang alalahanin. Para sa listahan ng mga doctrinal mastery passage at mahahalagang parirala ng banal na kasulatan, tingnan sa Doctrinal Mastery Core Document (2023).

Tiyakin na nauunawaan ng mga estudyante na gumamit ng mahigit isang doctrinal mastery passage sa pagsagot sa bawat tanong.

Matapos magkaroon ang mga estudyante ng sapat na oras para matukoy ang mga doctrinal mastery passage na angkop sa pinili nilang mga sitwasyon, talakayin ang nalaman nila sa pamamagitan ng pagtatanong ng tulad ng mga sumusunod:

• Sa palagay mo, anong mga doctrinal mastery passage ang naaangkop sa sitwasyong pinagtuunan mo?

• Paano makatutulong ang mga doctrinal mastery passage na ito sa sitwasyong iyon?

Maaari mong hilingin sa ilang estudyante na ibahagi ang passage na pinili nila at kung paano sa palagay nila makatutulong ito sa isang tao na may ganoong tanong.

Planuhing maglaan ng hindi lalampas sa 10–15 minuto sa aktibidad na ito upang makapagbigay ng sapat na oras para sa pagsasanay sa pagsasabuhay ng doctrinal mastery kalaunan sa lesson.

Ang mga karagdagang ideya kung paano matutulungan ang mga estudyante na ipamuhay ang mga doctrinal mastery passage ay matatagpuan sa mga materyal sa ilalim ng “Mga Aktibidad sa Pagrerebyu ng Doctrinal Mastery” sa appendix.

Matutuhan at ipamuhay ang mga alituntunin ng pagtatamo ng espirituwal na kaalaman

Para sa natitirang bahagi ng lesson, pagtuunan ang pagtulong sa mga estudyante na magamit ang mga alituntunin ng pagtatamo ng espirituwal na kaalaman sa isang sitwasyon sa tunay na buhay. Bago gumawa ng sitwasyon sa ibaba, maaaring makatulong na iparebyu muna sa mga estudyante ang mga alituntunin ng pagtatamo ng espirituwal na kaalaman. Ang mga iminumungkahing aktibidad sa pagrerebyu ay kasama sa appendix sa ilalim ng “Mga Aktibidad sa Pagrerebyu ng Doctrinal Mastery.” Matatagpuan ang mga paglalarawan sa mga alituntunin sa mga talata 5–12 ng bahaging “Pagtatamo ng Espirituwal na Kaalaman” sa Doctrinal Mastery Core Document.

Gumawa ng sitwasyon

Upang matulungan ang mga estudyante na magamit ang mga alituntunin ng pagtatamo ng espirituwal na kaalaman, maaari kayong gumawa ng sitwasyon bilang isang klase tungkol sa isang taong may mga alalahanin tungkol sa kasal o pagsisimula ng pamilya.

Maaari mong anyayahan ang mga estudyante na ilista sa pisara ang mga paniniwalang maaaring narinig nila tungkol sa kasal at pamilya. Sabihin sa mga estudyante na pumili ng isang item mula sa listahang ito na sa palagay nila ay may kaugnayan para makatulong sa paggawa ng sitwasyon. Sabihin sa mga estudyante na pumili ng isang pangalan para sa tao sa sitwasyon na may ganitong alalahanin at magdagdag ng mga detalye hanggang sa ito ay maging parang tunay na buhay, at nauugnay na sitwasyong maaaring maranasan nila o ng isang taong kilala nila.

Ang sumusunod ay isang halimbawang sitwasyon:

Nagdiborsyo ang mga magulang ni Troy noong bata pa siya. Maganda ang ugnayan niya sa kanyang dalawang magulang, pero tila nadarama niya na pinagsisisihan ng mga magulang niya na nagpakasal sila. Nasaksihan din niya ang maraming pagtatalo at labis na stress. Iniisip niya kung sulit bang magpakasal. Hindi siya sigurado kung gusto niyang magpakasal.

Mga istasyon ng talakayan

Ang isang paraan para magamit ng mga estudyante ang sitwasyon para magsanay sa paggamit ng mga alituntunin ng pagtatamo ng espirituwal na kaalaman ay tukuyin ang mga hamon at mag-isip ng mga solusyon. Ang mga sumusunod na prompt sa talakayan ay maaaring ilagay sa iba’t ibang dako ng silid. Maaari mong hatiin ang mga estudyante sa mas maliliit na grupo para masagot ang mga tanong sa bawat istasyon.

Pagkatapos ng sapat na oras sa isang istasyon, maaari mong papuntahin ang mga grupo sa iba pang istasyon para magamit ng bawat estudyante ang tatlong alituntunin ng pagtatamo ng espirituwal na kaalaman. Batay sa sitwasyong ginawa ng klase, maaaring makatulong na iangkop ang mga ibinigay na tanong sa talakayan.

Istasyon 1

Ang mga hamon: Anong mga pananaw ang maaaring makaimpluwensya sa damdamin ng taong ito tungkol sa kasal at pamilya? Sa iyong palagay, bakit maaaring mahirap na makakita ng walang-hanggang pananaw sa sitwasyong ito?

Mga posibleng paraan para makatulong: Ano ang nais mong maunawaan ng taong ito tungkol sa plano ng kaligtasan ng Ama sa Langit? Paano matutugunan ng walang-hanggang pananaw ang mga hamong natukoy mo?

Rebyuhin ang mga talata 8–10 sa bahaging “Pagtatamo ng Espirituwal na Kaalaman” ng Doctrinal Mastery Core Document, at tukuyin ang mga karagdagang pahayag ng katotohanan na makatutulong.

Istasyon 2

Ang mga hamon: Saan maaaring narinig ng taong ito ang mga ideyang ito? Bakit kaya nakahihikayat ang mga pilosopiyang ito?

Mga posibleng paraan para makatulong: Bakit mahalagang umasa sa sources na itinalaga ng Diyos kapag naghahanap ng impormasyon tungkol sa kasal at pamilya? Maghanap ng isa o dalawang banal na kasulatan o mga pahayag ng mga propeta na maaaring makatulong sa sitwasyong ito.

Rebyuhin ang mga talata 11–12 sa bahaging “Pagtatamo ng Espirituwal na Kaalaman” ng Doctrinal Mastery Core Document, at tukuyin ang mga karagdagang pahayag ng katotohanan na makatutulong.

Para sa istasyon 2, maaari mong bigyan ang mga estudyante ng card o sticky note na susulatan ng banal na kasulatan o pahayag ng propeta na mahahanap nila at idikit ito sa pisara. Kapag nakaikot na ang mga estudyante sa lahat ng tatlong istasyon, maaari mong hilingin sa ilang estudyante na ibahagi kung bakit makatutulong sa tao sa sitwasyon ang banal na kasulatan o pahayag ng propeta na pinili nila.

Kung kailangan ng mga estudyante ng tulong sa paghahanap ng scripture reference, maaari kang maglista sa pisara ng mga passage tulad ng Genesis 1:28; 2:24; 1 Corinto 11:11; Doktrina at mga Tipan 42:22–25; 49:15–17; 131:1–4.

Istasyon 3

Ang mga hamon: Ano ang maaaring magpahirap sa taong ito na kumilos nang may pananampalataya?

Mga posibleng paraan para makatulong: Ano ang ipagagawa mo sa taong ito para kumilos nang may pananampalataya? Paano madaragdagan ng mga pagkilos na ito ang tiwala ng taong ito kay Jesucristo habang pinagsisikapan niyang malampasan ang mga hamong ito?

Rebyuhin ang mga talata 5–7 sa bahaging “Pagtatamo ng Espirituwal na Kaalaman” ng Doctrinal Mastery Core Document, at tukuyin ang mga karagdagang pahayag ng katotohanan na makatutulong.

Ang natutuhan mo

Ang mga sumusunod na tanong ay magagamit sa isang talakayan o aktibidad sa journal:

• Mula sa natutuhan mo ngayon, ano ang ibabahagi mo sa isang taong may mga tanong tungkol sa doktrina ng Ama sa Langit tungkol sa kasal at pamilya?

• Ano ang natutuhan mo tungkol sa pagtatamo ng espirituwal na kaalaman na makatutulong sa isang tao na masagot ang isang tanong na may kaugnayan sa ebanghelyo?

Maaari mong ipaalala sa mga estudyante na normal ang magkaroon ng mga tanong tungkol sa ebanghelyo. Maaari mong ibahagi ang iyong nadarama tungkol sa bisa ng paggamit ng mga alituntunin ng pagtatamo ng espirituwal na kaalaman upang masagot ang anumang mga personal na tanong o alalahanin.

Karagdagang Aktibidad sa Pag-aaral

Isang alternatibong sitwasyon na gagamitin bilang pagsasanay ng pagsasabuhay

Ang sumusunod ay isang alternatibong sitwasyon:

• Nabagabag si Rob dahil sa mga balita tungkol sa digmaan, karahasan, at sakuna. Nagsimula niyang maramdaman na ang mundong ito ay hindi isang lugar kung saan gusto niyang magkaroon ng pamilya.

Anyayahan ang mga estudyante na gamitin ang mga alituntunin ng pagtatamo ng espirituwal na kaalaman para tulungan si Rob. Hikayatin silang gamitin ang natutuhan nila tungkol sa doktrina ng kasal at pamilya sa plano ng kaligtasan ng Ama sa Langit.