Tausia o le Aso Sapati

I le toatele o tagata, o le Aso Sa o se isi lava aso i le faaiuga o le vaiaso mo malologa faaopoopo ma faafiafiaga. Ae peitai, o faaaliga anamua ma nei ona po ua aoaoina ai le taua o le tausia o le aso Sapati ia paia. I itulau e 56–57 o le lomiga lenei, o loo talanoaina ai e Larry M. Gibson, fesoasoani muamua i le au peresitene aoao o Alii Talavou, le matafaioi taua o le tausia o le aso Sapati. Na saunoa mai Brother Gibson, “O le auala tatou te tausia ai le aso Sapati ia paia o se faailoaga i fafo o a tatou feagaiga e manatua pea Iesu Keriso.”

Ao aoao lau fanau e tausia le aso Sapati ia paia, o le a saunia i latou e maua le tele o faamanuiaga. E pei ona saunoa mai Brother Gibson, “Afai o le a tatou mulimuli ma ola ai i le tiute paia o le tausia o le aso Sapati ia paia, o le a faamanuiaina i tatou e le Alii, taitaiina i tatou, ma musuia i tatou i le foiaina o faafitauli e faafetaiaia i tatou.”

Fautuaga mo le Aoaoina o le Autalavou

Faitau faatasi le tusiga a Brother Gibson i itulau e 56–57. Ona talanoaina lea po o le a se mea e mafai ona faia e lou aiga i vaiaso taitasi e saunia ai e tausia le aso Sapati ia paia. I afiafi faaleaiga, e mafai ona outou usuina le pese “Si’i Malie Viiga Paia” (Viiga, nu. 81) po o se isi viiga e uiga i le Sapati, ma talanoaina mea e mafai ona faia e lou aiga i le Aso Sa ia tausia ai le aso Sapati ia paia.
Mafaufau e faitau faatasi ma lau fanau talavou le vaega o le tausia o le aso sapati i le Mo le Malosi o le Autalavou, e aofia ai mau o loo lisi atu i le faaiuga. E mafai ona outou sueina faatasi isi mau e uiga i le tausia o le aso Sapati ia paia ma talanoaina ia mataupu faavae i tua atu o le tausiaina o le aso Sapati.
Afai e maua mataupu aoaoina fou a le autalavou i lau gagana, e mafai ona e faaaogaina ia lesona e saili ai tusiga po o vitio i le tausia o le Sapati ia paia. Alu i le lds.org/youth/learn. E mafai ona fesoasoani lesona o Setema e faatatau i poloaiga mo lenei autu.

Fautuaga mo le Aoaoina o Tamaiti

Faitau le “Tiakono Fou Lava” i le Liahona o Oketopa 2013 ma talanoa i le taua o le faamanatuga i le tausiga o le aso Sapati ia paia.
Mafaufau e faitau le “O Se Lesona i le Migao” i le Liahona o Mati 2010; atonu e te manao foi e fai le gaoioiga e o faatasi ma le tusiga. Ia talanoaina faatasi ma lau fanau le ala e mafai ai ona fesoasoani le migao i le lotu e tausia ai le aso Sapati ia paia.
Ia talanoaina mea e mafai ona faia e lou aiga i le Aso Sa e faamamaluina ai le Alii. Atonu e te manao e faitau le “Filifili Nei Loa” mai le Liahona o Mati 2012 mo se faataitaiga o se tasi na tausia le aso Sapati ia paia i se tulaga faigata.
E mafai ona outou usuina faatasi ma lau fanau nisi o pese e faatatau i le Sapati, e aofia ai le pese “Aso Toonai” (Tusipese a Tamaiti, 105). Talanoa e uiga i auala e mafai ai e lou aiga ona faaaogaina le Aso Toonai ma isi aso o le vaiaso e saunia ai mo le Aso Sa.

Ata na tusia e Taia Morley