Savali a Faiaoga Asiasi

O Le Misiona Paia a Iesu Keriso: Faataitaiga

Ia suesue ma le agaga tatalo i lenei anomea ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te leoleoina e ala i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

O se vaega lenei o se faasologa o Savali a Faiaoga Asiasi e faaautu i le vaega o le misiona a le Faaola.

A o tatou malamalama o Iesu Keriso o lo tatou faataitaiga i mea uma, e mafai ona tatou faateleina lo tatou naunau e mulimuli ia te Ia. Ua tumu tusitusiga paia i faamalosiauga mo i tatou e mulimuli i tulagavae o Keriso. Na fetalai atu Keriso, i le au sa Nifae, “Ona o galuega na outou vaai na ou faia o mea ia tou te faia foi” (3 Nifae 27: 21). Na fetalai atu Iesu ia Tomasi, “O a’u nei le ala, ma le upu moni, ma le ola: e le alu atu lava se tasi i le tama, pe a le ui mai ia te a’u” (Ioane 14:6).

I lenei vaitaimi ua faamanatu mai e o tatou taitai ia i tatou e faatuina le Faaola e avea ma o tatou faataitaiga. Na saunoa mai Linda K. Burton, peresitene aoao o le Aualofa, “A oo ina tusia i le taele o o tatou loto taitoatasi le aoaoga faavae o le togiola, ona amata lea ona avea i tatou ma ituaiga o tagata e finagalo ai le Alii.”¹

Na saunoa mai peresitene Thomas S. Monson, “O lo tatou Alii ma le Faaola, o Iesu Keriso, o lo tatou Faataitaiga ma lo tatou malosiaga.”²

Ia tatou filifili e faalatalata atili atu ia Iesu Keriso, ia usiusitai i Ana poloaiga, ma taumafai e toe foi atu i lo tatou Tama Faalelagi.

Mai Tusitusiga Paia

2 Nifae 31:16; Alema 17:11; 3 Nifae 27:27; Moronae 7:48

Mai lo Tatou Talafaasolopito

“Sa Ia faailogaina le ala ma taitai atu ai le ala,” na tusia e Eliza R. Snow, o le peresitene aoao lona lua o le Aualofa, e uiga i le galuega faaletino a Iesu Keriso.³ Na auauna atu o Ia i tagata—taitoatasi. Sa Ia aoao mai e tatau ona tatou tuua le ivasefulu ma le iva ae laveai le tasi ua se (tagai i le Luka 15:3–7).Na Ia faamaloloina ma aoaoina tagata taitoatasi, e oo lava i le faaavanoaina o le taimi mo tagata taitoatasi o i le motu o tagata e 2,500 (tagai i le 3 Nifae 11:13–15; 17:25).

I tamaitai o le Au Paia o Aso e Gata Ai, na saunoa mai i ai, Peresitene Dieter F. Uchtdorf, Fesoasoani Lua i le Au Peresitene Sili, e faapea: “E tuuina atu e outou na tuafafine ofoofogia galuega alofa i isi mo mafuaaga e sili mamao atu nai lo manaoga mo manuia faaletagata lava ia. Ua outou faaaoao ai i le Faaola. … O Lona finagalo ia fesoasoani atu i isi.”⁴

Faamatalaga

1. Linda K. Burton, “Pe Ua Tusia ea i o Tatou Loto le Faatuatua i le Togiola a Iesu Keriso?” Liahona, Nov. 2012, 114.

2. Thomas S. Monson, “Faafetaiaia o Lui o le Olaga,” Liahona, Ian. 1994, 82.

3. “Ma’eu le Poto ma le Alofa,” Viiga, nu. 109.

4. Dieter F. Uchtdorf, “O Le Fiafia, O Lo Outou Talatuu,” Liahona, Nov. 2008, 120.

O Le A se Mea e Mafai Ona Ou Faia?

1. Aisea ma e faapefea ona avea Iesu Keriso ma ou faataitaiga?

2. E mafai faapefea e le auauna atu i uso o ou asia ona fesoasoani ia te au e mulimuli i le Faaola?

O Le Toetu, saunia e Harry Anderson