Lesona 73: Mataupu Faavae ma Feagaiga 58–59

Mataupu Faavae ma Feagaiga 59

O Le Aso o le Alii

I le 1831 na valaauina ai e le Alii nisi o le Au Paia e siitia atu i le Itumalo o Siakisone, Misuri, e faatu Siona. A o faatasi ai le Perofeta o Iosefa Samita ma nei Au Paia, sa ia maua faatonuga mai le Alii e uiga i le tausia o le aso Sapati ia paia. O lenei lesona e mafai ona fesoasoani i tagata aoga ia ava i le Alii e ala i le filifili e tausia le aso Sapati ia paia.

Gaoioiga E Ono Mafai Ona Aoao Ai

Faaiuga e uiga i le Aso Sapati

Fesoasoani i tagata aoga e mafaufau e uiga i nisi o faamanuiaga ma luitau o le usiusitai i le poloaiga e tausia le aso Sapati ia paia. E mafai ona e faaaogaina le aafiaga lenei na faasoa mai i le konafesi aoao. O le mafaufau ai i le tulaga o iai se isi tagata e mafai ona fesoasoani e saunia ai tagata aoga e mafaufau i o latou lava manatu, lagona, ma amioga.

Na faasoa mai e Elder Larry Y. Wilson o le Fitugafulu le aafiaga lenei:

O le ma afafine o, Maria, o se tagata soka tulaga ese a o tuputupu ae. I se tasi tausaga na oo atu ai lana au i le suega siamupini ma, tou te silafia, o lena taaloga o le a faia i le Aso Sa. A o avea ai ma se talavou, e tele tausaga sa aoaoina ai Maria o le Sapati o se aso e malolo ai ma toe faamalosia ai faaleagaga, e le mo ni gaoioiga faafiafia. Ae sa ia lagonaina pea le uunaiga mai ana faiaoga ma le au ia taalo, faapea foi ma se naunautaiga ina ia aua nei ona faatoilaloina lana au. (Larry Y. Wilson, “Tau Lava o Mataupu Faavae o le Amiotonu,” Liahona, Me 2012, 104–5)

• Aisea e ono manatu ai nisi tagata o lenei mea o se faaiuga taua i le olaga o Maria a o isi ailoga a mafai?

• Afai o oe o Maria, o le a sou manatu i le mea e taua ona mafaufau i ai a o lei faia lenei faaiuga?

Mafaufau mo sina taimi e uiga i faaiuga e te faia e uiga i le aso Sapati. O le a se mea e masani ona e faia e taiala ai au filifiliga? A o e suesue i le aso, saili musumusuga mai le Agaga Paia e fesoasoani ia te oe e iloa ai pe aisea e tausia ai le Sapati ia paia ma pe faapefea ona e faia lena mea.

O poloaiga ma faamanuiaga a le Alii

O le parakalafa lenei e mafai ona tuuina atu ai ni talaaga mo le Mataupu Faavae ma Feagaiga 59.

E ui ina sa faaletonu lona soifua maloloina i le 55 o ona tausaga, ae sa tuua e Polly Knight lona aiga i Kolesavile, Niu Ioka, ma le naunautai e usitai i le Alii ma sau i Siona. Sa oo atu Poli i Siona (Itumalo o Siakisone, Misuri) ma maliu ai i ni nai aso mulimuli ane. I le aso o lona maliu, o se Aso Sa, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 59. I lenei faaaliga, na aoao mai ai e le Alii upumoni e mafai ona faamafanafanaina ai le aiga o Polly (tagai fuaiupu 1–2). Sa Ia fetalai foi e uiga i Ana poloaiga, ma se faamamafa i le Sapati. Na folafola mai ai e le Alii faamanuiaga e tele ia i latou o e tausia le aso Sapati ia paia.

Mafaufau e fai ni koluma se lua i luga o le laupapa faatasi ma faalagiga Faatonuga ma Faamanuiaga. Valaaulia tagata aoga e suesue fuaiupu nei i ni vaega toalaiti ma lisi i koluma i luga o le laupapa mea latou te maua. E mafai foi ona latou fatuina ni lisi talitutusa i a latou api talaaga mo suesuega.

Faitau le Mataupu Faavae ma Feagaiga 59:9–20, ma fai ni lisi se lua, o se tasi o faatonuga e tuuina mai e le Alii mo a tatou amioga ma uiga faaalia i le Sapati ma le isi o faamanuiaga ua Ia ofoina mai ia i tatou.

Valaaulia tagata aoga e faasoa atu mea na latou aoaoina. Ma le isi, tuu atu ia i latou se avanoa e fai ai ni a latou fesili, ma talanoaina faatasi fesili a tagata aoga. E ono fesoasoani mo tagata aoga le sueina o uiga o upu faigata pe a manaomia. Atonu e talanoaina ma iloa e tagata aoga le uiga o le “avatu ai au tapuaiga i le Silisili Ese” (fuaiupu 10) ma “avatu ai au taulaga ma au faamanatuga i le Silisili Ese” (fuaiupu 12). E mafai ona e fesoasoani e taiala le talanoaga a le tagata aoga i fesili e pei o nei:

• O a upumoni e mafai ona tatou faailoa mai i nei fuaiupu e uiga i le faamoemoe o le Sapati?

  Valaaulia ia tagata aoga e faasoa soo se upu moni sa latou mauaina. E mafai ona e fai atu i tagata aoga e talanoaina pe aisea latou te manatu ai e taua upumoni sa latou faailoaina mai. Faatasi ai ma isi upumoni e faasoa mai e tagata aoga, fesoasoani i tagata o le vasega e faailoa ma talanoaina o le Sapati o se aso mo i tatou e faaali atu ai lo tatou tuuto i le Atua (tagai fuaiupu 10).

• E mafai faapefea e le i ai o se aso e taulai atu ai i lou alofa ma le faamaoini i le Atua ona fesoasoani ia te oe i lou olaga?

O le ava i i le Alii i le Sapati

O le gaoioiga lenei e mafai ona fesoasoani i tagata aoga ia malamalama pe mafai faapefea ona latou ava i le Alii e ala ia latou filifiliga i le aso Sapati. Atonu e te manao e tusi le fesili o le pepa faataga o le malumalu o i lalo ifo i luga o le laupapa.

I le taimi o faatalanoaga o pepa faataga o le malumalu, o le a fesiligia ai oe:

“O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma taumafa ma le agavaa i le faamanatuga; ma soifua i lou olaga ia ogatusa ma tulafono ma poloaiga o le talalelei?”

Ina ia fesoasoani ia te oe e mafaufau pe mafai faapefea ona e usitai i le poloaiga e tausia aso Sapati ia paia, tusi i lalo manatu i lau api talaaga mo suesuega e uiga i le ala e mafai ai ona e ava i le Alii e ala i le tausia o le aso Sapati ia paia.

O punaoa nei e mafai ona fesoasoani i tagata aoga e faailoa mai ai nisi auala e tausia ai le Sapati ia paia i le aiga ma i le lotu. Mafaufau e faaali atu ia i latou ma tuu atu i tagata aoga se taimi e suesue ai ma faaopoopo i a latou lisi o manatu.

Faitau mau nei e iloa ai po o le a le mea na faia e Iesu Keriso i le Sapati:

• Mataio 12:9–13

• Luka 4:16

Suesue nisi o punaoa nei mo ni manatu faaopoopo i le tausia o le aso Sapati ia paia:

• “Alofa i le Atua, alofa i Lou Tuaoi,” i le Mo Le Malosi o le Autalavou: O Se Taiala mo le Faia o Filifiliga ([2022], 10–14)

• Autu ma Fesili, “Aso Sapati” ma le “Faamanatuga,” topics.ChurchofJesusChrist.org

  E mafai foi ona e mafaufau e faaali atu le “I Lo’u Aso Paia—Faamamaluina o le Sapati” (1:30) e sue ai se fautuaga faaopoopo mai ia Elder Jeffrey R. Holland.

  O tusiga nei mai le ChurchofJesusChrist.org e mafai foi ona avea ma punaoa aoga e faasoa atu: “Sini: Ava ma Olioli i le Aso Sapati” ma le “Saunia mo le Faamanatuga i le Vaiaso Atoa.”

  A uma ua lava se taimi o tagata aoga e suesue ai, mafaufau e valaaulia i latou e faasoa mai mea sa latou aoaoina. E mafai ona e tuu atu ia i latou e tusi nisi o a latou sailiiliga i luga o le laupapa. Mafaufau foi e fai atu fesili nei e fesoasoani ai i tagata aoga e faasoa mai o latou lava aafiaga.

• O le a se mea na fesoasoani ia te oe e faaali atu ai lou faamaoni i le Atua i le Sapati? O le a se eseesega ua faia e nei amioga mo oe?

Atonu e fiafia tagata aoga e aoao atili mai le aafiaga o Maria na folasia mai i le amataga o le lesona. E mafai ona e tuuina atu i tagata aoga le vaega o totoe o le tala e ala i le faaali atu o le vitio “Only upon the Principles of Righteousness” mai le faailotaimi 5:24 i le 6:26, o loo maua i le ChurchofJesusChrist.org.

Fai se fuafuaga

Mafaufau e faaali atu le vaalaulia lenei. E mafai ona e valaaulia ni nai tagata aoga naunau e faasoa mai a latou fuafuaga pe a uma ona latou faia.

Fai se fuafuaga i lau api talaaga mo suesuega e uiga i le auala o le a e taumafai ai e ava i le Faaola i le aso Sapati. E mafai ona e faailoa mai manatu o mea o le a amata ona e faia, faaauau pea ona fai, pe taofi le faiga, a le i le fale po o le lotu.

Punaoa Faaopoopo

Aisea e tausia ai e Kerisiano le Sapati i le Aso Sa?

“I taimi o le Feagaiga Tuai, sa tausia e tagata o le feagaiga a le Atua le Sapati i le aso lona fitu o le vaiaso aua sa malolo le Atua i le aso lona fitu, ina ua uma ona Ia foafoaina le lalolagi (tagai Kenese 2:2). Ina ua mavae le Toetu o Iesu Keriso, lea na tupu i le uluai aso o le vaiaso, sa amata ona tausia e soo o le Alii le Sapati i le uluai aso o le vaiaso (tagai Mareko 16:2), na amata e le Alii ona tausia le Sapati i le aso muamua o le vaiaso, le Aso Sa (tagai Galuega 20:7)” (Autu ma Fesili, “Aso Sapati,” topics.ChurchofJesusChrist.org).

E mafai faapefea e le faamamaluina o le Sapati ona fesoasoani ia te au e faailoa atu ai lo’u faamaoni i le Atua?

Na aoao mai Elder David A. Bednar o le Korama o Aposetolo e Toasefululua:

I le Sapati tatou te tapuai atu i le Tama i le suafa o le Alo e ala i le auai i le faatinoga o sauniga ma aoao e uiga i le, mauaina, manatua, ma le faafouina o feagaiga. I Lona aso paia, o o tatou mafaufauga, taga, ma amioga o faailoga ia tatou te avatu i le Atua ma o se faailoilo foi lea o lo tatou alolofa mo Ia. (David A. Bednar, “O Folafolaga Silisili ma le Taua,” Liahona, Nov. 2017, 92)

O le a le mea e finagalo le Faaola ia tatou malamalama ai e uiga i le Sapati?

Na faamatala mai e Peresitene Russell M. Nelson:

Ou te talitonu [e manao Iesu Keriso] ia tatou malamalama o le Sapati o Lana meaalofa lea ia i tatou, faatagaina le malologa moni mai faigata o le olaga i aso taitasi ma se avanoa mo le toefaafouina faaleagaga ma faaletino. Na tuuina mai e le Atua ia i tatou lenei aso faapitoa, e le mo mea faafiafia po o galuega o aso taitasi ae mo se malologa mai tiute, faapea foi i le faaletino ma le faaleagaga. (Russell M. Nelson, “O Le aso Sapati o se Aso Fiafia,” Liahona, Me 2015, 129)

E mafai faapea ona avea le Sapati ma se aso e malolo ai?

Sa faasoa mai le peresitene Russell M. Nelson i se aafiaga ma aoao mai:

Sa ou maua muamua lava le fiafia i le Sapati i le tele o tausaga ua mavae a o avea ma se fomai tipitipi pisi, sa ou iloa na avea le Sapati ma se aso mo le faamalologa faaletagata lava ia. E oo atu i le faaiuga o vaiaso taitasi, ua tiga ou lima mai le olo soo i le fasimoli, vai, ma se palasi e malo nifo. Na ou manaomia foi se malologa mai le mamafa o se galuega faigata. O le Aso Sa la na maua ai lena toomaga sa sili ona manaomia. …

I le faaEperu, o le uiga o le upu Sapati o le “malolo.” Na i ai lava le faamoemoega o le Sapati talu mai le Foafoaga o le lalolagi, ina ua uma aso e ono na galue ai, na malolo le Alii mai le galuega o le foafoaga. (Russell M. Nelson, “O Le aso Sapati o se Aso Fiafia,” Liahona, Me 2015, 129)

O le a le uiga o le tausia ma le fiafia o le Sapati ae “lē ma le ata leoleoā”? (Mataupu Faavae ma Feagaiga 59:15)

Na aoao mai Elder Richard G. Scott (1928–2015) o le Korama a Aposetolo e Toasefululua:

Ia faaeteete i aga malie. O le ‘ata leoleoa lē talafeagai o le a faatiga ai i le Agaga. O se uiga malie lelei e fesoasoani lea i faaaliga; ae o le ata leoleoa e leai. O se uiga malie o se ki lea e faasopoloa ai atugaluga o le olaga. (Richard G. Scott, “E Faapefea ona Maua Faaaliga ma Musumusuga mo Lou Lava Olaga Patino,” Liahona, Me 2012, 46)

Gaoioiga Faaopoopo e Aoao Ai

Aoao ia tausia le Aso Sapati ia paia

Afai na e faailoa atu ia Maria ma lana faaiuga pe taalo soka i le Aso Sa, i le faaiuga o le lesona mafaufau e fai atu i tagata aoga e mafaufau e tuuina atu le fautuaga ia Maria. E mafai e tagata aoga ona faasoa mai mea na latou aoaoina e uiga i le aso Sapati ma pe mafai faapefea e lena mea ona aafia ai a latou filifiliga. E mafai ona latou faatino pe talanoaina mea na latou aoaoina i ni vaega toalaiti.

“Ma le manatu tasi i lo’u mamalu” (Mataupu Faavae ma Feagaiga 59:1)

O lenei gaoioiga e mafai ona fesoasoani i tagata aoga e mafaufau loloto ai i le uiga o le manatu tasi i le mamalu o le Atua.

Faaali atu se ata o le Faaola. Valaaulia tagata aoga e fai se moto matagataga i le lima e tasi, tapuni le mata e tasi, ma tilotilo atu i le ata e ala i le avanoa laitiiti na fai e o latou lima. Fai atu i tagata aoga e faamatala mai le mea o loo latou vaaia. Ona valaaulia lea o le vasega e pupula le isi mata ma ta’u mai mea uma ua mafai nei ona latou iloa e mafai ona faalavelaveina ai i latou mai le taulai atu i le Faaola.

Valaaulia tagata aoga e faamatala mai pe mafai faapefea e lenei gaoioiga ona fesootai i le manatu tasi faaleagaga i le mamalu o le Atua. Valaaulia tagata aoga e faasoa mai ni auala e mafai ona latou aveesea ai mea faalavefau lea e mafai ona aveesea ai lo latou taula’iga mai le Faaola, aemaise lava i Lona aso paia.

“Aua e te … faia soo se mea faapena” (Mataupu Faavae ma Feagaiga 59:6)

Ina ua uma ona poloaiina le Au Paia e aua le gaoi, mulilua, pe fasioti tagata, sa faaopoopo e le Alii “pe e te faia soo se mea faapena” (Mataupu Faavae ma Feagaiga 59:6). Fesoasoani i tagata aoga e mafaufau i le uiga o lenei fasifuaitau ma le aafiaga e i ai i o tatou filifiliga. E mafai ona e fai i le vasega e talanoaina le uiga o le gaoi. Ona fai atu lea ia i latou e mafaufau i taga e le pei o le gaoi ae o “se mea faapena.“ E mafai foi ona e faia le mea lava lea e tasi mo le faia o le mulilua ma le fasioti tagata. Fesoasoani i tagata aoga ia iloa le puipuiga ua ofoina mai e le Atua ia i tatou e ala i le tuuina mai ia i tatou o nei poloaiga.

Faafetai i le Atua ma ta’uta’u atu Lona aao “i mea uma” (Mataupu Faavae ma Feagaiga 59:7, 21)

Mafaufau e faitau faatasi o se vasega le Mataupu Faavae ma Feagaiga 59:7, 21 ma vaavaai mo le poloaiga a le Alii. Valaaulia tagata aoga e mafaufau pe mafai faapefea ona aafia i tatou e ala i le faailoaina ai pea o le taitaiga ma faamanuiaga a le Atua i o tatou olaga. Tuu atu i tagata aoga se taimi e mafaufau loloto ai i faamanuiaga a le Atua i o latou olaga, ma fautuaina i latou e filifili ni auala patino e mafai ona latou faaalia ai lo latou lotofaafetai i le Atua.