Lesona 71: Mataupu Faavae ma Feagaiga 58–59

Mataupu Faavae ma Feagaiga 58:26–29

“Auai ma le Naunautai i se Faamoemoega Lelei”

E toatele le Au Paia, e aofia ai se vaega mai Kolesavile, Niu Ioka, na faatoa taunuu talu ai nei i le Itumalo o Siakisone, Misuri. Sa latou mananao e fesoasoani i le Faaola e fausia Siona, ae sa latou le mautinoa po o le a le mea e fai. Sa faamalamalama mai e le Alii sa faamoemoeina i latou e faaaoga lo latou faitalia e saili ai ni auala e fesoasoani ma auauna atu ai. O lenei lesona e mafai ona fesoasoani i tamaiti aoga ia malamalama pe faapefea ona mulimuli i le faataitaiga a le Faaola o le faia o mea lelei.

Gaoioiga E Ono Mafai Ona Aoao Ai

O se aso i le soifuaga o Keriso

A o lei amataina le vasega, mafaufau e tusi le Latou te [feoai] ma agalelei i luga o le laupapa. Valaaulia tamaiti aoga taitasi e faasoa mai le igoa o se tasi latou te iloa e fetaui lona olaga ma lena faamatalaga. E mafai e ni nai volenitia ona faasoa mai pe aisea e faamanatu atu ai e lena fasifuaitau ia i latou le tagata na latou filifilia.

Ta’u i tamaiti aoga o le Galuega 10 o se faamaumauga o aoaoga a Peteru i Kaisareia. Valaaulia i latou e sue i le Galuega 10:38 e vaai po o ai le igoa na ono tusia e Peteru i luga o le laupapa.

Mafaufau pe faape’i pe ana faapea na soifua mai Iesu i o tatou aso, nofo i lou pitonuu, pe aoga i lau aoga.

• O le a sou manatu i le mea o loo ia faia e mafai ona faamatalaina o le “[feoai] ma agalelei”?

Ina ia fesoasoani i tamaiti aoga ia mananao e mulimuli i le faataitaiga a le Faaola, mafaufau e tuu atu ia i latou se taimi e tusifaamaumau ai o latou manatu e uiga i le uunaiga lenei i a latou api faamaumau mo suesuega.

Taumafai e vaai faalemafaufau pe mata o a ni ou lagona pe afai e te faaaluina se Aso Toonai faatasi ma Iesu e “[feoai] ma agalelei” i le aso atoa. E mafai faapefea e lenei aafiaga ona aafia ai le ala o le a e filifili ai e faaalu lou taimi e oo lava i aso e te le o faatasi ai ma Ia?

Filifili e fai mea lelei

Ina ua maua le Mataupu Faavae ma Feagaiga 58 na faatoa taunuu lava Iosefa Samita ma nisi o toeaina o le Ekalesia i Misuri. Sa latou mananao i ni faatonuga i le auala e faavae ai le Ekalesia ma fausia Siona i le eria. Sa aoao i latou e le Faaola i le ala e mafai ai ona latou faaaogaina lo latou faitalia e fai ai Lana galuega.

Faitau le Mataupu Faavae ma Feagaiga 58:26–29 e aoao ai po o le a le mea na aoao e le Alii i Lana Au Paia e uiga i le faaaogaina o le latou faitalia. Tusi upu ma fasifuaitau e te maua i vaega talafeagai o le siata lenei. (Manatua: “E le tatau” o lona uiga e le alagatatau pe manaomia.)

Mafaufau e faaali atu le siata lenei i luga o le laupapa po o le tuuina atu i tamaiti aoga o a latou lava kopi. E mafai ona fesoasoani i nisi o tamaiti aoga e auai atili i lenei gaoioiga pe afai e valaaulia i latou e faauma faatasi ma se paga.

Faaaogaina o lo tatou faitalia e avea ai …

Atili faapei o Keriso	Itiiti le pei o Iesu

A uma ona fai e tamaiti aoga, mafaufau e fai atu fesili e fesoasoani ia i latou e mafaufau ai ma malamalama i le uiga o fasifuaitau na latou mauaina. Mo se faataitaiga:

• O le a sou manatu i le uiga o le “auai ma le naunautai,” po o le saili ma le naunautai, ia faia mea lelei?

• Aisea e te manatu ai e tatau ona tatou aloese mai le “faamalosi,” pe faamalosia, ia faia mea lelei?

• Aisea e te manatu ai e taua o tatou faamoemoega mo le faia o mea lelei?

I lau api faamaumau mo suesuega po o au tusitusiga paia, i au lava upu, tusi ai se upu moni se tasi pe lua e mafai ona e iloa e taua i le Faaola mai nei fuaiupu.

Valaaulia tamaiti aoga e faasoa mai upu moni sa latou faamaumauina pe tusi foi i luga o le laupapa. O se tasi o upu moni atonu latou te faailoa mai o le, e tauia e le Atua i latou o e saili ma le naunautai e faataunuu le amiotonu.

Atonu e te manao e valaaulia tamaiti aoga e mafaufau loloto pe tusifaamaumau pe faafia ona latou saili ma le naunautai mo auala e auauna atu ai i le Atua ma isi e aunoa ma le faatalitali ina ia ta’u atu i ai le mea e fai. Valaaulia i latou e gauai atu i auala e mafai ona latou taumafai ai ina ia auai ma le naunautai atili i se faamoemoega lelei a o faaauau pea ona latou suesue.

• O a ni faataitaiga e mafai ona e mafaufau i ai mai tusitusiga paia lea na ola ai se tasi i aoaoga a le Faaola i nei fuaiupu?

• O a ni faataitaiga o le silafia e le Faaola o avanoa e faia ai mea lelei ma faaaoga Ai Lona faitalia e faatino ai?

E mafai ona e fuafua e faaali i le vasega le vitio “Jesus Christ Has Compassion and Heals the People” (6:32), o lo o maua i le ChurchofJesusChrist.org. O loo faaalia ai le Faaola toetu o loo filifili e nofo i se taimi faaopoopo i sa Nifae e auauna atu ai ma faamalolo i latou.

Ua Agaalofa Iesu Keriso ma Faamaloloina Tagata | 3 Nifae 17:1-10

Pe e mafai foi ona e faaalia le vitio “Widow of Nain” (2:22), o loo maua i le ChurchofJesusChrist.org. O loo faaalia ai le silafiaina e le Faaola o se tina faanoanoa ma filifili e tu, faamafanafana ia te ia, ma faamalolo lana tama.

Widow of Nain

O aoaoga a le Faaola i o tatou olaga

Mafaufau e fesoasoani i tamaiti aoga ia iloa pe mafai faapefea e aoaoga a le Faaola i fuaiupu 26–29 ona vaai i tulaga moni o le olaga. E mafai ona e faaaogaina nisi o tulaga nei po o isi e sili atu ona fesootai i au tamaiti aoga.

Vaevae tamaiti aoga i ni vaega toalaiti e talanoaina po o fea fuaiupu po o fasifuaitau e sili ona faatatau i tulaga taitasi. Fautuaina vaega e mafaufau i ni auala se tele e mafai ai e tagata taitoatasi ona faaaoga lo latou faitalia e punouai ai i se faamoemoega lelei.

Ona mafaufau lea e valaaulia vaega taitasi e toe fai le gaoioiga e ala i le fatuina o o latou lava tulaga lea e mafai ai e se talavou ona faaaoga aoaoga a le Faaola i le vaega 58.

1. Sa tofia talu ai nei Juliet e auauna atu i se aiga na te lei feiloai lava i ai. Na te le o mautinoa pe faapefea ona amata.

2. O le faiaoga o le Aoga Sa a Ann o se tagata maoae ae e le o se faiaoga poto masani. O le toatele o ana uo i le vasega e foliga mai ua leai se naunau ma ua le toe taumafai e auai i lesona.

3. Ua matauina e Jasmine ua foliga mai ua sili atu le vaivai o lona tina nai lo le mea na masani ai talu ai nei.

4. Na tau ane Xavier i ni tusiga le lelei e uiga i se isi tamaiti aoga i luga o ala o faasalalauga faaagafesootai.

5. E leai se aoauli avanoa a Iareto e leai se mea e faamoemoeina o ia e fai ma leai se mea e tatau ona i ai o ia.

Ina ia faaiu, mafaufau e valaaulia tamaiti aoga e usu pe faalogologo i se viiga e faamalosia ai mataupu faavae na aoaoina i lenei lesona. O se tasi o filifiliga o le “Ua Ou Faia Ea se Lelei?” (Viiga, nu. 136). Fai atu ia i latou e mafaufau loloto pe faapefea ona faaaoga upu i mataupu faavae na aoao mai e le Faaola i le vaega 58. Valaaulia se tamaiti aoga se toatasi pe toalua e faasoa mai i le vasega mea latou te lagona e finagalo le Faaola latou te manatua mai a latou suesuega i le asō. Atonu e fesoasoani le tuu atu i tamaiti aoga e tusi o latou manatu a o lei valaauliaina nisi e faasoa leotele mai.

E mafai ona e valaaulia tamaiti aoga e vaavaai mo se avanoa e faatino ai mea sa latou aoaoina a o lei oo i le isi lesona seminare. E mafai ona e tulitatao e ala i le valaaulia o ni tamaiti aoga naunau e faasoa mai a latou poto masani i le vasega.

Punaoa Faaopoopo

O a nisi o faataitaiga o auala e mafai ona tatou faaaogaina ai le Mataupu Faavae ma Feagaiga 58:26–29 i o tatou olaga?

Na saunoa Elder Jeffrey R. Holland o le Korama a Aposetolo e Toasefululua i le mea lenei ae lei leva ona faalauiloa mai e taitai o le Ekalesia le polokalama o auaunaga. E toatele tagata o le ekalesia sa i ai ni fesili e uiga i le auala e auauna atu ai ma le mataalia i isi.

O Le Galuega o le Faaleleiga

Matou te … fautua atu ia aua ne’i e faatali mo le tele o isi faatonuga. Na o le puna lava i totonu o le vaitaele ma aau loa. Agai atu ia i latou e le tagolima. Aua le tau na o le faaopeopea ma mafaufau pe tatau ona aau e ū i ai lou tua po o le aau pisipisi pei se taifau. Afai tatou te mulimuli i mataupu faavae autu ua aoaoina, tumau le ogatusa ma ki o le perisitua, ma saili atu i le Agaga Paia e taiala i tatou, e le mafai ona tatou toilalo. (Jeffrey R. Holland, “O le Galuega o le Faaleleiga,” Liahona, Nov. 2018, 77)

Sa faamalamalama mai e Peresitene Dallin H. Oaks o le Au Peresitene Sili le ala e mafai ai e nei mataupu faavae ona faaaoga i lo tatou sailia o faaaliga ma le taitaiga mai le Atua:

O le mea taua i soo se taumafaiga e maua se faaaliga, o se tautinoga lea e faia mea uma tatou te mafaia i a tatou lava taumafaiga ma faaiuga. O lona uiga e manaomia ona tatou auauna atu ma galulue.

O le agai i luma i a tatou auaunaga ma galuega o se auala taua e agavaa ai mo faaaliga. I a’u suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi latou te galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e faia. (Dallin H. Oaks, “I Lona Lava Taimi, i Lona Lava Ala,” Ensign, Aok. 2013, 22)

Na faasoa mai e Sister Rebecca L. Craven o le Au Peresitene Aoao o Tamaitai Talavou se auala e mafai ona faaaoga ai nei mataupu faavae i le mauaina o se molimau:

Fai Le Mea e Sili Ona Taua

E i ai so’u aafiaga manaia ma se tamaitai talavou pele, o le sa fai maia se fesili faamaoni: “Sister Craven, e faapefea ona e iloa e i ai se mea e moni e uiga i le Ekalesia? Aua ou te lē lagonaina lava se mea.”

Ae ou te le’i oso atu i se tali, sa muamua ona ou fai atu ia te ia ni nai fesili. “Faamatala mai ia te a’u e uiga i au lava suesuega o tusitusiga paia.”

Sa ia tali mai, “Ou te lē faitauina ni tusitusiga paia.”

Sa ou fesili atu, “Ae a lou aiga? Pe tou te suesueina faatasi le Sau, Mulimuli Mai ia te A’u ?”

Sa fai mai o ia, “E leai.”

Sa ou fesili e uiga i ana tatalo: “O a ou lagona pe a e tatalo?”

Sa ia tali mai, “Ou te lē tatalo.”

O la’u tali ia te ia, sa faigofie, “Afai e te manao e iloa se mea, o le a tatau ona e faia se mea.”

Pe le moni ea lena mea i soo se mea tatou te mananao e aoao pe iloa? Sa ou valaaulia la’u uo fou e amata ona fai le talalelei a Iesu Keriso: tatalo, suesue, auauna atu i isi, ma faalagolago i le Alii. E le oo mai le liua a o leai se mea e fai. E oo mai e ala i le mana o le Agaga Paia a o tatou faia se taumafaiga ma le loto ia i ia iloa e ala i le fesili, saili, ma le tu’itu’i. E oo mai i le faia. (Rebecca L. Craven, “Fai Le Mea e Sili Ona Taua,” Liahona, Me 2022, 62)

Gaoioiga Faaopoopo e Aoao Ai

Se isi amataga

E mafai ona e amataina le lesona i se ata faataitai e pei o lenei, lea e mafai ai e se tasi ona faaaoga lo latou faitalia e fai ai se mea lelei pe filifili ai e aua nei galulue sei vagana ua faamalosia i latou e fai.

Vaai faalemafaufau e faapea, ao e savali i le auala na e iloa atu se tagata matua ua pa’ū. O lē fea o mea nei e tatau ona e faia?

1. Taofi e vaai pe uunaia oe e le Tama Faalelagi e fesoasoani.

2. Faatali e vaai pe fesili sao atu le tagata matua ia te oe mo se fesoasoani.

3. Talosia o le a ta‘u atu e se tasi le mea e te faia.

4. Vaai vave pe mafai faapefea ona e fesoasoani i le tagata na pau.

A uma ona tali mai tamaiti aoga, fai atu ia i latou e faasoa mai ni mafuaaga e ono i ai i se tasi mo le filifilia o filifiliga eseese taitasi. Ona valaaulia lea o i latou e faitau le Mataupu Faavae ma Feagaiga 58:26–29 ma mafaufau loloto pe faapefea e a tatou filifiliga ona tosina ai i latou e iu ina avea ai i tatou.

“Faamaoni i puapuaga”

Valaaulia tamaiti aoga e mafaufau loloto i se tauvaga lea e mafaufau ai faamasino i le maualuga o le faigata pe a fuafuaina togi e tatau i se tagata. O faataitaiga e mafai ona aofia ai tagafiti, faaseega aisa, po o le faasee i le kiona. Fesoasoani i tamaiti aoga e faamatala lenei mea i lo tatou Faamasino atoatoa, o Iesu Keriso, o lē ua malamalama atoatoa i faigata o loo feagai ma tagata taitoatasi i le lalolagi. Ona valaaulia lea o tamaiti aoga e faitau le Mataupu Faavae ma Feagaiga 58:1–4, ma vaavaai mo mea ua latou aoaoina e uiga i le faamasinoga a lo tatou Faaola.

Faaaogaina faaonaponei o fuaiupu 26–29

O se tasi o auala e fesoasoani ai i tamaiti aoga ia iloa le taua faaonaponei i aoaoga a le Faaola o le saunia lea o vaega e i ai kopi o faamatalaga i le vaega “Punaoa Faaopoopo.” E mafai e vaega taitasi ona faitau faamatalaga ma fuafua po o a fasifuaitau mai le Mataupu Faavae ma Feagaiga 58:26–29 e sili ona faaaoga i ai. Ona valaaulia lea o tamaiti aoga e faasoa mai ni tulaga eseese e mafai ai e se talavou ona faaaoga mea o loo aoao mai e na fuaitau ma faamatalaga.

Gaoioiga talafeagai

I luga o se fasipepa laitiiti, e mafai e tamaiti aoga taitasi ona tusi i lalo se nofoaga se tasi o le a latou i ai i le vaiaso a sau (fale, aoga, lotu, galuega, malae soka, ma isi mea faapena) ma tuu i totonu o se pakete. Ia sei ese soo se pepa mai le pakete, ma valaaulia le vasega e faasoa mai ni auala fatufatuai e mafai ai e se tasi ona filifili e faia ma le mataalia mea lelei i lena tulaga po o le nofoaga.

Punouai i le aoaoina

Ina ia fesoasoani i tamaiti aoga e talanoaina pe mafai faapefea ona faatatau upu moni o loo i le vaega 58 i o latou aafiaga i le seminare, mafaufau e faaali atu le saunoaga lenei mai ia Elder David A. Bednar o le Korama a Aposetolo e Toasefululua.

“O se tagata aoao e faaaogaina le faitalia e ala i le galue e tusa ai ma mataupu faavae sa’o e tatalaina lona loto i le Agaga Paia ma valaaulia Ana aoaoga, mana e molimau atu ai, ma le molimau faamautuina. O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae lē tau lava ina talia …

“ … E tatau i se tamaitiiti aoga ona faaaoga le faatuatua ma galue ina ia mafai ai ona maua le malamalama mo ia lava“ (David A. Bednar, “Seek Learning by Faith,” Ensign, Sept. 2007, 64).

Valaaulia tamaiti aoga e faamatala mai filifiliga e mafai e se tamaitiiti aoga ona fai a o lei amataina le vasega, i le taimi o le vasega, ma pe a uma le vasega e mafai ona faateleina pe faaitiitia mea latou te aoaoina ma lagonaina i le seminare.

Afai e aoga, e mafai e tamaiti aoga ona talanoaina pe mafai faapefea e mataupu faavae o loo i le vaega 58 ma le saunoaga a Elder Bednar ona faaleleia foi lo latou aafiaga i le aotauina i le aoga.