Tala Faamamai o le Talalelei
O Le Aiga Atua Paia
O Gordon B. Hinckley, peresitene lona 15 o le Ekalesia, na soifua mai i le aso 23 o Iuni, 1910. Sa faauuina o ia o se Aposetolo i le aso 5 o Oketopa, 1961, i le 51 o ona tausaga, ma i le aso 12 o Mati, 1995, sa lagolagoina ai o ia e avea ma Peresitene o le Ekalesia.
Mai le “O Le Tama, Alo, ma le Agaga Paia,” Liahona, Mat. 1998, 3–9; ua faalaugatasia ia mataitusi tetele ma faailoga.
O lo tatou talitonuga i le Atua le Tama Faavavau; i Lona Alo o Iesu Keriso; ma le Agaga Paia o le totonugalemu lea o la tatou faatuatuaga.
I le faatulagaina mai o elemene autu o la tatou aoaoga faavae, na tuu ai e le Perofeta o Iosefa Samita lenei mea o le numera tasi:
“Matou te talitonu i le Atua, le Tama Faavavau, ma Lona Alo, o Iesu Keriso, ma le Agaga Paia” (Mataupu Faavae o le Faatuatua 1:1).
[Na aoao mai foi le Perofeta]: “O le uluai mataupu faavae o le talalelei o le iloa ma le mautinoa o uiga o le Atua” (History of the Church, 6:305).
O nei folafolaga uiga ese ma le maoae e ogatasi lelei ma afioga a le Alii … : “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3). …
Le Atua le Tama Faavavau
Ou te talitonu e aunoa ma le taufaasese po o le masalosalo i le Atua, le Tama Faavavau. O Ia o lo’u Tama, o le Tama o lo’u agaga, ma le Tama o agaga o tagata uma. O Ia o le Foafoa silisiliese, o le Pule o le Atulaulau. … O Lona faatusa na foafoa ai le tagata. E patino o Ia. E moni o Ia. E toatasi o Ia. E i ai Sona “tino o aano ma ivi e mafai ona pai i ai e pei o le tagata” (MF&F 130:22).
O le tala i le foafoaga o le lalolagi, “Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou” (Kenese 1:26).
E i ai seisi gagana e sili atu ona manino? Mata e tuuitiitia ai le Atua, e pei ona faatalitonuina i tatou e nisi, faapea na foafoaina le tagata i Lona faatusa faapitoa? Nai lo lena, e tatau ona faaosofia i totonu o loto o alii ma tamaitai uma se agaga talisapaia sili atu mo ia lava o se atalii po o se afafine o le Atua.…
… Ao avea ma se faifeautalai, sa ou lauga atu [i Lonetona, Egelani, ae faalavelave mai se tagata faitio], “Aisea e te le tumau ai i le aoaoga faavae o le Tusi Paia lea e fai mai ai le Ioane (4:24), ‘O le Atua o le Agaga lava Ia’?”
Sa ou susueina la’u Tusi Paia i le fuaiupu na ia sii mai ma faitau atu ia te ia le fuaiupu atoa: “O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni.”
Sa ou fai atu, “E moni o le Atua o se agaga, ma e faapena foi oe, i se tuufaatasiga o le agaga ma le tino lea e avea ai oe ma se tagata ola, ma e faapena foi au.”
O i tatou taitoatasi o se tagata itulua o le vaega faaleagaga ma le vaega faaletino. E iloa uma lava le moni o le oti … , ma e iloa foi e i tatou taitoatasi o loo soifua le agaga i le avea ai ma se vaega o tagata taitoatasi ma o nisi taimi, i lalo o le fuafuaga paia ua mafai ai ona maua e ala i le taulaga a le Alo o le Atua, o le a i ai se toe faatasiga o le agaga ma le tino. O le tautinoga a Iesu faapea o le Atua e le o toe avea ma se agaga ua teena ai le i ai o Sona tino nai lo le faamatalaga lea o au o se agaga a o loo i ai foi ma se tino.
Ou te le faatusaina lou tino ma Lona tino i lona toe faaleleia, i lona tulaga, i lona matagofie ma le susulu. O Ia e faavavau. O lou tino e faaletino. Ae o le mea e na o le faateleina ai o lo’u faaaloalo mo Ia. … Ou te saili e alofa ia te Ia ma lo’u loto atoa, manatu, mafaufau, ma le malosi. E sili atu Lona poto nai lo le poto o tagata uma. … O Lona alofa e aofia ai Ana fanau uma, ma o Lana galuega ma Lona mamalu ina ia aumaia le tino ola pea ma le ola e faavavau o Ona atalii ma afafine… (tagai i le Mose 1:39). …
O Le Alii o Iesu Keriso
Ou te talitonu i le Alii o Iesu Keriso, le Alo o le Atua soifua e faavavau. Ou te talitonu ia te Ia o le Ulumatua a le Tama ma le Toatasi Na Fanaua e le Tama i le tino. Ou te talitonu ia te Ia o se tagata soifua, mavaevae mai Lona Tama.…
Ou te talitonu o Lona soifuaga faaletino o Ia o le tagata atoatoa e toatasi na savalia le lalolagi. Ou te talitonu o Ana upu ua i ai lena malamalama ma le upumoni lea, afai e usitaia, o le a faaolaina ai le lalolagi ma aumaia le faaeaga i tagata. Ou te talitonu o Lana perisitua ua i ai le pule paia—le mana e faamanuia ai, le mana e faamalolo ai, le mana e pulea ai ia mataupu faalelalolagi a le Atua, le mana e fusifusia ai i le lagi mea e fusifusia foi i luga o le lalolagi.
Ou te talitonu e ala i Lana taulaga togiola, o le tuuina atu o Lona soifua i luga o le mauga o Kalevaria, sa Ia puapuagatia ai mo agasala a tagata, ma aveesea mai ai ma i tatou le avega o le agasala pe afai tatou te lafoai ia mea leaga ma mulimuli ia te Ia. Ou te talitonu i le moni ma le mana o Lona Toetu. … Ou te talitonu e ala i Lana Togiola, … ua ofoina mai ai ia i tatou le meaalofa o le toetu mai le oti. Ou te talitonu atili e ala atu i lena taulaga o loo ua faalautele atu i alii ma tamaitai uma, atalii ma afafine uma o le Atua, le avanoa mo le ola e faavavau ma le faaeaga i le malo a lo tatou Tama, a o tatou… usiusitai i Ana poloaiga.
E leai se tasi ua silisili naua ua savalia le lalolagi. E leai se tasi ua na faia se taulaga e faatusalia pe na tuuina atu se faamanuiaga faapena. O Ia o le Faaola ma le Togiola o le lalolagi. Ou te talitonu ia te Ia. Ou te tautino atu Lona paia… Ou te alofa ia te Ia. Ou te tautala atu i Lona suafa i le faaaloalo ma le ofo. …
… Ua tau mai e tusitusiga Paia i [latou] na Ia faaalia o Ia lava i ai, ma i latou na Ia fetalai i ai i le avea ai ma se Alo o loo soifua ma ua toetu o le Atua. E faapena foi ona Ia faaali mai i lenei tisipenisione, ma o i latou o e na vaai ia te Ia na tautino mai:
“Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ma te tuu atu e uiga ia te ia: O loo soifua o ia!
“Aua sa ma vaai ia te ia, i le lima taumatau lava o le Atua; ma sa ma faalogo i le leo o molimau mai o ia o le Toatasi na Fanaua e le Tama—
“E faapea e mai ia te ia, ma ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua” (MF&F 76:22–24).
O le Keriso lenei lea ou te talitonu, ma o lea ou te molimau atu ai.
O Le Agaga Paia
E maua le malamalama mai le upu o tusitusiga paia, ma o lena molimau e sau mai le mana o le Agaga Paia. O se meaalofa, e paia ma matagofie, na tuuina mai e ala i le faaaliga mai le sui lona tolu o le Aiga Atua. Ou te talitonu i le Agaga Paia i le avea ai ma se peresona o agaga e nofoia se nofoaga faatasi ma le Tama ma le Alo, o nei tagata e toatolu e fatuina ai le Aiga Atua paia. …
Na mautinoa lava le iloaina o le Agaga Paia i aso anamua o se tasi o le Aiga Atua i le talanoaga i le va o Peteru ma Anania ina ua taofia e i laua se vaega o le tupe na maua mai le faatauina o se vaega o le fanua.
“A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga Paia … ?
“… Ua e le pepelo i tagata, a o le Atua” (Galuega 5:3–4).
O le Agaga Paia o le Fesoasoani [lea] na folafola mai e le Faaola o le o le a aoaoina Ona soo i mea uma ma faamanatuina mai mea uma… (tagai i le Ioane 14:26).
O le Agaga Paia o le Molimau o le Upumoni, o le e mafai ona aoao atu i tagata mea e le mafai ona latou aoao i le tasi ma le isi. … O se malamalama i le moni o le Tusi a Mamona ua folafola atu “i le mana o le Agaga Paia.” Na tautino atu e Moronae, “Ma o le mana o le Agaga Paia e mafai ona outou iloa ai le moni o mea uma lava” (Moronae 10:4–5).
Ou te talitonu o lenei mana, lenei meaalofa, ua avanoa mo i tatou i lenei vaitaimi.
Moni ma Patino
… Ou te talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia.
Sa ou papatiso i le suafa o i latou nei e toatolu. Sa ou faaipoipo i le suafa o i latou nei e toatolu. E leai sau fesili e uiga i lo latou tulaga moni ma lo latou tulaga taitoatasi. Na faaalia lena tulaga taitoatasi ina ua papatiso Iesu e Ioane i Ioritana. Sa tu i totonu o le vai le Alo o le Atua. Sa faalogoina le siufofoga a Lona Tama o folafolaina mai Lona tulaga paia faaleatalii, ma sa faaali mai le Agaga Paia i le tulaga o se lupe (tagai i le Mataio 3:16–17).
Ua ou iloa na fetalai mai Iesu ua faapea mai o i latou o e na vaai ia te Ia ua vaai i le Tama [tagai Ioane 14:9].Pe le tutusa ea lea mea i le toatele o atalii o e soo i ona matua?
Ina ua tatalo Iesu i le Tama, e mautinoa lava Na te le o tatalo ia te Ia Lava!
Lotogatasi Atoatoa
O i latou o ni tagata mavaevae, ae ua tasi i le faamoemoe ma le malosi.Ua latou lotogatasi ina ia tasi i le faataunuuina o le fuafuaga sili ma le paia o le faaolataga ma le faaeaga o fanau a le Atua.
… Sa aioi atu Keriso i Lona Tama e uiga i le au Aposetolo, lea na Ia alofagia, ua fetalai mai:
“E le faapito la’u tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua” (Ioane 17:20–21).
O le lotogatasi atoatoa lena i le va o le Tama, le Alo, ma le Agaga Paia lea e fusia ai nei tagata e toatolu i le tuufaatasiga o le Aiga Atua paia.
3 Nifae 11:15: Taitoatasi, saunia e Walter Rane, faaaloaloga o le Falemataaga o Talafaasolopito a le Ekalesia
Tatalo i Ketesemane, saunia e Del Parson