Moronae 10:32

O le autu o le Mutuale o lenei tausaga o se valaaulia mai ia Moronae e mulimuli i le Faaola.

32 Ioe, o mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso; ma afai tou te atoatoa ia Keriso e ala i le alofa tunoa o le Atua, e leai se ala e mafai ai ona outou faafitia le mana o le Atua.

O Mai ia Keriso

O loo i ai i tusitusiga paia le tele o valaaulia e o mai ia Keriso.Sue ia nai faataitaiga o loo lisiina i lalo. O le a le mea ua aoaoina ai oe e nei mau e uiga i faamanuiaga o le o mai i le Faaola? E mafai ona e mauaina nisi mau i lenei valaaulia?

Ina ia Faaatoatoaina ia te Ia

“E le tatau ona tatou lotovaivai pe afai ua foliga mai ua matua faigata ma le maea a tatou taumafaiga faamaoni agai atu i le atoatoaga. O le atoatoa o loo faatalitali i ai. E oo mai lona atoatoa pe a maea le Toetu ma e na o le Alii lava e ala ai. O loo faatalitali mo i latou uma lava o e alolofa ia te ia ma tausia ana poloaiga.”

Elder Russell M. Nelson o le Korama a Aposetolo e Toasefululua, “Atoatoaga O Lo o Faatalitali,” Liahona, Ian. 1996, 105.

Alofa i le Atua

E faapefea ona e faaali atu i le Tama Faalelagi e te alofa ia te Ia? Mafaufau i manatu nei ma mafaufau nisi ou lava manatu. I lau api o talaaga, tusi ai e uiga i le mea o le a e faia.

Tausi poloaiga.
Alofa ma auauna atu i isi.
Faataunuu ia tiutetauave faale-ekalesia.
Tatalo ma le faamaoni.

Ua Lava Lona Alofa Tunoa mo Outou

“O nisi Kerisiano ua latou tuuaia le Au Paia o Aso e Gata Ai… ua faafitia le alofa tunoa o le Atua e ala i le tautino atu e mafai ona latou sailia lo latou lava faaolataga. Tatou te tali atu i lenei tuuaiga … , ‘Ona ua matou galulue maelega… e faatauanau atu ai ia matou fanau… ia talitonu ia Keriso, ma ia faalelei ma i le Atua; ona ua matou iloa e faaolaina i tatou i le alofa tunoa, pe a uma mea uma e mafai ona tatou faia’ (2 Ni. 25:23). Ma o le a le uiga ‘o mea uma tatou te mafaia’? E mautinoa lava e aofia ai le salamo (tagai i le Alema 24:11) ma le papatisoga, tausia o poloaiga, ma le tumau e oo i le iuga.”

Elder Dallin H. Oaks o le Korama a Aposetolo e Toasefululua, “Pe ua Faaolaina Oe?” Liahona, Iulai 1998, 70.

Alofa tunoa

“O le upu alofa tunoa, e pei ona faaaogaina i totonu o tusitusiga paia e faasino tonu lava i le fesoasoaniga faalelagi ma le malosi tatou te maua e ala i le Togiola a le Alii o Iesu Keriso.”

Faamaoni i le Faatuatua: O Se Tusitaiala o le Talalelei (2004), 18.

Faaatoatoa ia Keriso

Atoatoa, e pei ona faaaogaina i tusitusiga paia, o lona uiga “atoa, atoatoa, ua faatupuina le atoatoa; amiotonu atoatoa. E mafai foi ona faatatau le atoatoa i le aunoa ma se agasala po o se leaga. E nao Keriso lava na atoatoa ona lelei. O soo moni o Keriso e mafai ona faaatoatoaina e ala i lona alofa tunoa ma lana togiola” (Taiala i Tusitusiga Paia, “Atoatoa,” scriptures.lds.org).

Leai se ala

Leai se ala—E leai se ala pe leai se mea.

Kalafi na saunia e le The Design Farm