Tumau ma le Lelei
Mai se lauga, “That’s Life,” o le faigalotu na tuuina atu i le BYU–Hawaii i le aso 30 o Oketopa, 2012.Mo le tusiga atoa i le gagana Peretania, asiasi i le devotional.byuh.edu/archive.
E le tatau ona tatou faamoemoe i le Alii e aveese o tatou luitau ona ua tatou folafola atu ia te Ia o le a tatou faamaoni i taimi uma pe afai Na te faia. Nai lo lena, ia tatou tumau ma le lelei, ona faamanuiaina ai lea o i tatou.
O le ata o le faaolataga o se fuafuaga matagofie, ma o se vaega o lena fuafuaga e aofia ai le faatoilaloina o faafitauli lea o nisi taimi e faalavelave i o tatou ala ma taofia i tatou mai le faataunuuina o tatou faamoemoega ma miti. Tatou te fetaiai uma ma faalavelave i le aluga o tatou taimi i le lalolagi. O nisi e laiti ao nisi e tele.
Atonu o se faafitauli laitiiti le uma o le penisini i luga o se auala pisi. O se faafitauli tele atonu o le maliu lea o se tasi e pele, o se faalavelave na pipili ai se tasi, po o se faalavelave faaleaiga. O nisi o faafitauli tatou te aumaia ia i tatou lava e ala i le le usiusitai i tulafono a le Atua po o tagata. O nisi e le o se tatou mafuaaga e oo mai ai i o tatou luga. Ou te masalo o le toatele o i tatou ua oo i le mea e mafai ona faaupuina o ni “mea le lelei o loo tutupu” o le olaga. Soo se tasi na taalo i se taaloga lea e aofia ai se polo na te silafia mea uma e faatatau i le lelei o le fiti o le polo. O se vaega o le taaloga. E le taumateina le tele po o le fai faafia.
O se tagata taalo lelei e na te silafiaina o fiti le lelei o se vaega o le olaga ma e taumafai ona faaauau pea ona ola ma le faatuatua ma le lototele. Ina ia tumau faamaoni i lo tatou naunau e toe nonofo faatasi ma le Tama Faalelagi, e tatau ona tatou sailia se auala e galulue ai e ala atu i faafitauli ma ia iloa le mea e sili ona taua i le olaga.
Tau Lava o le Aau Pea
Ao talavou le ma tama teine e toatasi, o Lindsay, ma te fiafia lava e matamata faatasi i ata tifaga. O se tasi o ata ma te fiafia i ai ma matamata faatasi i le tele o taimi o se ata tifaga ua ta’ua o le Sailia o Nimo. I le ata tifaga, na pueina Nimo e se tagata maulu ma faaiu ai i le tane e tuu ai i’a i le ofisa a se fomai nifo. Na naunau lava lona tama, o Marlin, e saili Nimo. Na fetaui Marlin ma se i’a e igoa ia Dory i le aluga o lana malaga. Sa la feagai ma lea faafitauli ma lea faafitauli ao la taumafai e sue Nemo. Pe tele pe laitiiti le faafitauli, e tasi lava le savali a Dory ia Marlin: “Tau lava o le aau pea.”
O ni nai tausaga mulimuli ane sa faamisiona ai Lindsay i Santiago, Chile. E faigata ia misiona. E tele faanoanoaga. I vaiaso taitasi i le faaiuga o a’u imeli sa ou tusia ai, “Tau lava o le aau pea. Alofaaga, o Tama.”
Ina ua maitaga Lindsay i lana tama lona lua, sa ia iloa ai o lana pepe e lei fanau mai e i ai se pu i lona fatu ma e le atoatoa le malosi o lona mafaufau [Down syndrome]. Ao ou tusi atu ia i te ia i lenei vaitaimi sili ona faigata, sa ou tapunia au imeli faapea, “Tau lava o le aau pea.”
E oo mai faafitauli i o tatou olaga taitoatasi, ae ina ia mafai ona faatoilaloina ma oo atu ai i le mea e te fia alu i ai, e tatau ona tatou aau pea.
O se tasi o fuaitau o mau ou te fiafia lava i ai o le vaega e 121 o le Mataupu Faavae ma Feagaiga. O se fuaitau matagofie lea e oo ai le Perofeta o Iosefa Samita i le loloto o le faanoanoa ma ea ae ai i mea maualuluga faaselesitila. O lenei vaega ma vaega e 122 ma le 123 e sau mai se tusi na tusia e Iosefa i le Ekalesia. Ina ia malamalama atili i nei faaaliga maoae, e tatau ona tatou tuuina i le talaaga sao.
Na faapagotaiina ia Iosefa ma ni ona soa i le falepuipui i Lipereti, Misuri, mai ia Tesema 1838 seia oo ia Aperila 1839. Sa leai se ea mafanafana o le falepuipui, ma sa tau le mafai ona aiina meaai. Sa tuuina i latou i le potu i lalo o le fale ma le fola palapala ma le taualuga matua maualalo lava sa tau le mafai ona tu sao i luga. I lena lava taimi, na tutuliesea ai le Au Paia mai o latou fale. I le lotolotoi o lenei vevesiga, na tuuina mai ai e Kovana Lilburn W. Boggs lana faatonuga faaumatia.
Na aioi atu ai Iosefa, “Le Atua e, o fea o i ai oe? Ma o fea o i ai le faapaologa ua ufi ai lou afioaga lafi?” (MF&F 121:1). O le Iosefa Samita lava lea e tasi lea sa oo mai i ai ni asiasiga faalelagi mai le Atua le Tama; Iesu Keriso; Moronae; Ioane le Papatiso; Peteru, Iakopo ma Ioane; ma isi. E lei leva ona tuuina atu ana fesili i fuaiupu muamua, ae faaalia loa e Iosefa lona le fiafia:
“Ia tuu atu lou toasa e faamumū e faasaga i o matou fili; ma, ia e tauimasui i matou i le toasa tele o lou finagalo ma lau pelu, mo sese ua faia ia te i matou.
“Ia manatua lau au paia mafatia, lo matou Atua e; ma o le a olioli ai au auauna i lou suafa e faavavau” (fuaiupu e 5–6).
Na tali mai le Alii i le faagaulemalie atu a Iosefa i le faapea mai, “Lo’u atalii e, ia filemu lou agaga; o lou tiga ma ou puapuaga o le a nao sina minute laitiiti” (fuaiupu e 7).
Ona Ia aoao mai lea ia Iosefa o se mataupu faavae matagofie: “Ma ona oo lea, afai e te talitalia lelei, o le a faaeaina oe e le Atua i luga; o le a e manumalo i ou fili uma” (fuaiupu e 8).
O le savali e tuusao ma pupuu. E le tatau ona tatou faamoemoe i le Alii e aveese o tatou luitau ona ua tatou folafola atu ia te Ia o le a tatou faamaoni i taimi uma pe afai Na te faia. Nai lo lena, ia tatou tumau ma le lelei, ona faamanuiaina ai lea o i tatou. O se lesona matagofie lena o le olaga mo i tatou taitoatasi.
E tele isi aoaoga o loo tuuina mai i le fuaiupu e 10, lea na ta’u mai ai e le Alii ia Iosefa, “E lei avea lava oe e pei o Iopu; e le o finau au uo faasaga mai ia te oe, pe tuuai oe i se solitulafono, e pei ona latou faia ia Iopu.” E ui lava i le tele o mea na puapuagatia ai Iopu, tatou te aoao, “Na afio ifo le Atalii o le Tagata i lalo o i latou uma. Ua sili atu ea oe ia te ia?” (MF&F 122:8).
Vaega 122 e faaatoatoaina le vaega e 121. Ou te faaigoaina o le vaega afai. O le upu afai e faa 15 ona faaalia mai.Mo se faataitaiga, fai mai le fuaiupu e lima, “Afai e valaaulia oe e te ala atu i puapuaga; afai e faalavelavea oe i totonu o uso pepelo; afai e faalavelavea oe i totonu o faomea; afai e faalavelavea oe i le laueleele po o le sami” (MF&F 122:5; faaopoopo le faamamafa).
Afai tatou te suia na luitau mo luitau o loo feagai ma i tatou i le lalolagi i nei ona po, atonu e mafai ona tatou aoaoina se mea, e pei o le afai o i ai se maliu i lo’u aiga po o le afai na tiai au e la’u uo tama po o le uo teine po o le afai e i ai ni au avega tautupe po o le afai e sili atu lou atamai.
Ina ua mavae na afai, ua fetalai mai le Alii, “Ia e iloa, lo’u atalii e [po o le afafine], o nei mea uma e te maua ai le poto masani, ma o le a avea mo ou lelei” (fuaiupu e 7). I se isi faaupuga, o luitau o tatou mauaina i le olaga e matua aoga lava ma e taua foi.
“O lea, le au uso pele e, ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai” (MFF 123:17).
Ua tumu le olaga i faafitauli, o nisi e foliga mai ua matua faigata lava. E tatau ona tatou onosaiina ma le fiafia ma le faamaoni. O le faia faapea, o le a iu ina tatou toe foi atu ai ma nonofo faatasi ma le Atua i le faavavau.
O Le Faataitaiga a le Faaola
O le faataitaiga silisili ua tatou maua e faatatau i le tumau ai, o le soifuaga lea o le Faaola. E manaomia e le Togiola Lona afio ifo i lalo o mea uma, ma ofoina atu Lona soifuaga atoatoa mo i tatou. O le afio ifo i lalo o mea uma, na Ia puapuagatia ai mo faafitauli ma agasala uma o le olaga, “o le mafatia lea na oo ai ia te au lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (MF&F 19:18).
Sa silafia e Iesu mea na manaomia mai ia te Ia, ma sa Ia fetalai mai i se ala sili faaletagata, “Lo’u Tama e, afai e mafai, ia ave ese lenei ipu ia te au; a e aua le faia lo’u loto, a o lou finagalo” (Mataio 26:39). Ae ui i lea, sa Ia naunau e faia le finagalo o Lona Tama ma onosai i mea uma.
O Le Mea e Avea ai i Tatou e Faia ai le Eseesega
O lau pisinisi o i ai nei na faavaeina e lou tama i le toeitiiti atoa le 60 tausaga talu ai. Sa maliu o ia i le 1980, ae tuua au e faafoeina le kamupani i le 30 o ou tausaga.
I na tausaga popofou, na tulai ane ai ni tulaga lea na manaomia ai au e faia ni faaiuga e aafia ai le lumanai o la matou pisinisi vaivai. Sa ou galue malosi e galue e pei o lou tama, ma sa ou faaaluina se taimi tele i ou tulivae, e taumafai ai ina ia iloatino le mea e fai. I na filifiliga uma, ou te le’i lagonaina se uunaiga o le toafilemu po o soo se itu o se auala se tasi po o se isi. Na iu lava ina ou faia se mea sa ou manatu sa sili ona lelei ma agai i luma. Ae sa ou le fiafia e lei mafai ona ou mauaina se faamautinoaga o au faatinoga.
I se tasi po na oo mai ai lo’u tama ia te au i se miti. Sa amata ona ou faitio ia te ia mo le le fesoasoani mai ia te au ina ia iloa le mea e fai. Sa fai mai o ia sa ia nofouta i lo’u tulaga ae sa pisi i le mea sa i ai ma e lei taua tele lana pisinisi lea sa i ai muamua. “Chris, matou te le popole tele i le pisinisi iinei,” o lana tala lea. “O le mea matou te matuai popole ai lava o le mea e avea ai oe ona o lau pisinisi.”
O se lesona maoae lea ou te faamoemoe o le a le galo lava ia te au. O le mea tatou te mauaina i le faagasologa o tatou olaga e le taua, ae o le mea o le a avea ai i tatou i le olaga e matua tele lava se eseesega.
O nisi taimi e galo ai ia i tatou o le muai olaga na tatou tau ai faatasi ma le Faaola i le puipuiga o le fuafuaga o le faitalia tatau a le Tama. Ma sa tatou manumalo ai! Na tutuli ese Lusifelo ma ana au, ma tatou maua le avanoa e iloa ai le ola o tatou tauivi i ai. O le fuafuaga a le Tama o loo aofia ai le Togiola. O la tatou galuega o le fetaiai ai ma o tatou luitau ma onosaia lelei. A o tatou faia lenei mea, o le a i ai le uiga o le Togiola i o tatou olaga ma tatou faataunuuina le galuega ma le mamalu a le Alii ma le mamalu: “ia aumaia le tino ola pea ma le ola faavavau o le tagata” (Mose 1:39).
Ou te molimau atu o Iesu o le Keriso. O Ia o le Faaola o le lalolagi. O Ia o le Alii o le Filemu ma lo tatou Puluvaga i le Tama. Ou te molimau atu e silafia e le Tama i tatou i o tatou igoa, alofa ia i tatou e ui lava i o tatou le atoatoa, ma o le a saunia se nofoaga mo i tatou pe afai tatou te faamaoni ma tumau e oo i le iuga.
Ata mai Photodisc/Thinkstock