Faafetaiaia o le Lumanai ma le Faatuatua & Faamoemoe
Mai se saunoaga na tuuina atu i le Iunivesite o Polika Iaga–Idaho i le aso 6 o Aperila, 2012. Mo le tusiga atoa i le gagana Peretania, asiasi i le web.byui.edu/devotionalsandspeeches/speeches.aspx.
Ia manatua i taimi uma, o Iesu Keriso—le Foafoa o le atulaulau, o le mataisau o lo tatou faaolataga, ma o le ulu o lenei Ekalesia—e pule aoao.
O tulaga i le lalolagi e le o mautonu ma matautia, ma o le tamaoaiga o le lalolagi e le o mautu ma le mautinoa. O tulaga faatauaina faapelepele o le olaga, saolotoga, ma le sailiga o le fiafia o loo osofaia e i latou o e o mananao e faatapulaaina le faitalia ma faia ina ia tatou ola faalagolago nai lo le uunaia o i tatou e faaaoga o tatou tomai ma taleni e fatuai ai ni auala fou ma mananaia o le faia o mea.
O tulaga faatonuina o le ola mama ua toilalo. O loo ua osofaia le aiga ma ua solovī. O le alofa o i loto o alii ma tamaitai ua faasolo ina maalili, ma ua le moni (tagai i le Mataio 24:12; Roma 1:31). O loo i ai se faaletonu faifai pea i le amio sa’o, faamaoni, ma le amiotonu o faaupufai, pisinisi, ma isi taitai. Ua faateleina ia taua ma tala o taua i totonu o atunuu ma talitonuga. Ma e sili atu ona matautia nai lo soo se taua o tauina i le va o le lelei ma le leaga—i le va o le Faaola ma Lana autau o le malamalama ma Satani ma ana au leaga o le pogisa—mo agaga o le fanau a le Atua.
Na faamatalaina e Peresitene Gordon B. Hinckley (1910–2008) le lalolagi lea o le a ulu atu i ai ia tagata talavou o aso nei ina ua ia saunoa: “Ua tatou ola i se vaitau ua faia ai e e faasaua mea matautia ma le mataga. Ua tatou i se vaitau o taua. Ua tatou ola i se vaitau o le faasausili. Ua tatou ola i se vaitau o le amioleaga, o ata ma tusi mataga, o le ola le mama. O agasala uma lava a Sotoma ma Komoro ua maua i o tatou nuu ma alalafaga. E lei fetaiai o tatou tupulaga talavou ma se luitau sili atu [nai lo lenei]. Tatou te lei vaai manino muamua faapenei i foliga faatiapolo.”1
E le tatau ona tatou ofo i nei tulaga o o tatou taimi aua na molimau ia tusitusiga paia ma valoaga e faatatau i o tatou aso i le mea o le a tupu i le lalolagi pe afai e fulitua tagata i le Atua. O le a tatou aafia i le tele o mea lē lelei, aua o loo faaauau pea taumafaiga a le tiapolo e faataunuu ana fuafuaga faatiapolo. I le taimi lava e tasi, o perofeta anamua o e na vaai i o tatou aso, o e na vaai i tupulaga talavou o aso nei, na iloa o le taimi lenei o le a avea ma se vaitaimi o le malamalama ma le ofoofogia e lei oo lava i ai le lalolagi.
A o ou saunia lenei savali, sa ou talosaga atu mo le taitaiga ina iloa ai po o le a le savali o loo finagalo lo tatou Tama Faalelagi tatou te faasoa atu. Na oo mai i lou mafaufau ia upu toafimalie ma faamautinoa na saunoa ai le Alii i le Perofeta o Iosefa Samita: “Ia fiafia, ona o le a Ou taitaia outou i le ala. O le malo ua ia outou … , ma o oa o le faavavau ua ia outou ia” (MF&F 78:18).
Suia le Fefe i le Faatuatua
O le mea ou te talitonu e finagalo le Alii ou te fai atu e faapea e tatau ona tatou suitulagaina le fefe i le faatuatua—faatuatua i le Atua ma le mana o le Togiola a le Alii o Iesu Keriso.
E mafai ona ou manatua i le avea ai ma se tama talavou e 13 tausaga le matua o toe foi mai i le fale mai le sauniga perisitua i le Aso Sa, 7 o Tesema, 1941, e iloa ai mai ou matua faatoa uma lava ona pomuina e Iapani ia Pearl Habour. O lenei mea na uunaia ai le Iunaite Setete i se taua o le lalolagi lea ua leva ona vevela i Europa mo le lua tausaga. Sa foliga mai o le olaga sa matou iloaina o le a faaiuina. Sa tele le le mautonu a o aveina atu le toatele o alii talavou i le tautua faamiliteli. Ae peitai, i le taimi lava lenei, i le lotolotoi o feeseeseaiga uma, tauiviga, ma faatosinaga leaga i le lalolagi, sa i ai lava le tele o le lelei.
A o tatou mafaufau e uiga i le lumanai, e tatau ona faatumulia i tatou i le faatuatua ma le faamoemoe. Ia manatua pea o Iesu Keriso—le Foafoa o le atulaulau, o le mataisau o lo tatou faaolataga, ma o le ulu o lenei Ekalesia—e pule aoao. Na te le faatagaina lava Lana galuega ina ia toilalo. O le a Ia manumalo i le pogisa ma le leaga uma. Ma sa Ia valaaulia i tatou o tagata uma, o Lana Ekalesia ma isi o e faamaoni i le loto, e auai i le taua mo agaga o le fanau a le Atua. Faatasi ai ma isi mea uma o le a tatou faia i le olaga, e tatau foi ona tuuto atu ma faapaiaina o tatou loto, manatu, mafaufau, ma le malosi i Lana galuega, ma savavali i le faatuatua ma galulue faatasi ai ma le talitonuga maumaututu.
Faafetaiaia o le lumanai ma le fiafia. Ou te talitonu ua tatou tutu nei i le amataga o se vaitau fou o le tuputupu ae, tamaoaiga, ma mea e tele. O le leai o se faalavelave po o se faafitauli faavaomalo e lei mafaufauina, ou te manatu ai o nai tausaga a sau o le a aumaia se toe aliae mai i le tamaoaiga o le lalolagi e pei ona faia mea fou i fesootaiga, vailaau faafomai, malosi, femalagaaiga, fisiki, tekinolosi faakomepiuta, ma isi vaega o taumafaiga.
O le toatele o nei mea ua maua, e pei ona o le taimi ua tuanai, o le a avea ma taunuuga o le Agaga o musumusu mai ni malamalamaaga ma faamalamalamaina ai mafaufau o tagata taitoatasi o sailia le upu moni. O nei mea ua maua ma tekinolosi fou ma faaleleia o le a oo mai ai ni avanoa o ni galuega fou ma le manuia mo i latou o e galulue malosi ma aemaise lava mo i latou o e taumafai e tausi i poloaiga a le Atua. O le tulaga lea sa i ai i isi vaitau taua o le tuputupu ae faaletamaoaiga o le faaleatunuu ma faavaomalo.
E le gata i lea, o le tele o nei mea ua maua o le a faia e fesoasoani e aumai ai le faamoemoega ma galuega a le Atua ma ia faatelevaveina ai, e aofia ai le galuega faafaifeautalai, o le fausiaina o Lona malo i le lalolagi i aso nei.
Fai Lau Vaega
A o lei Afio Mai Faalua le Faaola—ma e tusa ai ma Lana taimi paia—e tatau ona ave le talalelei i atunuu uma, ituaiga, gagana, ma tagata seia oo ina faatumulia ai le lalolagi atoa. E mafai ona outou manatua upu faaperofeta a le Perofeta o Iosefa Samita: “E leai se lima palapala e mafai ona taofia le galuega mai le agai atu i luma; e mafai ona matamataita sauaga, e mafai ona tuufaatasi le au faatupu faalavelave, e mafai ona faapotopoto autau, e mafai ona osofai mai talapepelo taufaaleaga, ae o le a agai pea i luma ma le le fefe le upumoni a le Atua, e viia, ma tutoatasi, seia oo atu i konetineta uma, ma asia itulagi uma, faatumulia ai atunuu uma, ma lagona e taliga uma, seia oo ina faataunuuina faamoemoega o le Atua, ma fetalai mai ai le Ieova Silisili ua mae’a le galuega.”2
Ao aveina atu le talalelei i le faitau piliona o agaga o fiaai faaleagaga, o le a faataunuuina vavega e ala i aao o le Alii O faifeautalai o le toatele o aganuu o le a auauna atu i le Alii i le lalolagi atoa. O le a fausia falelotu fou ma le tele o nisi malumalu ina ia faamanuiaina le Au Paia, e pei ona valoia e faatatau i le tuputupu ae o le Ekalesia ao lei oo i le meleniuma.
Atonu e te fesili, “O fea o le a aumai ai ia punaoa tautupe lea o le a faatupe ai lenei tuputupu ae? O le a aumai punaoa mai tagata faamaoni e ala i a latou sefuluai ma taulaga. Ao tatou faia la tatou vaega o le a faamanuiaina i tatou e le Alii i le manuia ma le poto e faataulai atu ai o tatou mafaufau i mea e sili ona taua i le olaga: “Ae ia outou muai saili le malo o le Atua, ma lana amiotonu; ona faaopoopoina atu lea o nei mea uma ia te outou” (Mataio 6:33).
O lea ona ua toe o se vaitau, atonu o se vaitau puupuu, o le a foliga mai ai e pei ua toina moni mai ai lava pupuni o le lagi ina ia “silisili ona tele” (Malaki 3:10).
Ou te talitonu o le toatele o talavou matutua o le taimi nei o le a auai malosi i faamanuiaga faaletino pe afai latou te tausia poloaiga a le Alii. Faatasi ai ma le manuia o le a oo mai ai ma se luitau tulagaese—o se suega o le a tofotofo ai le toatele i o latou gafatia faaleagaga. Ina ua e laa i totonu o lenei lalolagi fou o le tamaoaiga ma faaauai i le liua ai o lou tomai ma aoaoga i le manuia tautupe, e tatau lava ona e iloa le eseesega i le va o manaoga ma mea e manaomia.
Saili muamua le malo o le Atua
O le a e maua ni filifiliga se lua. Mata o ou naunautaiga e fausia ma maua ia faamanuiaga a le Alii e mo le faamalieina faaletagata lava ia, mo le aloaiaina e tagata, ma mo le malosi, uunaiga, ma le faateleina o lou lava malosi po o taua? Pe o lou naunautaiga ea e mo le faamamaluina o le Atua, e galulue e fesoasoani i le aumaia o le tuputupu ae ma le faalauteleina o Lana Ekalesia?
O i latou o e saili ia ‘oa e fausia ai o latou lava uiga faaletagata o le a maseesee a latou ‘oa ma o le a le mafai ona taofia i latou i aso o lo outou mativa (tagai i le Helamana 13:31). O le manuia o o latou agaga o le a i ai i se tulaga lamatia tele. Na lapataia i tatou e Iakopo, o le uso laitiiti usiusitai o Nifae:
Ma ua fiafia tele mai le aao o le Atua i luga o outou, ua outou maua ai oloa e tele; ma ona ua maua e ni isi o outou ni oloa e sili atu ona tele nai lo o outou uso o lea ua faafefeteina ai outou i le faamaualuluga o o outou loto, ma outou ofu i ua maaa ma ulu maualuluga ona o le taugata o o outou ofu, ma outou sauaina o outou uso ona o lo outou manatu ua outou sili atu nai lo i latou.
“… Tou te manatu ea ua taʼuamamāina outou e le Atua i lenei mea? Faauta, ou te fai atu ia te outou, E leai. Ae ua taʼusalaina outou e ia, ma afai tou te faia pea nei mea, o le a vave ona oo mai o ana faamasinoga ia te outou.
“… Aua le tuua lenei faamaualuga o o outou loto e faaumatia ai o outou agaga!” (Iakopo 2:13, 14, 16).
Ona tuu lea e Iakopo o lo tatou naunautaiga ia maua le oa i le tulaga e tatau ai i se folafolaga:
“Peitai ae tou te lei saili mo le oa, ia outou saili mo le malo o le Atua.
“Ma pe a uma ona outou maua o se faamoemoe ia Keriso o le a outou maua oa, pe afai tou te sailia, ma ia outou saili e fai ai mea lelei—e faaoofu ai e ua le lavalava, ma fafaga ai e ua fia aai, ma faasaoloto e ua faatagataotauaina, ma avatu ai le fesoasoani i e ua mamai ma puapuagatia” (Iakopo 2:18–19).
E le o faapea mai le Alii ia i tatou e le tatau ona tatou mauoa po o le mauoa o se agasala. Nai lo lena, Na te faamanuiaina pea Ana fanau usiusitai. Ae o loo Ia ta’u mai ia i tatou e tatau ona tatou saili ia mauoa pe manuia pe a uma ona tatou saili, maua, ma auauna atu ia te Ia. Talu ai, ona o loo lelei o tatou loto, ona e faasilisili ma faatauaina lo tatou alolofa ia te Ia, o le a tatou filifili ai e faaagaoioi a tatou oa ua tatou maua i le fausiaina o Lona malo.
Afai e te filifili e saili i oa mo le manuia o oa, o le a e le taunuu. O le a le faamalieina lava oe. O le a leai sau mea e maua, o le a le maua le fiafia moni ma le olioli tumau.
O le tofotofoina o lo outou faatuatua i nai tausaga e sosoo ai e le faapea ona ua e le mauaina ni mea faaletino o lenei lalolagi. Ae o le filifilia o se mea e fai i faamanuiaga faaletino na e mauaina.
I tupulaga talavou laiti o le vaitaimi lenei, na saunoa ai Peresitene Ezra Taft Benson (1899–1994):
“Mo le toeitiiti ono afe tausaga, na faapolopoloina ai oe e le Atua e te oo mai i aso amuli a o lumanai le afio mai faalua o le Alii. …
“… Na faapolopolo e le Alii mo le vaitaimi mulimuli nisi o ana fanau aupito malolosi, o e o le a tauaveina ma le manumalo le malo.”3
Na saunoa mai Peresitene Thomas S. Monson, “O outou o nisi o fanau aupito sili ona malolosi a lo tatou Tama Faalelagi, ma sa ia faapolopoloina outou e o mai i lenei lalolagi ‘i se taimi faapenei’ [Eseta 4:14].”4
O le avea ma se vaega taua o le “galuega ofoofogia ma le mea e ofo ai” (2 Nifae 25:17) o nei aso e gata ai, e tatau ai ona gauai atu o tatou loto i le Atua, ma tofatumoanaina i Lona finagalo. Ao outou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma … taumamafa fiafia i le afioga a Keriso” (2 Nifae 31:20), saili ma le filiga, tatalo e le aunoa, ma talitonu, ma e pei ona folafola mai le Alii, “o le a galulue faatasi mea uma mo lo outou lelei” (MF&F 90:24).
Faapaia ma Faamanuiaina
Ou te uunaia outou ina ia faia se tautinoga ia te oe lava ma le Tama Faalelagi e tuuto atu lou ola ma faapaiaina ou taimi ma taleni i le fausiaina o le Ekalesia a Iesu Keriso e saunia ai mo le Afio Mai Faalua o le Faaola. Ia tuu atu i faamoemoega o ou mafaufauga ma amioga e faamamaluina ai le Atua ma faamanuia ai o outou uso a tagata. Ia uunaia oe e lenei manao e faafeiloai ma le naunautai ia taeao fou taitasi, ma ia musuiaina ou manatu ma amioga i le aluga o aso taitasi.
Afai e te faia lenei mea, o le a faamanuiaina oe i le lotolotoi o se lalolagi ua vave ona leiloa lona ala, ma o le a outou maua ma e pele ia te oe le saogalemu ma le fiafia. E le faapea o le a e le feagai ai ma faigata ma tofotofoga, ae o lona uiga o le a e maua le malosi faaleagaga e taulima ai i latou ma le faatuatua ma faalagolago i le Alii.
O le faamoemoega o la’u savali o le fesoasoani lea ia te oe e vaai faalemafaufau atu i lou lumanai. Ia maua le faatuatua ma le faamoemoe mo le lumanai manuia o loo outou feagai ai. O alii talavou o ni tamā o le lumanai; o tamaitai talavou o ni tina ma e faafaileleina o le lumanai. I le tuufaatasia ua avea ai outou “o se tupulaga filifilia, o se perisitua tau tupu, o se malo paia, o se nuu faapitoa ma tulaga ese” (1 Peteru 2:9).
Mo alii ma tamaitai uma, o se tasi o au mea e sili ona faamuamua o le sailia lea o sou soa faavavau pe afai e te lei maua lava. O le faaipoipoga i le malumalu o le a tuuina atu ai ia te oe se soa e fesoasoani i lou tumau ai i le ala sa’o lea e taitai atu ai i le afioaga o lo tatou Tama Faalelagi ma le Alii o Iesu Keriso. E tatau ona faia la tatou vaega o le faaauau pea ona sauniuni mo le Afio Mai Faalua.
Ata na saunia e Christina Smith
Togiola Paia saunia e Simon Dewey © Altius Fine Arts