Lesona 72: Mataupu Faavae ma Feagaiga 58–59

Mataupu Faavae ma Feagaiga 58:38–60

“O Ia o Le Ua Salamo … Ua Faamagaloina”

E oo lava i soo sili ona faamaoni o Iesu Keriso e manaomia le salamo ma le faamagaloga. I le Mataupu Faavae ma Feagaiga 58, na valaaulia ai e Iesu Keriso nisi o taitai o Lana Ekalesia ia salamo ma folafola atu e faamagalo a latou agasala pe afai latou te usiusitai. O le faamoemoega o lenei lesona o le fesoasoani lea i tagata aoga ia lagona le faamoemoe faapea, e faamagalo e le Faaola i latou o e salamo ia latou agasala.

Gaoioiga E Ono Mafai Ona Aoao Ai

Manu’a

Mafaufau e amata le vasega i le fatuina o se talanoaga e uiga i lo tatou manaomia o Iesu Keriso e faamagalo a tatou agasala.

O se tasi o auala e faia ai lenei mea o le faaali atu lea o le ata lenei pe tusi se ata fasilaau o se talavou i luga o le laupapa. Ina ia faatupuina le fiafia, e mafai ona e valaaulia le vasega e ta’u mai o ia ma fai ni faamatalaga auiliili e uiga i lona olaga a o lei faasoaina atu le tulaga lenei.

Vaai faalemafaufau i lau uo na fai atu ia te oe na pa’ū o ia mai se mea maupu’epu’e anapo. Na te lagonaina le tele o le tiga pe a manava o ia ma e faapea ua gau lona lima. Ua ia filifili e aua nei vaai i se fomai ona ua popole o le a le fiafia le fomai ma isi pe afai latou te iloa ua ia filifili e alu latalata i autafa o lena mea maupu’epu’e matautia. O lea ua ia fuafua ai e faalilolilo lona tiga, ma le faamoemoe o le a toe lelei mea uma i le taimi e tatau ai.

• O le a sou lagona e uiga i le fuafuaga a lau uo? Aisea?

Vaai faalemafaufau la i se tulaga faapena, ae o le taimi lenei ua ta’u atu e lau uo ia te oe ua ia faia se agasala matuia. Nai lo le mulimuli i aoaoga a le Faaola e uiga i le salamo, ua tonu ia te ia e nana lana agasala ma le faamoemoe o le a lelei mea uma i le aluga o taimi.

Valaaulia tagata aoga e faasoa mai ni fesili po o ni atugaluga eseese e ono faatosinaina ai se talavou e aua nei salamo.

• O le a se fautuaga o le a e avatu i lau uo?

Ua aoao mai le Faaola e uiga i le salamo

Faamalamalama atu e faapea, i le 1831, na malaga ai Iosefa Samita ma isi toeaina i Misuri, lea na poloaiina ai e le Alii nisi e nonofo ma fausia le aai o Siona. I le avea ai o se vaega o le faatonuga a le Alii, sa Ia fautuaina ai nisi o i latou e salamo i a latou mea sese (tagai i le Mataupu Faavae ma Feagaiga 58:14–15, 38–41, 60).

Faitau le Mataupu Faavae ma Feagaiga 58:60 e vaai ai i le fautuaga a le Alii i se tagata e igoa ia Ziba Peterson.

• O a ni le malamalamaaga sese e te manatu atonu na i ai ia Ziba e uiga i le Atua pe e uiga i le salamo lea o le a mafua ai ona ia nanaina ana agasala? (Atonu e te manao e faitau le fautuaga a Alema i lona atalii e uiga i taunuuga o le taumafai e nana a tatou agasala. Tagai i le Alema 39:7–9.)

• O le fea o nei malamalamaaga sese e te manatu o loo tauivi pea ma tagata i aso nei?

Mafaufau e faaali atu le uunaiga lenei ma tuu atu i tagata aoga se taimi e mafaufau loloto ai le tagata lava ia pe tusi o latou manatu.

Ona valaaulia lea o i latou e vaavaai mo aoaoga i le taimi o le lesona e mafai ona fesoasoani ia i latou i a latou taumafaiga e salamo i o latou olaga atoa.

Mafaufau pe i ai ni agasala sa e musu e te salamo ai. Afai o lea, mafaufau e uiga i au mafuaaga mo le taofiaina.

Fesili ma tali

A o suesue e tagata aoga le fuaitau lenei, atonu e te manao e faamanatu atu ia i latou ni fesili patino po o ni atugaluga e uiga i le salamo na latou faasoaina muamua atu i le lesona.

Faitau le Mataupu Faavae ma Feagaiga 58:42–43, ma vaavaai mo aoaoga a le Faaola e fesoasoani e tali ai fesili ma atugaluga e ono i ai i nisi tagata e uiga i le salamo.

O leMataupu Faavae ma Feagaiga 58:42–43 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

Tuu tagata aoga i ni vaega toalaiti. Valaaulia i latou e faasoa mai ni fasifuaitau mai fuaiupu 42–43 e fesoasoani ia i latou e tali ai fesili patino po o atugaluga pe na anoa ia i latou. Ona valaaulia lea o vaega e faasoa mai ni mea na latou aoaoina ma le vasega. A o faasoa mai tagata o le vasega, ia mautinoa ua latou malamalama afai tatou te salamo i a tatou agasala, o le a faamagalo i tatou e le Alii ma ina ia salamo, e manaomia e le Alii i tatou e ta’uta’u atu ma lafoai a tatou agasala.

• E mafai faapefea ona fesoasoani nei upumoni i atugaluga e ono i ai i tagata e uiga i le salamo?

Afai e i ai ni fesili a tagata aoga e uiga i le salamo e le o tali mai e nei fuaiupu, fuafua pe sili atu ona fesoasoani ia i latou e sue tali o se vaega o lenei lesona, i le taimi o se lesona i le lumanai, pe e ala i le fautuaina mai o punaoa mamana ua filifilia lea e mafai ona latou sailia mo ni a latou lava tali.

(Manatua: O loo i ai faamatalaga i le vaega “Punaoa Faaopoopo” e mafai ona fesoasoani pe afai e i ai ni fesili a tagata aoga e uiga i manatu faavae patino i lenei fuaitau o le atamai i aoaoga faavae, e pei o le ta’uta’u atu po o le lafoaia o agasala.)

E faamagalo le Alii

O lenei vaega ua fuafuaina e fesoasoani i tagata aoga ia lagona le faamoemoe faapea e faamagalo e le Faaola i latou o e salamo. Fuafua ma le agaga tatalo po o le fea o punaoa ma fautuaga o le a sili ona fesoasoani i au tagata aoga e saunia ai ma le manuia a latou tali i le gaoioiga lenei.

I lau api talaaga mo suesuega, saunia se tali e mafai ona e faasoa atu i se tasi ua popole e le mafai ona faamagaloina o ia. O le a se mea e mafai ona e faasoa atu e uiga i le natura o le Faaola ma folafolaga e mafai ona fesoasoani i lenei tagata e faatoilalo ai soo se atugaluga? Filifili nisi o filifiliga nei e fesoasoani ia te oe e saunia ai lau tali:

1. Tusitusiga Paia: Suesue i tusitusiga paia mo fuaitau o loo i ai folafolaga a le Alii ia i latou o e salamo pe mo tulaga e faaalia ai Lona naunau e faamagalo ma. O le lisi o fuaitau o le atamai i aoaoga faavae i le Pepa Autu o le Atamai i Aoaoga Faavae (2023) e mafai ona fesoasoani. E mafai ona e mafaufau e fefaasinoa’i pe faafesootai nisi o nei mau i le Mataupu Faavae ma Feagaiga 58:42–43.

2. Faamaoniga patino: Mafaufau i faataitaiga na e molimauina ai le naunau o le Faaola e faamagalo ma fesoasoani i se tasi ia suia. (Aua nei faasoaina igoa po o auiliiliga o agasala.)

3. O le vaega o le “O le a fesoasoani Iesu Keriso ia te oe” o le Mo Le Malosi o le Autalavou: O Se Taiala mo le Faia o Filifiliga ([2022], 6–9): Vaavaai mo upumoni e uiga i le Tama Faalelagi ma Iesu Keriso lea e aumaia ia i tatou le faamoemoe.

4. Perofeta o aso nei: Saili mo faamatalaga mai taitai o le Ekalesia i ona po nei e fesoasoani tatou te malamalama ai i le natura faamagalo o Iesu Keriso.

O se faataitaiga lenei mai ia Elder Dieter F. Uchtdorf o le Korama a Aposetolo e Toasefululua e mafai ona e filifili e faasoa atu i au tamaiti aoga:

O Iesu Keriso o le Malosiaga o le Autalavou

A’u uo talavou pele, pe ana faapea o loo i ai iinei le Faaola i le taimi nei lava, o le a Sana fetalaiga ia te outou? …

… Atonu o le a e manatuaina ni mea sese na e faia, o taimi na e lolo atu ai i faaosoosoga, o mea e te moomoo ma’imau pe a na e lē faia—pe moomoo foi sa lelei atu ona e faia.

O le a lagonaina e le Faaola mea na, ma ou te talitonu o le a Ia faamautinoa atu ia te oe i ni upu na Ia fetalaia i tusitusiga paia:

“Aua le fefe” [Luka 5:10].

“Aua le masalosalo” [Mataupu Faavae ma Feagaiga 6:36].

“Ia fiafia” [Mataio 14:27].

“Aua le atuatuvale o outou loto” [Ioane 14:1, 27].

Ou te lē manatu o le a Ia faia ni ‘alofaga mo au mea sese. Na te lē faaitiitia foi. Leai, o le a Ia faatonu oe ia e salamo—ia lafoai ese au agasala, ia sui, ina ia mafai ona Ia faamagalo ia te oe. O le a Ia faamanatu atu ia te oe le 2,000 tausaga talu ai na Ia ave ai na agasala i Ona lava luga ina ia mafai ona e salamo ai. O le vaega lena o le fuafuaga o le fiafia na faameaalofa mai ia i tatou mai lo tatou Tama Faalelagi alofa. (Dieter F. Uchtdorf, “O Iesu Keriso o le Malosiaga o le Autalavou,” Liahona, Nov. 2022, 9)

A uma ua lava se taimi e saunia ai a latou tali, valaaulia tagata aoga e faasoa mai i ni vaega toalaiti mea na latou aoaoina ina ia maua e i latou uma o e mananao e faasoa mai le avanoa.

E mafai foi ona e fuafua e faaali le vitio “The Savior Wants to Forgive” (5:50), o loo maua i le ChurchofJesusChrist.org, o se faataitaiga o le manao faifai pea o le Faaola e faamagalo mai.

Mafaufau e faaiu le vasega i lau molimau i le natura faamagalo o le Faaola, ma fautuaina le vasega e salamo ma le faatuatua i Ana folafolaga.

The Savior Wants to Forgive

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le mau “O ia o le ua salamo i ana agasala, o ia lava lea ua faamagaloina.” O manatu mo gaoioiga o le taulotoina o loo i ai i le vaega faaopoopo i lalo o le “Gaoioiga o le Iloiloga o le Atamai i Aoaoga Faavae.

Punaoa Faaopoopo

Aisea ou te manatua ai pea a’u agasala? Pe o lona uiga ea e le o faamagaloina a’u?

Na saunoa mai Elder Dieter F. Uchtdorf o le Korama a Aposetolo e Toasefululua:

Point of Safe Return

O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lena ma vaega o le faagasologa o le faamalologa ma le faapaiaga o loo manaomia. (Dieter F. Uchtdorf, “Vaega Tonu o le Toe Foi Saogalemu,” Liahona, Me 2007, 101)

Pe galo moni ea e le Alii na tatou agasala pe a uma ona tatou salamo?

Na faamatala mai e Elder Gerrit W. Gong o le Korama o Aposetolo e Toasefululua e faapea:

Pe a tatou salamo, pe a tatou ta’uta’u ma lafoa’i a tatou agasala, ua fetalai mai le Alii Na Te le toe manatuaina lava. E le faapea Na Te faagalo; ae, i se ala ofoofogia, e peiseai Na Te filifili e le toe manatuaina, e faapena foi i tatou. (Gerrit W. Gong, “Toe Faalagolago,” Liahona, Nov. 2021, 98)

E mafai faapefea ona ou iloa ua faamagaloina au ina ua uma ona salamo faamaoni?

Matamata le vitio “How Do We Know the Lord Has Forgiven Us?” (3:18).

How Do We Know the Lord Has Forgiven Us

O afea ou te manaomia ai le fesoasoani a se epikopo ia salamo?

Na saunoa Elder Neil L. Andersen o le Korama a Aposetolo e Toasefululua:

O epikopo ma peresitene o siteki ua faauuina ma vaetofia e avea ma faamasino i Isaraelu. Ioe, na o le Alii e faamagaloina agasala, ae o taitai perisitua latou te faia se matafaioi taua lava i le faagasologa o le salamo mai agasala matuia. (Neil L. Andersen, The Divine Gift of Forgiveness [2019], 205)

I le Mo Le Malosi o le Autalavou: O Se Taiala mo le Faia o Filifiliga (2022), tatou te faitau:

O lou epikopo e umia ki o le perisitua ma meaalofa faaleagaga e fesoasoani ia te oe ia salamo. E mafai ona e sailia lana fesoasoani ma fautuaga i soo se taimi. Afai na e faia ni mea sese matuia, e pei o le solia o le tulafono o le legavia, talanoa ma lou epikopo. Na te le tausalaina oe. O ia o se sui o Iesu Keriso ma o le a fesoasoani ia te oe ia iloa le ala e salamo atoatoa ai ma maua le mana faamalolo ma le faamalosiau a le Faaola. (Mo Le Malosi o le Autalavou: O Se Taiala mo le Faia o Filifiliga,8)

Ae faapefea pe afai o loo ou tauivi e lafoai se agasala?

Na faamalamalama mai e Elder Neil L. Andersen o le Korama a Aposetolo e Toasefululua:

“O nisi taimi i la tatou salamo, i a tatou taumafaiga i aso taitasi ia avea atili e faapei o Keriso, tatou te iloaina ai i tatou lava ua tauivi pea lava pea ma faafitauli lava e tasi. E pei o loo tatou feaei i se mauga e tumu i laau, i nisi taimi tatou te le vaaia lo tatou alualu i luma seiiloga ua tatou latalata atu i le tumutumu ma toe vaai ifo ai mai tumutumu mauga maualuluga. Aua le lotovaivai. Afai o loo e taumafai ma galue ia salamo, ua e i ai i le faagasologa o le salamo. …

O le lafoaia e manaomia ai le taimi. Ina ia fesoasoani ia i tatou, e faataga ai e le Alii i nisi o taimi ia toega o a tatou mea sese e nofo i o tatou manatua. O se vaega taua o lo tatou aoaoina faaletino.

A o tatou ta’uta’u atu ma le faamaoni a tatou agasala, toefuatai mea tatou te mafai ona faia i e na faatiga i ai, ma lafoai a tatou agasala e ala i le tausia o poloaiga, ua tatou i ai i le faagasologa o le mauaina o le faamagaloga. (Neil L. Andersen, “Salamo … Ina Ia Ou Faamaloloina Outou,” Liahona,, Nov. 2009, 42)

Gaoioiga Faaopoopo e Aoao Ai

Se isi amataga

Tatai atu mafaufau o tagata aoga i se mea faitino, e pei o se laulau, e tele naua e lafi lelei ai i totonu o le potu. Fai i le vasega e moeiini o latou mata mo le 30 sekone a o e nanaina le mea faitino tele e ala i le tuuina o se mea laitiiti, e pei o se tusi po o se peleue, i ona luma po o luga. Valaaulia tagata aoga e pupula o latou mata ma vaai pe o le a le vave e mafai ona latou maua ai le mea faitino tele.

Fai atu i tagata aoga e faasoa mai pe mafai faapefea ona fesootai lenei mea i le mea na taumafai Ziba Peterson e nana mai le Atua i le Mataupu Faavae ma Feagaiga 58:60.

Aisea e taumafai ai pea tagata i aso nei e nana a latou agasala? O a ni auala latou te taumafai e nana ai? O le a le mea o le a iu ina tulai mai i le nanaina o agasala nai lo le salamo mai ai?

E manaomia uma e i tatou ona salamo

O fuaitau nei e mafai ona fesoasoani i tamaiti aoga e iloa ai e le tulaga ese i latou pe leai se faatuatua ona e manaomia ona latou salamo. Fesoasoani ia latou malamalama o le “salamo o lona uiga ia suia, … ia faaleleia ma maua le faamagaloga” (Mo Le Malosi o le Autalavou: O Se Taiala mo le Faia o Filifiliga,7). E oo lava i e sili ona faamaoni e manaomia ona suia pe afai latou te mananao ia avea atili e faapei o Iesu Keriso. Valaaulia tagata aoga e faitau fuaitau nei o le Mataupu Faavae ma Feagaiga, ma vaavaai mo le savali masani a le Faaola mo nei soo faamaoni e toatolu.

• 58:14–15: Eteuati Paterika, le uluai epikopo o le Ekalesia

• 58:38–39: Matini Harisi, o se tasi o Molimau e Toatolu i le Tusi a Mamona

• 58:40–41: William W. Phelps, o se taitai ma se lomitusi o le Ekalesia i Misuri

• O a ni valaaulia masani a le Alii na i ai mo i latou?

• Aisea e te manatu ai ua valaaulia e Iesu ia taitai faamaoni o Lana Ekalesia ia salamo?

New Era Itulau o le Atamai i Aoaoga Faavae

Mafaufau e tusi i luga o le laupapa po o luga o se pepa e tufa atu se otootoga autu o le itulau lenei mai le mekasini o le New Era . Ia aofia ai fuaitau autu taitasi ae le o parakalafa faamalamalama mai vaega taitasi. Valaaulia tagata aoga e faaaoga a latou tusitusiga paia ma faamatalaga mai taitai o le Ekalesia e fatu ai ni faamalamalamaga o fasifuaitau taitasi e pei o loo latou saunia le itulau ina ia lolomiina i le mekasini o le Mo Le Malosi o le Autalavou e sosoo ai.

• “Atamai i Aoaoga Faavae: Salamo ma le Faamagaloga,” Liahona, Fep. 2019, 45