Seia Tatou Toe Feiloai
E mafai ona Ia Vaai ia te Au?
E alala le tusitala i Iuta, ISA.
Na tamoe mai Tanielu i le fanua ma fesili mai ia te au, “Afai ou te tilotilo i luga o le lagi ma ataata, mata e toe ataata mai le Atua ia te au?”
O le taeao lea ao lei auai atu lou atalii, o Tanielu, i lona aso muamua i le aoga faataitai, ma sa i ai ni nai ona popolega e uiga i le tuua o le fale e auai i le aoga. Sa ou manao ina ia mautinoa na ia lagona le saunia e fetaiai ma luitau i le “lalolagi moni.” Sa ou fai atu ia Tanielu o le a ou matua misia lava o ia a o aluese atu. Sa ou faamautinoa atu ia te ia e ui lava sa le mafai ona ou i ai faatasi ma ia i le aoga, ae na te le manaomia lava ona lagona le fefe po o le tuuatoatasi aua o le a puipuia o ia e lona Tama oi le Lagi. Sa ou faamanatu atu ia te ia e mafai ona ia tatalo i soo se taimi, i soo se mea ma o le a faafofoga mai le Atua ia te ia i taimi uma.
A o ou talanoa atu, sa faalogo ma le totoa ia Tanielu, lea e lei atoa lelei lona lima tausaga. Ina ua mavae ni nai manatu sa ia tali mai ai, “Mata e mafai Ona Ia vaai mai ia te au pe a ou i ai i lo’u fale?”
“Ioe,” sa ou faamautinoa atu ia te ia.
“Mata e mafai ona Ia vaai mai ia te au pe a ou i ai i fafo?” o lana fesili mai lea.
“Ioe, e mafai ona Ia vaai mai ia te oe i taimi uma,” o lau tali atu lea.
Faatasi ai ma se vaaiga o le fiafia, na tamoe vave atu Tanielu i tuafale. Sa ou taotao atu lava i ona tua. Sa tilotilo atu i luga Tanielu i le lagi lanumoana e leai ni ao ma fesili mai, “Afai ou te tilotilo i luga o le lagi ma ataata atu, mata Na te vaai mai ia te au ma Ia toe ataata mai?”
Na le mafai ona ou tautala ona o le mea na ia fai mai ai na ou lagona ai le ootia tele, ae na luelue atu lou ulu, “Ioe!”
Sa tilotilo atu pea i luga, i le taimi la lea ua tau pulapula ona mata, ma se faatuatua atoatoa faatamaitiiti, na fesili mai ai Tanielu ma le manatunatu, “E mafai ona ou Vaai ia te Ia?”
“Atonu e mafai ona e vaai ia te Ia,” o lau tali atu lea, “ae o le a e iloa o loo i ai o Ia iina aua o le a e lagonaina Lana ataata i totonu o lou loto.”
Na tu Tanielu ma ataata a o ia tilotilo atu i le lagi. Mai le vaaiga ma le toafilemu i ona foliga pei se agelu, na ou iloa ai o loo ia lagonaina lena ataata faalelagi i le loloto o lona agaga.
Mai gutu o tamameamea tatou te aoao ai le tele o mea e uiga i le faatuatua mama—le faatuatua tatou te faamoemoe o le a latou pipii atu i ai e faavavau. E mautinoa lava lo latou iloaina e ui e lelei le olaga, ae e faigata i nisi taimi. Matou te tatalo ina ia fesoasoani lo latou faatuatua ia i latou e onosaia [na taimi faigata].
Pe a oo mai taimi faigata i lou olaga, ou te manatua le faataitaiga a Tanielu, ma faatasi ai ma le faatuatua faapei o se tamaitiiti lea e mafai ai e se tagata matua ona mauaina i totonu, ma o le a ou vaavaai atu foi agai i le lagi ma fesili atu, “Mata e Mafai Ona Ia Vaai mai ia te Au?” Ona, faapei lea o Tanielu, ou te mafaufau ai lemu, “Mata E Mafai Ona Ou Vaai ia te Ia?” A o ou mafaufau i le tele o Lona alofa mutimutivale agamalu i lo’u olaga, ua faamautuina mai ai e le Agaga Paia lou lagonaina moni lava o le alofa o le Tama Faalelagi. O le toe faafouina o lou faatuatua ma le uunaiga i le faamoemoe, ua faamautinoa mai ai e le Agaga ia te au o le a le mavae ma au le alofa o le Tama Faalelagi.
Ata na tusia e Welden C. Andersen; tuaata na saunia e Craig Dimond