Aso Sapati

O le Sapati o le aso o le Alii, ua faapitoa i vaiaso taitasi mo le malolo ma le tapuai. I taimi o le Feagaiga Tuai, sa tausia e tagata o le feagaiga a le Atua le Sapati i le aso lona fitu o le vaiaso aua sa malolo le Atua i le aso lona fitu, ina ua uma ona Ia foafoaina le lalolagi. Ina ua mavae le Toetu o Iesu Keriso, lea na tupu i le uluai aso o le vaiaso, sa amata ona tausia e soo o le Alii le Sapati i le uluai aso o le vaiaso, le Aso Sa.

Vaaiga Aoao

O le Sapati o le aso o le Alii, ua faapitoa i vaiaso taitasi mo le malolo ma le tapuai. I taimi o le Feagaiga Tuai, sa tausia e tagata o le feagaiga a le Atua le Sapati i le aso lona fitu o le vaiaso aua sa malolo le Atua i le aso lona fitu, ina ua uma ona Ia foafoaina le lalolagi (tagai Kenese 2:2). Ina ua mavae le Toetu o Iesu Keriso, lea na tupu i le uluai aso o le vaiaso, sa amata ona tausia e soo o le Alii le Sapati i le uluai aso o le vaiaso (tagai Mareko 16:2), na amata e le Alii ona tausia le Sapati i le aso muamua o le vaiaso, le Aso Sa (tagai Galuega 20:7).

Na faamamafa e le Alii le taua o le tausia o le Sapati i Tulafono e Sefulu ina ua Ia faapea mai, “Manatua le aso sapati, e te faapaiaina” (tagai Esoto 20:8--11). Na tausia e le Faaola lava ia le aso Sapati ia paia i Lana galuega i le olaga faitino (tagai i le Mataio 12:9–13; Luka 4:16; Ioane 5:9).

Na tau atu e le Alii ia Mose faapea o le tausia o le Sapati o se faailoga o le feagaiga i le va o Ia ma Lona nuu ma afai latou e tausia ia paia o le a latou iloa o Ia o lo latou Alii ma le Atua (tagai Esoto 31:13; tagai foi Esekielu 20:20).

I se faaaliga na tuuina atu ia Iosefa Samita i le 1831, na poloai ai le Alii:

“Ma ina ia mafai ona e tausi atili atoatoa oe lava i le lē pisia mai le lalolagi, ia e alu atu i le fale tatalo ma osi aʼe i luga au faamanatuga i loʼu aso paia; Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese” (Mataupu Faavae ma Feagaiga 59:9–10).

Faatasi ma lenei faaaliga, ua saili tagata o le Ekalesia e tausia ia paia le aso Sapati i le lotu ma i le aiga. I le lotu, e auai tagata i le sauniga paia o le faamanatuga, lea na faatuina e Iesu Keriso i le Paseka Mulimuli ma le taimi na Ia asia ai sa Nifae (tagai Mataio 26:26–28; Luka 22:19–20; 3 Nifae 18:1–12). I le aiga, e auai tagata i gaoioiga musuia e fesoasoani ia i latou e aoao ai le talalelei, faamalosia le faatuatua ia Iesu Keriso, ma fausia sootaga faaleaiga, ma faia auaunaga.

O le auai i na gaoioiga i le lotu ma le aiga, e mafai ai e tagata ona fausia ni tu masani faaleaiga o le a fesoasoani e faafaileleina ai le tele o augatupulaga faaleaiga e faatuatua i le Alii ma e taua le Sapati o se aso fiafia (tagai Isaia 58: 13--14).

Tusifaamaumau Ou Lagona Uunai

Oa mea e tatau ona ou faia ma oa mea e le tatau ona ou faia i le Sapati?

Na aoao mai Peresitene Russell M. Nelson: “Sa ou iloa mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga na talafeagai pe leai foi mo le Sapati, e na o lo’u fesili lava ia te au, ‘O le a le faailoga ou te manao e avatu i le Atua?’ O lena fesili e matua ta’u manino mai ai lava a’u filifiliga e uiga i le aso Sapati” ( “O le Sapati o se Aso Fiafia,” Liahona, Me 2015, 130).

O le a le faamoemoega o sauniga faamanatuga?

Na aoao mai Elder Dallin H. Oaks: “O le sauniga o le faamanatuga ua faia le lotu faamanatuga ma sauniga aupito sili ona paia ma taua i le Ekalesia. Ua na o le pau lea o le sauniga o le Sapati e mafai ona auai faatasi ai le aiga atoa. O lona anotusi e faaopoopo atu i le faamanatuga e tatau lava i taimi uma ona fuafuaina ma folasia atu e faataulai atu lo tatou gauai i le Togiola ma aoaoga a le Alii o Iesu Keriso.”(“Sauniga Faamanatuga ma le Faamanatuga,” Liahona, Nov. 2008, 17.