Mata e Mafai ona Ou Faitauina Lena Tusi?
Neil R. Cardon, Iuta, ISA
E tusa ma le 50 tausaga talu ai, sa ma talai ai ma la’u soa faifeautalai i tafatafa o le Iunivesite o Córdoba i Atenitina, sa valaaulia i maua e se alii talavou i totonu o lona fale mautotogi. Sa vave ona foliga mai sa latou valaauliaina ma ana uo i maua ina ia finau mai e uiga i le i ai o se Atua.
Ma te lei fia finau, o lea na ma ioe ai e feiloai i se taimi mulimuli ane e talanoaina ai la maua savali i se siosiomaga e siitia ai le aoaoina. Ina ua ma toe foi mai, na faamalamalama mai e le alii talavou le mafuaaga na te talitonu ai e leai se Atua. Na fai mai o ia na faia e le tagata le Atua ona o lona manao ina ia talitonu i se mea e sili atu, se mea ofoofogia.
Ina ua oo i lo ma taimi, sa ou fesili atu, “E faapefea ona e iloa e i ai se Iunaite Setete? Ou te molimau atu e uiga i lona moni ma fesili atu pe i ai nisi faamaoniga e faamaonia ai lona i ai. Na fai o ia sa ia faitau i ai i tusi ma nusipepa. Ona ou fesili atu lea pe sa ia talitonu i la’u molimau ma mea sa ia faitauina. Sa fai mai faamalosi o ia ioe na ia talitonu.
“O lona uiga la e le mafai ona tatou faafitia le molimau a i latou, e pei o aʼu, e sau mai le Iunaite Setete,” sa ou fai atu ai. “E le mafai foi ona tatou teena le molimau a i latou o e ua tusia e uiga i ai.” Na ioeina e le alii talavou.
Ona ou fesili atu lea, “E tusa la ma lenei manatu, e mafai ona tatou teena ia molimau a i latou o e na vaai i le Atua ma tusi e uiga i o latou aafiaga?” Sa ou faaali atu ia te ia le Tusi Paia, ma ta’u atu ia te ia o loo i ai i totonu ia molimau a alii ma tamaitai o e na vaai ma talanoa ma le Atua ma Iesu Keriso. Sa ou fesili atu pe mafai ona tatou teenaina ia molimau o loo i ai i le Tusi Paia, ma sa ia fai mai ma le musuā e leai.
Ona ou fesili atu lea, “O le a sou manatu e uiga i se tusi na tusia e ni tagata e ese mai ia i latou o i le Tusi Paia o e na vaai i lea lava Atua e tasi e pei o tusitala o le Tusi Paia? Sa ia tali mai e le o i ai se tusi faapena.
Na ma faaalia ia te ia le Tusi a Mamona ma aoao atu ia te ia lona faamoemoega. Sa ma molimau atu i le moni ma o loo fesootai mai pea le Atua e ala mai i perofeta soifua i le taimi nei.
I le te’i, na fai mai ai le alii talavou, “Ua mafai ona ou faafememeaiina ia faifeau uma mai isi ekalesia. O loo ia te oulua se mea ou te lei faalogo ai lava muamua. Mata e mafai ona ou faitauina lena tusi?” Sa ma tuuina atu ia te ia le tusi ma molimau atu e uiga i le alofa o le Atua mo Ana fanau.
Talu ai ona o le a faaiuina le semesa, sa le mafai ona ma toe asiasi i lenei alii talavou a o lei foi atu o ia i lona aiga i Polivia. Ae ui i lea, sa ou tatalo o le a ia faitauina le tusi ma maua se molimau.
I le 2002 sa valaauina a’u e avea ma se peresitene o le paranesi faa-Sipaniolo i le Nofoaga Autu o Aoaoga mo Faifeautalai i Provo. I se tasi Aso Sa sa ou faamatalaina ai le tala lenei i faifeautalai. Ina ua maea sa tau mai ia te au e se faifeautalai mai Polivia faapea na ia faalogo o faamatalaina e se tamaloa matua i lana siteki le tala o lona liua—le tala lava lea e tasi sa ou faamatalaina iinei.
Sa faatumulia o’u mata i loimata.Ina ua mavae le 40 tausaga, sa ou mauaina se tali o a’u tatalo e uiga i le alii talavou mai Polivia. Ua ia iloaina o loo i ai se Atua ma Lana fuafuaga sili o le fiafia. Ou te iloa o le a i ai se aso ma te toe feiloai ai, ma o le a ma olioli faatasi ma ia i le talalelei.