Leo o le Autalavou: Faamanuiaga o Talafaasolopito o Aiga

Na valaaulia talu ai nei le autalavou mai Niu Ioka, ISA, e le latou au peresitene o le siteki e saili se igoa o le aiga e ave i le malumalu o se vaega o le konafesi faapitoa a le autalavou. Sa latou maua ni faamanuiaga silisili a o latou lagona le liliu atu o latou loto i o latou tama (tagai i le Malaki 4: 5–6).

Aveina o Igoa o Aiga i le Malumalu

• “Sa masani ona ou mafaufau o le talafaasolopito o aiga o se isi lava mea e siaki, ae o le taimi nei ua ou iloaina o ni tagatamoni lava i latou o e ua tausagā ona faatalitali. O ou aafiaga o le malumalu e ese lava pe a ou aveina igoa o aiga. Ou te manatu ona o le galue malosi, taimi, ma tatalo sa alu i le sailia o se igoa e tasi. Ae o se igoa e tasi e matuai aoga lava aua o lena tagata e toatasi o loo manaomia le faatasi ai ma le Tama oi le Lagi.” —Hana A., 13 tausaga

• “A uma ona e mauaina se tagata, e amata ona e fesootai ma lena tagata i le lalolagi o agaga. O le aumaia o a oe lava igoa o se auala lea e faamalolosia ai lenei sootaga. E fesoasoani ia te oe e malamalama ai i lou aiga e faavavau.” —Spencer S., 15 tausaga

• “O le aumaia o igoa o aiga i le malumalu e fesoasoani ia te oe e iloa ai le moni po o ai nei tagata. E le na o i latou o ni igoa i luga o se fasi pepa; o i latou o ni uso ma ni tuafafine moni lava o e faasoaina lou talafaasolopito—ma o se vaega o i ai.” —Lilli N., 16 tausaga

Mauaina o Faamanuiaga

• “Ua ou matauina se eseesega i lo’u olaga. O se lagona mafanafana ma le saogalemu.” —Noah R., 13 tausaga

• “E te lagonaina i lou loto o oe o se vaega o se galuega e sili atu. O le tuuina atu i lou aiga le avanoa e maua ai faamanuiaga o le malumalu o se lagona e le mafaatusalia.” —Corinne C., 17 tausaga

• “Ua sili atu lou lagona o le mafanafana ma le toafilemu talu ona amata ona ou faia le talafaasolopito o aiga. Pe a ou ave igoa o aiga i le malumalu, e aumaia ai ia te au se lagona o le olioli.” —Tyler M., 16 tausaga

• “Ua faateleina ai lo’u alofa mo le Faaola, Tama Faalelagi, ma o’u tuaa. Ua fesoasoani ia te au e latalata atili ai i lo’u aiga patino ma faateleina ai lau molimau o le talalelei.” —Alexandra H., 14 tausaga

• “Ua matuai ou fiafia lava.” —Ross S., 12 tausaga

• “Faatasi ai ma igoa taitasi, ua ou lagonaina se lagona o le filemu ma le fiafia, e pei na faatalitali mai le tagata mo na o au lava.” —Rhiannon B., 15 tausaga

• “Ou te iloa le mea na ou sau mai ai, ma ua faatupulaia lou talitonuga.” —Eliza L., 13 tausaga

• “Ua faaitiitia lou finau i totonu o lo’u aiga.” —Gehrig L., 12 tausaga

• “Ua atili faateleina lou malamalama i le taua o aiga. Ou te fia faalatalata atili i lo’u aiga i le lalolagi.” —Emma L., 15 tausaga

• “Ua fesoasoani ia te au ia malamalama atili i le fuafuaga a le Atua mo i tatou. Ou te lagona le latalata atili atu i le Tama Faalelagi ma le talalelei aua ua ou malamalama lelei atili i sauniga ia o loo faatinoina.” —Noah C., 14 tausaga