2014
O Le Malaga a Mamá Sefi i le Malumalu
Ianuari 2014

O Le Malaga a Mamá Sefi i le Malumalu

Betty Ventura, Iuta, ISA

I se tasi aso ao ou i ai le ofisa o le Misiona a Mekisiko i le vaitau o le 1940, na taunuu atu ai se tuafafine mai le tamai taulaga o Ozumba, o se taulaga e tu i le tausiusiuga o Popocatépetl, o se mauga mu ola pe a ma le 43 maila (70 km) i sautesasae o le Aai o Mekisiko. Matou te iloaina uma lava o ia. O lona igoa o Mamá Sefi.

E nonofo faifeautalai faamisiona i lona taimi fale e fai i piliki mai le palapala ma vaovao, lea na te teuina ai se potu mo nao i latou. O Mamá Sefi, e le atoa le lima futu (1.5 m) o le maualuga, e maua ana tupe i le faatauina atu o fualaau aina suamalie i maketi i alalafaga i totonu o Ozumba. E tofu le alalafaga ma se aso o le maketi, ma e malaga o ia i maketi taitasi e faatauina atu ana fualaau aina suamalie.

Sa malaga mai o ia i le ofisa o le misiona i lena aso o afisiina se taga falaoamata tele. Sa tumu i tostones, o afa-peso siliva lea na ia sefeina i le tele o tausaga. O nisi o tupe siliva e mai le vaitaimi o Porfirio Díaz, lea sa pulea Mekisiko mai le 1884 e oo i le 1911. O Mamá Sefi na malaga mai le pasi ma lana taga tupe mai Ozumba i le fale o le misiona. Sa ia tauina atu ia Peresitene Arwell L. Pierce sa ia sefeina le tupe mo le tele o tausaga ina ia mafai ona ia malaga atu i le Malumalu o Sate Leki ia maua ona faaeega paia.

Sa ia mauaina se faatagaga e tuua le atunuu, sa nonoina atu e se faifeautalai se atopau ia te ia, ma sa matou momoliina o ia i le nofoaafi. Sa telefoni atu Peresitene Pierce i se tagata i El Paso, Texas, e faatali le nofoaafi i leisi itu o le tuaoi o le I.S. ma faaee ia Mamá Sefi i luga o se pasi mo le Aai o Sate Leki. Sa faatalia e ni tagata o le paranesi faa-Sipaniolo i le Aai o Sate Leki le pasi, vaaia manaoga o lona fale, ma fesoasoani ia te ia i le malumalu.

I ni nai vaiaso mulimuli ane, na toe foi atu ai Mamá Sefi i le Aai o Mekisiko atoa ai ma lona aiga i Ozumba. Sa ia faia le malaga umi ma le saogalemu. Ona ia toe faaauau lea o le faatauina atu o fualaau aina suamalie i maketi.

E le tautala Mamá Sefi i le gagana Peretania, ma o lea sa matou fesiligia ai o ia pe na faapefea ona ia okaina ia meaai ao malaga i le pasi mai El Paso i le Aai o Sate Leki—o se malaga e tele ni aso. Sa ia fai mai sa aoaoina o ia e se tasi i le tauina o le “pai apu” i le faaPeretania, ma o taimi uma lava e tu ai le pasi mo taumafataga, na te okaina le pai apu.

Talu ai ona e pau na o upu sa ia iloaina i le faaPeretania, sa ia ola i le pai apu i le taimi o lana malaga i le pasi i le itu o setete—i le aluga ma le toe foi mai. Ae e lei afaina lea mea ia Mamá Sefi. Nai lo lena, sa toe foi mai o ia ma le agaga faafetai ma le susulu mai lona aafiaga i le malumalu.